Liike 8

Ɓɛ̀ hã́a lɛ hàarí wóò bè Yiezu máahũ bòo

1Ɛ́ pehɔ̀ máahṹ, ɛ̀ Yiezu ɛ́ khie bɔ̀ hɔ̀ lɔ́-bɛhɛ̃ àá hɔ́ lɔ́-cíini ǹ, ɛ́ lè Bentĩnu lɛ ɛ́ lè Dɔfĩn bɛ́záanú bòo ɛ̀ bie ɛ̀ buie. Ɛ́ piè kɛ̀ránzɛ̀ɓɛ̀ pírú àá nìɛ ɓɛ̀ ɲu ɛ́ bɔ̀ɓán àá ɔ́. 2Ɛ̀ ɓɛ̀ hã́a dɔ̀ lɛ ɛ́ Yiezu ɛ́ pɛ̃̀hṹ ɲɛun ɓɛ̀ ńɲíkĩ́nìɛ líeniɛ nin àá ɓɛ́dɔ̀ lɛ á pɛ̃̀hṹ wiɛniɛ duò ɛ́ lò ɓiɛ̀ bɔ̀ɓán àá ɔ́: Àdɔ̀ iè ɔ̀ Maari lɛ ɛ́ ɓɛ́ wóò ve nɛ Makedala Maari, àpelɛ ɛ́ Yiezu ɛ́ hàarí ɲɛun ńɲíkĩ́nìɛ hùuɲu ɛ́ líeniɛ nin, 3àdɔ̀ iè Zaanɛ lɛ ɓà ɓɛ́rɔ yèrè ɛ́ ɓɛ́ nɛ Suza, lɛ hàarí iè Herɔɔde tɔntɛ́riè hándí, àdɔ̀ iè Sizaanɛ àá ɓɛ́ hã́a dɔ̀ cɛ̀rìɛɛ lɛ hàarí ɛ́ Yiezu àá mí kɛ̀ránzɛ̀ɓɛ̀ ɛ̀ sĩiní àá ɓɛ́ núnú hũn bòo.

Lè wĩ̀i lɛ ɛ́ Yiezu wɛ̃̀ à bɔ̀dé dɔ̀ bòo hũn

Mat 13.1-9; Mar 4.1-9

4Ɛ́ ɓɛ́ nìnbirìe ɛ́ van lɔ́kɛ hɔ lóoniɛ̀ cɛ̀rìɛɛ ɛ́ ɓɛrɛ Yiezu viì; ɛ́ hɔ́lɛ ɛ́ ɓɛ́ nìnbí-dũmu ɛ́ ɓɛrɛ ɓen koo ɓánlɔ̀n, ɛ́ Yiezu ɛ́ khie ɛ́ lè wĩ̀i lɛ ɛ̀ wĩ̀ ɛ̀ lɛ́ ɓà ǹ ɛ́ nɛ làa: 5«Nìnbírɔ dɔ̀ ɛ́ lɔ́ nɛ mii vɛ dé bòo mí mún hũn. Ɛ́ hɔ́ lɛ á van mí bòo ɛ̀ dé, ɛ́ hɔ́ biè dɔ̀ ɛ́ van siɛ lè wṹn ɲunù. Ɛ́ ɓɛ́ nìnbirìe ɛ́ ɓɛrɛ van khie pehɔ̀ lɔ̀n, ɛ́ ɓɛ́ ńɲízàani ɛ́ ɓɛrɛ khuie hɔ̀ ɛ́ dú. 6Ɛ̀ hɔ̀dɔ̀ ɛ́ van siɛ lè lɛnù lɔ̀n; ɛ́ bòo lɛ ɛ́ hɔ́ siɛ lɔ́ mii hĩ́ní lòo, ɛ́ hɔ́ yòó hɔn iè hɔ̀ lɛ ɛ́ ńɲùnlɔ́ ɛ́ mí yán wɛ̀. 7Ɛ̀ hɔ̀dɔ̀ ɛ́ van siɛ hɔ̀ ńɲinlɛ̀a hũn ɛ́ hɔ́ páaníɛ siɛ lɔ́ hĩ́nà àá hɔ́pe ńɲinnà, ɛ́ hɔ́ ńɲinlɛ̀a ɛ́ yòó muaniɛ hɔ̀. 8Ɛ̀ hɔ̀dɔ̀ ɛ́ van siɛ hɔ̀ tĩ́ní lɛ sãa hũn, ɛ́ hɔ́ siɛ lɔ́ hĩ́nà yòó han hɔ̀ biè: dúrɔ wóò hɛ bie khĩminù.» Ɛ́ Yiezu ɛ́ bĩniɛ zɔn bie ɛ́ nɛ làa: «Nìnbírɔ kɛ́ à dàa ɲɛkɛ̃̀a lɛ dàa wóò ɲí bòo, à ɲí hɔ́ sãàní.»

