Gimpuunan 48

Si Manasis ag si Ipraim

1Balaw dugay, may nagbarita sa kan Husi kuntay may sakit kay ama. Nakan tinaban niya kay duwa ka anak sida ni Manasis ni Ipraim bag-u nag-ati sa kan Hakub. 2Pagka naalaman ni Hakub rinmas-ug kay anak si Husi, sinikap niya makatukaw sa kay igyaan. 3Magkun si Hakub sa kan Husi, “Katpung ati di waya aku sa Lus, sa daga Kanaan, napakakit sa kangku ti Makamaskihan pag Diyus ag pinapaladan niya aku. 4Magkun siya, ‘Pakan-an niku kawu mayamu pag linahi hampay kawu ti ama kayamuun tawu. Ag ipakaun niku inda pag daga Kanaan sa kanmu manga linahi ag kanda yi inda hanggan waya aban.’ ”

5Nagparargu si Hakub sa kay magbagaw, “Kanmu duwa ka anak sida ni Ipraim ni Manasis, ti iinanak atay sa Ihiptu bag-u aku rinmas-ug, sida ga kangku diman pag manga anak, parihu sa kanda ni Rubin ag ni Simyun.#48:5 Ginan diman sa kan Ipraim hanggan ni Manasis ti manga lahi Israilita. 6Dapat kay sunud nimu pag manga anak tunda kanmu yi ag makatanggap sida maranahun ginan sa kanda ni Ipraim ag ni Manasis. 7Magkaala-ala niku ti pagkamatay nimu ina. Ginan kami sa Padan#48:7 Padan: ngatay, Padan Aram. tunda katpung ag maglakaw sa daga Kanaan. Arani yi kami sa Iprata tunda katpung kay magkamatay, nakan ilinbung yi lang niku siya sa saruy dalan atabug sa Iprata.”#48:7 Iprata: sa Hibriyu, Iprat. (Ti Iprata ti pag-ingarnan Bitlihim taynguna.)

8Pagka nakitan ni Israil#48:8 Israil: siya diman si Hakub. kay manga anak ni Husi, nagpaingana siya, “Si unu duy sida?” 9Sinmagut si Husi, “Sida duy kang manga anak ti ipinakaun Diyus sa kangku atay sa Ihiptu.” Nakan magkun si Israil, “Daraha sida ataytag sa kangku hampay papaladan niku sida.” 10Harus udyi maghiling si Israil dahil gurangun yi, nakan dinara ni Husi kay manga anak atag sa kan Israil arani. Hinagkung sida ni Israil ag inarkan. 11Magkun si Israil sa kan Husi, “Balaw yi ungud aku magsarig makitan waya niku kawu, dapat taynguna ipinahintulut Diyus balaw lang kawu kang makitan nu unman hanggan diman kanmu manga anak.”

12Bin-ul ni Husi kay manga anak sa sarapupwan ni Israil ag yinmuk-ub siya bilang paggalang sa kay ama. 13Bag-u ipinakarani maan niya kay manga anak sa kanda laki hampay papaladan. Si Ipraim sa sikun ni Husi, imaw ti sa wala ni Israil ag si Manasis sa wala ni Husi, imaw ti sa sikun ni Israil. 14Dapat ikinupa ni Israil kay sikun kamang sa ulu ni Ipraim imaw kay kap-usan, bag-u ikinupa niya kay wala pag kamang sa ulu ni Manasis imaw kay panganay. 15Pagkatapus, pinapaladan niya sida magkumun,

“Mana papaladan Diyus inda pag manga anak, ti sinirbihan niku manga ginurang nida ni Abraham ni Isaak, imaw diman ti Diyus maggiya sa kangku ginan sa kang pagkalusad tugka taynguna.

16Ag mana papaladan diman sida anghil, ti nagribri sa kangku sa tanan kadamhakan.

Mana maalaala aku hanggan kang manga ginurang sida ni Abraham ni Isaak sa panab-anan nida.

Ag mana yumamu waya sida sa kalibutan.”

17Pagka nakitan ni Husi ikinupa niya ama kay sikun pag kamang sa ulu ni Ipraim, balaw niya inda ikinabaya. Nakan hiniyaptan niya ti kamang niya ama hampay ilipat sa kan Manasis, 18ag magkun, “Amang, balaw duy tunda. Indaay di kay panganay; ikupa duy nimu kanmu sikun pag kamang sa ulu niya.” 19Dapat sinmagut kay ama, “Hu, alam niku anak. Ti manga lahi ni Manasis bumaliw diman bantug pag nasyun. Dapat mas mibantug kay manga lahi niya kap-usan pag patar-ari ag mas mayamu kay lahi.” 20Ag sa tunda pag sirang, pinapaladan niya sida magkumun, “Gamitun manga Israilita kanyu ngaran sa magpapalad. Sumabi sida, ‘Papaladan kawu Diyus parihu sa kanda ni Ipraim ag ni Manasis.’ ” Nakan binwat niya mas lamang si Ipraim kaysa kan Manasis.

21Pagkatapus, magkun si Israil sa kan Husi, “Arani yi aku mamatay, dapat danga kawu magkaarimputu dahil ibahan di kawu Diyus ag ibalik kamu sa daga niyu ginurang. 22Kawu Husi ti manmana Sikim, lamang kawu usa sa kanmu manga patar-ari. Tunda pag manga daga kangku dahil sa kang naglaban sa manga Amuriyu sa panab-anan baladaw ag pamana.”

Currently Selected:

Gimpuunan 48: HNN

Highlight

Copy