དང་པ་ཀོ་རིན་ཐི། 3
3
ཁིརིས་ག་ཕྱག་ཞུ་ཁཱན་ པ་ཝལ་དང་ཨ་པོལ་ལོས།
1ཡུང་ཟི་བ་ ན་ཧ་བ་ ཐུགས་ཉིད་ག་མ་ཝ་ཨ་དེན་གེ་ ཐུགས་ཉིད་ཆོ་ཝ་པུརུས་ཀིན་ཨ་ཉི་ ཆཱས་ཨ་ལེ་མར་ཤི། དག་པ་ཀབ་ཉི་ ན་ཧ་བ་ ཁིརིས་ག་ཝག་ཙ་ མིང་བུ་བ་ད་བུ་ཆོ་ཝ་ཨ་དེན་གེ་ འཛམ་གླིང་ག་ཆོ་ཁཱན་ སོ་ངོ་བ་ཀ་ ཆཱས་ཨ་ཝ་ད་བུ་ཨ་ཉི་ ཇི་གི་ནའི་ཀབ་ཉི་ ཆཱས་ཨ་ལེ་ཁེ༌ཝ། 2ན་ཧ་བ་ ལྟོ་ཟ་ལེ་མ་རེན་པ་ཨ་དེན་གེ་ ཇི་གི་ན་ཧ་ནུ་ཤ་བི༌ཝ། ཉི་ན་ཧ་བ་ ཨོ་མ་བུ་ ལྟོ་ཟ་ལེ་མ་རེན་པ༌ལ། 3ཧང་ཡ་དག་ནེ་ལ་ ན་ཧ་བ་ ཨོ་མ་བུ་ འཛམ་གླིང་ག་ སོ་ངོ་བ་ད་བུ་རང་ཆོ་ན། ན་ཧ་པོང་ཀ་མིང་ཤོག་ཉི་ ཐུར་དང་ཐུར་ཀབ་ཉི་ ཁོ་ལོང་ཨ་ཁཱན་ཤོ་ འཛམ་གླིང་ག་མང་གི་སྨོ། ཧང་ ན་ཤི་གེན་ཁཱན་ འབད་བཞག་ཤོ་ འཛམ་གླིང་ག་ སོ་ངོ་བ་ད་བུ་མ་ལ་སྨོ། 4ཧང་ཡ་དག་ནེ་ལ་ ཐུར་གི་ཡེག་ལ་ ཇང་པ་ཝལ་ག་གི་ལ་དག༌ཉི། ཉི་ཨོམ་ཐུར་གི་ཡེག་ལ་ ཇང་ཨ་པོལ་ལོས་ག་གི་ལ་དག༌ཉི། ཧང་ཨུ་ཐུ་ཤོ་ འཛམ་གླིང་ག་སོ་ངོ་བ་ཀི་ ཨ་ཁཱན་ད་བུ་མ་ལ་སྨོ།
5ཨ་པོལ་ལོས་ གི་ལུ་ཤོ་ ཨི་བི་གི་ལ་ཡ། ཉི་པ་ཝལ་ཤོ་ ཨི་བི་གི་ལ་ཡ། ཨ་ཆིང་ཤོ་ ན་ཧ་བ་ དད་པ་ཨ་ལེ་རིག་ཁཱན་ དཀོན་མཆོག་ག་ གཡོག་པ་ཤ་གི༌ལ། ཉི་གཙོ་བོ་གི་ ཨ་ཧ་གནང་མ་དང་ཏུ་ཉི་ ཨ་ཤི་ཨོ་ཉ་ལའི་ཨན༌ཅ། 6ཇི་གི་ལི་ཆེ་ཝ་ ཉི་ཨ་པོལ་ལོས་གི་ རི་ལུག༌པ། དག་པ་ཀབ་ཉི་ ཨོ་ཉ་ལི་ལིག་པེ་བི་ཁཱན་ཤོ་ དཀོན་མཆོག་གི༌ལ། 7ཨོ་ཉི་ཨ་དེན་གེ་ ལི་ཆེ་ཁཱན་དང་ རི་ལུག་ཁཱན་ཤོ་ ཁག་ཆི་ལུ་མང་གི། དག་པ་ཀབ་ཉི་ ལི་ལིག་པེ་བི་ཁཱན་ དཀོན་མཆོག་ཤོ་ ཁག་ཆི་ལུ་གི༌ལ། 8ལི་ཆེ་ཁཱན་དང་ རི་ལུག་ཁཱན་སོ་ངོ་ག་ མིག་པ་ཐུར་གི༌ལ། ཉི་ཉིག་ཙིང་ག་རང་ རང་རང་ས་ལའི་དང་ཏུ་ཉི་ སེ་རབ་གནང༌མེ། 9ཧང་ཡ་དག་ནེ་ལ་ ཨའི་ཤོ་ དཀོན་མཆོག་ཀབ་ཉི་ པི་ག་ ལའི་ཨན༌ཅ། ཉི་ནའི་ཤོ་ དཀོན་མཆོག་ག་ ཨུང་གི༌ལ། ཉི་ན་ཧ་བ་ཤོ་ དཀོན་མཆོག་ག་ ཕོ་བྲང་བུ་གི༌ལ།
10དཀོན་མཆོག་གི་ ཇ་ག་ཐུགས་རྗེ་ གནང་མ་དང་ཏུ་ཉི་ བཟོ་པ་མཁས་ཏྲ་གི་ རྨང་ཆེ་ཝ་ད་བུ་རང་ ཇི་གི་རྨང་ཆེ་ཉི་ཐ་ཝ༌ཅ། ཉི་བཱརའ་སོ་ངོ་གི་ ཨོ་ཉ་ཐུང་ཀ་ ཕའི་ཅོད༌ལ། དག་པ་ཀབ་ཉི་ ཅོད་ཁཱན་ཨི་བི་རང་གི་ནེ་བུ་ རིག་པ་སྒྲིམ་པེ་ཁེ༌ལེ། 11ཉི་ཨ་ཤི་ གི་ཚེ་གེ་ཤ་ རྨང་ཆེ་ཉི་ཐ་ཁཱན་ག་མ་ཏོག་པ་ ཨི་བི་གི་རང་ བཱརའ་རྨང་ཆེ་ལེ་མར༌བ། ཉི་ཨ་ཤི་ཆེ་ཁཱན་རྨང་ཤོ་ ཡི་ཤུ་ཁིརིས་གི༌ལ།
12ཨི་བི་གི་རང་གི་ནེ་བུ་ ཨོ་ཉ་རྨང་ཐུང་ཀ་ ཕའི་ཅོད་པ་ཀབ་ཉི་ གསེར་དང་དངུལ་ ཉི་བྱུ་རུ་བ་དང་ ཤིང་བ་ཀི་ཅོད་ཏུ། ཉི་ངོན་དང་ ཙ་ཀམ་གི་བུ་ཅོད་ཏུ། 13དག་པ་ཀབ་ཉི་ ཁྲིམས་ཅཱད་པེ་ནོང་ཀ་ ཨི་བི་གི་ ཧང་ད་བུ་ལའི་ ཨ་ཝ་ཅ་གི་ལ་སྨོ་ ཨོ་ཉ་ཀོར་གེ་ཙ་ཆོད༌པེ། མི་གི་ཨ་ཉི་ ཨོ་ཉ་ལའི་ཁེ་པ་གེན༌མེ། ཉི་ཨི་བི་གི་ ལའི་ཧང་ད་བུ་ ཨ་ཝ་ཅ་གི་ལ་སྨོ་ ཨོ་ཉ་ཀོར་གེ་ མི་གི་ཨ་ཉི་རྒྱུགས་ལ༌ལེ། 14ཨི་བི་གི་ ཅོད་ཐཱན་རང་གི་ནེ་བུ་ མི་གི་མ་ཞུབ་ནེ་ལ་ ཨོ་ཉ་སོ་ངོ་གི་ སེ་རབ་ཉོང༌པེ། 15དག་པ་ཀབ་ཉི་ རོ་ཀི་ཅོད་ཁཱན་ཁེ་པ་ མི་གི་ཞུམ་ནེ་ལ་ ཨོ་ཉ་སོ་ངོ་གི་ སེ་རབ་མ་ཉོང༌པ། མི་གེ་གཱན་དིན་ཅ་ཨ་ཉི་ ཧང་རང་མ་ཝ་རི་ཁཱན་ སོ་ངོ་པུརུས་ཀིན་ཨ་ཉི་ རོག་རོག་ཏེན་རང་ཏ་ ཐར་པ་ཉོང༌པེ།
