Binwat 2

Sa kay Pagras-ug Ispiritu Banal

1Pagka udas yi Pintikustis, ti tanan magsarig nagkaminsan sa usa ka balay. 2Bigla may naghagunung ginan sa langit parihu ga usa ka untug, nas-ub ti balay kanda tinukawan. 3Bag-u may nakitan sida manga ga labdab apuy magbululagan nagrugpu sa kada usa sa kanda. 4Sida tanan lubus sinuldan Ispiritu Banal. Bag-u nag-umpisa sida nagbagaw sa tuhay-tuhay pag pamagaw sigun sa kay pakaun Ispiritu pag kadunungan sa kanda.

5Ati sa Hirusalim may mag-uli manga maka-diyus pag Hudiyu ginan sa kada nasyun sa sirung langit. 6Pagka nadnugan nida ti ingay, nagtiripun ti kayamuan tawu. Naglingut gid sida dahil ti kada usa sa kanda nakadnug kanda sadili pamagaw pagbagawun manga magsarig. 7Nadulaw gid ti manga tawu, naglingut sida magkun, “Unman aw lunsay taga Galiliya tunda pag manga tawu tigbagaw? 8Hayga mag-adnugan yi nita ti kinadak-anan nita pag pamagaw kanda pagbagawun? 9Kita manga taga Partiya, manga taga Midya, manga taga Ilam, manga mag-uli sa Misuputamya, sa Hudiya, sa Kapadusya, sa Puntu ag sa Asya, 10sa Pirigya ag sa Pampilya, sa Ihiptu ag sa manga daga sa Libya arani banwa Sirini. Ti iba sa kanta manga taga Ruma, manga Hudiyu, hanggan manga balaw Hudiyu niabay sa surundanun Hudiyu, 11manga taga Kiriti, manga taga Arabya. Dapat nadnugan nita sida magbagaw sa kanta sadili manga pamagaw tungkul sa manga makadululaw pag buwat Diyus.” 12Nakan sida tanan nadulaw ag naaburidu sa nangyari. Magparaingan-an sida magkun, “Hintay nguna kay kahulugan inda?” 13Dapat ti manga iba naghangal-hangal magkun, “Magkalangu banta sida.”

Kay Paliwanag ni Pidru

14Tinmindug si Pidru hanggan ti sampulu may usa ka kaibahan niya manga apustul. Ainalsa ni Pidru kay busis sa kay magpaliwanag sa kayamuan tawu magkun, “Kamu pag manga kaparihu niku Hudiyu hanggan kamu tanan manga mag-uli sa Hirusalim, pag-isipa niyu inda, kamu pagpatingi mayad, dahil aku may itultul sa kanyu. 15Kanyu hantup langu inda pag manga tawu, dapat ay balaw langu inda dahil magpamalayan di waya ti init. 16Inda imaw yi ngani ti sinabi ni Purupita Huwil magkun,

17‘Magkun ti Diyus, “Inda aban kang buwatun sa katapusan panahun.

Ibuhus niku kang Ispiritu sa tanan tawu.

Bag-u pumurupita kanyu manga anak una lalaki una babayi.

Bukasan niku ti naisipan niyu manga kan-akan bag-u aku may ipakakit sa kanda.

Ag kanyu manga gurangun lalaki tumagin-up.

18Ati katpung pag udas ibuhus niku kang Ispiritu sa kang manga panawuhun una lalaki una babayi bag-u pumurupita yi sida.

19Pumakakit aban aku manga makadululaw sa langit ati sa tungud ag manga tanda sa sirung langit sa babaw daga, dugu ngani, apuy ag magtalimbuuk pag anus.

20Dumulum ti init ag bumaliw ga dugu kay karara ti bulan

bag-u rumas-ug kay kaudasan Panginuun, ti makadululaw gid ag pagdayawun pag kaudasan.

21Nu mangyari aban tida maribri ti kada tawu nu magdangup sa kay ngaran Panginuun.” ’#2:21 Bantayi diman ti Huwil 2:28-32.”

22Magkun maan si Pidru, “Kamu pag manga kaparihu niku Israilita, pamatingi kamu. Udyi kamu pumahimudil sa kan Hisus taga Nasarit, dahil may nakitan yi waydi kamu puruyba. Binwat yi ni Hisus sa kanyu atubangan ti manga makamaskihan hanggan makadululaw pag tanda dahil sa kay kapangyarihan Diyus. Tunda balaw yi ngap nilihim sa kanyu. 23Si Hisus ipinahintulut sa kanyu angay sa kay nalub-anan gayak Diyus. Bag-u kanyu apinapaku sa kurus ipinamatay sa manga tawu balaw Hudiyu. 24Dapat binuhi di siya Diyus ag irinibri sa kapangyarihan kamatayan, sa ungud, una ti kamatayan unman may kapangyarihan amparahun siya. 25Sinabi yi ni Dabid tungkul sa kan Hisus magkun,

‘Daan nakitan niku ti Panginuun sa kang atubangan.

Siya sa kang arani handa gid umawat,

nakan balaw aku maanggihut.#2:25 maanggihut: sa Tagalog, nangangamba.

