རོ་མི། 14

བཱརའ་ག་ཁ་མ་ཏང༌ཤོ།

1དད་པ་སྒྲིང་སྒྲིང་མ་ཁཱན་ ཡི་ཤུ་པ་ཁེ་པ་ ན་ཧ་སེམས་ཀ་ཤོང་པེ་ཁེ༌ལེ། ཉི་རོག་ཏེ་བ་ཀི་ གི་ལ་དང་མང་གི་དག་ཉི་ མི་ཁཱན་ག་ཀོར་གེ་ ཤག་མ་རུམ༌ཤོ། 2དཔེ་ཨ་ནེ་ལ་ སོ་ངོ་ཐུར་གི་ ཧང་རང་ཟ་ལེ་ཆོག་པེ་དག་ཉི་ དད་པ་ཨ་ན། ཉི་ཨོམ་ཐུར་ག་ དད་པ་སྒྲིང་སྒྲིང་མ་ཝ་ཨ་དེན་གེ་ རོ་ཀི་ཤ་དང་ང་ ཧང་རང་ཅཱད་ཉི་ མོམ་ཇུ་ཐུར་ཤ་ཀམ༌ཅ། 3ཐམས་ཅན་རང་ཟ་ཁཱན་གི་ ཐམས་ཅན་རང་ མ་ཟ་ཁཱན་ག་ ངལ་མ་རངས་པ་ ཨ་ལེ་མང་ཕ། ཉི་ཐམས་ཅན་རང་ མ་ཟ་ཁཱན་གི་ ཐམས་ཅན་རང་ ཟ་ཁཱན་ག་ ངལ་མ་རངས་པ་ ཨ་ལེ་མང་ཕ། ཧང་ཡ་དག་ནེ་ལ་ དཀོན་མཆོག་གི་ རོག་ཏེ་བ་ རོ་ཀ་ཐུགས་ཀ་ ཤོང་ཉི་གནང་མ༌ཅ། 4དཀོན་མཆོག་ག་ གཡོག་པ་ག་ ཁྲིམས་ཅཱད་ཁཱན་ ན་ཧ་བ་ཤོ་ ཨི་བི་གི་ལ་ཡ། རོག་ཏེ་བ་ཀི་ གོ་ཆོད་ནེ་བུ་མ་ཆོད་ནེ་བུ་ རོག་ཏེ་བ་ཀ་ ཡོན་ད་ག་ཏཱན་ རྩིས་སྤྲོད་པེ་ཁེ༌ལེ། ཉི་རོག་ཏེ་བ་ཀི་ གོ་ཆོད༌པེ། ཧང་ཡ་དག་ནེ་ལ་ དཀོན་མཆོག་གི་ རོག་ཏེ་བ་ གོ་ཆོད་པ་ཅོད་ཉི་གནང༌མེ།

5ཨུ་ཉུ་པུརུས་ཀིན་ཨ་ཉི་ ཚེ་བང་གི་མི་ན་ ནོང་ཐུར་ཕང་ཤོ་ བཱརའ་ནོང་བ་ཀེ་མང་པུ་ དམ་པ་གི་ལ་ཨ༌ཉི། དག་པ་ཀབ་ཉི་ ནོང་ཐམས་ཅན་རང་ ཐུར་རང་གི་ལ་ཨ་ཉི་ བཱརའ་སོ་ངོ་བ་ཀི་མི་ན། ཨོ་ཐ་ཀོར་གེ་ སོ་ངོ་ཐམས་ཅན་རང་ རང་རང་ས་སེམས་དང་ཏུ་ཉི་ ཨ་ལེ་གོད་པེ་ཁེ༌ལེ། 6ཨི་བི་གི་ ནོང་ཐུར་ཕང་ དམ་པ་ཙི་ཝ་ཐུར་ གཙོ་བོ་ག་དེན་གེ་ ཙིན་ཅ་གི༌ལ། ཉི་ཨི་བི་གི་ ཤ་ང་མ་ཐུར་ དཀོན་མཆོག་ག་ བཀའ་དྲིན་བསམ་ཉི་ གཙོ་བོ་ག་མཚན་ག་ ངམ་ཅ་གི༌ལ། ཉི་ཨི་བི་གི་ ཤ་ཅཱད་པ་ཐུར་ དཀོན་མཆོག་ག་ བཀའ་དྲིན་བསམ་ཉི་ གཙོ་བོ་ག་མཚན་ག་ ཤ་ཅཱད་ཅ་གི༌ལ། 7ཧང་ཡ་དག་ནེ་ལ་ ཨའི་ཨི་བི་རང་གི་ནེ་བུ་ རང་ཏེན་ག་དེན་གེ་ ཆོན་ཅ་མང་གི་ ཉི་རང་ཏེན་ག་དེན་གེ་ ཤིན་ཅ་བུ་མང་གི། 8ཨའི་ཆོན་ཐཱན་ཨ་ནེ་ལ་ གཙོ་བོ་ག་དེན་གེ་ ཆོན་ཅ་གི༌ལ། ཉི་ཨའི་ཤིན་ཐཱན་ཨ་ནེ་བུ་ གཙོ་བོ་ག་དེན་གེ་ ཤིན་ཅ་གི༌ལ། ཨོ་ཉི་ཨ་དེན་གེ་ ཨའི་ཆོ་ནེ་བུ་ཤི་ནེ་བུ་ གཙོ་བོ་ག་རང་གི༌ལ། 9ཁིརིས་ཤོ་ གསོན་པོ་དང་ཤི་ཁཱན་ ཐམས་ཅན་ག་ གཙོ་བོ་རི་ལེ་དེན་གེ་ ཁིརིས་གཤགས་ཐཱན་ ལོག་ཉི་བཞེངས་པ་གི༌ལ།