Bòo lɛ temu lɛ́ ɛ́ Yiezu dàa wóò wĩ̀ hɔ̀ wũ̀a mì biehĩ́ hũn

Mat 13.10-17; Mar 4.10-12

9Ɛ́ Yiezu kɛ̀ránzɛ̀ɓɛ̀ ɛ́ ɔ̀ dìenin nɛ lepe wĩ̀i sɔsí ɲún ɛ́ iè lè dúsɔ. 10Ɛ́ Yiezu ɛ́ zɔn bie lɛ́ ɓà ǹ nɛ làa: «Mìpe iè pe ɛ́ Dɔfĩn ɛ́ lɛ́ hɔ́ bɔ̀dũmunù nin ɛ́ mí dàa dũ piè bɛ́záanú bòo lɛ tànkɔniɛ; kɛ́ ɓɛ́ ɓen iè ɓɛ̀pe nìnbirìe lɛ kɛ́, ɛ̀ hɔ̀pe bòo sɔ ɛ́ wóò bie lɛ́ ɓà ǹ àá wũ̀a. Ɛ́ si iè hɔ̀pe ɛ́ ɓɛ́ dàa wóò húi kɛ́ ɓɛ́ yí loo bòo, ɛ̀ ɓɛ̀ ɲí kɛ́ ɓɛ́ yí dũ pehɔ̀ ɲún wɛ̀.»

