Maka 2
2
Yesumi ki ange lupawi ali menda ma-epeaisaya ei
(Madiu 9:1-8; Luka 5:17-26)
1Naare mendane einu aomare Yesumi Kapeneame ree anda para wala lekeya ipisaya. Wenaalimi nipuna anda para wala epa aya angele la eiri pamisimiya. 2Gupuma go gole nipu aisaya anda para wenaali waru epa rayasimiya. Go dina, pora gape para ambuna wenaalimi rumbialumbisaya eimi ali komea pirape para menda pa na-lombapa wisaya. Go pa ae para Yesumi angele walisaya. 3-4Yesu go para angele walala-ainya ali malapu alinumi ki ange lupawi ali menda rekena ria ipisimiyapare wenaalinumi anda kerepealumbisaya eimi Yesu repara pope-nae-lisimiya. Go eina mo ali malapu anda kuluna opaisiaoma Yesu aisaya lena andoma pondea ma-siaisimiya. Gupuma monde ki ange lupawi ali rekena kope andima Yesu aisaya lena siainyaisimiya.#2:3-4 Diu wenaali nimuna anda kuluri para ma-paisimiya. So kuluna polameyandare anda warepana oposiaoma puala puaisimiya. Rimba riripu pala pisayandare so anda kuluna oposiaoma pirala pisimiya. 5Mo alinumi Yesumi mo ali ora rambamiliae kone waru wisimiya ei Yesumi andoma monde ki ange lupawi ali para lalore, Na nakio, neme nena koae einu raayosi pereyado, lisaya.
6Go lisayapare gole para pirisimiya Mosesimi Rudule Angele waloaisimiya alinumi nimuna koneme gole aisa pisimiya. 7Go alimiri akepeanda go angele dapae, kone wisimiya. Gode ero lada ara da piri, kone wisimiya. Godeme komea koae einu rambuadore ana pea, kone wisimiya. 8Mo alinumi nimuna pu para go kone wisimiya ei Yesumi ambala kone suma nimu para lalore, Alendana go kone widamepae, lisaya. 9Angele yapa pi eiri aiyapae, lisaya. Mo ki ange lupawi ali para lala ara Nena koae aunu neme rambuari puli, nee rekoma nena yapara ma-ripinya puae. Angele ai yapa peapae, lisaya. 10-11Alina Si Nakimi go suna ara koae aunu rambuape kongapu nipu para wialo wadoae, lisaya. Go eina, monde ki ange lupawi ali para lalore, Neme nee para lalo, lisaya. Rekoma nena yapara ma-ria, nena anda puae, lisaya. 12Monde wenaalinumi andere-ainya ande ali reka puma nipuna yapara ma-ripinyuma anda nane wange wangepu paisaya. Go eina wenaali raayome lee opo andala ara Godena bi ma-andayao minyasiada ara lalore, Go pi eiri koro mendanda ora na-andemae, lisimiya.
Yesumi Lipai misaya ei
(Madiu 9:9-13; Luka 5:27-32)
13Yesu Galili ipa lee repaa lena wala paisaya. Gupuma wenaali raayo Yesu para epa mombelisimiyanda Yesumi nimu para angele walisaya. 14Gupuma Yesu pula ara Alipiasina naki Lipai, mo dakisi muni muaisimiya lena pirinya, Yesumi andoma nipu para lalore, Na kou nane raluma ipuae, lisaya. Go angele lisayanda Lipai rekoma Yesuna kou nane raluma paisaya.
15Werepe nane Yesu Lipaina anda para piri enda nala pirisaya. Dakisi muni muaisimiya alinu andapu pange wenaalinumi raname waru na-kome wenaalinu pange nipuna kou nane raluaisimiya alinu pange mo anda para pambo piri Yesu rapu enda nisimiya. Go dina gurupa go au pi wenaalinu andapumi nipu raluma pamuaisimiya. 16Gupuma Mosesimi Rudule Angele waloaisimiya alinu mendane einu Parisi alinu gole aisimiya. Go alinumi Yesu mo dakisi muni muaisimiya alinu pange wenaalinumi raname na-kome wenaalinu rapu enda nala pirisaya ei andala ara nipuna kou nane raluaisimiya alinu para lalore, Akepeanda Yesumi mo dakisi muni muaisimiya alinu pange wenaalinumi raname na-kome wenaalinu rapu mendaa para enda no piapae, lisimiya. 17Yesumi monde lame angele pangoma nimu para lalore, Yainya na-kome wenaalinumi dokeda ali para na-peleme, lisaya. Mo yainya pambe wenaalinu komea peleme, lisaya. Epe au puaeme wenaalinumi kone menda perekeyao winyayanda wi da na-epawa, lisaya. Koae koae au puaeme epe auri wenaalimi rana na-komeme wenaali mendame kone menda perekeyao winyayanda wi da epawa, lisaya.
