Matta 28
28
Mattə gə taane
(Markus 16.1-8; Luka 24.1-12; Yohana 20.1-10)
1Beetɨ ite fərə piyatɨ da Yawude pɨrə, ka haa kɨɗatə a saarə bətɨ kwamətə, Maryamu dɨ Magdala ka Maryamute hiɗə, a dɨmə a wudə ɓa niyadə taane. 2Itɨngɨn njiya a humuro kɨr-kɨr gə malyene da Həmɨmiye a janga dɨ pwa. Nda zə taane a mgbəngtəngdə faratə a nggəɓəddə a nza nəngrə. 3Naasən ndi malyenəngɨn nə ɓətɨ ɓɨrti. Sɨɓwetɨ dan nə kung pwat-pwat. 4Kala a gə nggɨree kanyi dɨ gɨra taane, təna gə ɗəng ɓətɨ wogi.
5Malyenəngɨn a boyə mandingɨn atɨ, “Ɓe kala aa gəwnə, hɨn leyə atɨ Yesu a mya gbaltən nə hwuna dɨ ɨlə. 6Ɓə tam ga, ɓə maggə we ka myentə ɓətɨ nda boyo. Wam, namə haa nda bədə. 7Wudəm tan-tan boyəmə lagbe dan atɨ, ‘Ɓə maggə we ka myentə, sɨndə a humwa kəwnə dɨ muɗə vor Galili. Hwun ɓa nan a hangɨn.’ Hɨn səwnə.”
8Mandingɨn a mɨn gə taane tan-tan, ka kala kat ka hanɨngtə. Təna gyeɓə ɓa dɨ boyə lagbe dan. 9Tee ɗəng, təne dɨ gyeɓi, təna peyə ka Yesu. Nda sarən atɨ, “Hɨn wunakəwnə.” Təna shi a gyerə humwasən a kər mbwayingɨn a kalan-gbəətə. 10Yesu a sarən atɨ, “Ɓe kala aa gəwnə. Wudəm boyəmə ji-nuwogi a lagbe de təna zə vor Galili, a hangɨn tən ɓa ne.”
Nggɨre a bwe sa ɗa
11Ite mandingɨn a kɨt tɨfe a dɨ muɗə, imi dɨ vor nggɨree gɨra taane a pɨrə vor vɨratə a boyə kɨsehəmi kpan-kpanye shee ɗa kat. 12Ite kɨsehəmingɨn ka mi kpanye da Yawude a peyə a shalasə le, təna ɗa kuta, a və nggɨre kaɓa taa kpan. 13Təna sarən atɨ, “Boyəmə ɓwaare atɨ, ‘Ite hine dɨ sheni, lagbe dan a shi ka tukotə a hɨr wongɨn.’ 14Ləngɨn kana zə humwaa nggwamna, hin lee la hin ɓa boyən nda mwakenə, asə aa dɨ gəwnə.” 15Nggɨrengɨn a luu taangɨn a ɗa mgban ɓətɨ mya fyel-kwakingrən. Mya bwe ləngɨn kat a waka Yawude, baa a dɨma a fəranə supo.
Lyentɨ gbakte Yesu a ɗaka lagbe dan kaarə
(Markus 16.14-18; Luka 24.36-49; Yohana 20.19-23; Lyenta 1.6-8)
16Tən lagbenə bəw a mbiɗi-hiɗə a muɗə vor Galili, a nggɨrə nə mote Yesu a boyərən atɨ a təna wudə də. 17Ite təna nan, təna kalan-gbəətə, nagi ka sate atɨ imi aa mwa atɨ sɨnə. 18Yesu a shi hakarən a sarən atɨ, “Gəte kat gaarə a vor pwa, kat ka itɨnə a vɨratə, mye vitɨrə. 19Gə-angɨn wudəmə nagi ndo njiya hwuna kənə mingɨn shee, təna gəə lagbe de, hwuna ɗarən batisɨmatə a vor kwakɨ Baatə, ka hɨnggə Nze ka hɨnggə Pitɨ Ɗəmɗəmtə. 20Hwun ta kənərən koddə ləməgyee na vəwnə kat. Mbak-mbak hɨne ɓwaa kəwnə baa kpawtɨ vɨratə.”
Currently Selected:
Matta 28: bcy
Highlight
Share
Copy
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