Yiezu ɛ́ lè wĩ̀i lɛ á wɛ̃̀ à bɔ̀dé bòo ɲún ɛ̀ munkɛ

Mat 13.18-23; Mar 4.13-20

11Ɛ́ Yiezu ɛ́ zɔn bie àá mí kɛ̀ránzɛ̀ɓɛ̀ ɛ́ nɛ làa: «Ɛ́ lɛ iè lèpe wĩ̀i sɔ ɲún: Hɔ̀ bòo lɛ á bɔ̀dé ɛ́ dé ɛ́ iè lè Dɔfĩn bienù. 12Ɛ̀ ɓɛ̀ nìnbirìe dɔ̀ ɛ́ lɔ́ɓán àá lé wṹn ɲunù lɛ ɛ́ hɔ́ biè dɔ̀ ɛ́ van siɛ lɔ̀n: ɓɛ̀ ɓen ɲɛ́ lé bienù, à Sitũanɛ ɛ̀ ɓen leń lé peɓɛ̀ tĩɛ̀ hũn, bòo lɛ ɛ́ wé ɛ̀ ɓɛ̀ bí dɛsĩ̀ lè ǹ, ɛ̀ dàá yí fuen wɛ̀. 13Ɛ̀ ɓɛ̀dɔ̀ ɛ́ lɔ́ɓán àá lé lɛnù viì: ɓɛ̀ wóò ɲí lé bienù ɛ̀ ɓɛ̀ tɛ̀ pelè bòo àá tĩwiɛ̀ kɛ́ ɓɛ́ dén yáà fùansí lè ǹ ɛ̀ lè fɛ́sí dìń sãaní peɓɛ̀ tĩɛ̀ hũn wɛ̀. Ɛ́ peɓɛ̀ ńdɛsìnlɔ́ ɛ́ yáà vɛ híɛhɔ́ wɛ̀. Ɛ́ pɛ̃̀hṹ lɛ kɛ́ ɓɛ́ van wi le lɔ̀nbiè hũn, ɛ̀ ɓɛ̀ pĩ́ hɔ́ ńdɛsĩ̀nlɔ́. 14Ɛ̀ ɓɛ̀dɔ̀ ɛ́ lɔ́ɓán àá hɔ́ ńɲinlɛ̀a viì lɛ hɔ́ biè dɔ̀ ɛ́ van siɛ hũn; ɓɛ̀ ɛ́ ɲɛ́ lé bienù kɛ́ ɓɛ́ wóò fùansí ɛ̀ hɔ̀ hũn yenkɛà àá hɔ́ yírɛ́ wanminu àá lépe dímíɲɛ́ sɔ lɛ tùmù bòo ɛ̀ muaní lé Dɔfĩn bienù, ɛ̀ ɓɛ̀ dàá yá vɛ híɛhɔ́ ɓɛ́ ńdɛsĩnlɔ́ hũn wɛ̀. 15Ɛ̀ lè sṹsùnù lɛ sãa lɛ ɛ́ hɔ̀ biè dɔ̀ lɛ van siɛ hũn ɛ́ iè ɓɛ̀lɛ ɲɛ́ lé bienù ɛ̀ ɓɛ̀ ɓɛ́ɓɛ́a lè ǹ ɓɛ́ tĩɛ̀ lɛ sãa hũn, ɛ̀ ɓɛ̀ cã̀aniɛ ɓɛ́ ɲún, ɛ́ can ɓɛ́ kuò, ɛ́ han hɔ̀ biè.»

Pɛ̃̀ntĩ́ní wĩ̀i

Mar 4.21-25

16Ɛ́ Yiezu ɛ́ bĩniɛ zɔn bie ɛ́ nɛ làa: «Nìnbírɔ ɛ́ yáà ɲíi pɛ̃̀ntĩ́ní ɛ̀ khíi vɛ híɛnin àá dìɛ dɔ̀ tàá ɛ̀ vɛ zɔ dé dɛmu dìɛ fìi hũn wɛ̀. Kɛ́ á den wóò yòó bìsí lé mí bènlén, ɛ̀ ɓɛ̀ nìnbirìe lɛ ɛ́ lè zũnù ɛ̀ zɔ ɓɛ́kùi ɛ̀ dàá mi hɔ ńpiemu. 17Ɛ́ bòo dɔ̀ lɛ tànkɔ̀niɛ lɛ yá ɓén dũń ɛ́ mí, ɛ̀ bòo dɔ̀ lɛ ɛ́ ɓɛ́ nìnbirìe tànkɔ̀níkɛa ɓɛ́ tĩɛ̀ hũn lɛ yá ɓén lé yíe ɛ́ lò mínɛ wɛ̀. 18Ɛ́ mí mìiní mí yìe ɛ̀ mì wóo dũń hɔ́ bòo lɛ ɛ́ mí ɛ́ ɲí ɲún; iè hɔ̀ lɛ álɛ dàa hɔ bòo ɛ́ ɓɛ́ ɓén bĩní lɛ́ nin ɛ́ sĩiní, àlɛ yí dàa bòo dɔ̀, ɛ́ hɛ̀rí ɛ́ hɔ́pe bìcínbóo lɛ á tĩì à nɛ mí dàa ɛ́ ɓɛ́ ɓén bĩní fé.»