Gode repara kone sulameyanda koro menda enda na-noaisimiya eina angaa misimiya ei
(Madiu 9:14-17; Luka 5:33-39)
18Naare mendana Dionina kou nane raluaisimiya alinu pange mo Parisi alinumi Gode para kone sulameyanda koro menda enda na-ne ao-ala pisimiya. Go eina mo wenaalinumi Yesu para ipuma lalore, Mo Dionina kou nane raidame alinu pange mo Parisi alinuna kou nane raidame alinumi enda na-ne ao-aemepare nena kou nane raidame alinumiri go au na-pimipae, lisimiya. Go eiri, akepeanda na-pimipae, lisimiya. 19Yesumi angele yangi liada ara lalore, Nimina konemere wena lamuala ara pambala endana ipula wenaali reame pa koma pena kone widamepae, lisaya. Go eiri ora ana na-pea, lisaya. Mo wena pena mida ali rapu alimindare nimu reame na-koma peleme, lisaya. 20Nimumi Gode para kone sulame enda na-ne ae auri wena reali naare mendana mendame karu pelea dina enda na-ne ao-alimi, lisaya.
21Ali mendame ambaisena aka liripili eina ralao rambuduamere pena aka runguli na-milia, lisaya. Nipumi pena aka runguli ralaoma rambudiandare, mo pena aka runguli kiruru ala ipula ara monde ambaisena aka wala liripiama ma puma pondea ora andapu ma-sialia, lisaya. 22Gurupare ali mendame ambaisena mena yongaleme wari karumbi para kanga waini ipa na-koya pambelea, lisaya. Go au piliandare mo pena waini ipa rari pupula ara mo ambaisenande mena yongale karumbi ma-koyalia, lisaya. Go au piliandare mo mena yongale karumbi padulalumboma mo mena yongale karumbi rongona mo penande waini ipa rongona koyalia, lisaya. Go einare pena waini ipa rongona koyalia, lisaya. Go einare pena waini ipare pena mena yongale karumbina koya pambelea, lisaya.
Diu wenaalinuna koro piri naarena pupudengi nala eina lora pisimiya ei
(Madiu 12:1-8; Luka 6:1-5)
23Yesuri nipuna kou nane raluaisimiya alinu rapu Isaraelimi mandu rangala pae wenaalinuna koro piri naare komeana guni mapuna puma konda mipi pu misimiya. 24Gupumare mo Parisi alinumi Yesu para lalore, Anda, lisimiya. Mo koro piri naarena pape-nae au pula ara pimi. Akepeanda pimipae, lisimiya.
25Yesumi nimuna angele yangi liada ara lalore, Deipidimi reame komala ara pisaya eiri koro mendanda na-yarepelemepae, lisaya. 26Apiasa nipu Gode repara alinau puaisimiya alinuna kalu ali pa aisaya dina, kini Deipidi pange nipuna endali mini alinu nimu raayo reame komisimiya. Go au pisimiyanda Deipidi nipu komea mo Godena anda para konda pambala paisaya. Gupuma Deipidimi Godena bi loma wisaya yaakopi palawa muma nipuna alinu para alisayanda nimu raayosimi pa nisimiya. Go palaware Gode repara alinau puaisimiya alinumi komea nape ei lisayapare nimu reame ora komala ara pa nisimiya. Go ei pange Godena angele rungulala ara pisimiya.
27Gupuma nimu para lalore, Godeme ririna ambala wenaali waruma ainyalomare nimuna koro pida peme naare werepe nane winya lea, lisaya. Mo koro pia naare ririna ambala winyalomare werepe nanere wenaali koro pirinya na-lea, lisaya. 28Go eina Alina Si Nakiri mo koro pia naarena Reali ayae, lisaya.
Currently Selected:
Maka 2: POLENT23
Highlight
Share
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
