MATIYE 4

Manhúulí jãɗ Yeso

(Mark 1.12-13; Lug 4.1-13)

1Blam wããre sen Nenterse kal rawge de Yeso wo ti puuli maga Manhúulí mo jãɗ ne. 2Blam maga Yeso wo joŋ naw hwal hwal naa de síilí hwal hwal naa bay re mopo, koŋne raw cege ɓe. 3Manhúulí raw yaʼ ge see ɓe wii gi ga : Hayga ndo yaŋ diŋ wel Baa, wii weere húulìn wo mo lag ga á mo kol wo go hoole.

4Yeso raw fer wããre ne hẽn ga : á go de yerge ga : Je tabay hay tenen diŋ wer hoole tawa gà ama á joŋ tenen caw diŋ wer wããre maga Baa wãɗn go mo ɓuy no.

5Blam sen Manhúulí kal rawge de ɓe Jerusalem, ɓi leege mani Baa no, raw ooge ɓe ti tipẽẽ ge tiŋ Baa no, 6raw riŋgi ɓe ga : Hayga ndo yaŋ diŋ wel Baa, leʼ le go gesiŋ, werga á go de yerge ga :

Baa riŋ gi jar peele ɓen wo yaŋ ti ɓo

maga á mo cegaw wo ndo,

nen maga ɓaale ɓo mo maʼ ge se húulí wa.

7Yeso raw fer wããre ne hẽn ga : Á go de yerge lay ga : Jobo mo jãɗ Baa Waŋkluu wa.

8Manhúulí kal rawge de ɓe ti húulì ma de gẽẽre, raw kaŋ nen ɓe ti twaywaŋre ma ti tamsirn wo ɓuy, de woore ɓaaran wo ɓuy, 9raw ga : Hayga ndo laa kõyõgre we pel ɓi goŋ ndi no, ni ndi hã ra mo ɓuy.

10Blam sen Yeso raw fer wããre ne hẽn ga : Manhúulí, yaʼ wo go see ɓi hãã, werga á go de yerge ga : Goŋ diŋ Baa Waŋkluu ɓo no, leɗ monɗra goŋge diŋ se boŋ tuu seŋ.

11Blam sen Manhúulí raw menge ɓe. Jar peele Baa raw wo age see Yeso raw wo joŋ rege ne hẽne.

Yeso tĩĩ wer joŋre ɓen ɓi sir Galile

(Mark 1.14-15; Lug 4.14-15)

12De maga Yeso wo laa ge ga à baa Jaŋ we ti daŋgay mokay, á kal rawge Galile, 13laa hayge ɓi leege Nasared gà raw hayge wo go ɓi leege Kapernam ma ti jeŋ maarog ma Galile no, ɓi sir ma Sabulon wo de Neftali. 14-16Wããre maga Esay je ndar nen wããre ma jag Baa go hay siin go mono. Á ga :

Sir ma Sabulon, sir ma Neftali,

sir maga wo jag maarog go nen faale Jurdẽẽ mono,

Sir Galile mani jar maga bay wo diŋ jar Jwif wa mono!

Jar maga wo de lagge nen suŋgu mono,

Ko ge wo poɗag ma kluu yaŋe!

Jar maga wo de lagge diŋ nen suŋgu ɓi sir ni jar húulí wo,

Poɗag tee ngel yaŋ go ne hara ti.

17De sen ni tuu seŋ, Yeso raw tĩĩ wer siɗ wããre, raw riŋ jar ga : Coo we ɗiggi ɓay ma de ɓlaggen de deele tigriŋ werga ngel maga Baa nduu hay Waŋ kos we go.

Yeso ɗe jar bag cẽẽ wo naa

(Mark 1.16-20; Lug 5.1-11)

18Yeso kal rawge ti jeŋ maarog ma Galile, á raw ko jar po wo ɓog, ga wo hẽẽrebe, Simoŋ (maga á ɗen ga Piyer) wo de hẽn ɓe Aŋdre, de lag bày nen bii, werga á wo diŋ jar bag cẽẽ. 19Yeso raw riŋ rage ga : See we le wer ɓi, ndi kol nday go diŋ jar fleg jar téebeere wo ne Baa. 20Á raw wo men bày ɓaaran go ti ngel ni, raw wo maŋ blam ɓe.

21Yeso raw yaʼ ge wo pel hãã pa, raw ko jar po wo ɓog, wo hẽẽrebe lay, diŋ Jag wo de Jaŋ jar ni Sebede wo. Á hay wo ɓi daage de pan ɓaara Sebede, hay wo kneʼ bày ɓaara no. Yeso raw ɗe rage le. 22Ni tuuseŋ á raw wo men daagen go de pan ɓaara ni, raw wo maŋ blam Yeso.

Yeso de had jare, de sii wããre, de pẽɗ jar go lay

(Lug 6.17-19)

23Yeso raw raŋ sir Galile go ɓuy, had jar ɓi tiŋ tosge wo, siɗ Wããre ma de Cõõren ne jar ga Baa de age hayge Waŋ, pẽɗ jar go jag wer cege ma honla ɓuy, de gayre ma see ɓaaran wo. 24À raw laa re ɓe wo go ɓi sir Siri ɓuy. À raw age de jar maga cege wo de joŋ bon ɓaara, jar maga wo go de fĩɗ ti doo cege, jar ma de sõõre ti wo, de maga leɗ wo ɓluri, jar grúmri wo ɓuy ne hẽne. Yeso raw pẽɗ rage go. 25Jar ngaɓa raw wo maŋ blam ɓe, jar sen a wo le ɓi sir Galile, de sir Dekapol, de jar Jerusalem, de sir Jude, de sir maga wo de lagge faale Jurdẽẽ mono.

Currently Selected:

MATIYE 4: TUP

Highlight

Copy