Markusu 5

Yɛsu Mbǝti Ndǝ nam Aka Mambǝl nam Kulɗa

(Mat 8:28-34; Luk 8:26-39)

1Yɛsu kaka ndzǝr nuwurni ngǝmba tǝbwanda mandar Galili, akwa diyir Garasina. 2Sakatǝ Yɛsu sǝba akwa sar, dzǝ kǝɓai aka ndǝ laka tara sǝba akwa bǝri kulɛ, ndǝ ni dzǝ aka mambǝl nam kulɗa akwa dzari. 3Dzǝ ada ndzai akwa ntsa kulɛ, ndǝ adai nam awa mǝzi mbwai tǝni wala aka tsalala pǝrta wɛ. 4Akuya ka hang tǝ ndǝ ada mbwai tsiyari ba thlǝlari aka tsalala, ama dzǝ ada dlǝnta ka tsanta ata thlǝlari. Ndɛ adai nam aka dǝna awa mǝzi ngǝitsǝni tǝni wɛ. 5Tsǝtsi aka vǝri dzǝ ada nuɗɛ akwa ntsa kulɛ aka vui paya-paya, tǝ dzǝ ada tuwa ka tadǝr kǝrni aka paya.

6Dzǝ pǝɗǝm sakatǝ dzǝ wula Yɛsu, dzǝ whui ka dla tǝ ɓungyɛ akǝmari, 7antǝ dzǝ ka tuwa aka dǝna, “Yɛsu Zǝr Hyal Nam Ati! Mi tǝ gǝ ada bara aka yɛ? Ka Hyal, Yi ada kǝgyǝ tǝngɛ ta gǝ ta lai bwanai!” 8Dzǝ gha ǝni akuya Yɛsu gha alari, “Mambǝl nam kulɗa, ka gǝ sǝba akwa ndǝ ni!”

9Antǝ Yɛsu yu tǝni, “Mǝ thlǝma gǝ?”

Ndǝ ni ka sǝnau apǝri, “Thlǝmawai Dlami, akuya yar hang!” 10Antǝ dzǝ lǝkǝma aka kǝgyǝ Yɛsu ta dzǝ ta kǝdlǝ mambǝl nam kulɗa yarni ka ngyar vui nda.

11Bǝri gadu adai kudzǝghɛ akwanda, ada sǝmɛ ati ata ngwama gar. 12Antǝ mambǝl yarni kǝgyǝ Yɛsu apǝri, “Hyanti tǝ yar alǝkwa gadu yarni, ka yar lǝkwa kuta dar.” 13Dzǝ ngyar tǝ dar tǝ mambǝl nam kulɗa yarni sǝba akwa ndǝ ni ka lǝkwa gadu yarni. Sanga bǝri gadu yarni apa kumthlani kumɛ ka sǝɗɛ, dar whui alǝghǝl ata kusara paya ka pudzi alǝkwa manda ka ntsǝghǝldzi.

14Ndzǝ nam ada ɓǝla gadu yarni whui ka kikil labar ǝni akwa mǝlmɛ kaka vui damwa yarɛ nam tara dlǝti tǝni. Ndzǝ lǝba ka wul sǝ nam tara 'ya. 15Sakatǝ dar si adzǝ Yɛsu, dar wula ndǝ nam aka mambǝl nam kulɗa hang akwa dzari ni. Dzǝ ada ndzai akwanda tara hatǝ kari aka hankalari kal-kal, antǝ dar ka hyivǝr. 16Ndzǝ nam tara wula mwar ka nkǝrɛ ala ndzi ata kǝra sǝ nam tara 'ya ata kǝra ndǝ nam aka mambǝl nam kulɗa ni, ba ata kǝra gadu yarni. 17Antǝ dar ka kǝgyǝ Yɛsu ka dzǝ ngyar diyir dar.

18Sakatǝ Yɛsu ada lǝkwa sar, ndǝ nam aka mambǝl nam kulɗa ni kǝgyǝ tǝni, “Ngyar ka Yi nu tǝngɛ!” 19Ama Yɛsu ta yiɗɛ alari wɛ. Ata vuiya ǝni, dzǝ gha alari, “Mwara livi akwa ntsa ndzǝr ngɛ ka gǝ gha ala dar sǝ nam tǝ Thlaku tara mǝrti ala gǝ aka ɗakur nam tǝ dzǝ ada 'ya ala gǝ.” 20Ani ndǝ ni ka tǝra ka baditsǝni gha akwa Dikapaulis ni#5:20 Nam ani, Mǝlmɛ Kumɛ yarni. ada nkǝr hangkur sǝ tǝ Yɛsu tara 'ya alari. Ba sanga ndzǝ ka ndatǝdzi.

