དང་པ་ཀོ་རིན་ཐི། 9
9
སྐུ་ཚབ་བ་ཀ་དབང་ཚད།
1ཧང་ཇང་ རང་དབང་རང་ཚད་ ཉོང་པ་མཱན་ཅ་སྨོ། ཧང་ཇང་ སྐུ་ཚབ་མང་གི་སྨོ། ཧང་ཇ་ག་མིང་གི་ ཨ་ཧ་གཙོ་བོ་ཡི་ཤུ་ མཇལ་བ་མཱན་ཅ་སྨོ། ཧང་ ན་ཧ་བ་ཤོ་ ཇི་གི་ལའི་ཨ་ཝ་ཨ་དེན་གེ་ ན་ཧ་བ་ གཙོ་བོ་ག་ཨོ་ཕ་མང་གི་སྨོ། 2ཇང་བཱརའ་སོ་ངོ་བ་ཀ་དེན་གེ་ སྐུ་ཚབ་མང་གིན་ཐཱན་རང་གི་ནེ་བུ་ ན་ཧ་དེན་གེ་ཏ་ ཐེ་རི་བ་རི་རང་ སྐུ་ཚབ་གི༌ལ། ཧང་ཡ་དག་ནེ་ལ་ ཇང་གཙོ་བོ་ག་ སྐུ་ཚབ་གི་ལ་དག་ཉི་ ན་ཧ་བ་ཀི་ ཁུངས་ཀེ་ཅ་གི༌ལ།
3ཇང་སྐུ་ཚབ་གི་ལ་སྨོ་ མང་གི་སྨོ་གོད་པེ་ག་ ཇང་གེ་ རྒྱུགས་ལ་ཁཱན་བ་ཀ་དེན་གེ་ ཨུ་ཐུ་ཤོ་ ཇ་ག་ལན་གི༌ལ། 4ཧང་ཨ་ཤི་ ཟ་ལེ་ཇ་མེ་ག་རྒྱུ་ དོག་པེ་མ་ཆོག་པ་སྨོ། 5ཧང་ བཱརའ་སྐུ་ཚབ་བ་ཀི་ རིག་བུ་ཝ་པུརུས་ཀིན་ཨ་ཉི་ ཨ་ཤི་ཤོ་ དད་པ་ཨ་ཁཱན་མེ་ཝག་ཙ་ ཨའི་ཀབ་ཉི་ རིག་བུ་ལེ་མ་ཆོག་པ་སྨོ། གཙོ་བོ་ག་བོ་ཉིང་དང་ པ་ཏྲུས་གི་བུ་རིག་བུ་ན། 6ཨུ་ཉུ་མ་ནེ་ལ་ ཧང་ ཇང་དང་ བར་ན་བཱས་གི་ཤ་ ཨའི་ཏེན་ག་ ག་དང་གི་ལའི་ཨ་ཉི་ ཟ་ལེ་ཁེ་ལེ་སྨོ།
7ཧང་ དམག་མི་གི་ རོག་ཏེན་ག་ ཏོ་ལོབ་བིན་ཅ་སྨོ། ཉི་ཨི་བི་གི་ ཨང་གུར་ཆེན་ཐཱན་ ཨོ་ཉ་སེ་ མ་ཟ་ལཱན་ཆོན་ཅ་ཡ། ཉི་ཝ་སིང་ཁཱན་གི་ ནུ་མ་ཇམ་ཁཱན་ ཨི་བི་ཅ་ཡ། 8ཨོ་ཐ་ཆཱས་ཁེ་པ་ ཇི་གི་ སོ་ངོ་ག་མི་ཐང་དང་ཏུ་ཉི་ཤ་ ཡེག་ཅ་མང་གི། ཧང་ དཀོན་མཆོག་ག་ བཀའ་ཁྲིམས་གེ་བུ་ ཨུ་ཉུ་པུརུས་ཀིན་ཨ་ཉི་རང་ ཤོ་ལུ་མ་ལ་སྨོ། 9མོ་ས་གི་འབྲི་ཁཱན་ བཀའ་ཁྲིམས་ནང་ཀེ་ཤོན་ཅ་ བར་ཟོ་ཕེ་གང་ཀ་ ཏོ་ཀ་ག་ནོ་ཝང་ མ་དམ་ཅོ་#9:9 ཁྲིམས་ལུགས་ག་དཔེ་ཆ་ 25:4དག༌ཉི། ཉི་ཨོམ་ ཧང་ དཀོན་མཆོག་གི་ ཏོ་ཀ་དེན་གེ་ཤ་ ཐུགས་བསམ་གནང་མ་གི་ལ་སྨོ། 10ཧང་ དཀོན་མཆོག་གི་ ཨ་ཧ་ཏཱན་བུ་ གསུངས་མ་མང་གི་སྨོ། གི་ལ་ ཨུ་ཐུ་ཤོ་ ཨ་ཧ་དེན་གེ་གསུངས་མ་གི༌ལ། ཧང་ཡ་དག་ནེ་ལ་ ཨུང་ཐ་ཁཱན་དང་ཡེད་ཁཱན་ ལའི་པ་ཉིག་ཙིང་རང་ བུ་དང་ཁེ་པ་ བོང་མེ་ག་རེ་ཆ་ཨ་ཉི་ ཨན་ཅ་གི༌ལ།
11ཨ་ཤི་ན་ཧ་པོང་ཀ་ ཐུགས་ཉིད་ག་ལི་ཡ་ཕ༌ཅ། ཧང་ ཨ་ཤི་ཨ་ཧ་ཐོག་ཨ་ཉི་ ན་ཧེ་ཟཱན་ཇམ་ག་རྒྱུ་དོག་པ་ཀབ་ཉི་ ཟག་པུ་རང་ཟག་ལ་སྨོ། 12བཱརའ་གི་ ན་ཧ་བ་ཀེ་ ཨོ་ཐ་བ་རེ་ཆ་ཨ་ནེ་ལ་ ཨ་ཤི་ཏ་ ཨོ་ཉ་གེ་ལག་ཉི་ རེ་ཆ་ཨ་ལེ་ག་ དབང་ཚད་མཱན་ཅ་སྨོ། ཨོ་ཉེ་རང་གི་ནེ་བུ་ ཨོ་ཐ་ཐོབ་ཐང་ཁེ་པ་ ཨ་ཤི་ན་ཧེ་མ་ཕུན་ཤི། ལག་ཏང་ ཁིརིས་ག་ཀོར་གེ་ འཐེན་ལེག་པུ་ག་ལའི་ག་ མ་ཏོག་ཅེན་དག་པ་གི་ ཨ་ཤི་ཧང་ཧང་རང་ ཐེས་ཉི་ཆོ་ཝ༌ཅ།
13ཧང་མཆོད་ཁང་ནང་ཀ་ ལའི་ཨ་ཁཱན་བ་ མཆོད་ཁང་ནང་ཀེ་རང་ ཟ་ལེ་ཇ་མེ་ག་ཉོང་ཅ་དག་ཉི་ ན་ཤི་སེ་ལུ་མ་ལ་སྨོ། ཉི་མཆོད་གཤམ་ག་ མཆོད་པ་ཕུལ་ཁཱན་གི་ མཆོད་པ་ཕུལ་ཁཱན་གེ་རང་ རོ་ཀ་ཕང་ཉོང༌ཅ། 14ཨུ་ཉུ་པུརུས་ཀིན་ཨ་ཉི་ འཐེན་ལེག་པུ་བཤད་ཁཱན་བ་བུ་ ཨོ་ཉ་འཐེན་ལེག་པུ་ག་ལའི་གེ་ཨ་ཉི་རང་ རོག་ཏེ་བ་ཀ་ ཀེ་ཕང་ཁེ་པ་ ཉོང་པེ་ཁེ་ལེ་དག་ཉི་ གཙོ་བོ་གི་ བཀའ་གནང་མ༌ཅ། 15དག་པ་ཀབ་ཉི་ ཇི་གི་ ཨོ་ཐ་ཐོབ་ཐང་བ་ ཐུར་རང་ ན་ཧེ་མ་ཕུན་མ༌ཅ། ཉི་ན་ཤི་ ཨོ་ཐ་བ་ ཇ་ག་དེན་གེ་ཨན་ཆེན་དག་པ་གི་ འབྲི་ཅ་བུ་མང་གི། ཇང་ཤི་ནེ་བུ་ ཏ་ཀ་ཧང་རང་མཱན༌ཅ། དག་པ་ཀབ་ཉི་ སོ་ངོ་ཐུར་ཕང་གི་ ཇ་ག་ཁ་ཏང་ཉི་ ཉོང་པེ་དེན་གེ་ཤ་ གསུང་བཤད་ལ་དག་ཉི་ ཡེག་པེ་ག་ ཏི་ངེ་རང་མ་བི༌ལ། 16ཨོ་ཉེ་རང་གི་ནེ་བུ་ ཇི་གི་འཐེན་ལེག་པུ་ བཤད་པ་ཀབ་ཉི་ ཇི་གི་ཁམ་ཙོང་མེ་མར༌བ། ཧང་ཡ་དག་ནེ་ལ་ ཇང་ཐབ་རང་མ་ཝ་ འཐེན་ལེག་པུ་ བཤད་པེ་ཁེ་ཝ་རི་ཝ༌ཅ། དག་པ་ཀབ་ཉི་ ཇི་གི་འཐེན་ལེག་པུ་ མ་བཤད་ནེ་ལ་ ཇང་ཧབ་ཏུར་ ཀ་ལུ་ཨོ་ཕེ་ཡ།
