Marku 4

ARBAITUSPAGINAT JUMALAN VALDUKUNDAH NÄH 4:1-34

Kylväi

(Matf. 13:1-9; Luk. 8:4-8)

1Iisus tuli myös opastamah järven rannale. Hänes ymbäri kerävyi muga äijy rahvastu, ga Hänel pidi mennä veneheh. Häi istui venehes järvel, a rahvasjoukko oli rannal. 2Häi opasti heidy äijäh dieloh arbaituspaginoin vuoh.

Opastajes Häi sanoi heile nenga: 3«Kuulkua! Mies lähti kylvämäh. 4Konzu häi kylvi, erähät siemenis kirvottih dorogupieleh, i linnut tuldih da syödih jyvät. 5Erähät kirvottih kivikkökohtah, kus oli vähä muadu. Terväh net nostih orahale, ku ei olluh muadu muga syväh. 6No konzu nouzi päiväine, se polti orahat, i net n՚äivistyttih, ku niilöil ei olluh juurii. 7Erähät kirvottih ohtoloin keskeh, ohtoit kazvettih da salvattih orahat, ei niilöis suadu sualistu. 8No erähät jyvis kirvottih hyväh muah. Net nostih orahale, kazvettih i annettih sualis, kudai kolmekymmen, kudai kuuzikymmen, kudai sada jyviä.» 9I Häi sanoi: «Kel on korvat, se kuulkah!»

Mindäh Iisus pagizi arbaituspaginoil?

(Matf. 13:10-17; Luk. 8:9-10)

10Konzu Iisus jäi yksinäh, kaksitostu opastujua da muut Hänenke olijat kyzyttih nämih arbaituspaginoih näh. 11Häi sanoi heile: «Teile on annettu tiediä Jumalan valdukunnan peittodielo, no toizile, ulgopuolizile, kai tulou arbaituspaginoin kauti,

12ku hyö kaččojen kačottas,

no ei nähtäs,

kuunnelten kuultas,

no ei ellendettäs,

da ku hyö ei kiännyttäs Jumalan puoleh

da ei suadas prosken՚n՚ua.»

Arbaituspaginan sellitys kylväjäh näh

(Matf. 13:18-23; Luk. 8:11-15)

13Sit Iisus sanoi: «Ku työ etto ellendä tädä arbaituspaginua, ga voittogo ellendiä toizet arbaituspaginat? 14Kylväi kylväy sanan. 15Dorogupieleh kylvetty siemen on rahvahah näh, kudamat kuultah sana, no tulou sattan da koppuau sen, mi heih oli kylvetty. 16Kylvö kivikkökohtah on niilöih näh, kudamat sanan kuultuu kerras otetah se vastah hyväl mielel. 17No heis ei ole juurdu ičes, sendäh hyö kestetäh vai kodvaine, a ku tulou ahtistus libo painandu sanan täh, sit hyö kerras hyllätäh se sana. 18Sit on siemen, kudai kylvettih ohtoloin keskeh. Se on niilöih näh, kudamat kuultah sana, 19no kudamis sana ei tuo andimii, ku tämän muailman huolet, eloloin suvaičendu da muut mielitahtot heijän sydämeh puuttuhuu täpätäh sana. 20A hyväh muah kylvämine on ristikanzoih näh, kudamat kuultah sana da otetah se vastah. Hyö annetah hyvä sualis, kudai kolmenkymmenen-, kudai kuvvenkymmenen-, kudai suankerdaine.»

Sanan kuundelemine

(Luk. 8:16-18)

21Iisus sanoi: «Eihäi lampua tuvva pertih vakan libo magavosijan alle pandavakse? Nägevihhäi se pannah! 22Ku mi ollou peitos, ga vai sikse, ku jiäviekseh. Ku mi ollou peitetty, ga vai sikse, ku tulla nägevih. 23Kel on korvat, se kuulkah!» 24Vie Häi sanoi heile: «Otakkua vardeh, midä kuuletto. Mittumal miäräl työ miäriättö, moizel miärätäh teile da vie ližätäh. 25Kel on, sille annetah, kel ei ole, sil otetah segi, mi hänel on.»

Ičessäh kazvai vil՚l՚u

26Iisus sanoi: «Tämänmoine on Jumalan valdu. Mies kylväy siemenen muah. 27Häi yöl maguau, a päiväl nouzou, a siemen orastau da kazvau, a häi ni tiijä ei, kui. 28Mua andau sualehen ičessäh, enzimäi korren, sit tähkän, sit tävven jyvän tähkäh. 29Konzu vil՚l՚u on sualistunnuh, kerras häi työndäy leikkuajat, ku leikkuanduaigu on tulluh.»

Gorčitsan siemen

(Matf. 13:31-32, 34; Luk. 13:18-19)

30Sit Iisus sanoi: «Mih vie myö voizimmo verrata Jumalan valdua? Mittumal arbaituspaginal voizimmo sanella sih näh? 31Se on ku gorčitsan siemen. Konzu gorčitsan siemen kylvetäh muah, se on muailman siemenis kaikis pienin, 32no muah puuttuhuu, se nouzou da kazvau kaikkii kodipellon kazvoksii suurembakse. Sit kazvetah moizet suuret oksat, ga taivahan linduzet voijah luadie pezii niilöin pilvekseh.» 33Äijil nengomil arbaituspaginoil Häi pagizi rahvahanke sen verran, min hyö voidih kuunnella. 34Arbaituspaginoittah Häi ei paissuh heijänke, no omile opastujile sellitti kai, konzu hyö oldih keskenäh.

SUURET KUMMAT 4:35-5:43

Iisus tyynistyttäy järven

(Matf. 8:23-27; Luk. 8:22-25)

35Illan tulduu senny päivänny Iisus sanoi opastujile: «Lähtekkiämmö toizele rannale.» 36Opastujat jätettih rahvasjoukko, a iče mendih veneheh. Iisus jo istui venehes. Heijänke lähtiettih toizetgi venehet. 37Järvel nouzi suuri bauhu, allot perrettihes veneheh, i se oli jo täyttymäs viel. 38A Iisus magai venehen peräs, pielus piänpohjis. Opastujat nostatettih Händy i sanottih: «Opastai, etgo ni huoles ole, myö uppuommo!» 39Iisus nouzi, kieldi tuuldu da sanoi järvele: «Azetu, ole hil՚l՚ah!» Tuuli hil՚l՚eni, i rodih ihan tyyni. 40Iisus sanoi heile: «Miksebo oletto nengozet varačut? Eigo teil viegi ole uskuo?» 41Suuri varavo otti heidy valdah, i hyö kyzeltih toine toizel: «Mibo miehii tämä on, ku Händy kuunnellah tuuli dai allot?»

Currently Selected:

Marku 4: LIVVI

Highlight

Copy