Yiezu ɓà nín àá ɓà zɛ̀ɓɛ̀ bòo

Mat 12.46-50; Mar 3.31-35

19Ɛ́ Yiezu ɓà nín àá ɓà zɛ̀ɓɛ̀ ɛ́ van ɓɛrɛ nɛ ɓɛ mi-ɛ; kɛ́ hɔ́lɛ ɛ́ ɓɛ́ nìnbirìe ɛ́ buò cɛ̃̀un, ɛ́ ɓɛ́ yí dɛ̀ yá vɛ zɔ dɛ̃ piè viì wɛ̀. 20Ɛ́ ɓɛ́ nìbiriè dɔ̀ ɛ́ khie bie lɛ́ Yiezu ǹ nɛ làa: «Mì nín àá mì zɛ̀ɓɛ̀ ɛ́ lɔ́ dɛ̃̀ lè yíe ɛ́ kɔ̀ cɛ̀.» 21Kɛ́ Yiezu ɛ́ den zɔn kɔ̃́niɛ ɓɛ̀ ɛ́ nɛ làa: «Kìe nín àá kìe zɛ̀ɓɛ̀ ɛ́ iè ɓɛ̀lɛ ɛ́ wóò ɲí lé Dɔfĩn bienù, ɛ̀ ɓɛ̀ vɛ bè lè ǹ.»

Bòo lɛ ɛ́ Yiezu dàa waaniɛ pinpi-bɛhɔ́ dɔ̀ hɔ̀ ɲun-bɛhɔ́ lɔ̀n

Mat 8.23-27; Mar 4.35-41

22Ɛ́ wurù dɔ̀ zɔn, ɛ́ Yiezu yòó zɔn lè ɲumu wiè dɔ̀ àá mí kɛ̀ránzɛ̀ɓɛ̀ à bie lɛ́ ɓà ǹ ɛ́ nɛ làa: «Mì nɛ ke cánkɛ́ hɔ́ ɲumu ɛ̀ vɛ lé àá lé vṹn san-cóoní yéni lɔ̀n.» Ɛ́ ɓɛ́ wo khie cɔ́. 23Ɛ́ hɔ́ lɛ ɛ́ ɓɛ́ hɔ̀ ɲumu ɛ̀ cánkɛ́, ɛ́ Yiezu siɛ dũmua. Ɛ́ pinpi-bɛhɔ́ dɔ̀ ɛ́ pan pan ɛ̀ lè siɛ hĩ́nà hɔ̀ ɲumu lɔ̀n, ɛ́ lé wiè ɛ́ yòó tí àá hɔ́ ɲumu, ɛ́ ɓɛ́ hɛ̀ wo yòó ɛ́ hɔ̀ mɛ̀rɔ́ hũn ɛ̀ zɔ. 24Ɛ́ ɓɛ́ kɛ̀ránzɛ̀ɓɛ̀ ɛ́ khie van lúwiniɛ Yiezu ǹ ɛ̀ ɓɛ̀ tĩ̀niɛ ɔ̀ ɛ̀ ɓɛ̀ bie lɛ́ à ǹ ɛ́ nɛ làa: «Ɲunsɔ, Ɲunsɔ, ké lɛ ɛ́ hí cɔ́!» Ɛ́ Yiezu yìe siɛ fɛ́ á siɛ hĩ́nà yóò tĩ́nɛ lé pinpinù àá hɔ́ ɲumu lɛ ɛ́ sànbɔ̀níkɛ ɲún hũn, ɛ́ hɔ́ yòó dɛ̃̀; ɛ́ lé viì míkùi ɛ́ yòó wan hĩ́ɔɔn. 25Ɛ́ Yiezu ɛ́ khie mí kɛ̀ránzɛ̀ɓɛ̀ ɛ̀ dìenin ɛ́ nɛ làa: «Mì ńdɛsìnlɔ́ ɛ́ wi àá yí?» Kɛ́ hɔ́ den hɛ̀ yòokɛa peɓɛ̀ lɔ̀n, ɛ́ ɓɛ́ hɛ̀ zɛ́rɛ cɛ̃̀un ɛ́ khie biekɛ ɛ̀ lɛ́ ɓá ǹ ɛ́ nɛ làa: «Àpe nùún sɔlɛ ɛ́ iè wie á dàa wóò bie lɛ́ lé pinpinù àá hɔ́ ɲumu ǹ ɛ̀ hɔ̀ ɲí piè bòo?»

