Binwat 4

Sida ni Pidru ni Huwan sa Atubangan Katipunan manga Pinunu

1Magbagaw waya sida ni Pidru ni Huwan sa manga tawu, nagpakarani ngap sa kanda ti manga manughandug, ti takinan manga guwardiya hanggan ti manga Sadusiyu. 2Magkagalit sida sa kanda ni Pidru ni Huwan dahil pag-itudlu nida sa manga tawu si Hisus nabuhi uman, imaw ti puruyba kuntay buhiun diman uman ti manga namatay. 3Nakan dinakup nida sida ni Pidru ni Huwan bag-u kanda ipinaslud sa pirisuhan tugka surip, dahil magkayabi yi ati katpung. 4Dapat mayamu ti nakadnug sa kanda ni Pidru paliwanag ti nagsarig sa Panginuun. Kay kabuuhan manga lalaki nagsarig sa Panginuun manga lima yi ka libu.

5Pagka surip nagtiripun sa Hirusalim ti manga pangulu manughandug, ti manga paggurangunun manga Hudiyu hanggan ti manga manugtudlu Kasuguan. 6Siyun diman ti Pangulu Manug-asiwa si Anas, hanggan sida ni Kaipas, ni Huwan, ni Alihanduru hanggan ti tanan manga katawuhan Pangulu Manug-asiwa. 7Pagka bin-ul ginan sa pirisuhan sida ni Pidru ni Huwan, ipinaatubang sida sa Katipunan manga Pinunu bag-u pinaingana nida magkun, “Sa hintay pag kamaskihan pag pinaayad niyu tunda pag tawu? Kantapu pag ngaran kanyu sinampit?”

8Bag-u si Pidru, lubus sinuldan Ispiritu Banal, nagsagut sa kanda magkun, “Kamu duy pag manga pangulu ag manga paggurangunun manga Hudiyu, 9taynguna kanyu pagsuyasidun kami tungkul sa kamayadan binwat sa tawu lunu, nu kabitay siya pag pinaayad. 10Kailangan maalaman niyu hanggan tanan manga Israilita, inda pag tawu taynguna matindugan sa kanyu atubangan dahil sa ngaran ni Hisu-Kiristu taga Nasarit. Imaw ti nagpaayad sa kanya. Imaw diman pag Hisus kanyu ipinaku sa kurus dapat siya binuhi uman Diyus. 11Siya yi ngani ti pagkumnun sa Banal Kasuratan,

‘Ti dinayu manugpatindug balay pag batu,

imaw ngap ti nagbaliw patakinan pag batu.’#4:11 Bantayi diman ti Kanta 118:22.

12“Udyi may iba hanapan karibrihan nu unman si Hisus lang. Dahil unman may iba ngaran sa sirung langit ipinakaun sa manga tawu hampay magribri sa kanta.”

13Pagka nadnugan manga Pinunu kanda ni Pidru ni Huwan pagbagawun matutum kanda naisipan, naglingut gid sida dahil alam diman nida unman masyadu kay inadalan nida ni Pidru nu unman kasarangan lang#4:13 kasarangan lang: sa Tagalog ngatay sa Inglis, simple lang. kay kadunungan pag manga tawu. Kilala diman manga Pinunu sida ni Pidru ni Huwan kay iribahun ni Hisus kaybi sa kay buhi di waya. 14Dapat unman yi sida may sabihun laban sa kanda ni Pidru ni Huwan dahil nakitan yi waydi nida ti tawu pinaayad sa kay pagkalunu siyun matindugan sa kanda arani. 15Sinabi Katipunan manga Pinunu sa kanda ni Pidru magkun, “Palwas dapu kamu.” Bag-u nagharampangan ti manga Pinunu. 16Magkun sida, “Hintay nguna kanta buwatun sa inda pag manga tawu? Dahil magkaalaman yi waydi tanan manga tawu sa banwa Hirusalim inda pag makadululaw gid pag tanda binwat nida ni Pidru ni Huwan. Ag dayi kita makapahimudil. 17Dapat ay kailangan sabihan nita sida danga yi gid sida magbagaw una sa kantapu tungkul sa kamaskihan ni Hisus hampay inda pag barita unman milantag sa tanan tawu.” 18Nakan pagka kanda pinaslud maan sida ni Pidru ni Huwan, kanda sinabihan magkun, “Inda ginan danga yi gid kamu magbagaw una magtudlu tungkul sa kan Hisus.”