17ཏོང་པ་གེ་ ཇི་གི་འཐེན་ལེག་པུ་ བཤད་ཐཱན་ཨ་ནེ་ལ་ ཇི་གི་སེ་རབ་ཉོང༌པེ། ཉི་ཏོང་པ་གེ་ མ་བཤད་ཐཱན་ཨ་ནེ་ལ་ ཇི་གི་ཨ་ལེ་ཁེ་ཁཱན་ དཀོན་མཆོག་གི་ ཇ་ག་གནང་ཁཱན་ལའི་ཁེ་པ་ ཇི་གི་ཨན་ཅ་གི༌ལ། 18ཉི་ལ་ ཇ་ག་སེ་རབ་ ཧང་གི་ལ་ཡ། ཇི་གི་ཏོང་པ་གེ་ འཐེན་ལེག་པུ་ བཤད་པེ་ཉོང་ཁཱན་དང་ ཇ་ག་ཐོབ་ཐང་བ་མ་ཕུན་མཱན་ འཐེན་ལེག་པུ་ བཤད་པེ་ཉོང་ཁཱན་ཁེ་པ་ ཇ་ག་སེ་རབ་གི༌ལ།
19ཇང་ཤོ་ ཨི་བི་ག་རང་ ཟ་པ་མང་གི། ཇང་ཤོ་ རང་དབང་རང་ཚད་ཆོ་ཁཱན་ སོ་ངོ་གི༌ལ། དག་པ་ཀབ་ཉི་ ཧབ་ཏུར་རེ་བ་ཐུར་ སོ་ངོ་མང་པུ་ཐུར་ ཟག་པེ་དེན་གེ་ ཇང་ཐམས་ཅན་ག་ ཟ་པ་རི་ཝ༌ཅ། 20ཡ་ཧུ་དི་པ་བ་ ཁིརིས་ག་ཕ་ལེ་དེན་གེ་ ཡ་ཧུ་དི་པ་བ་ཀ་པོང་ཀ་ ཇང་ཡ་ཧུ་དི་པ་བ་ད་བུ་རི༌ཝ། ཇང་བཀའ་ཁྲིམས་ག་ཕརའ་ཁེ་ མཱན་ཐཱན་རང་གི་ནེ་བུ་ བཀའ་ཁྲིམས་ག་ཕརའ་ཁེ་ཆོ་ཁཱན་ སོ་ངོ་བ་ ཁིརིས་ག་ཕ་ལེ་དེན་གེ་ ཇང་རོག་ཏེ་བ་ད་བུ་རང་ བཀའ་ཁྲིམས་ག་ཕརའ་ཁེ་ཆོ་ཁཱན་ སོ་ངོ་ད་བུ་རི༌ཝ། 21ཉི་བཀའ་ཁྲིམས་ག་ཕརའ་ཁེ་མ་ཁཱན་ སོ་ངོ་བ་ ཁིརིས་ག་ཕ་ལེ་དེན་གེ་ ཇང་བུ་ རོག་ཏེ་བ་ད་བུ་རང་ བཀའ་ཁྲིམས་ག་ཕརའ་ཁེ་ མ་ཝ་རི་ཉི་ཆོ༌ཝ། (གི་ལུ་ཏ་ ཇང་དཀོན་མཆོག་ག་ བཀའ་ཁྲིམས་གེ་ ཐར་པ་ཉོང་པ་མཱན༌ཅ། ཉི་ཇང་ ཁིརིས་ག་ བཀའ་ཁྲིམས་ག་ཕརའ་ཁེ༌ཅ།)
