Markusu 6

Nabi nam Kura Aka Nggakur

(Mat 13:53-58; Luk 4:16-30)

1Yɛsu ngyar vui nda ka tǝra akwa mǝlmǝrni kaka ndzǝr nuwurni. 2Ata vǝr Sǝbdu dzǝ baditsǝni hyipɛ akwa fǝr vǝkǝr sǝlai. Ndzǝ hang akwanda, antǝ sakatǝ dar ngati tǝni, sanga dar ndatǝdzi.

Dar ka yuwɛ, “Dzǝ ɓui sanga sǝni ama?” Dzǝli bǝrkawakur madi tǝ ndǝ lari? Mǝmi tǝ dzǝ ada 'yati sǝr ndati yarni? 3“Əni adi ani kafinta zǝr Maryamu, zǝr angǝra Yakubu, Yusufu, Yahuda aka Simaun ni wɛ? Adi nkwaiyir angǝri ani ada ndzai akwani wɛ?” Antǝ dar ngǝla tǝni.

4 # Yaw 4:44 Yɛsu nkǝrɛ ala dar, “Ɗiɗi akwa mǝlmǝrni, akwa ntsa kulfǝrni ba aivi aharni ani tǝ nabi kura aka sǝlai.” 5Dzǝ ta mǝzi 'ya sǝr ndati akwanda wɛ, ama dzǝ pukǝr tsiyari ala ndzǝ nam kura kalang dzǝ ka mbǝti tǝ dar. 6Dzǝ ndatǝdzi ata kǝra kura hamnta dzǝrǝr dar.

Yɛsu Hyanǝba Ndzǝ Kumɛ Kapu Sǝɗɛ ni

(Mat 10:5-15; Luk 9:1-6)

Antǝ Yɛsu mwari akwa mǝlmǝ nam akwanda tǝ dzǝ ada hyipɛ ala ndzi. 7Dzǝ kǝga ndzǝr nuwurni kum kapu sǝɗɛ ka hyanti tǝ dar sǝsǝɗɛ. Dzǝ la dar wada ata kǝra mambǝl nam kulɗa yarɛ.

8Dzǝ gha ala dar, “Ta gǝri ta kǝl su ata dzɛ akwa buraburar gǝri, tar zuwa—ta gǝri ta kǝl mantsǝkǝl, wala ngǝrkǝr, wala kwapa akwa ghyǝpu. 9Hatamɛ ɓǝɓai ama ta gǝri ta kǝl lǝkutu damwa.” 10“Sakatǝ gǝri livi akwa kǝi, ndziyamɛ akwa kǝi nda tar ma vǝr tǝ gǝri ngyar vui nda. 11#'YaSu 13:51#Luk 10:4-11Ma gǝri si akwa mǝlmɛ nam kura ndzǝ ta dlu tǝ gǝri wala dar ta sǝthlǝmɛ ala gǝri wɛ, ngyaramɛ vuiyari ka gǝr ɓunta bǝr-bǝr nam ata thlǝla gǝri, ǝni ata ndzai ala dar sǝr ɗǝmnya apǝri, Hyal ata hakatsǝni tǝ dar.”

12Antǝ dar lǝba ka nkǝr labar ala ndzi apǝri ka dar tubi ka ngyar bikǝr dar. 13#Yak 5:14Dar kǝdlǝba mambǝl nam kulɗa, ka pukǝr mal ata kǝra ndzǝ nam kura kalang ba dar ka ɓui mbǝtǝdzi.

Ndǝ Dǝlnta Kǝra Yawhana Ndǝr 'Ya Bamtizǝma ni

(Mat 14:1-12; Luk 9:7-9)

14 # Mat 16:14; Mar 8:28; Luk 9:19 Kuhyi Hirudus ngati sanga sǝni, akuya thlǝma Yɛsu kikilntadzi akwa sanga vui. Ndzǝ laka ada gha apǝri, “Yawhana Ndǝr 'Ya Bamtizǝma dzǝ ani tara hyati akwa ntǝnti, ani tara 'ya tǝ dzǝ aka dǝnar 'ya sǝr ndati yarni.”

15Ndzǝ laka ada gha apǝri, “Dzǝ Iliya.”

Ndzǝ laka ada gha, apǝri, “Dzǝ nabi, apa dukwa nabi yarɛ nam watsi.”

16Sakatǝ Hirudus ngati, dzǝ gha, “Dzǝ dza Yawhana Ndǝr 'Ya Bamtizǝma! Yi hau tǝ ndǝ dǝlnta kǝrari ama dzǝ dzakti hyati akwa ntǝnti.”

