'Ya Su 1

Yɛsu Tǝra Alǝtahyal

1 # Luk 1:1-4 Tiyafulus, akwa kakadǝrna nam kǝma Yi rǝbwa ata kǝra sanga sǝ nam tǝ Yɛsu tara baditsǝni 'ya ba hyipɛ, 2har ka la vǝr nam tǝ ndɛ tara kǝtǝ tǝni alǝtahyal. Əni 'ya aghǝla tǝ dzǝ vi wada atar Mambǝl Kartǝ ala ndzǝr hyarni yarɛ nam tǝ dzǝ tsarba. 3Aghǝla tǝ ndǝ kukwanta tǝni, dzǝ tsanti kǝrni ala ndzǝ yarɛ ni ba dzǝ hamnta sǝ yarɛ nam tara tsanti apǝri dzǝ aka mpikɛ, dzǝ 'ya vǝr fwaɗǝthlani akwa ntsa dar, ba dzǝ labar ata kǝra kuhyikur Hyal. 4#Luk 24:49Vǝr laka, sakatǝ dar ada sǝm su atakǝmaduku, dzǝ la dar tsau ni, “Ta gǝri ta ngyar Ursalima, ama ka gǝri sǝkǝ alkawalǝr Tada nam tǝ gǝri ngati ata kǝri akai. 5#Mat 3:11; Mar 1:8; Luk 3:16; Yaw 1:33Yawhana ada 'ya bamtizǝma aka yimi, ama aghǝla vǝr nkyiɗǝ laka ndǝ ata 'ya ala gǝri bamtizǝma aka Mambǝl Kartǝ.”

6Ani sakatǝ ndzǝr hya yarɛ ni si atakǝmaduku dar ka yu Yɛsu, “Thlaku, akwa saka ǝnǝni ya tǝ gǝ ata ɓakta la kuhyikur Izǝraila ala dar?”

7Dzǝ ka nkǝrɛ ala dar, “Adi nǝgǝri wɛ tǝ gǝri awa zǝndi saka wala vǝri yarɛ nam tǝ Tada ni dza ani tara tsarba aka wadarni. 8#Mat 28:19; Mar 16:15; Luk 24:47,48Ama gǝri ata ɓui dǝna ma sakatǝ Mambǝl Kartǝ sǝgǝl ata kǝra gǝri; antǝ gǝri ata ndzai sakǝidarna akwa Ursalima, ba akwa sanga Yahudiya ba Samariya, ba ka la dǝntar dunya.”

9 # Mar 16:19; Luk 24:50,51 Ani ata saka nam tǝ dzǝ nkǝr sǝni, dar tsu ada wulɛ dzǝ ka tǝra alǝtahyal, ba dlamba ka mbui tǝni ta tǝ dar awa wula tǝni.

10Tsu sakatǝ dar ada wulɛ alǝti taku tǝ dzǝ ada tǝra, kura aka yakǝn nda ndzǝ sǝɗɛ ada hyati ata ngwama dar aka kari mwapu tǝyal. 11Dar ka nkǝrɛ, “Dakuraiyir Galili, kami tǝ gǝri ada hyati akwani tǝ gǝri ada wul alǝtahyal? Yɛsu ǝni nam tǝ ndǝ kǝlnta adzǝ gǝri ka tǝra lǝti akǝr atahyal ni dzǝ ata ɓakta si tsu akwa whal nam tǝ gǝri wula tǝni tǝ dzǝ tǝra alǝtahyal ni.”

Ndǝ Tsarba Matiyas ka Kǝtǝ Vuiyir Yahuda

12Aghǝla ǝni dar ka ɓita sivi akwa Ursalima akwa paya nam tǝ ndǝ ada ká tǝ Payar Zaitun, nam tǝ pǝɗǝmkurni kal-kal aka mwarǝr vǝr Sǝbdu#1:12 Nam ani, kilaumita duku. ta mǝlmǝ ni. 13#Mat 10:2-4; Mar 3:16-19; Luk 6:14-16Ani ba sakatǝ dar sivi, dar ka mwari alǝti akwa fǝr nam ati ata kǝra kǝmani, vui nam tǝ dar ada ndzai akwa. Ndzǝ nam akwanda ani Bitrusu, Yawhana, Yakubu, Andǝrawusu, Filibusu, Tauma, Barthlalaumisu, Mata, Yakubu zǝr Halfa, Simaun nam Zailaut ni ba Yahuda zǝr Yakubu.

