2 Corintios 4
4
Jiwunitieye ti 'es pa Sinia'
1Tempi it'imina ti jla'm ani'netiejli, kajeyepa ti kasts'ajane pa awonaja ni jikap'ijliuskiye iyo ni Sinia' ti yikialts'e siunie sikijmaye iyo. 2'Yina je awoki siuniwa wask'i'nelaja ti taka'ajwejlasajne'n, siuniwa tijwekie ti je isis, ti je niwaka Sinia' jlamtis kanjwe'el. 'Wenajliyi jla'am siunie awoki samtikie', naka ni siunie ti ijiatk'i, je ajwekie. Jak je iyoyiji napo i'nio' jla'yi pa Sinia' jan'we'en ti ijiate ti je awok'iate siunapo i'nio' jiniliaja ti lajk'iyi paka iwoyisi, 'yina sa'm ijiatayi wek sa'am. 3Siuti japoye siunapo i'nio' ti ijwi'il ka je 'nakajk'i siunie iyo ti awok samtikie', ajwel'ni jla'm ijiate wek jla'am siunapo ijioyi jana 'najlati ti janetiane ti kia' iyoyisi, kajeyepa ti po' siunie ti ip'io'n ape'e ni jlosik. 4'Yina 'yakakiuyis, siunie ajnat jinia' iyojwa'n talojoye siuniwa iyo niwa jlosikis, ti iyo ka je i'we'en ki iyo ni jla'al ti ijiate ti 'esi, naka inka'niye ti 'es, ti ijwi'il ni jijweye ni Sijwajieti ti jla'am ti Sinia' jipe'el. 5Siuti awok samtikie', je sam'ne ka inijwela, 'wenajliyi jla'am ti ajwela pa Sijwajieti Jesús ti jla'am ti Saka'niona. Siuti sa'am ani'wenkina'ase'm ti akawosts'e'm, lapakawo ti yimijnaye e'ne ni Jesús. 6'Yina je 'wena siunie Sinia' ti iyot'ipi 'ate, “'Esiji ka nak intajla'm ni jloma ni siunie ajnatiok”,#Gén 1.3 naka 'neje ti jloma yijnits'i niwa sosikis, 'nakayi ti ja jatiant'iekiejeniti ni siunie k'iejliyi ni jijweye ti ijiate ti 'es, ti jla'al itie'e ni Sijwajieti jitiokio'.
Jimoliyis napo i'nio' jla'yi ni Sinia' jijweye
7Siunie ijiate ti laja po', naka ni ajwel'ni ti Sinia' jla'am kiak iyonts'e, ti je kast'o'n, awok'iate niwa i'niat jijwa'al ti isatis. 'Yina nak 'yakajanit ti jla'am pa Sinia' ti tajle nak injweye ti je jlase', je ka sama ka intalts'e. 8Jak je iyoyiji 'wanjliyi ka insta' pa si'niayija', 'yina ajwayeje. 'Wanjliyi ka sijliak'ali poye, 'yina je kaskiwaliyi'i ni sinijijwiye ti po'. 9'Wanjliyi ka jiwak inents'e'm napo i'nio' ti teje selia'm, 'yina lapakawo ti po' siunie i'nio' ti je talts'e'm. Kassajak'ni ajnatk'i, 'yina je kasnetiajnat jiwek. 10Ti pak jajioki, siupi jiliaye iyot'iyipi pa Jesús ti tiliana nak atejliaki'n, ja 'nakayeyi pet siojona ji'wasankiye janikajanit pet ti jane siwa'm. 11Siuti sa'am ti kas'wasajne'n ti akiniek'i pa Jesús, naka ti kassekiajlaja siunie siliaye ti kaslanaja'n, kajeyepa ti ja 'nakayeyijna'a pet ti kiak jawo jana ji'wasankiye jankaj pet siwa'm, ti janejyi'ni siunie ts'isie'n ti je t'o'n. 12'Yina kiak jikijmaye iyo nak inlaye ti yits'e, 'yina jla'am ti asa'am siunie jikijmaye siunie naka ti as'wasankiye pet.
13Po' siuniwa inamtis ti yi'i ni ji'wet ti iyo'ate, “Lapakawo ti itienkiujnieye ti it'imina ti awo yamtikie'.”#Sal 116.10 'Yina siuti sa'am kiak awoki, sitienkiujnieye po' it'imina ti awok samtikie' pet. 14Kajeyepa ti kasts'ajane pa awonaja ti paka Sinia' ti iniujwa'n kisie'e pi Jesús ti itiajlajni pi a'no', sek jane'yi ti si'niayi injwanjliyena'a ti ja kassokiji pa Sijwajieti. 15'Yina ti jlam kiak iyoyi, 'nakayeyi ti ja insisieyi ni iyo ni iwit'ia. Jak je iyoyi siuti kia'iyo ti je jlase' siunie iyo ni Sinia' jikap'ijliuskiye, ja ke piniye napo i'nio' ti jinikanitieyi janwene pi Sinia', siu'neje ti janwunitis.
Jla'm akiniejliyi wek siunie sitienkiujnieye ti 'es ti ena'a, ti je a'wenajli'ijyi pa Saka'niona
16Jak je iyoyiji ka ijliasataja isia'm siu'nie awoki, jla'm ani'netiejlik'i. Ijiatata wek 'ni ts'isie'n ti iyo 'yusieja', 'yina siuniwa sosikis yamjli pet niwa jlomas ti yapi jwemik'i. 17'Naka siunie sijliak'ali iyo, je 'esieta jayi, jak je iyoyiji ta'a ti yam'niji. 'Yina lapakawo ti iwints'e'm siunie siwunitieye pet ti laj jlaja, jla'yi ti 'yaka'm ape'e naka. 18'Yina ti je a'yena siuniwa wask'i'nelaja 'yaka, a'yena siuniwa je 'yaka. Kajeyepa siuniwa wask'i'nelaja 'yaka ji'niayi je itio'yi, jlampet siuniwa je 'yaka niwak ijiate pet ti t'o'n.
Currently Selected:
2 Corintios 4: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.