Gimpuunan 41

Itinultul ni Husi ti Tagin-up Hari

1Pagkalawuy duwa ka timpu, nanagin-up ti hari Ihiptu#41:1 hari Ihiptu: sa Hibriyu, Paraun. Katunda diman sa sunud pag manga talata. matindugan kunu siya sa saruy Sapa Nilu. 2Sa kay tagin-up, kadaka may napatakas ginan sa sapa pitu ka baka mararinu ag maratabul bag-u nanharab ilamnun. 3Lagat-lagat may napatakas maan ginan sa sapa pitu ka baka balaw marinu ag maniwang. 4Pinakaranyan nida ti pitu ka baka mararinu ag maratabul bag-u kinaun. Ag nimata ti hari.

5Naturugan maan ti hari ag nanagin-up maan. Sa kay tagin-up, nakakit siya pitu ka uhay mapugnung inmuhay sa usa lang ka bahi. 6Ag sa tunda diman pag bahi, inmuhay ti pitu maan ka uhay yupa nauga dahil sa mainit pag durus ginan sa butlakan.#41:6 durus ginan sa butlakan: Nu sa Israil kawu, baliwa sa may butlakan. Dapat nu sa Ihiptu kawu, ginan sa salatan baliwa. 7Kinaun yupa ti pitu ka mapugnung pag uhay. Ag nimata maan ti hari. Kay isip tutuu tunda dapat tagin-up lang maaw.

8Pagka surip, magkaarimputu ti naisipan hari tungkul sa kay manga tagin-up, nakan ipinatawag niya ti tanan manughula hanggan ti madunung pag manga tawu sa Ihiptu. Itinultul niya sa kanda kay tagin-up, dapat una di usa sa kanda unman may nakatultul nu hintay kay ibug sabihun tunda pag tagin-up.

9Napakarani sa hari ti takinan niya manga manugsirbi irinmun ag magkun, “Naimatun-an yi duy niku taynguna kang kasalanan. 10Balaw aw kabay kawu nangisug kaybi sa kangku hanggan sa takinan manugtama tinapay, ag ipinapirisu nimu kami sa ulian kapitan manga guwardiya? 11Ati katpung pag yabi, nanagin-up kami duwa, ag balaw parihu duy kay ibug sabihun kanmi tagin-up. 12May kaibahan kami ati kan-akan Hibriyu, suruguun kapitan manga guwardiya sa balay hari. Itinultul duy nimi sa kanya kanmi tagin-up ag itinultul niya sa kanmi kay ibug sabihun inda. 13Natupad gid ngani kay sinabi tungkul sa kanmi: Pinabalik nimu aku sa kang buruwatun ag ipinatuhug nimu sa matindugan pag matarum kayu ti takinan manugtama tinapay.”

14Nakan ipinatawag hari si Husi, ag pinaluwas siya sa pirisuhan. Bag-u nanguguy siya kay bungut, nangilis kay rutay ag nag-ati sa hari. 15Magkun ti hari sa kanya, “Nanagin-up aku dapat unman may nakatultul kay ibug sabihun inda. May nagkumun sa kangku kuntay madunung kawu magtultul kay ibug sabihun manga tagin-up.” 16Nagsagut si Husi, “Balaw duy aku Mahal Hari, nu unman ti Diyus di ti magpakaun kay ibug sabihun manga tagin-up nimu para sa kanmu ikaayad.”

17Itinultul hari kay tagin-up sa kan Husi. Magkun siya, “Nanagin-up duy aku, matindugan kunu aku sa saruy Sapa Nilu. 18Kadaka may napatakas pitu ka baka mararinu ag maratabul ginan sa sapa bag-u nanharab ilamnun. 19Lagat-lagat may napatakas maan pitu ka baka balaw marinu ag maniwang. Unman waya gid aku may nakitan katida pag manga baka balaw marinu sa buu Ihiptu. 20Ti un-an napatakas pag pitu ka baka maratabul kinaun manga balaw marinu ag maniwang pag baka. 21Dapat igu nakaun nida, unman diman nahalata kuntay nangaun sida dahil unman nauman maniwang diman sida. Ag nimata aku. 22Dapat naturugan maan aku ag nanagin-up maan. Nakakit aku pitu ka uhay mapugnung inmuhay sa usa lang ka bahi. 23Bag-u sa tunda diman pag bahi, inmuhay ti pitu maan ka uhay yupa nauga dahil sa mainit pag durus ginan sa butlakan. 24Kinaun yupa ti pitu ka mapugnung pag uhay. Itinultul yi niku inda sa manga manughula, dapat unman una di usa ti nakatultul kay ibug sabihun inda.”

25Magkun si Husi sa hari, “Mahal Hari, ti duwa nimu ka tagin-up usa lang duy kay ibug sabihun. Sa panab-anan inda pag manga tagin-up nimu, pag-ipaburayhaw Diyus sa kanmu nu hintay kay buwatun. 26Ti pitu ka baka maratabul hanggan ti pitu ka uhay mapugnung parihu pitu ka timpu kay ibug sabihun. 27Ti pitu ka baka balaw marinu ag maniwang, hanggan ti pitu ka uhay yupa nauga dahil sa mainit pag durus ginan sa butlakan, kay ibug sabihun duy pitu ka timpu taglun-us.

28“Parihu sa kang sinabi sa kanmu, Mahal Hari, ipinaburayhaw Diyus sa kanmu nu hintay kay buwatun. 29Sa sulud duy pitu ka timpu pararas-ugun, bumaliw gid abunda sa buu Ihiptu. 30Dapat dumasun siyun ti pitu ka timpu taglun-us, ag malimtan yi manga tawu kanda nalakawan kaabundahan dahil ti taglun-us umapiktu gid subra sa daga Ihiptu. 31Masyadu gid duy pag lun-us ti rumas-ug ga unman nakalakaw kaabundahan ti daga Ihiptu. 32Kadwa ginan duy kawu nanagin-up, Mahal Hari, hampay maalaman nimu itinagka Diyus inda mangyari udyi dugay aban.