14Dar sang kǝltsǝnidzi aka ɗǝfu duku tǝ dar ada 'ya aduwa, tsuwɛ dar kaka Maryamu angǝra Yɛsu, ba mwahyi laka yarɛ, ba madar angǝri Yɛsu.

15Akwa vǝr yarɛ ǝnda, Bitrusu ka hyati akwa ntsa ndzǝ nam tara mbǝrsa (ndzǝ kudzǝghɛ adzǝ kumthlani aka sǝɗǝthlani) dzǝ ka nkǝrɛ, 16“Madar mana, Labar Hyal ni ata siya ghǝiyabadzi nam tara ndǝrɛ ata kǝra Yahuda, ndǝ nam tara pwar ndzǝ nam tara ngǝti Yɛsu. Əni ani ndǝrɛ watsi tǝ Mambǝl Kartǝ nkǝrɛ, atar nya Dauda. 17Yahuda ndɛ ada tsu tǝni akwa ntsa muri, ba dzǝ 'ya palaiyir ni akwa kǝthlǝrǝr Hyal.”

18 # Mat 27:3-8 (Aka wadzǝɓa nam tǝ dzǝ ɓui akuya ka kulɗakurni, Yahuda ɗǝlba vui akǝri. Dzǝ ka ɗi tǝ kǝr akwa vui ǝndari, dzǝ ka ndǝlantadzi, ghayari ka sǝba. 19Əni kǝ ndzai aka zǝndǝr sanga ndzǝ nam ada ndzai akwa Ursalima, har tǝ ndǝ ada ka vui ni akwa nyar dar tǝ Akaldama nam ani, Vuiyir Masi.)

20 # Zab 69:25; Zab 109:8 “Kadǝbar,” Bitrusu nkǝrɛ “akwa kakadǝr Zabura ndǝ rǝbwai apǝri,

“ ‘Ngyar ka kǝiyirni ndzai babal;

ta kǝlara ndɛ ta ndzai akwa tsuwɛ,’

ba,

“ ‘Ngyar ka ndǝ laka kǝtǝ kǝrtǝrni nǝr nggakur.’

21 # Mat 3:16; Mar 1:9; Luk 3:21; Mar 16:19; Luk 24:51 Ani kulini kǝ ndzai ntsakǝr ka mur tsarba ndǝ nam ata kǝtǝ kǝrtǝrni, akwa ntsa dakurai nam kaka muri sanga saka nam tǝ muri kaka Thlaku Yɛsu tǝ muri ada mwari, 22ngǝzi ata vǝr tǝ Yawhana tara 'ya alari bamtizǝma ka la vǝr nam tǝ ndǝ kǝtǝ tǝni alǝti atahyal adzǝ muri, akuya pathlu akwa ndzi ni kǝ ndzai ntsakǝr ka dzǝ ndzai sakǝida vwam kaka muri ata kǝra hyatǝrni.”

23Ani dar ka tsarba ndzǝ sǝɗɛ: Yusufu nam tǝ thlǝmari Barsabas (tsuwɛ nam tǝ ndǝ ada nkǝrɛ alari Dzustus) ba Matiyas. 24Antǝ dar ka 'ya aduwa, “Thlaku, gǝ zǝndi sanga ɗǝfa ndzi. Tsanti ala yar pathlu akwa ntsa ndzǝ sǝɗǝ ni nam tǝ gǝ tsarba, 25ka dzǝ ndzai ndǝr hya ba ka dzǝ kǝthlǝr ata vuiya Yahuda nam tara ngyar ka tǝra akwa vuiyirni.” 26Antǝ dar ka ɗal tsarɛ ba tsarari ka tsarba Matiyas, ani ndǝ ka tsǝkǝr tǝni ala ndzǝr hya yarɛ kum kasutang ni.

Currently Selected:

'Ya Su 1: CKL

Highlight

Copy