22ཉི་ཤུག་མ་ཁཱན་བ་ ཁིརིས་ག་ཕ་ལེ་དེན་གེ་ ཇང་བུ་ ཤུག་མ་ཁཱན་ད་བུ་རི་ཉི་ཆོ༌ཝ། ཧབ་ཏུར་རེ་བ་ཐུར་ སོ་ངོ་ཚེ་བང་གི་ ཐར་པ་ཉོང་ཅེན་དག་པ་གི་ སོ་ངོ་ཐམས་ཅན་ག་དེན་གེ་ ཇང་བུ་ ཐམས་ཅན་རང་རི༌ཝ། 23ཇི་གི་ འཐེན་ལེག་པུ་ག་བྱིན་རླབས་ ཤ་མེ་ཉོང་ཅེན་དག་པ་གི་ ཨོ་ཐ་བ་ ཐམས་ཅན་རང་ ཇི་གི་འཐེན་ལེག་པུ་ག་ཡོར་ཀེ་ ཨན་ཅ་གི༌ལ།
24ཇུག་ཅ་ཨ་ཉི་ ཟང་ཟག་པ་ཕི་ཁཱན་ ཐམས་ཅན་གི་ ཙ་དྲེག་ནེ་བུ་ ཐུར་གི་ཤ་ སེ་རབ་ཉོང་ཅ་དག་ཉི་ ན་ཤི་སེ་ལུ་མ་ལ་སྨོ། ཨོ་ཉི་ཨ་དེན་གེ་ ན་ཤི་ སེ་རབ་ཉོང་པ་ཨ་ཉི་རང་ཇུག༌ཅོ། 25ཅང་ཁཱན་ཐམས་ཅན་གི་ གནམ་མེད་ས་མེད་ཙ་དྲེག་ཉི་ སློབ་སྦྱོང་ཕི་ལེ་ཁེན༌ཅ། རོག་ཏེ་བ་ཀི་ སེ་རབ་ཨ་ཉི་ཉོང་ཁཱན་ མ་བཱན་ཁཱན་རི་ང་#9:25 གོ་མ་གིརིག་ག་སོ་ངོ་བ་ཀི་ ཇུག་པེ་ག་ཟང་ཟག་པ་ཕིན་ཅ་ཨ་ཉི་ ཟག་ཁཱན་སོ་ངོ་ག་ སེ་རབ་ཨ་ཉི་ རི་ང་པུརུས་ཀིན་ཐབ་སེ་ཨ་ཝ་ཆོ་ཁཱན་ཐུར་ ཤ་རང་ག་མུག་ཉི་བིན་ཅ་གི་ཝ༌ལ། ཉི་ཨུ་ཉུ་ཤོ་ ཤིང་ཤ་བ་ ཡང་ན་ལ་ གསེར་གི་ཅོད་པ་ག་ཨུན་ཆོ་ཝ༌ལ།ག་དེན་གེ་ ཙ་དྲེག༌ལ། དག་པ་ཀབ་ཉི་ ཨའི་ཤོ་ ཧ་ལ་རང་མ་ཕུད་ཁཱན་ རི་ང་ཁེ་པ་ སེ་རབ་ཨ་ཉི་ཉོང་པེ་དེན་གེ་ ཙ་དྲེག་ཅ་གི༌ལ། 26ཨོ་ཉི་ཨ་དེན་གེ་ མིག་པ་ ཧང་རང་མ་ཝ་ག་ ཇང་ཇུག་ཅ་མང་གི། ཉི་བ་ཏོང་ཕི་ཉི་ རི་དི་ག་མུ་ཏྲུ་མེ་ཕི་ཁཱན་ད་བུ་ ཇི་གི་ཕི་ལུ་མཱན༌ཅ། 27དག་པ་ཀབ་ཉི་ ཇི་གི་བཱརའ་ག་ བཤད་ཐཱན་རང་གི་ནེ་བུ་ དཀོན་མཆོག་གི་ཇ་ག་ ནཱན་གི་ཚ་ཁ་མ་ཚུད་ཅི་དག་ཉི་ མ་གསུངས་ཆེན་དག་པ་གི་ ཇི་གི་ ཇ་ག་ལུས་པུ་ཁེ་པ་ སྒྲིགས་ཀ་ཙུག་ཉི་ ཇ་ག་ཟ་པ་ཅོད༌ཅ༎
Currently Selected:
དང་པ་ཀོ་རིན་ཐི། 9: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
