Yawhana 16
16
1“Yi gha ala gǝr ǝni, ani ka ta gǝri ta dla akwa hamnta gǝri. 2Dar ata kǝdlǝba tǝ gǝri akwa fǝr vǝkǝr sǝlai ala Hyal; ba saka ata si nam tǝ kǝlara ndǝ nam tara tsi tǝ gǝri dzǝ ata ɗǝnga apǝri kǝthlǝr Hyal tǝ dzǝ ada 'ya. 3Dar ata 'ya dzǝli sǝ yarni kadǝbar dar ta zǝndi Tada wala yɛ wɛ. 4Yi nkǝrɛ ala gǝri ǝni, ani ka ma sakari si gǝri ata ɗǝngati apǝri Yi galatsǝni tǝ gǝri. Yi ta gha ala gǝri ǝni tangkǝma wɛ kadǝbar Yi kaka gǝri.”
Kǝthlǝrǝr Mambǝl Kartǝ
5“Kulini Yi ata mwari adzǝ ndǝ nam tara hya tǝra, har ba kulini ndǝ adai akwa ntsa gǝri tara yu tǝra, ‘Gǝ ata lǝmarɛ wɛ?’ 6Kadǝbar tǝ Yi gha ala gǝri sǝ yarni, gǝri ghǝi aka sǝwa ɗǝfu. 7Ama Yi ada gha ala gǝri dzǝri: ata kwatsǝni ala gǝri ka Yi tǝra, kadǝbar ma Yi ta tǝra wɛ, Ndǝr Mbana adi ata si adzǝ gǝri wɛ. Ama ma Yi tǝra, Yi ata hyanti tǝni ala gǝri. 8Sakatǝ dzǝ kǝ si, dzǝ ata tsanti ala ndzǝr dunya ni apǝri dar sa ata kǝra biku, ata kǝr sǝ nam kalkalkur, ba ata kǝra hakar Hyal. 9Dar sa ata kǝra biku, kadǝbar dar ta mbǝrsa akwa yɛ wɛ, 10dar sa ata kǝra sǝ nam kalkalkur, kadǝbar Yi ada tǝra adzǝ Tada, ba gǝri adi ata wula tǝra kǝra wɛ. 11Ba dar sa ata kǝra hakar Hyal, kadǝbar ndǝ kurta hakatsǝni kuhyir dunya ni.
12“Yi aka su hangkurari tǝ Yi ata gha ala gǝri, ama kulini ata 'ya hang wur-wur ta tǝ gǝri awa kǝtǝ. 13Ama sakatǝ Mambǝlǝr dzǝrkur si, dzǝ ata pwar tǝ gǝri akwa sanga dzǝri. Dza adi ata 'ya ndǝrɛ nǝr kǝrni wɛ: Dza ata gha ala gǝri sǝ nam tǝ dzǝ ngati, ba gha ala gǝri ata kǝra sǝ nam tsu ata 'ya alǝkǝma. 14Dza ata lai nggakur, atar kǝtǝ sǝ nam tǝ Yi gha ka dzǝ nkǝrɛ ala gǝri. 15Sanga sǝ nam tǝ Babarna akǝri nana; ani sǝ nam tara 'ya tǝ Yi nkǝrɛ apǝri Mambǝl ni ata kǝtǝ sǝ nam tǝ Yi lari ka dzǝ gha ala gǝri.”
Mǝngǝlkur Ɗǝfu Ata Sǝnɛ ka 'Ya Mwapukur Ɗǝfu
16“Aghǝla saka nkyiɗu laka, gǝri adi ata wula tǝra wɛ, aghǝla saka nkyiɗu laka tsuwɛ, gǝri ata wula tǝra.”
17Antǝ laka ndzǝr nuwurni ka nkǝrɛ ala kǝma dar, “Sǝr mi akwa ɗǝfari tǝ dzǝ ada nkǝrɛ ala muri, apǝri, ‘Aghǝla saka nkyiɗu laka gǝri adi ata wula tǝra wɛ, aghǝla saka nkyiɗu laka tsuwɛ gǝri ata wula tǝra,’ ba tsuwɛ apǝri, ‘Kadǝbar Yi ata mwari adzǝ Tada’?” 18Dar lǝkǝma aka yuwɛ apǝri, “Sǝr mi akwa ɗǝfari tǝ dzǝ nkǝrɛ ‘saka nkyiɗu laka’? Mur ta zǝndi sǝ nam tǝ dzǝ ada gha wɛ.”