Bòo lɛ ɛ́ Yiezu dàa wiɛniɛ khíerɔ dɔ̀

Mat 8.28-34; Mar 5.1-20

26Ɛ́ Yiezu àá mí kɛ̀ránzɛ̀ɓɛ̀ ɛ́ cánkɛa hɔ̀ ɲumu ɛ́ van lɔ́ zɔn ɓɛ̀ Kerazeniɓɛ cɛ̃̀mɛ̀nɛ́ lɛ sɛ̃́ ɓán àá hɔ̀ Kalile. 27Ɛ́ bòo lɛ ɛ́ Yiezu ɛ́ zɔn lɔ́ lé ɲumu wiè hũn ɛ́ siɛ, ɛ́ hɔ́ lóo sɔ nùún dɔ̀ lɛ ɛ́ ńɲíkĩ́nìɛ ɛ́ winin ɛ́ ɓɛrɛ ɛ́ piè híɛhɔ́ ɛ̀ sĩ́. Hɔ̀ hàarí míɛ kɛ́ á yáà zɔ tĩ̀ɛ, à lò yáà zɔ zũnù wɛ̀; kɛ́ hɔ́ búo tĩ́ihṹ ɛ́ temu hàarí iè piè zɔnlén. 28Ɛ́ hɔ́ lɛ á mɔn Yiezu, á zɔn wũamɛa à ɓɛrɛ kùerɛ siɛ piè híɛhɔ́, à zɔn bérɛ cɛ̃̀un ɛ́ nɛ làa: «Yiezu, Dɔfĩn lɛ yòó van wi hɔ hóohũn lɛ sɔ́n sɔ́n hũn Zuú, hɔ ńɓuò ɛ́ kɔ́ ɛ́ cɛ̀ àá mi? Nín kɔ̀ hɛ̃nnin nɛ kɔ bí vɛ́ niǹ ɲɛkɛ̃̀a wɛ̀.» 29À ɛ́ bie kiɛ́ iè hɔ̀ lɛ ɛ́ Yiezu ɛ́ den bie lɛ́ á ńɲíkĩ́rɔ sɔ ǹ nɛ a lí-é pe nùún sɔ hũn. Àá yìe cɛ̀rìɛɛ kɛ́ ápe ńɲíkĩ́rɔ sɔ ɛ́ hṹn wóò hĩ́ní-ɛ pe nùún sɔ ǹ. Ɓɛ̀ hṹn wóò ɓaà ɔ̀pe nùún sɔ ɛ̀ cɛ níhĩ́ àá piè zehĩ́ àá hɔ́ zɔ̀kɔ̀zɔ́kɔ́ɓɛ̀ bòo lɛ ɛ́ wé à bí zè wɛ̀. Kɛ́ á den wóò fúa hɔpe zɔ̀kɔ̀zɔ́kɔ́ɓɛ̀, à ńɲíkĩ́rɔ ɛ́ wóò khíi fí-é ɛ̀ dàá vɛ le ńɲiherà hũn. 30Ɛ́ Yiezu ɛ́ zɔn ɔ̀ dìenin ɛ́ nɛ làa: «Kɔ̀ yèrè wɛrɛ̀?» Á zɔn nɛ: «Niǹ yèrè iè Zãamaa.» À ɛ́ khɛ́ kɛ̀amu iè hɔ̀ lɛ ɛ́ ɓɛ́ iè ńɲíkĩ́nìɛ bìkuì ɛ́ temu wi è ǹ. 31Ɛ́ ɓɛ́ ńɲíkĩ́nìɛ sɔ ɛ́ khiè ɛ́ Yiezu ɓɔ́nɓɔ́níkɛnin nɛ a bí ɲɛ ɓɛ́ ɛ̀ vɛ kóo lé nìhiè lóo kṹ-bɛhɔ́ hũn wɛ̀. 