16ན་ཧ་བ་ཤོ་ དཀོན་མཆོག་ག་ མཆོད་ཁང་གི༌ལ། ཉི་དཀོན་མཆོག་ག་ཐུགས་ཉིད་ ན་ཧ་ནང་ཀ་བཞུགས་ཅ་ཨ་ཉི་ ན་ཤི་སེ་ལུ་མ་ལ་སྨོ། 17ཉི་ཨི་བི་གི་ དཀོན་མཆོག་ག་མཆོད་ཁང་ མེ་པ་ཕི་ཝ་ཐུར་ དཀོན་མཆོག་གི་ ཨོ་ཉ་སོ་ངོ་ མེ་པ་ཕི༌ལེ། ཧང་ཡ་དག་ནེ་ལ་ དཀོན་མཆོག་ག་མཆོད་ཁང་ཤོ་ དམ་པ་གི༌ལ། ཉི་ཨོ་ཉ་མཆོད་ཁང་ཤོ་ ན་ཧ་བ་གི༌ལ།
18ཨི་བི་གི་རང་ རོག་རོག་ཏེན་ག་ མགུ་སྐོར་མ་ཕིན་ཆེན། ཨོ་ཐ་འཛམ་གླིང་ག་ མི་ཐང་དང་ཏུ་ཉི་ ན་ཧ་པོང་ཀེ་ ཨི་བི་གི་ རང་ཏེན་ཤོ་ སེ་བུ་ཅ་དག་ཉི་ མི་ཝ་ཐུར་ དཀོན་མཆོག་ག་སྤྱན་ག་ རོག་སེ་བུ་རི་ལེ་གི་ལ་དག་ནེ་ལ་ ཨོ་ཉ་སོ་ངོ་ཁེ་པ་ ཡོང་བ་རི་ལེ་ཁེ༌ལེ། 19ཧང་ཡ་དག་ནེ་ལ་ ཨོ་ཐ་འཛམ་གླིང་ག་ རིག་པ་ཤོ་ དཀོན་མཆོག་ག་སྤྱན་ག་ ཁུངས་ཧང་རང་མཱན༌ཅ། གསུང་རབ་གེ་བུ་ ཨོ་ཐེན་ཤོན་ཅ་
སོ་ངོ་སེ་བུ་བ་ཤོ་ དའི་ཏེན་ག་སེ་ཏྲ་ག་ཐུང་ཀེ་ཨ་ཉི་ དཀོན་མཆོག་གི་ ཁ་ཤོང་ནང་ཀ་ཙུང༌ཅ།#3:19 ཨ་ཡུབ་ག་དཔེ་ཆ་ 5:13
20ཉི་ཨོམ་ཆང་རང་
གཙོ་བོ་གི་ སོ་ངོ་སེ་བུ་བ་ཀ་སེམས་ཤོ་ ཁུངས་མཱན་ཅ་དག་ཉི་མཁྱེན༌ཅ།#3:20 མགུར་མ་ག་དཔེ་ཆ་ 94:11
21ཨོ་ཉི་ཨ་དེན་གེ་ ཨི་བི་གི་རང་ སོ་ངོ་བ་ཀ་ཡོར་ཀེ་ ཁམ་མ་ཙོང༌ཤོ། ཐམས་ཅན་རང་ ན་ཧ་གི༌ལ། 22པ་ཝལ་ཨ་ནེ་བུ་ ཨ་པོལ་ལོས་ཨ་ནེ་བུ་ པ་ཏྲུས་ཨ་ནེ་བུ་ ཉི་འཛམ་གླིང་ཨ་ནེ་བུ་ ཚེ་དང་ཤི་སྲོག་ཨ་ནེ་བུ་ ཉི་ཨུ་ཉུ་མ་ཚཱད་པ་ ཨོ་མ་དང་ མ་འོངས་པ་ཨ་ནེ་བུ་ ཐམས་ཅན་རང་ ན་ཧ་གི༌ལ། 23ཉི་ན་ཧ་བ་ཤོ་ ཁིརིས་ག་གི༌ལ། ཉི་ཁིརིས་ཤོ་ དཀོན་མཆོག་ག་གི༌ལ༎
Currently Selected:
དང་པ་ཀོ་རིན་ཐི། 3: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