10ན་ཤི་ཧང་ཨ་ཉི་ བཱརའ་ཡུང་ཟི་ག་ ཁྲིམས་ཅཱད་ཅ་ཡ། ན་ཤི་ཧང་ཨ་ཉི་ བཱརའ་ཡུང་ཟི་ག་ ངལ་མ་རངས་པ་ཨན་ཅ་ཡ། ཧང་ཡ་དག་ནེ་ལ་ ཨའི་ཐམས་ཅན་རང་ དཀོན་མཆོག་གི་ ཁྲིམས་ཅཱད་པེ་དེན་གེ་ རོ་ཀ་གསེར་ཁྲི་གུབ་ཀ་ ཐིང་མེ་ཁེ༌ལེ། 11གསུང་རབ་ནང་ཀེ་ཤོན་ཅ་

གཙོ་བོ་གི་གསུངས་མ་ལ་ ཇང་ཤོ་ གསོན་པོ་དཀོན་མཆོག་གི༌ལ། ཉི་ཏོང་ཟིང་ཐམས་ཅན་གི་ ཏེས་པེ་ཁེ༌ལེ། ཉི་ནོ་ཝང་ཐམས་ཅན་གི་ ཇ་ག་མིང་ག་ ཁ་དོག་པེ་ཁེ་ལེ་ ཇི་གི་ན་ཟཱན༌ཅ་#14:11 ཡ་ཤའི་ཡ་ག་དཔེ་ཆ་ 45:23 དག་ཉི།

12ཨོ་ཐེན་ཤོ་ལེ་དེན་ཐ་ཤོ་ ཨའི་ཐམས་ཅན་གི་ རང་རང་ས་རྩིས་ དཀོན་མཆོག་ག་ ཕུལ་བེ་ཁེ༌ལེ། 13ཨོ་ཉི་ཨ་དེན་གེ་ ཨ་ཤི་ཐུར་དང་ཐུར་ག་ ཁྲིམས་ཅཱད་པེ་ག་ཐུབ་ཐ་ཁེ། ལག་ཏང་ བཱརའ་ཡུང་ཟི་བ་ རོ་ཁེ་མ་དི་ལེ་དེན་གེ་ རོག་ཏེ་བ་ཀ་ ལམ་མ་ཏོག་པ་དག་ཉི་ ན་ཤི་མི་ལེ་ཁེ༌ལེ།

