Binwat 1

Ipinangaku Diyus ti Ispiritu Banal

1Kaybi duy Tiyupilu, isinurat yi niku sa kang un-an pag ribru#1:1 kang un-an pag ribru: Kay ibug sabihun, Ti mayad pag barita tungkul sa kan Hisu-Kiristu kay itinultul ni Lukas. ti tanan manga binwat ag itinudlu ni Hisus ginan waya sa umpisa, 2hanggan tugka sa udas pagka bin-ul siya atag sa langit. Kay udwaya nag-ati sa langit, may manga binilinan siya sa panab-anan Ispiritu Banal sa kay manga apustul, kay manga napili niya. 3Kabay pagka namatay yi si Hisus sa kurus, may pira ka bisis napakakit siya sa kanda ginan sa kay pagkabuhi uman. Pagka katida nakitan ti puruyba siya buhi di maan. Napakakit ngani siya sa kanda sa sulud upatpulu ka sirang ag nagtultul siya tungkul sa kay paghari Diyus. 4Ati katpung, kasaru waya nida si Hisus kay sinabi magkun, “Dag-ighit kamu ginan sa Hirusalim. Alagda gid niyu ti itinaratu ipakaun Ama sa kanyu imaw yi ti sinabi niku daan sa kanyu. 5Si Huwan nagtulbaw sa danum dapat ay balaw yi dumugay kamu itulbaw yi sa Ispiritu Banal.”

Sa kay Nag-atag sa Langit ni Hisus

6Nakan ngani pagka nagtiripun si Hisus hanggan kay manga apustul, nagpaingana sida sa kanya magkun, “Panginuun, kainda aw ipakaun maan nimu sa nasyun Israil ti karampatan hampay maghari?” 7Nagsagut si Hisus magkun, “Lubus yi lang kang Ama ti bahala magpili kay taning pag kaudasan. Unman kailangan maalaman niyu nu kapira aban pag mangyari tunda. 8Dapat makatanggap kamu kapangyarihan nu lubus kamu suldan Ispiritu Banal. Bag-u kamu yi gid ti manga manugpadakit magtudlu tungkul sa kangku sa Hirusalim una sa bilug Hudiya hanggan sa Samarya, hanggan waya sa katugkaan daga.”

9Pagka sinabi ni Hisus tunda, sa kanda gin atubangan dinara siya atag tungud, nakublian siya rurum udyi mag-akitan nida mata. 10Sa kay mag-atag tungud, magpakaturun kay manga apustul sa langit. Bigla may matindugan duwa ka lalaki sa kanda arani malagti kay manga rutay. 11Magkun sida sa manga apustul, “Kamu pag manga lalaki taga Galiliya, hayga kamu matindugan diman mabantayan atag sa langit? Inda pag Hisus ti dinara ginan sa kanyu atag sa langit, sumitay maan parihu sa kanyu nakitan sa kay nag-atag sa langit.”

Pinili Nida kay Kailis ni Hudas

12Bag-u nagbalik maan ti manga apustul sa Hirusalim ginan sa pagsabihun pag bantud Ulibu, udyi magkausa ka tamaan ginatung kay karayu.#1:12 udyi ... kay karayu: Mahimu manga usa ka kilumitru kay karayu. 13Pagka rinmas-ug yi sida sa banwa Hirusalim, nagsaka sida sa kanda dinayunan pag balay sa sulud-sulud sa ikadwa pag ugpu salug. Sida ngani ni Pidru, ni Huwan, ni Santiyagu, ni Andiris hanggan sida ni Pilipi, ni Tumas, sida ni Bartulumi, ni Matiyu hanggan si Santiyagu kan Alpiyu anak, si Simun (imaw ti pagsabihun makabayan#1:13 makabayan: Si Simun nakasali diman sa gurupu manga Hudiyu maglaban sa manga taga Ruma.), hanggan si Hudas kan Santiyagu anak. 14Pirmi sida tanan magtiripun sa darangin. Una manga babayi napaminsan sa kanda hanggan si Marya kay ina ni Hisus hanggan kay manga patar-ari lalaki ni Hisus.

15Pagka ati katpung nagtiripun maan ti manga patar-ari, manga usa ka gatus may duwapulu. Tinmindug si Pidru sa kanda karaw-an bag-u sinabi niya sa kanda magkun, 16“Manga patar-ari, kailangan tupadun ti nisurat sa Banal Kasuratan kay iinudyuk Ispiritu Banal sa kan Dabid tungkul sa kan Hudas, imaw ti nag-iba sa manga manugdakup sa kan Hisus. 17Kanmi diman waydi kaibahan siya dahil pinili siya ni Hisus hampay minsan diman siya sa kanmi sa buruwatun Panginuun.”

18Kabay may binili si Hudas daga, ibinayad niya tunda ngani pag kuwarta kay tinanggap suhul sa kay binwat kadautan. Nidusmu siya ag nanluput kay tiyan nagluwang kay puna. 19Tunda pag manga nangyari naalaman tanan tawu mag-uli sa Hirusalim. Nakan tunda pag daga kanda iningarnan sa kanda sadili pamagaw Akildama, kay ibug sabihun Madugu pag Daga.#1:19 Madugu pag Daga: Tunda kay ngaran pag daga dahil siyun pag binmuswak kay dugu ni Hudas ngatay dahil ti ibinili pag kuwarta sa siyun pag daga imaw ti kabaydanan sa pagpamatay sa kan Hisus. 20Magkun si Pidru, “Isinurat ngani sa Ribru manga Kanta magkun,

‘Danga yi may mag-uli sa kay balay,

danga yi mag-uli ati una hintay pag manga tawu.’#1:20 Bantayi diman ti Kanta 69:25.

Isinurat waya,

‘Iba maan ti tumanggap sa kay katungkulan.’#1:20 Bantayi diman ti Kanta 109:8.

21-22Nakan ngani kailangan kita magpili kaawat nimi sa magpadakit barita tungkul sa kay pagkabuhi uman ni Hisus. Kailangan tunda pag tawu daan di kaibahan nimi sa kay sitay di waya sa kanta ti Panginuun Hisus, ginan sa kay napatulbaw sa kan Huwan hanggan sa nagbalik siya atag sa langit.”

23Nakan ti manga patar-ari nagpili duwa ka lalaki, si Matyas hanggan si Husi kay usa ka ngaran Barsabas, binansagan diman Hustu. 24Nandarangin sida magkun, “Panginuun, kawu ngani ti makaalam tagipusuun tanan manga tawu. Ipakilala nimu sa kanmi nu naan sa duwa inda ti kanmu pinili, 25hampay siya yi ti kailis sa katungkulan sa pagka-apustul kay tinayakan ni Hudas, pagka siya atag sa rugar angay niya atagan.” 26Bag-u naglunggungan sida atag sa kanda ni Barsabas, nakatama si Matyas. Idinugang siya sa sampulu may usa ka apustul.

Currently Selected:

Binwat 1: HNN

Highlight

Copy