Yawhana 17

Yɛsu 'Ya Aduwa ala Kǝrni

1Aghǝla tǝ Yɛsu tara kurai ndǝr ni, dzǝ haɓǝti kǝrari atahyal ka nkǝrɛ apǝri:

“Baba, saka kǝ 'ya. Ka gǝ la nggakur ala Zǝr Ngɛ, ani ka Zǝrari yɛ la gǝ nggakur. 2Akuya gǝ lar wada ata kǝra ndzǝ sang, ani ka dzǝ la mpikǝ nam kura kurkuri ala sanga ndzǝ nam tǝ gǝ lari. 3Mpikɛ nam kura kurkuri ni ani zǝndi tǝngɛ, Hyal duku nam dzǝri, ba zǝndi Yɛsu Kǝrsti nam tǝ gǝ hyanti. 4Yi tsanti nggakur ngɛ akwa dunya; atar kurai kǝthlǝr nam tǝ gǝ lai ka Yi 'ya. 5Ba kulini, Baba, lai nggakur akǝma gɛ nggakur nam tǝ Yi akǝri aka gɛ kǝmata baditsǝniyir dunya.

Yɛsu 'Ya Aduwa ala Ndzǝr Nuwurni

6“Yi nkǝrba thlǝma gɛ ala ndzǝ nam tǝ gǝ faba lai akwa dunya. Dar nǝngɛ; gǝ lai tǝ dar, dar ɓǝlati ndǝrǝr ngɛ. 7Kulini dar zǝndi apǝri sanga sǝ nam tǝ gǝ lai hyati aka gɛ. 8Labar nam tǝ gǝ nkǝrɛ alai Yi nkǝrba ala dar, dar ka dlutsi. Dar zǝndi dzǝrkurari Yi sǝba adzǝ ngɛ, dar ka mbǝrsa apǝri gǝ dza tara hyanti tǝra. 9Yi 'ya aduwa ala dar; Yi ta 'ya aduwa ala dunya wɛ ama ala ndzǝ nam tǝ gǝ lai, kadǝbar tǝ dar nǝngɛ. 10Sanga sǝ nam tǝ Yi akǝri nǝngɛ, sanga sǝ nam tǝ gǝ akǝri nana, ba nggakur na ada tsantǝdzi atar dar. 11Yi adi ata ndzai akwa dunya kǝra wɛ, ama dar tsu akwa dunya, ba Yi ada si adzǝ ngɛ. Tada nam kartǝ, ɓǝlati tǝ dar aka dǝnar thlǝma gɛ (thlǝmɛ nam tǝ gǝ lai ni) ani ka dar ndzai duku apa tǝ mwa duku. 12#Zab 41:9; Yaw 13:18Saka nam tǝ Yi kaka dar, Yi ɓǝlati tǝ dar ba ngǝngǝuti tǝ dar aka thlǝm ǝnda nam tǝ gǝ lai. Kwa duku nam tara santadzi adi wɛ, ɗiɗi ndǝ nam kǝ ndzai ntsakǝr tǝ dzǝ ata sa. Əni 'yatǝdzi ani ka Labar Hyal ka dzǝ ghǝiyabadzi.

13“Yi ata si adzǝ ngɛ kulini, ama Yi nkǝrɛ sǝ yarni tsu tǝ Yi akwa dunya, ani ka dar ɓui ka ghǝi aka mwapukur ɗǝfǝr na nam akwa dar.” 14Yi nkǝrɛ ala dar labar ngɛ, dunya ngǝla tǝ dar, kadǝbar dar adi nǝr dunya wɛ, apa tǝ Yi ma Yi adi nǝr dunya wɛ. 15Yi adi ada yuwɛ tǝngɛ ka gǝ faba tǝ dar akwa dunya wɛ, ama Yi ada yu tǝngɛ ka gǝ ngǝngǝuti tǝ dar ta ndǝ kulɗa ni. 16Dar adi nǝr dunya wɛ, apa tǝ Yi ma Yi adi nǝni wɛ. 17Mǝrti tǝ dar ka dar 'ya ndzǝr ngɛ aka dzǝrkur; ndǝrǝr ngɛ ani dzǝrkur. 18Apa tǝ Gǝ hyanti tǝra akwa dunya, Yi hyanti tǝ dar akwa dunya. 19Ata nyar dar ani tǝ Yi hamnta kǝrna, ani ka dar ma ka dar hamnta kǝr dar ala gɛ dzǝr dzǝri.

Yɛsu 'Ya Aduwa ala Sanga Ndzǝr Mbǝrsa

20“Aduwarna adi ala dar ɗiɗi wɛ. Yi 'ya aduwa tsuwɛ ala ndzǝ nam ata mbǝrsa akwa yɛ atar labar dar. 21Baba, Yi 'ya aduwa apǝri ka sanga dar ndzai duku, tsu apa tǝ gǝ akwa yɛ ba Yi akwa gɛ. Ngyar ka dar ndzai akwa mwa tsuwɛ, ani ka dunya mbǝrsa apǝri gǝ hya tǝra. 22Yi kǝ la dar nggakur nam tǝ gǝ lai, ani ka dar ndzai duku apa tǝ mwa duku: 23Yi akwa dar ba gɛ akwa yɛ, ani ka dar ndzai sǝ duku, ka dunya zǝndi apǝri gɛ dza tara hya tǝra ba gǝ yiɗǝ tǝ dar apa tǝ gǝ tara yiɗǝ tǝra.

24“Baba! Yi ada bara ndzǝ nam tǝ gǝ lai, ka dar ndzai kaka Yi akwa vui nam tǝ Yi ati, ba ka dar wula nggakur na, nggakur nam tǝ gǝ lai kadǝbar tǝ gǝ yiɗǝ tǝra kǝmata hǝnɛ dunya.

25“Tada nam Kal-kal, dunya ta zǝndi tǝngɛ wɛ, ama Yi zǝndi tǝngɛ, ba ndzǝ yarni zǝndi apǝri gǝ dza tara hya tǝra. 26Yi mǝrti tǝ dar zǝndi tǝngɛ, ba Yi ata lǝkǝma aka 'ya ahani, ani ka yiɗɛ nam tǝ gǝ akǝri alai ka dzǝ ndzai akwa dar, ba Yi tsuwɛ akwa dar.”

Currently Selected:

Yawhana 17: CKL

Highlight

Copy