26Nakan magbaya gid aku sa kang naisipan,

pirmi gid magbagaw sa masulung kang bibig,

hanggan kang bilug may maariwaya yi dahil sa kang pag-asa.

27Dahil dayu aku pabay-anan nimu sa ulian manga namatay.

Unman pahintulutan nimu ti bangkay nimu matinupadun pag suruguun makalakaw karunutan.

28Itinudlu nimu sa kangku ti dalan atag sa buhi unman may katapusan.

Kawu kang kaibahan nakan aku mapnu yi gid kabayaan.’#2:28 Bantayi diman ti Kanta 16:8-11.”

29Magkun si Pidru, “Kamu duy pag manga kaparihu niku Hudiyu, tungkul sa kanta ginurang, sa kan Dabid, kang yi gid pagsabihun ti katutuuhanan, siya namatay ag ilinbung. Hanggan taynguna alam di nita kay naglubngan. 30Siya purupita nakan naalaman niya may marig-un pag taratu ti Diyus sa kanya magkun, ginan sa kay linahi usa aban ti humari parihu sa kanya. 31Madi udwaya nangyari, daan nakitan ag ipinurupita ni Dabid tungkul sa pagkabuhi uman Pinili Diyus Manugribri pag Hari. Sinabi ni Dabid magkun,

‘Unman siya pinabay-anan Diyus sa ulian manga namatay, ag unman ipinahintulut kay bangkay makalakaw karunutan.’

32“Imaw yi ngani pag Hisus ti binuhi uman Diyus. Nakitan gid nimi tanan kay yi nabuhi uman. 33Dinara siya tabug sa langit ipinatukaw siya Diyus sa kay sikun baliwa minsan sa kay karampatan maghari. Tinanggap niya angay sa itinaratu Diyus ti Ispiritu Banal ginan sa Ama. Bag-u ilinubus niya ipinakaun ti Ispiritu Banal sa kanmi ga kanyu nakitan ag nadnugan taynguna. 34Dahil balaw parihu sa kan Hisus pag nag-atag sa langit si Dabid. Dapat si Dabid waydi ti may sabi,

‘Sinabi Panginuun sa kang Panginuun:

Pagtukaw kawu sa kang sikun baliwa paminsan sa kang karampatan maghari,

35hanggan sa ud mabuwat niku tarat-an nimu manga lulud kanmu manga kalaban.’#2:35 Bantayi diman ti Kanta 110:1.

36“Nakan ngani kamu ti buu nasyun Israil, pagpasnui yi niyu kuntay tunda pag Hisus kanyu ipinaku sa kurus imaw ngap ti binwat Diyus Panginuun. Siya yi ti Pinili Diyus Manugribri pag Hari.”

37Pagka nadnugan manga tawu kan Pidru paliwanag, naaburidu kanda naisipan. Namaingana sida sa kan Pidru hanggan sa iba manga apustul magkun, “Manga patar-ari, kabitay wadi duy kami inda?” 38Nagsagut si Pidru magkun, “Ampuan niyu kanyu kasalanan ag paghagad kapatawadan sa Diyus. Pagpatulbaw ti kada usa sa kanyu, pagpasakup sa ngaran ni Hisu-Kiristu hampay patawadun yi kanyu manga kasalanan. Bag-u ipakaun Diyus sa kanyu ti Ispiritu Banal. 39Dahil sa kanyu diman pag itinaratu Diyus tunda hanggan sa kanyu manga anak una hanggan sa manga iba nasyun, ag sa kada tawu pinili Panginuun nita Diyus pumakarani sa kanya.”

40Mayamu waya kay ipinaliwanag ni Pidru sa manga tawu magkun, “Pagpasaman kamu sa manga tawu magbuwat daut hampay kamu makaribri.” 41Nakan ti manga tawu nagpaniwala sa kay paliwanag ni Pidru napatulbaw yi. Ati katpung pag sirang tulu ka libu tawu ti dinmagdag sa kanda. 42Unman pagkalimtan nida ti itinudlu manga apustul, ti pagkarausa magtar-arian, ti magmirinsanan magkaun hanggan ti magmirinsanan sa darangin.

Nagpakiusa ti manga Nagsarig sa kan Hisus

43Pirmi nagbuwat ti manga apustul manga makadululaw pag tanda dahil sa kapangyarihan kanda tinanggap ginan sa Diyus. Nakan lubus naglingut ag magkadala ti tanan tawu. 44Ti tanan manga nagsarig sa kan Kiristu nagkarausa ag nanhururayan kanda kasiyunan. 45Nu kas-a ginan ipinabili nida kanda daga hanggan kanda kasiyunan bag-u nanhururayan ngani sida kay kuwarta angay sa pangailangan sa kada usa. 46Kanda ugali sirang-sirang magtiripun sa Balay Diyus ag magmirinsanan magkaun sa balay manga patar-ari, masulung kanda tagipusuun sa kanda magkaun. 47Magdayaw sida sa Diyus. Ag ti tanan tawu nagbaya gid sa manga patar-ari. Sirang-sirang may idinagdag maan sa kanda ti Panginuun manga tawu kay irinibri.

Currently Selected:

Binwat 2: HNN

Highlight

Copy