Gimpuunan 49

Pinapaladan ni Hakub Kay manga Anak

1Pagkatapus, tinawag ni Hakub kay manga anak ag magkun, “Pagpakarani kamu dahil sabihun niku sa kanyu nu hintay ti mangyari sa kanyu sa aratubangun pag panahun.

2“Manga anak, pagpakarani kamu ag pagpatingi sa kangku sa kanyu ama.

3“Kawu Rubin, kang panganay pag anak, kawu ti un-an pag burak niku pagkalalaki. Bantug kawu ag makapangyarihan kaysa kanmu manga patar-ari. 4Dapat parihu kawu sa magkulkulu danum, dahil unman kawu makapigil sa kanmu pagkaibgan. Ag dahil nangulid kawu sa kang suruguun pag asawa ag ipinakay-a nimu aku, balaw yi kawu lumamang sa iba.

5“Kamu, Simyun ag Libi magkakampi, paggamitun niyu kanyu armas sa pagmatay. 6Balaw aku umiba ngatay makiusa sa kanyu pagtiripun dahil magmatay kamu tawu nu magkagalit kamu, ag pagpilayan niyu ti manga tudu nu pagkaibgan niyu. 7Saadan kamu dahil sa kanyu masyadu pag pangagalit. Wayakun niku ag ikalat kanyu manga lahi sa buu Israil.

8“Kawu Huda, dayawun kawu ag igalang nimu manga patar-ari. Taluhun nimu kanmu manga kalaban. 9Parihu kawu sa anak liyun igu nakasayab magbalik maan sa kay ulian ag ati pag magpahari. Ag unman may pumanghas bumalag sa kanya. 10Parargu kawu magpangulu, Huda. Ginan sa kanmu linahi ti bumaliw manga takinan. Nakan pumakaun buhis sa kanmu ti manga nasyun ag sumunud sa kanmu. 11Bumaliw abunda kanmu daga, nakan una ihigut nimu kanmu asnu sa may arani pinakamarinu pag tanum ubas, balaw niya inda kan-un. Ag una ipipi waya ti pin-gis ubas, balaw kawu matabwan. 12Nakan dahil sa abunda pag pin-gis ubas, kumislap kanmu manga mata ag sa abunda pag gatas lalu waya lumagti kanmu ngipun.

13“Kawu Sabulun, mangulian kawu sa baybay dagat. Kanmu daga ti punduhan manga sarakyan pandagat. Kanmu daga aput tugka sa Sidun.

14“Kawu Isakar, parihu kawu sa mabaskug pag asnu magpahari sa ulian manga karanidu.#49:14 mabaskug ... karanidu: ngatay, asnu punu baba malukuban. 15Agwantahun nimu magpakumbaba bilang suruguun una waya papas-anun kawu mabuyat ag patarabahuun sapilitan, basta mayad lang ag abunda ti ulianan nimu pag daga.

16“Kawu Dan, panguluhan nimu mayad kanmu manga tawuhan bilang usa sa manga linahi Israil. 17Kawu parihu sa ulay may dalit sa saruy dalan magsang-ab lulud kabayu maglawuy, nakan magkalagpak ti manga masakyan siyun.”

18Pagkatapus, magkun si Hakub, “Panginuun, mag-alagad duy aku sa kanmu pagribri.” 19Nagparargu waya siya sa kay magbagaw,

“Kawu Gad, girahun kawu gurupu manga tulisan, dapat balusan nimu sida habang magpalagiw sida.

20“Kawu Asir, umabunda kawu sa karan-unun. Umani kawu manga karan-unun para sa manga hari.

21“Kawu Niptali, parihu kawu sa pinalpasan karasyaw mag-anak mararinu.

22“Kawu Husi, parihu kawu sa maila pag asnu sa saruy bulbugan ngatay sa saruy yangpas.#49:22 Kawu Husi ... yangpas: ngatay, Kawu Husi, parihu kawu sa halaman arani sa bulbugan, magyapang sa may alad batu. 23Kasamukan kawu manga manugpana. Sa kanda pangagalit panaun nida kawu, 24dapat pirmi diman nimu sida panaun. Ag kanmu takyay parargu di gid mabaskug, dahil sa awat Diyus Makamaskihan, ti manug-alaga ag darangpan pag batu Israil. 25Siya ti Makamaskihan pag Diyus niyu manga ginurang, ti mag-awat ag magpapalad sa kanmu. Papaladan niya kawu uran ag danum sa manga bulbugan. Ag pakan-an niya kawu mayamu pag anak hanggan hayup. 26Mayamu aku papalad, subra waya sa kaabundahan kaybi manga sinauna pag kabantudan. Mana matanggap nimu inda pag manga papalad, Husi — kawu ti mas higit kaysa kanmu manga patar-ari.

27“Kawu Binhamin, parihu kawu sa simarun idu magtukub kay bulay sa surip hampay kan-un, ag sa yabi paghuray-hurayun kay sawad.”

28Sida ti 12 ka anak ni Hakub ti gimpuunan manga linahi Israil. Ag tunda ngani kay sinabi ni Hakub sa kada usa sa kanda. Pinapaladan niya sida angay sa papalad para sa kanda.

Ti Kamatayan ni Hakub

29Pagkatapus, magkun si Hakub sa kay manga anak, “Taynguna, balaw yi dugay ag makaibahan yi niku kang manga katawuhan namatay. Nu mangyari yi inda, lubngan niyu aku sa lulubngan niku manga ginurang, ati sa lukib sa may tanman ni Iprun usa ka Hitiyu. 30Tunda pag tanman ati sa Makpila, sa butlakan Mamri baliwa, sakup Kanaan. Binili niku laki ni Abraham tunda pag tanman sa kan Iprun hampay buwatun kalubngan. 31Ati siya pag ilinbung hanggan kay asawa si Sara ag kang manga gurang sida ni Isaak ni Ribika, bag-u ati diman niku pag ilinbung si Liya. 32Ti tanman ag ti lukib binili niku sa manga Hitiyu.”

33Pagka natapus kay pagsabihun ni Hakub sa kay manga anak, napahuway siya ag naugtasan arup. Ag imininsan siya sa kay manga katawuhan namatay yi.

Currently Selected:

Gimpuunan 49: HNN

Highlight

Copy