17 # Luk 3:19,20 Hirudus aka kǝrni ani tara nkǝrɛ ka ndǝ ngǝti Yawhana ka ndǝ hau tsalala akwa thlǝlari ka hau tǝni akwa fǝrsǝna. Dzǝ 'ya ǝni akuya Hiraudiya, mwalar zǝrangǝri Filibusu, nam tǝ dzǝ kǝtǝ. 18Akuya Yawhana faya gha ala Hirudus, “Adi kal-kal tǝ gǝ kǝtǝ mwalar zǝrma wɛ!” 19Antǝ Hiraudiya ngǝzi Yawhana akwa ɗǝfu antǝ dzǝ ada bara ka dzǝ tsi tǝni, ama dzǝ ta mǝzi wɛ. 20Hirudus ada hyivǝr Yawhana akuya dzǝ zǝndi apǝri Yawhana dzǝ ndǝ nam kal-kal tsuwɛ dzǝ ndǝr Hyal, antǝ dzǝ ada wulhǝ tǝni. Dzǝ ada yiɗǝ ka sǝthlǝmɛ alari, kǝlara sakatǝ dzǝ ngati tǝni dzǝ ada damitsǝnidzi.

21Ata dǝnta antǝ Hirudiya ɓui whalɛ. Ata vǝr ɗǝngati yar Hirudus, dzǝ ɗǝmhǝ sǝr sǝmɛ ala ngganggar gumnati, ba ndzǝ ngganggar saudza yarɛ kaka sǝliyir ndǝrkǝmar ndzǝr Galili ni. 22Nkwar Hiraudiya sǝmbwa ka fǝlɛ, ka 'ya sǝɗa ala Hirudus kaka mǝthlǝɓiyirni.

Tǝ kuhyi gha ala nkwani, “Mi tǝ gǝ ada bara ka gǝ ɓui? Yi ata la gǝ kǝlara su tǝ gǝ bara.” 23Dzǝ 'ya alari alkawal nam hang kaka mbǝrɛ apǝri, “Yi ata la gǝ kǝlara sǝ nam tǝ gǝ bara, wala raitar kuhyikurna ma!”

24Tǝ nkwani lǝba ka yu angǝri, “Mǝ tǝ Yi ata bara?”

Angǝri ka sǝnau alari, “Ka gǝ bara kǝra Yawhana Ndǝr 'Ya Bamtizǝma.”

25Nkwani whui ka lǝngui adzǝ kuhyi ka nkǝrɛ, “Yi ada bara ka gǝ lai kǝra Yawhana Ndǝr 'Ya Bamtizǝma akwa kwatǝm!”

26Əni mǝrti tǝ kuhyi ka damitsǝnidzi, ama dzǝ adi ata mǝzi ngǝla alari wɛ akuya alkawal kaka mbǝrɛ nam tǝ dzǝ 'ya akǝma mǝthlǝɓiyirni. 27Dzǝ ka hyanǝba ndǝr tsa ndɛ bǝtu-bǝtu ka dzǝ si aka kǝra Yawhana. Ndǝr tsa ndǝ ni mwar ka dǝlnta kǝra Yawhana akwa fǝrsǝna, 28ba dzǝ ka si akǝr akwa kwatǝm ka la nkwani, nkwani ka la angǝri. 29Sakatǝ ndzǝr nuwur Yawhana ngati sǝ ǝni, dar si ka kǝtǝ saiyirni ka harnta.

Yɛsu Ghǝiyati Ndzǝ Kumthlani Kumɛ ka Ntufu ni

(Mat 14:13-21; Luk 9:10-17; Yaw 6:1-14)

30Ndzǝr hya yarni tsaɓtsǝnidzi adzǝ Yɛsu ka nkǝrɛ alari sanga sǝ tǝ dar 'yati ba sǝ tǝ dar hyipɛ. 31Antǝ kadǝbar ndzǝ hang ada si ka tǝra nam kura dar awa ɓui saka ka sǝm sǝr sǝmɛ, dzǝ ka nkǝrɛ ala dar, “Ngyar ka mur tǝra akwa vui nam tǝ muri ɗiɗi ka mur ghǝrbadzi.”

32Antǝ dar ka tǝra akwa sar dar tǝ kǝr dar akwa vui nam tǝ dar ɗiɗi. 33Ama ndzǝ hang wula sakatǝ dar ada tǝra ka ngyar vui nda, antǝ tǝkǝma dar ka zǝndi apǝri dar. Ndzǝ hang sǝba akwa mǝlmɛ pam-pam ka whuiya lǝkǝma, ata dai ka si kǝmata Yɛsu kaka ndzǝr nuwurni. 34#Tsǝ 27:17; 1Kuh 22:17; 2Sǝt 18:16; Izǝ 34:5; Mat 9:36Sakatǝ Yɛsu sǝba akwa sar ka wuti dlamiyir ndzi, dzǝ ka nga kalhur dar, kadǝbar dar apa tǝma yarɛ nam kura aka ndǝr ɓǝla, tǝ dzǝ baditsǝni hyipɛ ala dar sǝ hang.

35Sakatǝ tsǝtsi angwa ɗi, ndzǝr nuwurni si adzǝni ka nkǝrɛ, “Saka kǝ kwatsǝni, antǝ vui ni pǝɗǝm ta mǝlmɛ. 36Hyantamɛ ndzǝ ni atǝra ani ka dar mǝzi lǝkwa mǝlmɛ nam tara dlǝti di ni kaka mǝlmǝ nam nkyǝnkyiɗu yarɛ ka dar ɗǝlba sǝ nam tǝ dar awa sǝmɛ.”