Nkwa Ntǝnti ba Mwala nam Kura Kalang

(Mat 9:18-26; Luk 8:40-56)

21Yɛsu dzakti fǝlba aka sar ka mwari adzǝ ngwama manda, adzǝ ngwama manda ni dlamiyir ndzi hang tsaɓtsǝnidzi adzǝni. 22Yayirus duku akwa ntsa ndzǝ ngga-ngga akwa fǝr vǝkǝr sǝlai ni. Sakatǝ dzǝ wula Yɛsu, dzǝ panyi kǝrni ata thlǝlari, 23ka kǝgyǝ tǝni aka dǝna apǝri, “Nkwarna nkyiɗǝ laka adai kura kalang, Usɛ azǝrɛ ka gǝ pukǝr tsiya gɛ ata kǝrari ka dzǝ mbǝtǝdzi ka dzǝ ndzai kalang!” 24Antǝ Yɛsu ka nuti Yayirus.

Ndzǝ hang yɛ ada mwar kaka dar, nam tǝ dar hang wur-wur adzǝni akwa kǝlara bwa. 25Mwala laka adai nam tara ɗar bwanai aka kasuwar pu masi nǝr fá kum kapu sǝɗɛ. 26Dzǝ ɗar bwanai akwa tsiya likǝta hang nam ada mbǝ tǝni, dzǝ santa kwaparni sang, akuya ka dzǝ ɓui mbǝtǝdzi, kasuwari ada dzagǝdzagi kǝlara saka. 27Dzǝ ngati ata kǝra Yɛsu, antǝ dzǝ ka si aghǝlari akwa ntsa ndzi ka tsǝkwar lǝkutǝrni, 28tǝ dzǝ ada gha ala kǝrni, “Ma Yi ɓui ka tsǝkwar lǝkutǝrni, Yi ata ɓui mbǝtǝdzi.” 29Aghǝla tǝ dzǝ tsǝkwar tǝni pu masi ni ka hyati ata saka duku, antǝ dzǝ ngati akwa dzari apǝri dzǝ mbi aka bwaniyirni.

30Tǝkǝma Yɛsu zǝndi apǝri dǝna laka sǝba akwa dzari, dzǝ ka mbaltǝ kǝrni akwa ntsa ndzi ka yuwɛ, “Wa tara tsǝkwar lǝkutǝrna?”

31Ndzǝr nuwurni sǝnau, “Gǝ wula dlamiyir ndzi tara dlǝti tǝngɛ, kami tǝ gǝ ada yu ndǝ nam tara tsǝkwar tǝngɛ?”

32Ama Yɛsu lǝkǝma aka wul ndǝ nam tara tsǝkwar tǝni. 33Mwala ni ngaba sǝ nam tara 'ya alari, dzǝ ka si aka kǝgǝdzi ka zǝɗi ata thlǝla Yɛsu ka gha alari sanga dzǝrkur. 34Yɛsu gha alari, “Nkwarna hamnta dzǝrǝr ngɛ kǝ mbǝtǝ tǝngɛ. Mwar lapiya, akuya gǝ kǝ mbǝtǝdzi akwa bwaniyir ngɛ.”

35Sakatǝ Yɛsu ada nkǝr sǝ ǝni, ndzǝr hyanti si akwa kǝiyir Yayirus, ndǝ nggar fǝr vǝkǝr sǝlai ni ka gha alari, “Nkwar ngɛ nti. Kami tǝ gǝ ada lǝkǝma aka damitsǝni malǝm ni?”

36Yɛsu ta sǝthlǝmɛ aka sǝ tǝ dar ada gha wɛ, ama dzǝ gha ala ndǝ nggar fǝr vǝkǝr sǝlai ni, “Ta gǝ ta hyivǝr, ka gǝ mbǝrsa.”

37Antǝ dzǝ ata yiɗɛ ka ndǝ damwa mwari aka dza wɛ, tar Bitrusu ba Yakubu aka zǝrangǝri Yawhana. 38Sakatǝ dar tsǝbti kǝiyir ndǝ nggar fǝr vǝkǝr sǝlai ni, Yɛsu kǝ wula ka ngati kuɗahǝr tuwa kaka lǝlɛ. 39Dzǝ lǝmbwa ka nkǝrɛ ala dar, “Kami tǝ gǝri ndatǝdzi? Kami tǝ gǝri ada tuwa? Nkwani ta ntǝ wɛ, dzǝ ata hanyi!” 40Ama dar ka ngusǝ tǝni.

Antǝ dzǝ kǝdlǝba sanga dar, dzǝ kǝtǝ atǝgǝra nkwani aka angǝri aka ndzǝr nuwurni makǝr ka lǝmbwa akwa fǝr tǝ nkwani ada pi. 41Dzǝ ngǝzi tǝni ata tsiyari ka gha alari, “Talita, kumi,” nam ada nkǝrɛ apǝri, “Zǝr nkwa, Yi gha ala gǝ ka gǝ hyati!” 42Nkwani hyati ata saka duku ka baditsǝni mwari akwa kuta fǝr ni. (Fárni kum kapu sǝɗɛ.) Sakatǝ sǝni tara 'ya, dar ka ndatǝdzi. 43Ama Yɛsu nkǝrɛ ala dar apǝri ta dar ta gha ala waima sǝ nam tara 'ya, antǝ dzǝ ka nkǝrɛ laramɛ su ka dzǝ sǝmɛ.

Currently Selected:

Markusu 5: CKL

Highlight

Copy