MARK 12

Wããre ma de ngaɓ ge de jar joŋre ma de ɓlagge wo

(Mat 21.33-46; Lug 20.9-19)

1Blam sen Yeso raw had rage de jagjõõ ga : Jobo raw peɗ tlalumn, á raw maʼ laɓ go ti ɓe cwẽẽ, raw tee tuu ma hãɗ bii tlalum no, boo tiŋ ma de gẽẽre ma gorge ɓe lay. Blam sen á raw hã wããre payn ne jar joŋ joŋre pay wo doo, kal rawge raŋge. 2Wur ruggi tlalum wo a ge mokay, á raw ɓoʼ wejõõ ɓe le see jar joŋre payn wo ga á mo hã wo nen ma sen le ne se. 3Ama á raw wo baa wejõõ seno, mbar wo ne, nii wo ne go doo koɗe. 4Pan payn raw ɓoʼ wejõõ ma tigriŋ wo, wejõõ ma sen, saara raw mbarge ɓe ti, ɗar wo ne. 5Pan payn raw ɓoʼ wejõõ ɓe ma tigriŋ wo pa, wejõõ ɓe ma sen lam kay pa no, á raw wo ʼwarge ɓe go. Joŋ wo weere jõõre ɓe ma tigriŋ wo debaŋ doosen no lay, bag wo jar la, id wo jar la go. 6Je maga gwaʼ doo pan payn boŋ diŋ wel dage ɓe no. Á raw ɓoʼ ge ɓe wo ɓiŋ ɓaara blam taw, kal wããge de ɓil ɓe ga : Á joŋ ge wo sõõre wel ɓin yaŋ. 7Ama jar joŋre pay raw wo riŋ kããra ga : Ko we nen ɓay, je maga kol ge wurpo pan payn mo caw le so no, naa ʼwarn we go, pay mo gwaʼ go diŋ ma naa. 8Á raw wo bagge ɓe, ʼwarn wo go, raw wo ɓoʼge ɓe wo go faale pay no.

9Yeso ga : Pan payn joŋ ge joŋ ẽẽ ne? Á a ge, id gi jar joŋre pay wo go, hã wããre pay ge go ne jar tigriŋ wo. 10Wããre ma de yergen wããn ga :

Húulì maga jar bor tiŋ ɓoʼn wo go,

Raw kolge de ɗaw cõõ tiŋ diŋ sen yaw.

11Joŋre maga Waŋkluu joŋ ne mokay,

Á diŋ fen mbuɗgi nen naa debaŋ.

Nday bay de jaŋge ɓe ti boŋ wa yawla?

12Waŋre jar Jwif raw wo kiɗ faage ga saara Baa Yeso, werga á wo de koge ga á wãã jagjõõ sen mono diŋ ne saara see. Ama á raw wo mege ɓe doo hẽẽne ngaɓan wo, raw wo rawge.

Hã targe ne Sesar

(Mat 22.15-22; Lug 20.20-26)

13Á raw laa Farisiyẽẽ maapo wo wo de jar po wo yoo jar ma wer Herod wo see Yeso ma kii wããre ne hẽn ti. 14Á raw wo woge wiigi ɓe ga : Waŋ wùr no, wùr yaŋ mbe de koge ga ndo diŋ je wãɗ wããre ti cwãy ɓe, ndo bay joŋ hẽẽne doo re maga jar ɗig wo mo wa, werga ndo bay kaŋ sug ti kluuri jar téebeere wo wa, ama ndo had diŋ cwãy re maga Baa da doosen nono. Sii ne wùr ɗa, jag liŋgi de hã faage ma hã targe ne Sesar waŋ Rom yaw noga bay wa yawla? Wùr mo hã yaw noga hã wa yawla? 15Ama Yeso raw koge go ga á yoŋ wo ɗiggi ɓaara ma kidolgin go, raw wii rage ga : Nday kiɗ kii wããre me ti le la? Maŋ we solay boo le me boŋ, ndi kon ɗa la. 16Á raw wo maŋge le ne hẽn boŋ, Yeso raw wii rage ga : Fodo wose mo taʼ ni ne, ɗúu wose de yerge ɓil ɓe mo taʼ ne? Á raw wo fer wããre ne hẽn ga : Diŋ fodo Sesar waŋ Rom wo de ɗúu ɓe. 17Blam sen Yeso raw riŋ rage ga : Hã we fen maga diŋ ma Sesar go ne hẽne, hã we maga diŋ ma Baa go ne Baa lay.