37Ama dzǝ ka sǝnau, “La daramɛ sǝ nam tǝ dar awa sǝmɛ.”

Dar ka nkǝrɛ alari, “Gǝ ta zǝndi apǝri ata kǝtǝ kudzǝghɛ adzǝ kwapar kǝthlǝrǝr hya ntsisu kama muri ata ɗǝlba sǝr sǝmɛ ala sanga ndzǝ ni wɛ?”

38“Takwara yiɗau tǝ gǝri akari?” tǝ dzǝ yuwɛ. “Mwaramɛ ka gǝri wula.”

Sakatǝ dar ɓui, dar nkǝrɛ, “Ntufu—aka kulfa sǝɗɛ.”

39Antǝ Yɛsu nkǝrɛ ala ndzǝr nuwurni ka dar hau ka ndzǝ ni ka dar ndzai akwa albwa yarɛ ata kusar miɗaku. 40Ani dar ka ndzai akwa albwa yarɛ kumthlani ba ntufuthlani. 41Yɛsu ka kǝtǝ takwara ntufu aka kulfa sǝɗǝ ni ka haɓǝtǝ kǝrari atahyal, dzǝ ka usar Hyal ba dzǝ ɓǝgǝlu takwara yarni. Antǝ dzǝ ka la ndzǝr nuwurni ka dar ndǝghǝnta ala ndzi. Dzǝ ndǝghǝi kulfa sǝɗǝ ni yɛ akwa ntsa dar sang. 42Kǝlara ndɛ sǝm ka ghǝi. 43Antǝ ndzǝr nuwurni tsaɓtsǝni wulna kum kapu sǝɗɛ nam tǝ dar sǝm ka mbi ɗǝvɛ aka kulfa ni. 44Hangkur sǝli nam tara sǝm sǝr sǝmɛ ni dar kumthlani kumɛ ka ntufu (5,000).

Yɛsu Mwari ata Kǝra Yimi ni

(Mat 14:22-33; Yaw 6:15-21)

45Tǝkǝma Yɛsu hau ndzǝr nuwurni ka lǝkwa sar ka lǝkǝmari atǝra akwa Bathsaida, sakatǝ tǝ dzǝ salamtsǝni dlamiyir ndzi. 46Aghǝla tǝ dzǝ pwarnta ndzi dzǝ mwari ati ata ngwama paya ka 'ya aduwa.

47Sakatǝ tǝhaku tara 'ya, sar ni ata ɗǝfa manda, sakatǝ Yɛsu ɗiɗi ata dai. 48Dzǝ wuti apǝri ndzǝr nuwurni ada sa bwanai akwa ngur sar akuya sambar ada damitsǝni tǝ dar, antǝ akwa dabwa saka makǝr aka nkwar kula-kula antǝ dzǝ ada si adzǝ dar. Apa tǝ dzǝ ada bara kwatsǝni tǝ dar, 49ama sakatǝ dar wula tǝni ada mwari ata kǝra yimi, dar dzamɛ apǝri dzǝ mambǝlǝr ndɛ. Dar ka ndǝri lǝlɛ, 50kadǝbar sanga dar kǝtǝ hyivǝr sakatǝ dar wula tǝni.

Yɛsu ka labar ala dar apǝri “Ta gǝri ta damitsǝnidzi, ǝni yɛ, ta gǝri ta hyivǝr mai!” 51Antǝ dzǝ lǝkwa sar kaka dar, antǝ sambar ka 'ya kǝɗǝk. Ndzǝr nuwurni ka ndatǝdzi sang, 52kadǝbar dar ta ngaba karabur la sǝr sǝmɛ ala ndzi kumthlani kumɛ ka ntufu ni wɛ; akuya tǝ ɗǝfa dar ndzi ɓaɓal.

53Dar fǝlba manda ni ka si ata dai akwa diyir Ganisarat, tǝ dar ka mbwai sarǝr dar. 54Tǝ dar sǝba akwa sar ni, tǝkǝma ndzǝ mǝzi ka zǝndi Yɛsu. 55Antǝ dar baditsǝni whuwhui akwa diyari, akwa kǝlara vui tǝ dzǝ lǝkwa, dar ada mwari alari aka ndzǝ nam kura kalang ata kǝtsǝr dar yarɛ. 56Ba kǝlara vui tǝ Yɛsu mwari—alǝkwa mǝlmɛ nkyǝnkyiɗu, mǝlmɛ nam ngga-ngga kaka vui damwa yarɛ—dar ada vi ndzǝ nam kura kalang akwa vui kasuwa. Dar ada kǝgyǝ tǝni ka dzǝ ngyar tǝ dar ka dar tsǝkwar nya lǝkutǝrni, ba sanga ndzǝ nam tara tsǝkwar tǝni dar ada mbǝtǝdzi.

Currently Selected:

Markusu 6: CKL

Highlight

Copy