MATIYE 5

Yeso hay go sii wããre ne jar ciŋ ti húulì

1Yeso wo ko jarn mo ngaɓa deŋ, á raw ɗii gi ciŋ ti húulì, raw hayge gesiŋ. Jar ma wer ɓen raw wo age see ɓe. 2Á raw had rage gà.

Yeso ga ɓil ɓay mo hay go feh fehe

(Lug 6.20-23)

3Jar maga wo de ko see ɓaara de coo ti nenterse woo wo we, werga twaywaŋ ma ciŋ diŋ ma ɓaara.

4Jar maga wo ti roo law see ɓaara wo wo we, werga Baa teŋ ge nen ɓaara yaŋ.

5Jar maga wo desãy wo wo we, werga sirn kol ge yaŋ diŋ ɓaara, doo ga Baa hay riŋ ga se hãn ge hara nono.

6Jar maga wo de dage debaŋ ga saara mo see doo ga Baa de wiigi nono, wo wo we, werga Baa wùu ra yaŋ de fẽẽre debaŋ.

7Jar maga ko wo de coo jar wo wo we, werga Baa ko decoo ɓaara yaŋ lay.

8Jar maga ɓil ɓaara depuy wo wo we, werga á ko ge wo Baa yaŋ.

9Jar maga tay wo jag jar wo wo we, werga Baa ɗe ra ge yaŋ ga weere se.

10Jar maga à joŋ bon ɓaara werga á wo de joŋ fen maga Baa de wiigi ɓe wo wo we, werga twaywaŋ ma ciŋ diŋ, ɓaara.

11Hayga jar yaŋ wo ɗar nday, joŋ wo bon ɓay, car wo re ne nday see, wãɗ ɓlagge ma honla ɓuy ti ɓay, wer maga nday diŋ jar ma wer ɓi no, 12ni nday wo we, ɓil ɓay mo hay go feh, lag we de woore, poɗge ɓay yaŋ le gor we ge ciŋ debaŋ. Werga á hay joŋ wo bon jar ndar nen wããre Baa go maga hay wo le taŋgu ɓay doosen no lay.

Yeso ga nday diŋ cuu, nday diŋ jar ler ngel go lay

(Mark 9.50; Lug 14.34-35)

13Á raw riŋ rage ga : Nday diŋ cuu ma kol jar ma ti tamsir wo de cõõre, ama hayga cõõre cuun ãã we go, á fer ferge ɓe de cõõre ferge pa la. Á joŋ mopo de ɓe gà so, à laan wo go diŋ siigi, jar see go ti ɓe.

14Nday diŋ jar ma ler ngel go ne jar ma ti tamsir lan wo ti. Nday doo ɓi leege maga go de boo ge ciŋ ti húulì tinoo lid tiʼ nono. 15À doʼ gér bay ma kuɓ hãn go ti wa, de el ɓen à hagn go ciŋ ma ler ngel go ne jar ma ɓi tiŋman wo ti ɓuy. 16Wersen ler we ngel go pel jar doosen no lay, maga á mo ko wo de el ɓay maga nday de joŋ ge ɓe mono, mo togoɗ wo Pan ɓay maga le ciŋ mono.

Yeso de had jar de jag liŋgi

17Ɗig we ga ndi a ɓlag jag liŋgi wo de hadge mani jar siɗ wããre Baan wo go no wa. Ndi a bay ma ɓlag rage wa, ama ndi a ma ɓoɗ wer ɓaara go ti cwãy ɓe. 18Ndi de riŋ nday kidolgi, de maga ngel ma ciŋ wo de tamsirn kiŋgi wo wo mo hãã no, hay bo yerge ma meʼ layblaʼ, hay bo yerge ma de duʼ gi ti jag liŋgi meʼ taʼ layblaʼ à kãã ma naa ge ɓe go gà hãã go ti wur maga re sen wo go joŋ ge ɗa. 19Wersen je maga men we go see jag liŋgi meʼ, day had jar we de ɓe ga á mo joŋ wo doosen no lay no, je sen kol ge diŋ je ma depẽẽre meʼ yoo jar ma ti twaywaŋ ma ciŋ wo. Ama ma je maga yãã wããre Baan we, day had jar we ga á mo yãã wo doosen no lay we no, kol ge diŋ je kluu ma yoo jar ma ti twaywaŋ ma ciŋ no. 20Ndi de riŋ nday ga hayga nday joŋ fen maga Baa de wiigi ɓe we daŋ jar ma ndar wer wããre Baa wo de Farisiyẽẽ wo we gà no, ni nday kãã ma woge laage ti twaywaŋ ma ciŋ gà.

