Markus 1
1
Yohana nzə-fwa humwa ta Yesu
(Matta 3.1-12; Luka 3.1-9,15-17; Yohana 1.19-28)
1Tiyatɨ ləmə feme da Yesu Nze da Həmɨnpwa, Ma Həmɨnpwa a Yaɓwarən nə anə.
2Mye doro vor malɨmta kpale Ishaya atɨ,
“Zə niyi hɨnə ɓa lyen malyene de,
a sɨnə nzə-fwa humwatɨ dəw,
sɨnə ɓa ɗəwdə tɨfe.”#1.2 Naasə: Malakai 3.1.
3“Kormə mangɨn nə
dɨ wagaha a vor kaake atɨ,
‘Ɗamdə tɨfe da Həmɨnpwa,
sɨnə ɗadə nzaasəwnə,
naa tɨfe a tɨɗə shant.’ ”#1.3 Naasə: Ishaya 40.3.
4Gə-angɨn Yohana nzə-ɗa batisɨmatə a shi ta hiwa ɓwaare a kaake atɨ təna por-njiya gə mya ɗarən batisɨmatə ka haɓye, gə Həmɨnpwa a nggurərəngə səhase darən. 5Kat dɨ njiya Yawudiya ka vɨra Urshelima ɓwaare a dɨmə a zə hakan. Tən ta bwe səhase darən, ndi Yohana ta ɗarən batisɨmatə a gbɨnuwo Urdun. 6Sɨɓwete Yohana a dɨ kala mya ɗatɨrən ka showo lukwaptə, nda ɓwe kada-mgbangɨn ka hinwa mya ɗa ka sɨlare, awyi ka njumwati nda dɨ zɨmə. 7La nda duwa hiwa kan nə atɨ, “Ama nee də ɓaga shi dɨ bee, mangɨn gətɨ dan pɨrgə hɨnggi, nagi salaki hwanye dan nə, hɨn taa kəni na kupo a paragərən. 8Hɨn na dɨ ɗəwnə batisɨmatə ka haɓye ɓəmbə, mangɨn ndi ɓa ɗəwnə batisɨmatə ka Pitɨ Ɗəmɗəmtə.”
Yohana a ɗa Yesu batisɨmatə
(Matta 3.13-17; Luka 3.21-22)
9A vor bətɨngɨn Yesu a maɗa dɨ Nazarat a vor njiya Galili, a shi haka Yohana nda sɨ ɗan batisɨmatə a gbɨnuwo Urdun. 10Sɨne dɨ nggɨragə vor haɓye, də a hangɨn nda naa pwa nza wunə bwang, Pitə a janga a nəngɨn ɓətɨ nji-gulati. 11Korme dɨ vor pwa a sa atɨ, “Nze de nə anə, a na dɨ mwo, haa a dɨ nɨnyi kan kɨr-kɨr.”
12Dɨ hangɨn Pitɨngɨn a koɗə kan a zəkan a vor kaake, 13nda nza vor kaakəngɨn baa bətə bəwtə fwat, Shetan Nzə-tɨmbɨrha nee dɨ kanarən. Sɨne də she a waka sɨkaake, malyenye da Həmɨnpwa mgban nee ɓwaa kan dɨ gwadən.
Yesu a tiya lyentə a Galili
(Matta 4.12-17; Luka 4.14-15)
14Mye ɓə ɗɨkdə Yohana a gbərəwe, Yesu aɓə mɨnə Galili ta hiwa ka ləmə feme da Həmɨnpwa. 15Nda sa atɨ, “Fəre kənə. Həmne da Həmɨnpwa shi gbyel kəwnə. Porom-njiya ka səhase dəwnə hwuna mwaka ləmə feme da Həmɨnpwa!”
Yesu a waga i ji-kəɗə fwat
(Matta 4.18-22; Luka 5.1-11)
16Ite Yesu woyo dɨ pɨri dɨ basa kwaka gərə Galili, nda naa Siman ka mufəngɨn Andrawus dɨ vyet ndwambe darən gə tən ji-kəɗə. 17Nda sarən atɨ, “Wam, kwaɗe mi, hɨn ɓa gəədəwnə ji-kəɗə 'ye ɓawa kasa ɓwaare.” 18A hangɨn ɗəng, təna ɗaka ndwambye darən a koɗən. 19Yesu ɓe nggəɓəsə ɓyeləng nda mɨna naa Yakubu nze da Zabadi ka mufəngɨn Yohana a vor koombotə təne dɨ ɗadə ndwambye darən. 20Nda watɨrən, ta ɗaka baagərən Zabadi ka ji-kəɗe dan a koɗən.