19Yɛsu zǝndi apǝri dar ada bara yu tǝni ata kǝra sǝni, ani dzǝ ka nkǝrɛ ala dar, “Gǝri ada yu kǝma gǝri ata kǝra sǝ nam akwa ɗǝfawai sakatǝ Yi gha apǝri, ‘Aghǝla saka nkyiɗu laka gǝr adi ata wula tǝra wɛ, aghǝla saka nkyiɗu laka tsuwɛ gǝri ata wula tǝra’? 20Yi ada gha ala gǝri dzǝri, gǝri ata tuwa ba sǝngǝlɛ, ama dunya ata 'ya mwapukur ɗǝfu. Gǝri ata 'ya mǝngǝlkur ɗǝfu, ama mǝngǝlkur ɗǝfǝr gǝri ata sǝmwatǝdzi ka 'ya mwapukur ɗǝfu. 21Ma mwala ata payar ya, dzǝ ada sa bwanai, kadǝbar sakar yarni 'ya. Ama aghǝla tǝ dzǝ yai zǝr mbǝghyiwa ni, dzǝ adi ada ɓǝla ɗǝngati bwanai nam tǝ dzǝ sa ndari wɛ, kadǝbar ka kutsariyirni apǝri zǝr ɓuidzi akwa dunya.
22“Ani apani gǝr ma, kulini gǝr aka mǝngǝlkur ɗǝfu, ama Yi ata ɓakta wula tǝ gǝri, antǝ gǝri ata 'ya ɗǝfu mwapu, ndǝ nam ata mǝzi kǝlnta ala gǝri mwapukur ɗǝfǝr gǝri ni adi wɛ. 23Akwa vǝr ǝnda gǝri tsu adi ata yu tǝra ka su kǝra wɛ. Yi ada gha ala gǝri dzǝri, Tada ata la gǝri kǝlara sǝ nam tǝ gǝri yu akwa thlǝmawai. 24Har kulini gǝri ta yu su akwa thlǝmawai wɛ. Yuwamɛ, gǝri ata ɓui, ba mwapukur ɗǝfǝr gǝri ata 'ya ghǝi-ghǝi.”
25Sanga ǝni Yi nkǝrɛ ala gǝr aka karabu, saka ata si nam kura Yi awa ɓǝla nkǝrɛ ala gǝr su akwa whal ǝni, ama Yi ata gha ala gǝri ata babal ata kǝra Bana. 26Akwa vǝr ǝnda gǝri ata yuwɛ akwa thlǝmawai. Yi adi ada nkǝrɛ apǝri Yi ata yu Bana kadǝbar gǝri wɛ. 27A'a, Tada tǝ kǝrni dzǝ yiɗǝ tǝ gǝri, kadǝbar gǝri yiɗǝ tǝra, gǝri mbǝrsa apǝri Yi hyati adzǝ Hyal. 28Yi hyati adzǝ Tada, ka si akwa dunya, kulini Yi ata ngyar dunya ka Yi ɓǝla mwari adzǝ Tada.
29Antǝ ndzǝr nuwurni ka nkǝrɛ apǝri, “Kulini ani tǝ gǝ ada labar ata babal, adi aka karabu wɛ! 30Kulini ani tǝ yar zǝndi apǝri gǝ zǝndi sanga su gǝ adi ada bara apǝri tar ka ndǝ laka yu tǝngɛ sǝr yu wɛ. Əni ani tara mǝrti tǝ yar mbǝrsa apǝri gǝ hyati adzǝ Hyal.”
31Yɛsu sǝnau, “Azarɛ, kulini ani tǝ gǝri mbǝrsa? 32Ama saka ata si, ba sakari ma kǝ si, nam tǝ sanga gǝri ata kikilntadzi, waima ata tǝra aharni. Gǝr sang ata ngyar tǝra Yi duku, ama dzǝri Yi adi duku wɛ, kadǝbar Tada aka Yɛ.
33“Yi nkǝrɛ ala gǝri apani ani ka gǝr ɓui ndzai lapiyakur akwa Yi. Akwa dunya gǝri ata sa bwanai, ama mbwaiyamɛ ɗǝfu! Yi sǝmkǝr ata kǝra dunya.”
Currently Selected:
Yawhana 16: CKL
Highlight
Share
Copy
Want to have your highlights saved across all your devices? Sign up or sign in
©2023 Seed Company in collaboration with Language Developers and Bible Translators Association