19Dapat ay nagsagut sida ni Pidru ni Huwan magkun, “Bahala kamu magkilala nu naan ti tama sa atubangan Diyus, nu kamu aw ngatay Diyus ngap ti dapat paniwalaan. 20Nu kami bay duy, dayu gid kami umapas kanmi magtultul tungkul sa kanmi nakitan ag kanmi nadnugan.” 21Lalu waya ngap sida hinigpitan manga pinunu bag-u sida pinalpasan. Unman sida may mag-akitan kadautan agud maparusahan ti duwa, dahil ti manga tawu magdayaw gid sa Diyus sa nangyari. 22Subra yi upatpulu ka timpu kay idad tunda pag tawu, ti binwatan tunda pag makadululaw pag tanda ag siya pinaayad sa pagkalunu.

Magdarangin ti manga Patar-ari hampay Matutum Kanda Naisipan

23Pagka pinalpasan yi ngani sida ni Pidru ni Huwan, nag-ati sida sa kanda manga kaibahan bag-u itinultul nida sa kanda ti tanan sinabi manga pangulu manughandug sa Balay Diyus hanggan manga paggurangunun manga Hudiyu. 24Pagka nadnugan manga patar-ari tunda pag manga barita, nagkarausa kanda manga tagipusuun, nagdarangin sida naghampang sa Diyus magkun, “Kawu duy Panginuun, ti naglalang langit, daga, dagat, hanggan ti tanan pag manga bagay asan sa kanda. 25Pagka inudyukan Ispiritu Banal kanmu suruguun si Dabid, kanmi waydi ginurang, ipinadakit niya kanmu bagaw magkun,

‘Hayga tinalung sa isug ti manga balaw Hudiyu?

Hayga ngani naggayak tunda pag manga nasyun tawu kanda turunu unman may pulus?

26Ti manga hari sa babaw daga nag-alistu yi hampay gumira.

Nagkaminsan ti manga pinunu laban sa Panginuun

Diyus ag laban sa kay Pinili Manugribri pag Hari.’#4:26 Bantayi diman ti Kanta 2:1,2.

27“Dahil tutuu ngani nagkabuu sida ni Hirudis ni Punsiyu Pilatu hanggan ti manga balaw Hudiyu ag ti nasyun Israil sitay sa banwa Hirusalim hampay labanan nida kanmu mahal pag Suruguun si Hisus, imaw ti kanmu Pinili Manugribri pag Hari. 28Binwat nida tunda angay sa kanmu kagustuhan mangyari, ti daan ihinanda nimu pag gayak. 29Taynguna Panginuun, alalahana nimu nu kabitay sida nangungud ngap sa higpit sa kanmi. Pabisugun duy nimu kami kanmu manga suruguun hampay unman gid kami magkadala magtudlu kanmu Bagaw sa manga tawu. 30Ipakakit nimu kanmu kamaskihan sa kanmu magpaayad sa may manga sakit. Pagsa kanmi ti kamaskihan ngaran ni Hisus kanmu banal pag Suruguun hampay makabuwat kami manga makadululaw ag lilingutan pag manga tanda.” 31Pagka nakadarangin yi sida nauyug ti balay kanda tinipunan, sida tanan lubus sinuldan Ispiritu Banal ag matutum kanda naisipan nanudlu sida Bagaw Diyus.

Inusa Nida Kanda Kasiyunan

32Nagkabilug ti manga nagsarig sa Panginuun nagkausa sida sa tagipusuun hanggan sa naisipan. Unman sida nag-araminan kanda kasiyunan, kanda ngap inusa tanan. 33May daka pag kapangyarihan kay tudlu manga apustul tungkul sa kay pagkabuhi uman Panginuun Hisus. Ilinubus Diyus kay papalad sa kanda tanan. 34Kang-ud di sida tanan-tanan sa kanda manga kailangan dahil kanda pag-ipabili kanda daga hanggan balay. 35Bag-u kay kabilyanan pag-ipaintirga nida sa manga apustul. Bag-u pag-ihuray maan manga apustul sa kada usa angay sa kay pangailangan.

36Katunda diman waydi hanggan kay binwat ni Husi, usa ka Libita taga Sipru. Binansagan siya manga apustul Birnabi, kay ibug sabihun Manugparig-un. 37May tanman ngani si Husi kay ipinabili bag-u dinara niya ti kabilyanan kay iinintirga sa manga apustul.

Currently Selected:

Binwat 4: HNN

Highlight

Copy