14ཇང་གཙོ་བོ་ཡི་ཤུ་ག་ དད་པ་ཨ་ཁཱན་ གི་ཝ་ཨ་དེན་གེ་ ཇ་ག་སེམས་ཀི་ཨ་ནེ་ལ་ ཟཱན་ཇམ་ག་ནང་ཀ་ མ་ཙང་མ་ ཏི་ངེ་རང་མཱན་ཅ་དག་ཉི་མིན༌ཅ། དག་པ་ཀབ་ཉི་ སོ་ངོ་ཐུར་ཕང་གི་ ཟཱན་ཇམ་ཚེ་བང་ མ་ཙང་མ་ཙི་ནེ་ལ་ ཨོ་ཉ་ཟཱན་ཇམ་ཁེ་པ་ རོ་ཀ་དེན་གེ་མ་ཙང་མ་གི༌ལ། 15ན་ཧ་ཟཱན་ཇམ་ག་གོད་ཉི་ ན་ཧ་ཡུང་ཟི་ཁེ་པ་ ཤོ་ནང་མ་ཕེ་ཝ་ཨ་ནེ་ལ་ ན་ཤི་རོ་ཀ་སྙིང་རྗེ་ཨན་ཅ་མང་གི། ན་ཤི་ཟ་ཉི་ཇམ་ཁཱན་གི་ ན་ཧ་ཡུང་ཟི་ མེ་པ་ཕི་ལེ་མ་བི། ཧང་ཡ་དག་ནེ་ལ་ རོ་ཀ་དེན་གེ་ ཁིརིས་གཤགས་པ་གི༌ལ། 16ཨོ་ཉི་ཨ་དེན་གེ་ ན་ཧ་ལེག་པུ་ག་ཀོར་གེ་ ངན་པ་ཆཱས་ཕི་ལེ་མ་བི། 17ཧང་ཡ་དག་ནེ་ལ་ དཀོན་མཆོག་ག་རྒྱལ་སྲིད་ཤོ་ ཟཱན་ཇམ་ག་མང་གི་ཝ་ དམ་པའི་ཐུགས་ཉིད་གི་གནང་ཁཱན་ དྲང་པུ་ སྐྱིད་པུ་དང་ ཤོ་ནང་གི༌ལ། 18ཨོ་ཐེན་ཨ་ཉི་ ཨི་བི་གི་ ཁིརིས་ག་ཕྱག་ཞུ་ཝ་ཐུར་ ཨོ་ཉ་སོ་ངོ་ཁེ་པ་ དཀོན་མཆོག་ག་ཐུགས་དང་ སོ་ངོ་བ་ཀ་སེམས་ཀ་ཚུད༌ཅ། 19ཨོ་ཉི་ཨ་དེན་གེ་ ན་ཤི་སྐྱིད་པུ་རིག་ཁཱན་དང་ ཐུར་དང་ཐུར་སྒྲིང་སྒྲིང་ཅོད་ཁཱན་ ལའི་བ་ཤ་ཨ་ལེ་ག་ མིག་པ་ཕི༌ཁེ།

20ཟཱན་ཇམ་ག་ཡོར་ཀེ་ དཀོན་མཆོག་ག་ ལའི་མེ་པ་མ་ཕི། ཟཱན་ཇམ་ཐམས་ཅན་རང་ ཙང་མ་གི༌ལ། དག་པ་ཀབ་ཉི་ བཱརའ་སོ་ངོ་ རོ་ཁེ་དི་ལེ་བི་ཁཱན་ ཟེ་ཁེ་པ་ཟ་ཉི་ཇམ་ནེ་ལ་ ཨུ་ཉུ་ཤོ་ ལེག་པུ་མང་གི། 21ཤ་དང་ཞུ་གི་ ཉི་ཨུ་ཉུ་མ་ཚཱད་པ་ བཱརའ་ཧང་གི་རང་གི་ནེ་བུ་ ན་ཧ་ཡུང་ཟི་ རོ་ཁེ་དི་ལེ་རིག་ནེ་ལ་ ཨུ་ཉུ་ཁེ་པ་ སྤང་མ་དྲག༌པེ། 22ཨོ་ཉི་ཨ་དེན་གེ་ ན་ཤི་ཨོ་ཐ་ཀོར་གེ་ ཧང་ཏེན་དད་པ་ཨ་ཝ་ཐུར་ ཨུ་ཉུ་ཤོ་ དཀོན་མཆོག་དང་ ན་ཧ་བར་ཀ་ཐའི། རང་ཏེན་གི་ ལེག་པུ་གི་ལ་ཨ་ཉི་ ཙི་ཁཱན་ལའི་གི་ རང་ཏེན་ག་ ཁྲིམས་མ་ཀེ་ཁཱན་སོ་ངོ་ཁེ་པ་ བྱིན་རླབས་ཅན་གི༌ལ། 23དག་པ་ཀབ་ཉི་ ཨི་བི་གི་ དོགས་པ་སག་ཐཱན་རང་གི་ནེ་བུ་ ཟ་ཝ་ཐུར་ ཨོ་ཉ་སོ་ངོ་གི་ ཁྲིམས་ཉོང༌པེ། ཧང་ཡ་དག་ནེ་ལ་ རོ་ཀི་དད་པ་དང་མ་ཁྲི་ཝ་ཨ་ཉི་ ཨ་ཝ་ཨ་དེན་གེ་གི༌ལ། ཧང་རང་གི་ནེ་བུ་ ལེག་པུ་མང་གི་ཨ་ཉི་ དད་པ་ཨ་ཁཱན་ཁེ་པ་ ན་ཤི་ཨ་ནེ་ལ་ ཨུ་ཉུ་ཤོ་ སྡིག་པ་གི༌ལ༎

Currently Selected:

རོ་མི། 14: TNTB

Highlight

Copy