32Hɔ́rɔsí ɛ̀ ɓɛ̀ nɛ̀nbùɛhĩ́ bìkuì dɔ̀ ɛ́ hàarí yòó wi le ɓúkìe lɔ̀n ɛ́ dí yán. Ɛ́ ɓɛ́ ńɲíkĩ́nìɛ ɛ́ khie ɛ́ Yiezu ɛ̀ ɓɔ́nɓɔ́níkɛnin nɛ a tɛ̀ nɛ ɓɛ́ vɛ zɔ ɓɛ́pe nɛ̀nbùɛhĩ́ sɔ hũn. Ɛ́ Yiezu nɛ ɓɛ lan vɛ zɔ. 33Ɛ́ ɓɛ ńɲíkĩ́nìɛ ɛ́ zɔn lɔ́ ápe nùún sɔ hũn ɛ́ van zɔn ɓɛ̀ nɛ̀nbùɛhĩ́ hũn, ɛ́ ɓɛ́pe nɛ̀nbùɛhĩ́ sɔ ɓɛ́kùi ɛ́ van yòó lìɛ lɔ́ lé ɓúkìe lɔ̀n ɛ́ ɓen siɛ zɔn hɔ̀ ɲumu hũn ɛ́ hɔ ɲumu ɛ́ zɔn fɔ́. 34Ɛ́ hɔ́ lɛ ɛ́ ɓɛ́ nìnbirìe lɛ te ɓɛ nɛ̀nbùɛhĩ́ sɔ ɛ́ hṹn sie ɛ́ mɔn hɔ̀ bòo lɛ wɔ́, ɛ́ ɓɛ́ zɔ̀ van bie hɔ̀ lè lóo hũn àá hɔ́ mɛhɛ̃ hũn. 35Ɛ́ ɓɛ́ nìnbirìe ɛ́ ɓen lɔ́ mɔn hɔ̀ bòo lɛ wɔ́. Ɛ́ ɓɛ́ ɓɛrɛ yú Yiezu àá ɔ́pe nùún lɛ á ɲɛun ɓɛ̀ ńɲíkĩ́nìɛ ɛ́ líeniɛ nin kɛ́ á kɛsí Yiezu sɛ̀nù ɛ́ zɔn hɔ̀ tĩ̀ɛ ɛ́ ɲún wi yán. Ɛ́ ɓɛ́ yòó zɛ́rɛ. 36Ɛ́ ɓɛ́lɛ ɛ́ mɔn hɔ̀ bòo lɛ wɔ́ míkùi àá ɓɛ́ yìe ɛ́ khɛ́ bòo lɛ ápe nùún lɛ ɛ́ ɓɛ́ ńɲíkĩ́nìɛ hṹn wi nin ɛ́ dàa wan ɛ́ lɛ́ ɓɛ́lɛ kɛ́ ǹ. 37Ɛ́ ɓɛ́ Kerazeniɓɛ cɛ̃̀mɛ̀nɛ́ sie ɓɛ́kùi ɛ́ khie ɛ́ Yiezu ɛ̀ hɛ̃nnin nɛ a lé ɓɛ́ cɛ̃̀mɛ̀nɛ́ hũn iè hɔ̀ lɛ ɛ́ ɓɛ́ zɛ́rɛ cɛ̃̀un. Ɛ́ Yiezu ɛ́ yòó zɔn lè wiè ɛ́ mii lan. 38Ápe nùún lɛ ɛ́ ɓɛ́ ńɲíkĩ́nìɛ ɛ́ lɔ́ nin ɛ́ ɔ̀ ɓɔ́nɓɔ́níkɛnin nɛ á fùansí nɛ mí bèɓán àá ɔ̀. Kɛ́ Yiezu den pɛ̃́ à bie lɛ́ à ǹ nɛ làa: 39«Khũ̀á lan vɛ kɔ yíe ɛ̀ vɛ khɛ́ hɔ́ bòo lɛ ɛ́ Dɔfĩn ɛ́ wɔ́ lɛ́ kɔ ǹ.» Á nùún ɛ́ khie cɔ́ van ɛ́ hɔ̀ bòo lɛ ɛ́ Yiezu wɔ́ lɛ́ à ǹ míkùi ɛ̀ buie hɔ lóo sɔ míkùi hũn.