33“Nakan taynguna, Mahal Hari, kang pagsabihun sa kanmu kailangan kawu pumili usa ka madunung pag tawu hampay manpamahala sa daga Ihiptu. 34Pagpauli diman kawu manga takinan sa buu daga Ihiptu hampay ialistu#41:34 hampay ialistu: ngatay, hampay manlikum ikalima pag bahagi ginan sa inani. inda pag rugar sa sulud pitu ka timpu kaabundahan. 35Siyun katpung, ipatipun diman nimu sa kanda ti tanan malikum nimu ginan sa manga ani.#41:35 Bantayi diman sa 47:24. Ag sa sirung nimu pagpamahala, patipunan duy nimu sa kanda ti manga ani atag sa balay haramnuan sa manga banwa. 36Inda pag manga ani ialistu para sa manga tawu nu rumas-ug yi ti pitu ka timpu taglun-us, hampay balaw sida lun-usun.”

Binwat taga Asikasu si Husi sa Ihiptu

37Naibgan hari hanggan niya manga takinan kay sinabi ni Husi. 38Magkun siya sa kay manga takinan, “Unman yi kita may makitan tawu parihu sa kan Husi paggiyahan Ispiritu Diyus.”

39Nakan magkun ti hari sa kan Husi, “Dahil sinabi Diyus inda pag manga bagay sa kanmu, balaw yi siguru may tuhay waya pag tawu ti may kadunungan hanggan pan-intindi parihu sa kanmu. 40-41Pag-iintirga kawu niku taynguna taga asikasu niku kaharian ag bilang gubirnadur buu Ihiptu, bag-u sumunud sa kanmu ti tanan tawuhan niku. Dapat mas makamaskihan aku kaysa kanmu.” 42Linapsu rargu hari kay singsing pantatak ag ipinasulung sa ituturu ni Husi. Pinasulungan diman niya si Husi rutay buwat sa linu hanggan gintu pag unu. 43Ipinagamit diman niya sa kan Husi kay pangadwa pag kalisa,#41:43 kay pangadwa pag kalisa: ngatay, ti kalisa takinan, ti ikadwa sa kanya. ag may manga manugbarita mag-una sa kanya magringgit, “Paggalang kamu sa gubirnadur!” Nakan tunda ginan, si Husi yi ngani ti manugpamahala sa buu daga Ihiptu.

44Magkun waya ti hari sa kan Husi, “Aku ti hari atay sa Ihiptu, dapat unman may una si unu ti bumuwat una hintay atay sa Ihiptu nu unman may pahintulut nimu.” 45Pinaingarnan niya Sapinat Paniya si Husi. Ag ipinakaun hari si Asinat kay anak ni Putipira, ti manughandug sa banwa Un hampay asawan-un ni Husi. Si Husi yi ti mag-asikasu sa buu daga Ihiptu bilang gubirnadur.

46Si Husi 30 ka timpu yi kay mag-umpisa magsirbi sa hari Ihiptu. Tinayakan dap niya ti balay hari ag namalibutan sa buu Ihiptu.

47Ungud gid abunda ti ani sa sulud pitu ka timpu kaabundahan. 48Ag ati katpung, ipinatipun ni Husi ti tanan nalikum ginan sa manga ani.#41:48 Bantayi diman sa 47:24. Ipinatagu niya sa kada banwa ti manga ani ginan sangput bantud. 49Masyadu mayamu pag ani ti natipun ni Husi, ga baras sa baybay dagat kay kayamu. Ipinaapas lang niya ti pagtakal dahil unman yi tunda kaya takalun.

50Bag-u rinmas-ug ti taglun-us, iinanak ti duwa ka anak ni Husi sa kan Asinat kay anak ni Putipira, ti manughandug Un. 51Iningarnan ni Husi kay panganay Manasis,#41:51 Manasis: Mahimu kay ibug sabihun sa Hibriyu, kinalimtan. dahil magkun siya, “Dahil sa awat Diyus, nalimtan niku kang manga kakurian hanggan kang mag-ayup sa kang ama magtal-anakan.” 52Iningarnan niya Ipraim#41:52 Ipraim: Mahimu kay ibug sabihun sa Hibriyu, namurak ngatay nag-abunda. kay ikadwa pag anak, dahil magkun siya, “Pinapaladan aku Diyus manga anak sa pinag-agwantahan niku pag daga.”

53Tapus yi ti pitu ka timpu kaabundahan sa Ihiptu, 54ag nag-umpisa yi ti pitu ka timpu taglun-us parihu sa kay sinabi ni Husi. May taglun-us sa tuhay-tuhay pag rugar dapat may karan-unun di sa buu Ihiptu. 55Nagras-ug ti udas nakaramdam diman lun-us ti manga taga Ihiptu, nakan naghagad sida karan-unun sa hari. Magkun ti hari sa kanda, “Pag-ati kamu sa kan Husi dahil siya ti sumabi sa kanyu nu hintay kanyu buwatun.”

56Naglantap ti taglun-us una naan tabug pag rugar. Ag dahil sa masyadu pag taglun-us sa Ihiptu, pinabukasan ni Husi ti tanan balay haramnuan ag pinabilihan karan-unun ti manga taga Ihiptu. 57Nag-ati diman ti harus tanan nasyun hampay bumili karan-unun sa kan Husi dahil sa taglun-us sa kanda nasyun.

Currently Selected:

Gimpuunan 41: HNN

Highlight

Copy