Ama ferge wããre ɓen raw ngris rage debaŋ.

Wããre bir gi jar ma de húulí wo go

(Mat 22.23-33; Lug 20.27-40)

18Jar po yoo Sadusiyẽẽ raw wo nduugi see Yeso. (A wo diŋ jar maga wãɗ wo ga jar ma de húulí fer wo birgi gà so mono.) Á raw wo wiigi ɓe ga : 19Waŋ, Moyis bag wããre Baa sen ne wùr de yerge ga : Hayga jobo maga wegeman ɓe huu we go, men wãy ɓe we bay biŋ wel no, ni wegeman ɓen mo hoo wãy no, mo biŋ weere de ɓe ne hẽn ɓe maga huu go mono. 20Day, weere po hay yaŋ wo wer man ɓaara renam. Ma kluu raw da wãy, raw huugi go, bay biŋ weere. 21Ma de ɓog ɓen raw hoo wãy no, raw huugi go bay biŋ weere lay. Ma de swaʼ ɓaaran joŋ doo lan wo no pa. 22Á wo renam ɓuy gus wo wãyn go wer ɓaara ɓuy, raw wo go hugri gi go bay biŋ weere ɓuy lay. Blam ɓaara ɓuy, wãyn raw huugi go lay. 23Wo dayge ti wur maga jar ma de húulí wo wo go birgi mono, wãyn joŋ ge diŋ wãy wose yoo jar se renam wo mo lag la, werga á gusn wo go wer ɓaara ɓuy wãy ɓaara so mono.

24Yeso raw fer wããre ne hara ga : Nday de hãy see ɓay, werga nday bay de ko wããre ma de yergen wa, nday bay de ko egre Baa wa lay. 25Ti wur maga jar ma de húulín wo wo go birgi mono, werpiiri wo de naare kaŋ wo kããra gà so, ama á lag wo doo jar peele Baa wo nono. 26Ama ti wããre ferge jar ma de húulín wo go birgi mokay, wããre maga Baa bag le ne Moyis yoo lir mono nday jaŋ wããre sen ti boŋ gà yawla? Naa jaŋ ne mono Baa wãã ne Moyis ni ga : Se diŋ Baa ma Abraham, ma Isag wo de Jakobe. 27Yeso wii ra ga : Baa diŋ Baa ma jar ma tenen wo, bay diŋ ma jar ma de húulí wo wa. Day nday go de hãy see ɓay has ɓuy so.

Jag liŋgi ma de daŋ lan wo no

(Mat 22.34-40; Lug 10.25-28)

28Je ma ndar wer wããre Baa po raw ko rage faage. Á wo koge ga wããre maga Yeso fer ne Sadusiyẽẽ wo de cõõre mokay raw yaʼ ge see ɓe mbaŋ, raw wiigi ɓe ga : Jag liŋgi maga go pel de daŋ lan wo ɓuy diŋ ma hon ɓa? 29Yeso raw fer wããre ne hẽn ga : Maga go pel de daŋ lan wo ɓuy, diŋ maga wãã ga : Israyele, coʼ sug ɓo. Waŋkluu, Baa naa no, Waŋkluun diŋ se boŋ. 30Ndo da ge Waŋkluu, Baa ɓon yaŋ go de jiili ɓo ɓuy, de maysee ɓo ɓuy, de ɗiggi ɓo ɓuy, de egre ɓo ɓuy lay. 31Coʼ sug ɓo, ma de ɓog ɓen wãã pa ga : Ndo mo da je ma ɓiŋ ɓo mbaŋ doo see ɓo no maʼ lay. Jag liŋgi po bay de daŋ ma se ɓogn wo mo lag wa so. 32Je ma ndar wer wããre Baan raw fer wããre ne Yeso blam sen ga : De el debaŋ, Waŋ. Wããre maga ndo wãã mokay, á kidolgi. Baa mbe boŋ, Baa maapo bay doosen no wa so. 33Wersen je tabay mo da Baa de jag jiili ɓe ɓuy, de ɗiggi ɓe boŋ ɓuy, de egre ɓe ɓuy, á mo da je ma ɓiŋ ɓe mbaŋ doo see ɓe no maʼ lay. Ngaɗge horogre maga a roɗ ra ti ngel ma siɗ jag no, de wer fẽẽre ma siɗ jag ma tigriŋ wo wer sar sar ga à joŋ sen mo ɓuy, wããre Baa se ma ɓogn mo lag daŋ sen wo. 34Yeso wo koge ga á fer wããre de ɗeŋ doosen mokay raw riŋgi ɓe ga : Ndo bay go see twaywaŋ mani Baan hãã wa so.

Blam sen á laa wo wii jag ɓe ti wããre po gà so has.

Kris wo de Dafid

(Mat 22.41-46; Lug 20.41-44)

35Yeso raw had jar ɓi tiŋ Baa, á raw wii wiigi ma kay ga : Diŋ wer may ga jar ma ndar wer wããre Baa wãɗ wo ga Mesi diŋ moo Dafid ɓa? 36Werga Dafid de see ɓe, Nenterse ma bay ɗag kaŋ wer ɓe ɗege ɓe ga :

Baa Waŋkluu riŋ Waŋkluu ɓin ga :

Hay ɓo go ti ɓaŋ war ɓi la,

Hãã go ti wur maga ndi kaŋ ɓaale ɓo ge go ti jar hee ɓon wo ɗa mono.

37Dafid de see ɓe, ɗen ga Waŋkluu se, day Mesi diŋ moo Dafidn mooge pa?

Yeso de riŋ jar ga á mo koɗ wo see ɓaara doo jar ma ndar wer wããre Baa wo

(Mat 23.1-36; Lug 20.45-47)

Jar ngaɓa debaŋ coʼ wo sug wããre Yeso go ɓil fehe. 38Yeso raw riŋ jar maga se de had rage ga : Koɗ we see ɓay doo jar ma ndar wer wããre Baa maga da wo raŋge diŋ de õõbe ma kluuri ti, maga ni jar mo her jag ne saara ɓi lumo de horge sug ti wo no mono, 39jar maga da wo lagge diŋ ti paale ma peln wo ɓi tiŋ tosge wo ti ngel hayle ma de woore ti ngel maga à ɗe jar we re hoole ni ngaɓa mono. 40Yãɗ wo fẽẽre ma doo naare dwur wo go ɓuy lay, da wo tosge de pããrege, maga saara mo ko nen jar de ele. Baa joŋ bon ɓaara yaŋ de hãã debaŋ.

Wãy dwur hã solay ɓen go ne Baa

(Lug 21.1-4)

41Blam sen Yeso raw hayge ti jeŋ ngel maga à lag solay ɓi tiŋ Baa ni mono, ma koge ga jar ngaɓan lag wo solay lag ẽẽ la. Jar ma de horog debaŋ raw wo lag solay pur puri. 42Wãy dwur po ma de coocoo raw age, raw laa solay ma kleere ni ɓoge, nen nus siisii boŋ. 43Yeso raw ɗe jar ma wer ɓen wo le, raw riŋ rage ga : Kidolgi ndi de riŋ we ge ga wãy dwur se ma de coocoo mo deŋ laa daŋ jar lan wo ɓuy. 44Werga jar lan lag wo diŋ solay maga sen go de gwaɗge doo ɓaara ni ga lag lagge, ama ma ɓe, de coocoo ɓen ɓuy, á hã go diŋ fen ma doo ɓen ɓuy tuu maga se de wo yeɗ rege ɓe de ɓe mono.

Currently Selected:

MARK 12: TUP

Highlight

Copy