Zayiriisi hãá vìerɔ́ àá hṹnu dɔ̀ lɛ ɛ́ cãani vĩ̀nlɔ́ duiè ɓaa wiɛnírɔ́

Mat 9.18-26; Mar 5.21-43

40Ɛ́ hɔ́ lɛ ɛ́ Yiezu van khũ̀a cankɛa hɔ̀ ɲumu ɛ́ ɓen lɔ́, ɛ́ ɓɛ́ nìzã̀amáa ɛ́ ɓen lɔ́ sɛ̃́ piè híɛhɔ́ iè hɔ̀ lɛ ɛ́ ɓɛ́ nìnbirìe ɓɛ́kùi ɛ́ hṹn ɔ̀ hìé. 41Ɛ́ nùún dɔ̀ lɛ yèrè ɛ́ ɓɛ́ nɛ Zayiriisi lɛ iè ɓɛ̀ Zuifuɓɛ ńkóoɓánlɔ̀n zũnù hándí dɔ̀, ɛ́ van ɓɛrɛ ɛ́ ɓen lúsí Yiezu híɛhɔ́ à ɓɔ́nɓɔ́niɛ ɔ̀ ǹ nɛ a ɓen mí yíe, 42iè hɔ̀ lɛ ɛ́ piè hãá wìcóoní mí-dòonú lɛ á yú, lɛ lɔ́líe ɛ́ yú pírú àá bɔ̀nbɔ̀ ɲu ɛ́ hí cɔ́. Ɛ́ hɔ́ lɛ ɛ́ Yiezu ɛ́ khie vaá-vɛ piè yíe ɛ́ ɓɛ́ nìzã̀amáa ɛ́ khie kirie ɔ̀ ǹ ɛ́ ɔ̀ ɲàa. 43Ɛ̀ hṹnu dɔ̀ ɓiɛ̀ hàarí wi yán kɛ́ cãani vĩ̀nlɔ́ duiè ɛ́ ɓaa ɔ̀ lɛ iè pehɔ̀ lɔ́líe pírú àá bɔ̀nbɔ̀ ɲu. [À hàarí yáakɛa mí núnú hũn bòo míkùi ɓɛ̀ dɔkɔtɔrɔɓɛ viì] kɛ́ ádɔ̀ ɛ́ yí dàń ɔ́ ɛ́ yí wiɛní wɛ̀. 44Á van ɓɛrɛ àá Yiezu máahṹ ɛ́ ɓen han piè pɔnkɔ̀rɔ́ ɲunù ǹ, ɛ́ mí laà hũn ɛ́ piè cãani vĩ̀nlɔ́ ɛ́ yòó dɛ̃̀. 45Ɛ́ Yiezu ɛ́ khie ɓɛ̀ nìnbirìe ɛ̀ dìenin ɛ́ nɛ làa: «A wieni ɛ́ te nin han nin?» Ɛ́ ɓɛ́pe ɓɛ́kùi ɛ́ pɛ̃́kɛ iè ɓɛ́pe ɛ́ yí ten hɔ́ yí wé wɛ̀. Ɛ́ Piɛre ɛ́ zɔn nɛ làa: «Kɛ̀ránlɔ, kɔ́ loo kɛ́ ɓɛ́ nìzã̀amáa ɛ́ kirie kɔ ǹ ɛ́ ɲàa.» 46Kɛ́ Yiezu ɛ́ den zɔn nɛ làa: «Ń dũ kɛ́ nìnbírɔ dɔ̀ ɛ́ han mi ǹ iè hɔ̀ lɛ ɛ́ ń dũnɛ niǹ tɛkɛ̀a hũn kɛ́ pànkɛ́ dɔ̀ ɛ́ lɔ́ mi ǹ.» 47Á hṹnu ɛ́ mɔn kɛ́ hɔ́ lɛ á wɔ́ ɛ́ Yiezu ɛ́ dũnɛ, á van ɓɛrɛ kɛ́ á ɛ́ zɛ̀ ɛ́ ɓen lúsí Yiezu híɛhɔ́, à bie ɓɛ̀ nìnbirìe ɓɛ́kùi yìe hũn bòo lɛ temu lɛ́ á dàa ɓɛrɛ han Yiezu ǹ, àá bòo lɛ á dàa yòó wan mí laà hũn. 48Ɛ́ Yiezu zɔn lɛ́ à ǹ ɛ́ nɛ làa: «Niǹ hãá, kɔ̀ ńdɛsìnlɔ́ ɛ́ wiɛniɛ kɔ. Ɛ́ kɔ́ lan àá hũn-wiɛ̀.»

