Pag-ighit 2

Ti Pagkalusad ni Muysis

1May usa ka tawu ginan sa lahi ni Libi ti nakaasawa sa usa ka babayi ginan diman sa lahi ni Libi. 2Namuduy ti babayi ag nanganak usa ka lalaki. Pagka nakitan niya makurasug ti lapsag, itinagu niya tunda sa sulud tulu ka bulan. 3Dapat pagka udyi niya mag-itagu ti lapsag, binmuul siya ga duyan-duyan pinangawat sa aynu ag pinayidan alkitran. Bag-u isinukad niya ti lapsag sa duyan-duyan ag pinayataw sa danum sa may maaynu sa saruy Sapa Nilu. 4Dapat ti aka lapsag matindugan balaw arayu hampay bantayan nu hintay ti mangyari sa lapsag.

5Tunda katpung ti anak babayi hari Ihiptu#2:5 hari Ihiptu: sa Hibriyu, Paraun. nag-ati sa Sapa Nilu hampay marigus. Habang magparigus siya, kay manga suruguun babayi waydi maglakaw-lakaw sa saruy. Taynguna nakitan niya ti duyan-duyan sa karaw-an maaynu, nakan ipinab-ul niya inda sa kay usa ka suruguun. 6Pagka binukasan niya ti duyan-duyan, nakitan niya maglumi ti lapsag, nakan naawa gid siya sa lapsag. Magkun siya, “Usa inda ka lapsag manga Hibriyu.”

7Bag-u dinmulud ti aka lapsag sa anak babayi hari Ihiptu ag namaingana, “Gustu aw nimu bul-an niku kawu usa ka babayi Hibriyu manugpasusu ag mangalaga sa lapsag para sa kanmu?” 8Sinmagut ti anak babayi hari Ihiptu, “Hu.” Nakan nighit ti aka lapsag ag inatihan kanda ina ag dinara sa anak babayi hari Ihiptu. 9Magkun ti anak babayi hari Ihiptu tabug sa babayi, “Daran-a nimu inda pag lapsag, pasusuhan nimu siya ag alagai para sa kangku, bag-u bayadan niku kawu.” Nakan bin-ul niya ti lapsag ag inalagaan.

10Pagka udyi magsusu ti anak, dinara siya niya ina sa anak babayi hari Ihiptu, ag inaku anak babayi hari Ihiptu ti anak ga kay sadili anak. Nakan pinaingarnan anak babayi hari Ihiptu ti anak Muysis,#2:10 Muysis: Mahimu kay ibug sabihun sa Hibriyu, bin-ul. dahil magkun siya, “Bin-ul niku siya ginan sa danum.”

Nalagiw si Muysis Atag sa Midyan

11Usa ka sirang, pagka daka yi si Muysis, nag-atag siya sa kay manga kadugu ag nakitan niya pagpakurianan sida hanggan pagpatarabahuun mabuyat. Nakitan waya niya ti usa ka Ihipsiyu magbakul sa usa ka Hibriyu kadugu niya. 12Namarantayun si Muysis sa kay palibut nu may maghiling. Pagka unman siya may nakitan, minatay niya ti Ihipsiyu ag ilinbung sa baras kay bangkay.

13Pagka sa usa ka sirang, nagbalik maan siya ag may nakitan siya duwa ka Hibriyu mag-arawayan. Pinaingana niya ti may salan, “Hayga kanmu pagbakulun kanmu kaparihu Hibriyu?” 14Sinmagut ti lalaki, “Si unu ti nagpakaun sa kanmu karampatan hampay mamahala ag manhusay sa kanmi? Matyun diman aw nimu aku parihu sa kanmu binwat kaaldaw sa Ihipsiyu?” Nadala si Muysis ag magkun sa kay sadili, “May nakaalam maaw sa kang binwat.”

15Pagka naalaman hari Ihiptu kay binwat ni Muysis, ginayak niya matyun siya. Dapat nalagiw si Muysis atag sa Midyan bag-u ati pag nangulian. Pagka sa usa ka sirang, tinmukaw siya sa saruy bubun. 16Rinmas-ug waydi ti pitu ka anak babayi manughandug sa Midyan hampay manaas ag mamainum manada hayup nida ama. 17May rinmas-ug diman waydi manga manug-alaga hayup ag pinaighit nida ti manga babayi hanggan kanda manga hayup, dapat inawatan ni Muysis ti manga babayi ag pinainum waya niya kanda manada hayup.

18Pagka nuli ti manga babayi sa kanda ama si Ruwil,#2:18 Ruwil: Inda ti usa waya ka ngaran ni Hitru. Bantayi sa 3:1. pinaingana niya sida, “Hayga bilang maagap kanyu uli?” 19Sinmagut sida, “May usa duy ka Ihipsiyu nangawat sa kanmi laban sa manga manug-alaga hayup. Tinaasan waya ngani niya kami danum ag pinainum kanmi manada hayup.” 20Nagpaingana kanda ama, “Naan yi siya? Hayga siya kanyu tinayakan? Tawaga niyu siya ag sagdaha mangaun.”

21Nagpasnu si Muysis mandayun sa balay ni Ruwil. Pagkadugay ipinaasawa ni Ruwil kay anak, si Sipura, sa kan Muysis. 22Si Sipura namuduy ag nanganak usa ka lalaki. Pinaingarnan ni Muysis Girsum,#2:22 Girsum: Mahimu kay ibug sabihun sa Hibriyu, day-uhan. dahil magkun siya, “Day-uhan aku sa inda pag daga.”

23Pagkalawuy mayamu timpu, namatay ti hari Ihiptu. Dapat imaw diman pag kakurian ti pag-agwantahun manga Israilita sa kanda pagkapanawuhun. Nakan naghagad sida awat ag aput sa Diyus kanda magdangup. 24Nadnugan Diyus kanda magdangup, ag naala-ala niya kay kasunduan sa kanda ni Abraham, ni Isaak, ag ni Hakub. 25Nakitan Diyus kanda kahamtangan ag naawa gid siya sa kanda.

Currently Selected:

Pag-ighit 2: HNN

Highlight

Copy