Yawhana 21

Yɛsu Tsantǝdzi ala Ndzǝr Nuwurni Murfwɛ

1Aghǝla ǝni Yɛsu ɓǝla tsanti kǝrni ala ndzǝr nuwurni ata nya Mandar Tibariya.#21:1 Nam ani, Mandar Galili. Əni ani whal nam tǝ dzǝ tsanti kǝrni: 2Simaun Bitrusu, Tauma (nam tǝ ndɛ ada ka tǝ tǝni tǝ Ɓwalɛ), Nathlaniyal nǝr Kana diyir Galili, ba madar Zabadi, kaka ndzǝr nuwurni yar laka sǝɗɛ, sanga dar atakǝmaduku. 3#Luk 5:5Simaun Bitrusu ka nkǝrɛ ala dar, “Yi ata lǝka tamwɛ.”

Dar ka nkǝrɛ alari, “Muri ata mwari vwam kaka gɛ.” Antǝ dar ka sǝba ka tǝra alǝkwa sar ni. Ama akwa kuta vǝr nda dar ta ngǝti mima wɛ.

4Kula-kula mbǝk, Yɛsu ada hyati ata nya manda. Ama dar ta zǝndi apǝri Yɛsu wɛ. 5Dzǝ ka kǝga tǝ dar, “Dakurai, gǝri adi aka kulfa wɛ?”

Dar sǝnau alari, “A'a wɛ!”

6 # Luk 5:6 Ani Dzǝ nkǝrɛ ala dar, “Pwamɛ lambusǝr gǝri tǝbwar tsisǝma sar ni, gǝri ata ngǝti kulfa.” Sakatǝ dar pwɛ, dar ta mǝzi ndǝrba lambusǝr pǝrta wɛ akuya ka hangkur kulfa nam akwa.

7Antǝ ndǝr nuwur Yɛsu nam tǝ dzǝ yiɗɛ ni nkǝrɛ ala Bitrusu, “Ənǝni Thlaku!” Sakatǝ Simaun Bitrusu ngati apǝri Thlaku, dzǝ hadzǝ lǝkutǝrni nam tǝ dzǝ tara ngunta akwa saka nam tǝ dzǝ ada 'ya kǝthlǝr ni, dzǝ ka ngǝma lǝkwa yimi. 8Laka ndzǝr nuwurni ndari ka si ata nya manda akwa sar, tǝ dar ada ndǝr lambusǝrari, ghǝi-ghǝi aka kulfa. Dar adi pǝɗǝm aka nya gar wɛ, apa thlǝl kumthlani makǝr.

9Sakatǝ dar sǝba ata nya gar, dar wula hahikǝr u'u aka kulfa ata kǝri, ba mantsǝkǝl.

10Yɛsu nkǝrɛ ala dar, “Azǝramɛ aka nakuma kulfa nam tǝ gǝri ngǝzǝ kulini ni.”

11Simaun Bitrusu ka fǝlti sar ka ndǝrti lambusǝr tamwɛ ndari ata nya gar, ghǝi-ghǝi aka kulfa nam ngga-ngga dar 153. Wala ahani kaka hangkur kulfa nam akwa, lambusǝr tamwɛ ndari ta thlǝkwantadzi wɛ. 12Yɛsu ka nkǝrɛ ala dar, “Azǝra sǝmamɛ ɗǝvɛ.” Akwa ntsa ndzǝr nuwurni nda ndǝ nam tara mbwai ɗǝfu ka yu tǝni, “Gǝ wa?” adi wɛ, kadǝbar dar zǝndi Dzǝ Thlaku. 13Antǝ Yɛsu ka si ka kǝtǝ mantsǝkǝl ndari, dzǝ ka la dar, ani ahani ma kulfari. 14Ənǝni ani nǝr makǝrkur tǝ Yɛsu tara tsantǝdzi ala ndzǝr nuwurni aghǝla tǝ dzǝ hyanti akwa ntǝnti.

Yɛsu Ɓakta Hau Bitrusu akwa Kǝthlǝrǝrni

15Sakatǝ dar kurai sǝm sǝr sǝmɛ, Yɛsu nkǝrɛ ala Simaun Bitrusu, “Bitrusu zǝr Yawhana, dzǝri gǝ yiɗǝ tǝra ɓwalnta ndzǝ yarni ya?”