49Ɛ́ Yiezu ɲɛùn yí bie vé wɛ̀, ɛ̀ nìnbírɔ dɔ̀ lɛ van lɔ́ á Zayiriisi yíe ɛ́ ɓɛrɛ ɓen bie lɛ́ ápe Zayiriisi ǹ ɛ́ nɛ làa: «Kɔ̀ hãá sɔ ɛ́ húrun ɛ́ kɔ́ wo bí tiɛní-ɛ kɛ̀ránlɔ́ wɛ̀.» 50Ɛ́ Yiezu ɛ́ ɲɛ́ hɔ́ á khie bie lɛ́ ápe Zayiriisi ǹ ɛ́ nɛ làa: «Bí Zãn wɛ̀; dɛsĩ̀ á ɓén fuen.» 51Ɛ́ bòo lɛ ɛ́ ɓɛ́ van dɛ̃un ɔ̀ Zayiriisi yíe, ɛ́ Yiezu ɛ́ yí fùansí nìnbírɔ dɔ̀ ǹ nɛ a yòó zɔ le zũnù àá mí kɛ́ a ɓen yí Piɛre àá Zãn àá Zaake àá ɔ́ zĩncáahɔ́ ɓà yàá àá ɓà nín. 52Ɛ́ ɓɛ́ nìnbirìe ɓɛ́kùi ɛ́ wíríkɛ kɛ́ ɓɛ̀ ɛ́ ɲinwikɛ à hãacíi ɲún hũn. Ɛ́ Yiezu zɔn bie nɛ: «Mì bí wírí wɛ̀. À yí hí wɛ̀, á wiè lɛ dũmua.» 53Ɛ́ ɓɛ́ zɔn ɛ́ ɔ̀ yáakɛ iè hɔ̀ lɛ ɛ́ ɓɛ́ dũ kɛ́ á húrun. 54Ɛ́ Yiezu ɛ́ siɛ zɛ̃nkɛa ɔ̀ hãacíi núnú ǹ à zɔn bérɛ ɛ́ nɛ làa: «Zĩncáahɔ́, síɛ hĩ́ní!» 55Ɛ́ piè mɛkɛ̃nì ɛ́ khũ̀a ɓɛrɛ ɛ́ piè yìe siɛ tɛ̃un, á siɛ hĩ́nà mí laà hũn. Ɛ́ Yiezu nɛ ɓɛ lɛ́ bɔ̀díe ɔ̀ ǹ nɛ á dí. 56Ápe zĩncáahɔ́ ɓà nìɛ ɛ́ hɔ́ hɛ̀ yòokɛa lɔ̀n cɛ̃̀un, kɛ́ Yiezu den nɛ ɓɛ bí lɛ́ nɛ nìnbírɔ dɔ̀ ɛ̀ ɲí hɔ́pe bòo lɛ wɔ́ wɛ̀.

Currently Selected:

Liike 8: bwj

Highlight

Copy