Yesu a dɨmdə pɨla nzə-dwatə
(Luka 4.31-37)
21Təna muɗə dɨ vɨra Kafanawum. A fərə piyatɨ da Yawude, Yesu a pɨrə vɨnə kəndəshe ta kənə ɓwaare shee. 22Ɓwaare a ɗa ndəle ka wule kəndəshe dan gəkɨlə nda dɨ kəndəshe ka gətə, aa ɓətɨ ji-lee kəndə ɓashita Musa a dɨ kəndəshe. 23Də a hangɨn ama ka pɨla nzə-dwatə a sɨsən, a nzaa wa kawahəme, 24“Ə'əi! Yesu dɨ Nazarat, mɨnə pedəm kəw hye ɓə shi ɓa tənəə denə? Di hɨn leera, hyenə Ma ɗəmɗəme da Həmɨnpwa!”
25Yesu a mgbaltən a gɨrarən a san atɨ, “Gbə kwaamɨnga, hye dɨmagə sɨsən!” 26Pɨlangɨn a baladə mangɨn a dɨmgən ka kawahəme. 27Ɓwaaree a hangɨn kat a ɗa ndəle tən ta ɗiyəsə atɨ, “Gba, ndawulasə anə? Supo i kənshi hwelinə ka gətə! Baa nda dɨ gɨra pɨle təna mwa a kɨltən.” 28Ləməgye a nəngɨn a fɨlə a mbəgə njiya Galili kat.
Yesu a gwadə ɓwaare hananang
(Matta 8.14-15; Luka 4.38-41)
29Ite təna dɨmgə vɨnə kəndəshingɨn, ndi Yesu ka Yakubu ka Yohana, təna muɗə hwoda yə Siman ka Andrawus. 30Təna boyə Yesu atɨ, “Shewtɨ Siman ndə bi ka ootɨ haɓi kpalamye.” 31Gə-angɨn nda jip hakarə a dɨ gwadə a kɨt tɨfəngrə ngga maɗə a nza, ootɨngɨn a təkəsə kaarə, ngga maɗə a vərən sɨzɨmtə.
32Ka kaadəngɨn fəre ɓe poro kpalam, ɓwaare a shi ka Yesu ka ji-ootə som-som, baa ka myee pɨle ji-dwatə a pɨrə sɨsərən. 33Mi vɨratɨngɨn a paya kat a kwaamɨ tɨfə hwoɗingɨn, 34Yesu a gwadə ɓwaare furi-furi, myee ka ootə som-som təna piyagə ootɨngɨn. Nda mɨna dɨmdə pɨle furi-furi, nda ɗɨkdə pɨlengɨn tənaa mba byele gə tən leerən.
Yesu a ɗa hiwtə dɨsərən
(Luka 4.42-44)
35Ka haa kpite dung-dung, Yesu a maɗə a ɗaka hwoɗye a muɗə haa taa ama də, a dɨ ɗa hiwtə dɨsərən. 36Siman ka mbiɗitɨ myee təna gə kaarən a dɨmə a zə ɨlsən. 37Ite təna nan, təna san atɨ, “Hii! Hya hye ɗenə yang? A ɓwaare hananang a dɨma ta ɨlta.”
38Yesu a luwa a sarən atɨ, “Zə wam mya zəm dɨ i vɨre gə na dɨ hiwarən mgban. Gə ləngɨn nə shike.” 39Ndi ta sarən she, təna pɨrə dɨ vor njiya Galili a mbəgə hee ta hiwarən a vəni kəndəshe darən a dɨmərən də pɨle ji-dwatə.
Yesu a suɓwagə ma ka ootɨ dagde
(Matta 8.1-4; Luka 5.12-16)
40Aa ɓongə ama ka ootɨ dagde a shi haka Yesu asɨ gyerə njiya a san atɨ, “Hye kana mwa, hye nee ka gətə hye suɓwagi gə dagdenə.”
41Lə mangɨn a oo Yesu, nda ɗifdə tɨfəngɨn a pa mangɨn a san atɨ, “Hɨn mwa, zə gi shet-shet.” 42A hangɨn dagdengɨn a dɨmgə mangɨn, sɨsən a gə shet-shet. 43Yesu a fyel-kwakingɨn twai, 44“Ɓe sa atɨ hye ɓa boyə ama sanə bəngra. Zə wudə hye bɨlə kɨsahəme sɨsa, gə nda bɨlə ɓwaare kat təna leyə atɨ dagde dəw mbəə kat. Beetɨ angɨn hye hama ɓətɨ ɓashita Musa a boyo.” Nda ɓə lɨkədən nda muɗə. 45Shezə mangɨn a pɨrə hiwatə ka ləngɨn, le a ngguro a mbəgə hee baa angɨn a ɗɨkdə Yesu ndaa yə woyo vɨrengɨn bwang. Nda dɨ ɨl haa taa ɓwaare də a muɗə də. Kat ka angɨn ɓwaare a paya dɨ hee som-som a shi hakan.
Currently Selected:
Markus 1: bcy
Highlight
Share
Copy
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