Dzǝ ka sǝnau, “A, Thlaku. Gǝ zǝndi apǝri Yi yiɗǝ tǝngɛ.”

Yɛsu nkǝrɛ, “La sǝr sǝmɛ ala madar tǝmarna.”

16Yɛsu nkǝrɛ alari kadamwa, “Simaun zǝr Yawhana, dzǝri gǝ yiɗǝ tǝra ya?”

Dzǝ sǝnau, “A, Thlaku. Gǝ zǝndi apǝri Yi yiɗǝ tǝngɛ.”

Yɛsu nkǝrɛ, “Ka gǝ ɓǝla tǝmarna.”

17Yɛsu nkǝrɛ alari nǝr makǝrkur, “Simaun zǝr Yawhana, gǝ yiɗǝ tǝra ya?”

Ɗǝfa Bitrusu ka sǝwa, kadǝbar Yɛsu yu tǝni ka makǝr, “Gǝ yiɗɛ tǝra ya?” Dzǝ ka nkǝrɛ, “Thlaku, Gǝ zǝndi sanga su; Gǝ zǝndi apǝri Yi yiɗɛ tǝngɛ.”

Yɛsu sǝnau, “La sǝr sǝmɛ ala tǝmarna. 18Yi ada gha ala gǝ dzǝri, sakatǝ gǝ tsu tatami, gǝ ada dzǝguti kǝrngɛ ka gǝ mwari akwa kǝlara vui nam tǝ gǝ ada bara; ama ma gǝ hali, gǝ ata munta tsiya gɛ, ba ndǝ damwa ani ata ha ala gǝ kari ba dzǝ ata mwari aka gɛ akwa vui nam kura gǝ ta yiɗɛ.” 19(Yɛsu nkǝr ǝni ka dzǝ tsati dzǝli nti nam tǝ Bitrusu ata 'ya nam ata hǝmnti Hyal.) Antǝ Yɛsu gha alari, “Nu tǝra.”

20 # Yaw 13:25 Bitrusu pughǝl ntsɛ dzǝ ka wula ndǝr nuwur Yɛsu nam tǝ dzǝ tara yiɗɛ ada nu tǝ dar. (Dza ani ndǝ nam ada ndzai kudzǝghɛ adzǝ Yɛsu sakar sǝm sǝr sǝmǝr yiɗǝdzi nam tǝ dzǝ nkǝrɛ, “Thlaku, wa dza ani ata ɓǝlai tǝngɛ?”) 21Sakatǝ Bitrusu wula tǝni, dzǝ ka yuwɛ, “Thlaku, mi ani ata ɓui ndǝ ni?”

22Yɛsu sǝnau, “Ma Yi yiɗɛ ka dzǝ ndzai aka mpikɛ har tar ma Yi si, mǝlambiyir ngɛ akwa? Nu tǝra!” 23Kadǝbar ǝni, labar ni ada kikilntadzi akwa ntsa ndzǝr nu Yɛsu apǝri ndǝr nu ni adi ata nti wɛ. Ama Yɛsu ta nkǝrɛ apǝri kura dzǝ ata nti wɛ; ɗiɗi dzǝ nkǝrɛ apǝri, “Ma Yi yiɗɛ ka dzǝ ndzai aka mpikɛ har tar ma Yi si, mǝlambiyir ngɛ akwa?”

24Əni ani ndǝr nuwɛ nam ada hamnta sakǝida ata kǝra sanga sǝ yarni, dzǝ ani tara ɓǝla rǝbwai tǝ dar; muri zǝndi apǝri sǝ nam tǝ dzǝ sakǝidatsǝni ni dzǝri.

25Yɛsu 'ya sǝ yar laka hangkurari tsuwɛ. Ma apǝri ndɛ ata rǝbwai sanga dar, Yi kǝ ta apǝri dunya sang ma adi ata ɓui fǝr ala kakadu yarɛ nam tǝ ndɛ ata rǝbwai wɛ.

Currently Selected:

Yawhana 21: CKL

Highlight

Copy