Malakyas 1
1
1Inda ti bagaw Panginuun para sa manga taga Israil sa panab-anan ni Malakyas.
Pagmahalun Panginuun ti manga Israilita
2Magkun ti Panginuun, “Pagmahalun niku kamu. Dapat magpaingana waya kamu, ‘Kabitay nimu kami kamahal?’ Isipa niyu una magtar-ari sida ni Isaw ni Hakub, pagmahalun#1:2 pagmahalun: ngatay, pinili. niku si Hakub 3dapat si Isaw unman. Dinaut niku kay manga kabantudan, nakan nagbaliw lang inda ulian manga simarun idu.
4“Nu sumabi ti manga Idumita,#1:4 manga Idumita: ngatay, manga linahi ni Isaw. ‘Una dinaut kanmi rugar ipatindug di maan nimi inda.’ Aku, ti Panginuun Makamaskihan, magkun: Una ipatindug waya maan nida kanda rugar, dautun di gid niku inda. Ingarnan sida ‘daut pag nasyun’ ag ‘manga nasakupan pirmi pagkagalitan Panginuun.’ 5Makitan gid niyu kanda kadamhakan ag sumabi kamu, ‘Makamaskihan ti Panginuun una sa luwas Israil.’ ”
Tinamyaw Panginuun ti manga Manug-asiwa
6Magkun sa manga manughandug ti Panginuun Makamaskihan, “Pag-igalang anak kay ama ag pag-igalang suruguun kay amu. Dapat bati aku kanyu ama ag amu unman niyu pag-igalang? Paglabagun waya niyu aku, bag-u magkun kamu, ‘Kabitay nimi kawu pag linabag?’ 7Linabag niyu aku sa panab-anan pagsagda mayagting#1:7 mayagting: Kay ibug sabihun, balaw mahimu ihandug sa Diyus. pag handug sa kang harandugan. Dapat magpaingana waya kamu, ‘Kabitay nagbaliw mayagting kanmi handug?’ Inuringan niyu kanyu manga handug sa panab-anan pagsabi unman may pulus kang harandugan. 8Nakan ngani maghandug kamu sa kangku manga hayup buta, pilay, ngatay may sakit. Balaw tida mayad! Subuki lang niyu ayawi kanyu gubirnadur katida pag kalasi manga hayup. Pihu gid balaw siya makabaya sa kanyu ag balaw niya kamu pakakitan kaayadan.” Inda ti pagsabihun Panginuun Makamaskihan.
9Magkun si Malakyas, “Taynguna, kamu pag manga manughandug, hagadun niyu sa Diyus kaawai niya kita. Dapat sa katida pag manga kalasi handug kanyu pag-isagda sa kanya, pihu gid balaw niya kamu bayaun. Imaw inda ti pagsabihun Panginuun Makamaskihan.”
10Magkun ti Panginuun Makamaskihan, “Mana may usa sa kanyu sa manga manughandug ti tumalakup sa manga sabian niku Balay, hampay balaw yi kamu magpamakut unman may pulus pag apuy sa kang harandugan. Balaw niku tanggapun kanyu manga handug, dahil balaw aku magbaya sa kanyu. 11Sa kay tutuu, pagdayawun manga nasyun kang ngaran, ginan sa butlakan tugka sa isalpan. Una naan pag rugar magtuub ti manga tawu kamangyan ag maghandug malumpiyu#1:11 malumpiyu: Kay ibug sabihun, mahimu ihandug sa Diyus. pag manga handug sa kangku. 12Dapat kamu, pagpakay-ahun niyu kang ngaran magkumun kamu mauring kang harandugan ag unman may pulus ti manga pag-isagda ati. 13Magkun waya kamu magsuku yi kamu sa kanyu maghandug sa kangku, ag pag-ipasipala niyu kang harandugan.#1:13 kang harandugan: ngatay, aku. Nakan maaw pagsagdahan niyu aku manga hayup may garis,#1:13 may garis: ngatay, tinakaw. pilay ngatay may sakit. Kanyu aw isip tanggapun niku tunda? 14Saadan niku ti magdaya, madi may taratu manhandug kay mayad pag hayup dapat kay ihinandug sa kangku balaw mayad. Saadan niku siya dahil aku ti makamaskihan pag hari ag paggalangun aku manga nasyun. Aku, ti Panginuun Makamaskihan, ti magbagaw inda.”
Currently Selected:
Malakyas 1: HNN
Highlight
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines
