MARK 11

Yeso kal ɓi leege Jerusalem

(Mat 21.1-11; Lug 19.28-40; Jaŋ 12.12-19)

1De maga á wo wo dayge see Jerusalem mbaŋ nen Betfaje wo de Betani mono, á raw wo age ti húulì maga koore Olif wo ti ɓe mono. Yeso raw laa jar ma wer ɓe wo wo pel ɓe ga : See we, 2wo ɓi leege maga wo pel ɓay ɗegere, nday wo yaŋ daʼ wel gerhẽẽ maga jobo bay de ɗiigi ti ɓe wa ɗa yaŋ de saʼ ge deŋ, ni nday pog we ne, a we le de ɓe me. 3Hayga jobo wii we we ga : Nday pog ne le la no, ni nday riŋ we ne ga : Waŋkluu de sãy ɓe ti, ni se men mbe gerhẽẽn yaŋ le rawge la deparday tuu lay.

4Á kal wo rawge so, wo wo daʼ wel gerhẽẽ go nen faale ti faage de saʼ ge jagjiŋ mbaŋ deŋ. Á raw wo pog ge ɓe. 5Jar ma baapo maga wo ni raw wo wii gi ga : Ɓa nday joŋ sen diŋ may ɓa? Nday pog wel gerhẽẽ le? 6Á raw wo fer wããre ne hara doo maga Yeso hay riŋ ra nono, jar sen raw wo men rage rawge de ɓe. 7Á raw wo age de wel gerhẽẽ ne Yeso, lag wo õõbe ɓaaran ne hẽn faale, Yeso raw ɗiigi ti ɓe. 8Jar debaŋ raw wo blar õõbe ɓaaran ti faage, ma baapo car wo doo koore le ɓi pay lagn wo ti faage lay. 9Jar maga hay wo seege pel Yeso de jar ma seege blam ɓen wo le ngar wo jag togoɗ Baa ga : Baa mo woo je maga le de age ti jag Waŋkluu mo caw no. 10Baa mo woo Waŋkluu maga le de age mo caw no, á nduu hayge ti Waŋ Pan wùr Dafid no, wùr togoɗ mo Baa ma ciŋ no.

11Yeso raw kalge ɓi leege Jerusalem, kal woge ɓil tiŋ Baa. Á kal raŋ nen go ti ɓe degarra ɓuy, kal rawge Betani de jar ma wer ɓe ma hwal ti ɓogn wo, werga wùr hay go de coŋ ge.

Yeso faɗ gum go

(Mat 21.18-19)

12Toŋ ɓe de maga á men wo Betani le go mono, koŋne raw cee Yeso. 13Á raw ko gum wo hãã kaʼ de goɗ sugi. Á raw woge ko ge ɓe ga se daʼ yaŋ de leʼge yawla. Á wo dayge see gumn mbaŋ mono, á raw daʼ ge diŋ sug ɓe tawa, werga á hay bay diŋ few maga gum leɗ wo nen ɓe mo wa ɗa. 14Blam sen Yeso raw riŋ gum ga : Jobo re ge leʼge ɓo gà so hase.

Jar ma wer ɓen raw wo laa wããre se no.

Yeso kal ɓi tiŋ Baa

(Mat 21.12-17; Lug 19.45-48; Jaŋ 2.13-22)

15Blam sen á raw wo ferge le Jerusalem, Yeso fer kalge ɓi tiŋ Baa pa, raw niɗ jar trere maga nduɗ wo yeɗ fẽẽre ɓi tiŋ Baan ni, raw srog table jar cor solay wo de paale jar yeɗ kurgudun wo go gesiŋ, 16laa men jobo le go kalge ɓi tiŋ Baa de mopo doo boŋ gà hase. 17Blam sen á raw kaŋ nen ɓaara ti wããre sen ga : Á go de yerge ga : À ɗe ge tiŋ ɓin ga tiŋ tosge ma wer jar ɓuy. Ama ma ɓay nday raw kolge ɓe go diŋ tiŋ ma yoŋ jar freŋ wo le la?

18Waŋre ma siɗ jagn wo de jar ma ndar wer wããre Baa wo wo laa wããre sen mokay, á raw wo kiɗ faage ma ii Yeso go, de sen ɓuy, á joŋ wo hẽẽne doo ɓe, werga ngaɓa jarn de ngrisgi wer hadge ɓe ma de el debaŋ no.

19Wur wo go coŋge mono, Yeso de jar ma wer ɓen raw wo men ɓi leegen go, raw wo laage le go.

Gum maga Yeso faɗn hig go de kããge ɓe ɓuy

(Mat 21.20-22)

20Toŋ ɓe de jag toŋ crum, de maga saara fer heege ti faage sen mo pa no, á raw wo ko gum wo go de higgi de kããge ɓe ɓuy kaʼa. 21Piyer raw ɗig ti, raw wii Yeso ga : Waŋ, ko nen ɓo, gum maga ndo faɗn go, hig we go. 22Yeso raw riŋ jar ma wer ɓen wo ga : Kidolgi, ndi riŋ nday hayga nday yaŋ de hã ɓil ɓay ne Baa no, 23nday kãã ma riŋ húulì ma kaʼ ga : Naa le go, ni ndo wo go leʼge nen maaroge, hayga nday bay we de faare jag jiili ɓay wa, nday kaŋ ɗiggi ɓay we ga fen maga nday wii ti ɓe joŋ no, á joŋ doosen no lay. 24Wersen ndi riŋ nday ga nday leʼ tosge we ma wii mopo no, kaŋ we ɗiggi ɓay ga nday daʼn we go, day á hãn yaŋ we lay. 25Hayga nday yaŋ go ti deele lag ma tosge, day ɓil ɓay yaŋ de sõõ ge ne jobo ti ti re po taʼ no, men re sen go ne hara ti, nen maga Pan ɓay ma ciŋ mo men ɗig re ɓlagge ɓayn go ne nday ti lay. [26Ama hayga nday bay we men ɗig re ɓlagge jar lan wo go ne hara ti wa no, Pan ɓay ma ciŋ men ge ɗig re ɓlagge ɓayn wo go ne nday ti gà lay.]

Jar ga Egre Yeso a le gen la

(Mat 21.23-27; Lug 20.1-8)

27Á raw wo ferge le Jerusalem tigriŋ pa. Yeso raw kalge le raŋ ɓil tiŋ Baa no, waŋre jar ma siɗ jag wo de jar ma ndar wer wããre Baa wo de jar kluurin, raw wo nduugi see ɓe. 28Á raw wo wiigi ɓe ga : Ɓa ndo joŋ fẽẽre sen wo mo deŋ diŋ de egre ma wo ɓa? Wose hã egre sen mo ma joŋ rage ɓa? 29Yeso raw fer wããre ne hara ga : Ndi wii jag ɓay ti mopo boŋ ɗa, hayga nday fer wããre we me ti ɓe no, ni ndi riŋ nday yaŋ ti egre ɓi maga ndi daʼn ma joŋ fẽẽre sen wo mo lay. 30Á raw wii rage ga : Wose ɓoʼ Jaŋ le joŋ batem jar mo ne, diŋ Baa yaw noga diŋ jar téebeere wo? Fer we wããre me ti sen ɗa so. 31Ama á raw wo faa kããra ga : Hayga naa wãã we la ga ɓoʼn le diŋ Baa, á kal ge riŋ naa la ga : Wer may ga nday yãã wããre Jaŋ gà la. 32Ama naa wãã ge ga ɓoʼn le diŋ jar téebeere wo gà pa... (Ngar wããre sen laa joŋ ge nen ɓaara gà werga á joŋ wo hẽẽne doo ngaɓa no, doo ga jar ɓuy de koge ga Jaŋ diŋ je ndar nen wããre ma jag Baa go cwãy.) 33Wersen á raw wo fer wããre ne Yeso ga : Wùr ko gà.

Yeso raw ga : ãã, de ele. Ndi de see ɓi, ndi riŋ we ge ti egre maga ndi joŋ fẽẽre sen wo de ɓe mo gà lay.

Currently Selected:

MARK 11: TUP

Highlight

Copy