MARK 13

Yeso ga à mbug tiŋ Baa ge go

(Mat 24.1-2; Lug 21.5-6)

1Yeso wo le go kalge ɓi tiŋ Baa mokay, jobo yoo jar ma wer ɓen wo raw ɗege ɓe ga : Waŋ, ko mbo húulìn wo de jagge ti kẽẽ de woore mo deŋ ɗa la. Tiŋ sen de booge de woore ɗa la. 2Yeso raw fer wããre ne hẽn ga : Ndo ko tiŋ se ma de booge kluun mo kaʼ we so gà yawla? Húulì po gwaʼ ge de jag ge ciŋ ti kẽẽ la ni boŋ gà has hase, à srog rage go gesiŋ fẽd ɓuy.

Bon maga age wo taŋgu tawge tamsir mono

(Mat 24.3-14; Lug 21.7-19)

3Yeso raw hayge ciŋ ti húulì maga koore Olife wo ti ɓe mono, pel tiŋ Baa ɗegere. Piyer, Jag, Jaŋ de Aŋdre wo de lagge see ɓe ni tawa, á raw wo wiigi ɓe ga : 4Sii ne wùr ɗa ɓa : Re sen a ge wo nà hun ɓa? Mayse kaŋ ge nen wùr ti wur maga re sen ɓuy a ge wo mo ɓa?

5Blam sen Yeso raw wii rage ga : Joŋ we see ɓay de ele, maga jobo mo hãy we nen wa. 6Jar a ge wo yaŋ debaŋ de ɗúu ɓi jage, wosela ɓuy yoo ɓaara wãã yaŋ ga se diŋ Mesi. Á hãy wo nen jar yaŋ go debaŋ. 7Nday leʼ ge yaŋ laa re durgi wo, de re durgi ma ɓi sir ma hãã hãã wo le, de sen ɓuy joŋ we hẽẽne wa, joŋ bà joŋ ge layblaʼ, sen joŋ go, day sen joŋ ge diŋ tawge tamsir gà ɗa ane. 8Wer jar ma baapo dur wo yaŋ de wer jar ma lan wo, day waŋ ma baapo leʼ ge wo waŋ ma lan yaŋ, fĩɗ gi sir joŋ ge yaŋ ɓi sir po wo sar sar lay, koŋne joŋ ge yaŋ. Sen joŋ ge doo tĩĩgi wer bon maga joŋ wãy maga leʼ biŋgi nono.

9Ama ma ɓay, joŋ we see ɓay de ele. Werga jar wo ge wo yaŋ de ɓay pel jar cag wããren wo, á jwag ge wo nday yaŋ de kleg ɓi tiŋ tosge wo, á wo ge wo yaŋ de ɓay pel goforne wo de waŋren wo ti re ɓi, ma joŋ sedewa ɓi go pel ɓaara. 10Wersen, da ga à mo sii Wããre ma de Cõõren go ne wer jarn ɓuy taŋgu ɗa. 11De maga à bag we we ma woge de ɓay pel jar cag wããren wo no, ni nday joŋ we hẽẽne go taŋgu ti wããre maga nday wããn ge mo wa, ama wãã we diŋ wããre maga à hãn ge we de sen ni mono. Werga wããn ge bay diŋ nday wa, ama wããn diŋ Nenterse ma bay ɗage. 12Jar po hã wo hẽẽre ɓaara yaŋ wo go ga id ra go, pan ɓaara joŋ wo weere ɓaara yaŋ wo doosen no lay, day weeren mbuɗ wo nen yaŋ de pããre ɓaara wo, day id rage wo yaŋ go lay. 13Jar caa hee yaŋ de ɓay ɓuy ti re ɓi. Ama je maga oo we ngiŋ hãã go ti wur tawge tamsir no, je sen daʼ ge see ɓe yaŋ.

Bon ma de horge see ti jar Jerusalem wo

(Mat 24.15-28; Lug 21.20-24)

14Nday ko ge mo ma de horge seen we de kaŋge ti ngel maga a de hay kal wo ni gà we no (Je maga yaŋ jaŋ ge ɓe, á mo laa wer ɓe de ele), jar maga á wo we daʼ rage ɓi sir Jude, ni á mo daŋ ge wo go ciŋ ti húulì wo, 15je maga á wo we go daʼ ge ɓe ciŋ ti tiŋ ɓe, ni á mo ɗii gi gesiŋ kalge tiŋma horge fẽẽre ɓe po wo wa so. 16Je maga á nduu daʼ ge ɓe go ɓi pay ɓe, mo fer ge liŋ ni ɓe ma hoo õõbe ɓen wa so lay. 17Re ma de gaali joŋ yaŋ debaŋ wur sen ti naare ma de ɓiili wo, de maga wo de weere jiili mono. 18Tos we Baa ga re sen mo a ti ɓay ti ceere wa. 19Werga wo ti wur sen, bon joŋ yaŋ de hãã debaŋ. Koh bà le ɓaa de maga Baa joŋ fẽẽren go so mono, hãã go patala, te bon sen bay de joŋge wa ɗa, day se joŋ ge wo pel doosen no gà so has lay. 20Hayga Baa Waŋkluu mo ɗig we ma fer naw sen go de dogray gà no, jobo de hay gwaʼ tenen boŋ yeʼ draʼ gà hase. Day á raw ferge ɓe go de dogray wer jar maga á hoo ra go ma ɓe mono.

21Wersen hayga jobo riŋ we ge we so ga : Ko we nen ɓay Mesi yaŋ la, noga Ko we nen ɓay á yaŋ wo mono, yãã we jag ɓe wa. 22Werga jar geteʼ maga wãɗ wo ga saara diŋ Mesi wo de jar geteʼ maga wãɗ wo ga saara diŋ jar ndar nen wããre Baa go, ndar wo nen yaŋ, á joŋ wo fẽẽre mbuɗgi yaŋ debaŋ wo de fẽẽre ma joŋ hẽẽne wo ma kaŋ wer jar go, á ɗig wo ga hayga saara kãã yaŋ no, saara mo kaŋ wer jar maga Baa hoo ra go mono go. 23Ama ma ɓay, joŋ we see ɓay de ele. Ndi siin we go we taŋgu.

Ferge Wel je táabay le

(Mat 24.29-31; Lug 21.25-28)

24Ama ti wur sen, blam joŋge bon sen, wur kol ge go lurum lurum, few ler ge ngel go gà so lay, 25gér ma ciŋ leɗ ge wo le go gesiŋ, egre ma ciŋ fĩɗ gi yaŋ lay. 26Blam sen jar ko ge Wel je táabay le a ge ti swaare de egre, de gragge de woore doo waŋ caw. 27Á lag ge jar peele ɓen Baa wo yaŋ go ti cõõ sir cwẽẽ ɓuy, ma tay jar maga Baa far ra go ma ɓe le go ti jag sir tawge le ciŋ nen wur botoŋ kaʼ hãã wo go gesiŋ ɓaŋla, le ti jag sir tawge le ciŋ nen wur bolaw kaʼ hãã wo go gesiŋ ɓaŋla taʼ lay.

Had koge re see gum

(Mat 24.32-35; Lug 21.29-33)

28Laa we wer wããre maga gum de kaŋ nen ɓay ni mono. De maga pãã ɓe a we go jag doo ɓe ɓuy, sug ɓe raw goɗ ge, nday raw koge ga jag tob kos we go mbaŋ. 29Wersen nday leʼ ko re sen wo mo deŋ we ɓuy so no, ni ko we go ga Wel je táabay yaŋ go de kos ge jagjiŋ mbaŋ. 30Kidolgi ndi riŋ we ga wer jar se maga wo tenen patala mono, huɗ gi wo go taŋgu age re sen ɓuy gà. 31Ngel ma ciŋ wo de tamsir ɓog ɓuy taw ge wo go, ama ma wããre ɓin taw go gà hase.

De ko naw tawge tamsirn diŋ Baa mbe boŋ

(Mat 24.36-44)

32Ama ma nawn wo de wur sen jobo bay de ko a ge ɓe wa hase, hay bo jar peele Baa wo layblaʼ kon wo gà hay bo Weln de see ɓe, say diŋ Pããben boŋ de ko ge ɓe ane. 33Joŋ we see ɓay de ele, leɗ we naa wa, werga nday bay de ko wur sen wa. 34Á joŋ ge doo jobo maga leʼ raw ge go raŋ ge, kal men tiŋ ɓen go, men wããre tiŋ ne weere jõõre ɓen wo doo, raw ɓes joŋren go ne hara doo sar sar ɓuy joŋ ge, kal riŋ je gor jagjiŋ ga á mo leʼ naa wa nono. 35Wersen, lag we go de pũygi, werga nday bay de ko wur maga pan tiŋ fer le de ɓe mo wa. Á fer le de law layblaʼ, gesiɗgi suŋ layblaʼ, noga ti roo kag blaʼ, noga de jag toŋ toŋ laybla. 36Hayga á nduu we gug tuu no, á mo daʼ we ti naa wa. 37Wããre maga ndi de wãã ge ɓe we mokay, ndi de wãã ge ɓe diŋ ne jar ɓuy, la g we go de pũygi.

Currently Selected:

MARK 13: TUP

Highlight

Copy