Malakyas 2
2
Ti Parusa sa Balaw Matinupadun pag manga Manug-asiwa
1-2Magkun waya ti Panginuun Makamaskihan sa manga manughandug, “Imaw inda kang pasandam sa kanyu: Nu balaw niyu patingihan ti pagsabihun niku, ag balaw niyu pahalgahan ti pagdayaw sa kangku, saadan niku kamu hanggan ti manga papalad kanyu pagtanggapun bilang manga manughandug. Sa tutuu lang, binwat yi niku inda dahil unman niyu pagpahalagahan ti pagdayaw sa kangku.
3“Pagpatingi kamu! Dahil sa kanyu, parusahan niku kanyu manga linahi. Ag itaplak niku sa kanyu manga uyahun ti ugat manga hayup kanyu ihinandug, ag iyamut diman kamu sa rayamtan manga ugat. 4Kailangan maalaman niyu, pagpaandaman niku kamu katida hampay pumarargu kang kasunduan sa kanyu ginurang sa kan Libi. 5Kang kasunduan sa kan Libi, tinaratuhan niku siya buhi ag kahusayan, basta galangun niya aku. Ag pag-igalang ngani niya aku. 6Itinudlu niya ti katutuuhanan ag balaw ti kapudilan. Mayad kay magsunud sa kangku ag matadlung kay buhi. Ag mayamu pag manga tawu kay inawatan hampay balaw yi makabuwat kasalanan.
7“Sa tutuu lang, kamu ti manga manughandug, katungkulan niyu ti magtudlu sa manga tawu hampay maalaman nida ti tungkul sa kangku. Ag kailangan diman magpatudlu sida sa kanyu dahil kamu kang manga manugbarita. 8Dapat nagsimray kamu sa matadlung pag dalan. Kanyu manga tudlu imaw ti nagpaturun sa mayamu tawu sa pagbuwat kasalanan. Aku, ti Panginuun Makamaskihan, magkumun linabag niyu kang kasunduan sa kanyu ginurang sa kan Libi. 9Nakan pinahintulutan niku puyaan kamu ag pakay-ahun tanan tawu dahil unman niyu sinunud kang manga palakaw ag may pagkilingan waya kamu sa kanyu manga magtudlu.”
Balaw Matinupadun ti manga Israilita
10Magkun si Malakyas sa manga Israilita, “Kabay kita tanan may usa lang ka ama? Unman aw usa lang ka Diyus ti naglalang sa kanta? Hayga bati nandarayaan kita sa usa kag sa usa? Sa inda pag binwat nita, pagduraun nita ti taratu Diyus sa kanta manga ginurang.
11“Namudil ti manga taga Huda; namuwat sida manga mayagting pag buruwatun sa Hirusalim ag sa buu nasyun Israil. Dahil inuringan nida ti pagmahalun Panginuun pag Balay Diyus,#2:11 Balay Diyus: ngatay, pinili pag nasakupan. sa panab-anan pag-asawa manga lalaki sa manga babayi magsamba sa tuhay pag manga diyus. 12Mana ti magbuwat katida pag tawu balaw yi iminsan sa nasakupan Israil, kaibahan yi kay manga anak ag manga laki, una manhandug waya siya sa Panginuun Makamaskihan.
13“Inda waya gid kanyu pagbuwatun: Magpakalumi kamu mabaskug sa harandugan Panginuun dahil balaw yi niya pagpansinun ngatay pagbayaun kanyu manga handug. 14Magpaingana kamu nu hayga udyi niya pagpansinun kanyu manga handug. Dahil maghiling ti Panginuun nandaya kamu sa kanyu asawa, kanyu pinaminsanan katpung kan-akan waya kamu. Linabag niyu kanyu kasunduan sa kanyu asawa, balaw kamu matinupadun sa kanda. 15Balaw aw lugud pinagkarausa yi kamu Panginuun sa bilug hanggan sa ispiritu hampay kanya yi kamu? Hayga mininsan niya kamu? Dahil gustu niya magkaanak kamu manga matinupadun sa Diyus. Nakan pihua gid niyu unman niyu dayaun kanyu asawa kanyu pinaminsanan sa katpung kan-akan waya kamu. 16Dahil magkun ti Panginuun, ti Diyus Israil, ‘Balaw niku gustu magtarayakan ti mag-asawa. Nu tayakan asawa lalaki kay asawa babayi, pag-unuunuhun niya siya.’
“Nakan pihua gid niyu unman niyu dayaun kanyu asawa babayi.”
Ti Sirang Pagparusa Diyus
17Magkun waya gid si Malakyas sa manga Israilita, “Magbugya yi ti Panginuun sa kanyu manga pagbagawun. Dapat magpaingana waya kamu, ‘Hayga, unu kanmi pagbagawun nakan magbugya yi siya?’ Magbagaw kamu ti tanan magbuwat daut mayad sa magbantay Panginuun ag magbaya siya sa kanda. Magpuya waya kamu magkun, ‘Naan yi ti Diyus katadlungan?’ ”
Currently Selected:
Malakyas 2: HNN
Highlight
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines
