Binwat 5

Sida ni Ananiyas ni Sapira

1Ati katpung may usa ka mag-asawa, kay ngaran lalaki si Ananiyas, kay asawa babayi si Sapira. May ipinabili diman sida kasiyunan. 2Bag-u nag-ati si Ananiyas tag sa manga apustul, iinintirga niya sa kanda ti kabilyanan kay lang iba. Alam diman waydi niya asawa kay iba kabilyanan tinawidan di ni Ananiyas. 3Pagka ati si Ananiyas, sinabi ni Pidru sa kanya magkun, “Ananiyas, hayga duy sinakup ni Satanas kanmu tagipusuun hampay kawu mandaya yi sa Ispiritu Banal sa kanmu nagtawid kay iba kabilyanan niyu daga? 4Kay udwaya nipabili, unman aw kanmu tunda pag daga? Pagka ipinabili yi nimu, unman aw kawu diman ti bahala sa kay kabilyanan? Hayga lugud, Ananiyas, inisip nimu ti katida pag buwat? Balaw tawu nu unman Diyus ngap ti kanmu dinaya.” 5Pagka nakadnug si Ananiyas sa kan Pidru sinabi, naplid lang siya rargu naugtas kay arup. Masyadu yi lang gid nadala ti tanan tawu nakadnug sa nangyari ati. 6Nam-ul ti manga lalaki amak, sinaput nida ti bangkay bag-u kanda yi ilinbung.

7Pagka lawuy tulu ka udas, rinmas-ug waydi kan Ananiyas asawa. Dapat unman niya alam may nangyari. 8Nagpaingana si Pidru sa kan Sapira magkun, “Sabiha duy nimu sa kangku, imaw lang aw inda kay halaga kanyu tinanggap sa kanyu nagpabili kanyu daga?” Nagsagut si Sapira magkun, “Hu duy, imaw lang waydi tunda.” 9Bag-u sinabi ni Pidru sa kanya magkun, “Hayga pinagkamhanan niyu subukan ti Ispiritu Panginuun nu ngatay siya humiling sa kanyu kasalanan? Pagpatingi kawu, sa ugsadan, yi ti manga tawu naglubung sa kanmu asawa ag kawu maan ti daran-un nida tag sa luwas.” 10Kadaka naplid si Sapira sa kan Pidru atubangan rargu naugtasan arup. Sinmaka maan ti manga kan-akan. Pagka nakitan nida tigbak si Sapira, dinara nida siya tag sa luwas, ilinbung sa kay arani niya asawa. 11Masyadu yi gid nadala ti tanan manga patar-ari hanggan ti tanan tawu nakadnug sa nangyari sa kanda duwa mag-asawa.

Manga Makadululaw pag Buwat ag manga Tanda

12Pinakan-an Panginuun kapangyarihan ti manga apustul hampay magbuwat sida mayamu pag makadululaw ag lilingutan pag manga tanda sa atubangan manga tawu. Pirmi magtiripun ati sa Parat-ungan ni Sulumun ti tanan manga nagsarig sa kan Hisus. 13Madi ti manga iba unman nagpanghas magpanuud sa kanda manga tiripun, ti tawu sa luwas iglisya nagbaya di gid sa manga patar-ari. 14Mayamu ngap ti manga bag-u nagsarig sa Panginuun una lalaki una babayi napadagdag sa iglisya. 15Pagka naalaman manga tawu ti manga makadululaw pag buwat manga apustul, dinara nida ti may manga sakit atag sa luwas, kanda ibinugtang sa manga papag, ti iba sa manga amak siti sa puun dalan hampay nu si Pidru lumawuy siyun, una lang maaninwan niya kay iba. 16Linmuwang diman ti mayamu tawu ginan sa manga baryu sa libut Hirusalim, dinara waydi nida ti may manga sakit ag ti manga pinakurian manga labang. Ag sida tanan-tanan pinaayad.

Inunu-unu ti manga Apustul

17Pagka dugay magkadaut yi gid sa manga apustul ti pangulu manughandug sa Balay Diyus hanggan tanan manga kaibahan niya, ti manga napaminsan sa manga Sadusiyu siti sa banwa Hirusalim. 18Nakan ngani sida nangalistu yi bag-u ipinadakup yi nida ti manga apustul kanda ipinaslud sa pirisuhan sa banwa. 19Dapat ay pagka yabi yi binukasan anghil Panginuun ti manga sabian kay ipinalwas sida ginan sa pirisuhan. Bag-u sinabi niya sa kanda magkun, 20“Pag-ati kamu sa Balay Diyus, itudlu gid niyu sa manga tawu ti tanan-tanan tungkul sa inda pag bag-u buhi.” 21Nagpaniwala ti manga apustul sa bilin anghil, nakan surip-surip nag-ati yi sida sa Balay Diyus hampay manudlu.

Pagka rinmas-ug ti pangulu manughandug sa Balay Diyus hanggan kay manga kaibahan, pinasuguan nida ti tanan paggurangunun manga Hudiyu hampay tiripun yi ti tanan Katipunan manga Pinunu. Bag-u kanda ipinab-ul ginan sa pirisuhan ti manga apustul. 22Dapat ay pagka dinuawan ngani manga pulis, unman yi siyun ti manga apustul sa sulud pirisuhan. Nakan nagbalik maan sa manga pinunu ti manga pulis, kanda sinabi magkun, 23“Pagka kami rinmas-ug sa pirisuhan, nakitan nimi may susi di mayad ti pirisuhan, matindugan diman ti manga bantay sa puun sabian. Dapat pagka binukasan nimi ti sabian, udyi maaw lagan ti tawu sa sulud.”

24Pagka naalaman nida inda, magkaaburidu ti kapitan manga pulis hanggan ti manga pangulu manughandug sa Balay Diyus. Naglingut gid sida nu hintay ti nangyari sa manga apustul. 25Bag-u may tawu linmuwang nagbarita sa kanda magkun, “Tunda ngani pag manga tawu kanyu ipinaslud sa pirisuhan, malu ati sida kainda sa Balay Diyus magtudlu sa manga tawu.” 26Nakan nag-ati sa Balay Diyus ti kapitan hanggan kay manga pulis bag-u kanda bin-ul ti manga apustul dapat unman kanda kinaragasyun. Magkadala waydi ti manga pulis barang sida batuhan kayamuan tawu.

27Pagka bin-ul yi manga pulis ti manga apustul, kanda ipinaatubang sida sa Katipunan manga Pinunu. Bag-u sinuyasid sida pangulu manughandug sa Balay Diyus magkun, 28“Hinigpitan yi nimi kamu magkun danga yi gid kamu magtudlu tungkul sa kamaskihan ni Hisus. Dapat malu, hintay ngap kanyu binwat? Sa buu banwa Hirusalim tanan-tanan tawu nakadnug yi gid kanyu tudlu. Gustu waya niyu kami pakan-an saragtun tungkul sa kamatayan siyun pag tawu.”

29Bag-u nagsagut si Pidru hanggan ti iba manga apustul magkun, “Kailangan nimi tupadun ti manga bilin Diyus, balaw ti bilin tawu. 30Ti Diyus nita ginurang imaw ti nagbuhi uman sa kan Hisus kanyu ipinapaku sa kurus ipinamatay. 31Pinakan-an si Hisus kadayawan, ipinatukaw siya Diyus sa kay sikun baliwa minsan sa kay karampatan maghari. Nakan si Hisus yi ngani ti Takinan hanggan Manugribri hampay pakan-an rugar ti nasyun Israil makaampu sa kanda manga kasalanan ag makahagad kapatawadan sa Diyus, agud sida patawadun. 32Kami yi ngani ti manga saksi tungkul sa manga nangyari. Magtudlu diman hanggan ti Ispiritu Banal ti ipinakaun Diyus sa manga tawu masurundun sa kanya.”

33Pagka nadnugan manga pinunu inda pag manga bagaw, masyadu yi lang gid sida nagalit nakan kanda gid gustu ipamatay yi ti manga apustul. 34Dapat may Parisiyu siyun, usa diman ka Pinunu, kay ngaran si Gamalyil. Manugtudlu siya Kasuguan, paggalangun tanan manga tawu. Nagsabi si Gamalyil palwasan dapu ti manga apustul. 35Bag-u sinabi niya sa manga Pinunu, “Kamu duy pag manga kaparihu niku Israilita, isipa gid niyu kaayad-ayad nu hintay kanyu buwatun sa inda pag manga tawu. 36Dahil udwaya waydi dugay kadaka kabay nagluwang si Tiyudas magkun, siya yi ngani kunu ti pangulu may kapangyarihan. Bag-u upat ka gatus lalaki napausa ngani sa kanya. Dapat ay pagka minatay si Tiyudas, nanarigwasak yi lang kay manga kaibahan ag taynguna udyi may naalaman. 37Pagka katpung tigsirinsu, nagluwang si Huda taga Galiliya. Mayamu maan tawu ti napausa sa kanya. Dapat ay pagka siya minatay, nanarigwasak diman waydi ti manga nagsunud sa kanya. 38Nakan kang pagsabihun sa kanyu, danga paglabuta niyu inda pag manga tawu, pabay-ani niyu sida. Dahil nu pinathaw lang tawu kanda turunu hanggan kanda buruwatun, mabuyu yi lang tunda. 39Nu bay inda ginan sa Diyus, dayi ngap niyu maampara, barang ngap kamu laban yi sa Diyus.” Nagpasnu ti manga Pinunu sa kan Gamalyil sinabi.

40Pagka ipinaslud maan nida ti manga apustul, kanda ipinahampak bag-u kanda sinabihan magkun, “Danga yi kamu magtudlu tungkul sa kan Hisus.” Bag-u kanda pinalpasan. 41Pagka ginan sa atubangan Katipunan manga Pinunu, nuli maan ti manga apustul. Nakabaya gid ungud sida, dahil pinakan-an sida karampatan hampay mag-agwanta parusa dahil ngani sa kan Hisus. 42Sirang-sirang una sa Balay Diyus una sa manga balay tawu unman sida mag-apas kanda magpanudlu. Itinudlu nida ti Mayad pag Barita magkun, “Si Hisus yi ngani ti Pinili Diyus Manugribri pag Hari.”

Currently Selected:

Binwat 5: HNN

Highlight

Copy