Yeso de had jar ti wããre leɗge kããra

21Nday yaŋ de laage ga Baa hay riŋ moore naa wo we le ga : Ndo mo ii húulí wa, je maga ii húulí we, à mo wo de ɓe pel je cag wããre no. 22Ma ɓi, ndi riŋ we ga : wosela ɓuy maga leʼ kããra we de hẽn ɓe, à mo wo de ɓe pel je cag wããren lay, je maga riŋ hẽn ɓe we ga : Je dog jag no, à mo wo de ɓe pel jar cag wããre ma kluurin wo. Je maga riŋ pa ga : Je loɗge no, á wo ge nen wùu maga huu gà no. 23Wersen, hayga wosela leʼ we woge de fen sii jag ne Baa ti ngel sii jag, day ti ɓe raw ɗiggi we ga hẽn se yaŋ de sõõ ɓil ne se ti ti fen po, 24á mo men fen sii jag ɓen jag tiŋ ma sii jag tiʼ i, á mo see wo tay jag ɓaara de hẽn ɓen ɗa. Blam sen ni á mo fer le sii jag ɓen kway.

25Hayga jobo ʼwaa war we ne kẽẽ ti pel je cag wããren no, de maga á wo wo de woge cag wããren mo tiʼ i, á mo tay jag de je ʼwaa war ne hẽn tin deparday de maga á wo wo ti faage ɗa mono, nen maga á mo hã mo go ne je cag wããren doo, day je cag wããren mo hã mo go ne sooden doo ma woge de ɓo ɓoʼ ge ti daŋgay seŋ wa. 26Ndi de riŋ moge kidolgi ga ndo kal ge go gà has, hãã ndo wo go poɗge, hay bà siisii boŋ draʼ gwaʼ ti ɓo gà.

Yeso de had jar ti re lengãɗge de naare

27Nday yaŋ de laa ge ga : Ndo mo lengãɗ de wãy jobo wa. 28Ama ma ɓi, ndi de riŋ nday ga : wosela ɓuy maga ko wãy po we, day raw ɗiggi we ga se de hay wo see ɓe we no, go de lengãɗge de ɓe tuu yaw. 29Wersen hayga ndo ko we ga nen ɓo ma ɓaŋ war go de kaŋ wer ɓo no, naan go, ɓoʼn wo go hãã, gwaʼ mbo go nen boŋ, sen de el ɗawa daŋ maga Baa wo ge go ɓoʼ moge go ɓuy nen wùu maga huu gà mono. 30Hayga wosela ko we ga doo se ma ɓaŋ war go de kaŋ wer se joŋ ɓlagge no, á mo caan go, mo ɓoʼn wo go, á mo gwaʼ mbe go doo boŋ, sen ɗawa daŋ maga á wo de ɓe ɓuy nen wùu maga huu gà mono.

Yeso de had jar ga bus naare wa

(Mat 19.9; Mark 10.11-12; Lug 16.18)

31À yaŋ de riŋ nday pa ga : Je maga bus wãy ɓe we go, á mo hã kefder ne hẽn doo ga se busn we go. 32Ma ɓi, ndi de riŋ nday ga : wosela maga bus wãy ɓe mbe go ti re po hãy koɗe, bay we werga se daʼn de lengãɗge de jobo wa, day wãyn raw we da war ma tigriŋ no, je sen kol wãy ɓen go lengãɗge de jar diŋ se, day je maga da wãy maga bus we le go busgi mo lay no, de lengãɗge de wãy sen lengãɗge lay.

Yeso de had jar ti re haɗ ge

33Nday yaŋ de laage ga Baa hay riŋ moore naa wo we le ga : Re maga ndo haʼ we go ti ɓe, je sen mo fer go budgi ɓe wa. Ama baa jag fen maga ndo haʼ go ti ɓe pel Waŋkluu go. 34Ama ma ɓi, ndi de riŋ nday ga haɗ we wa has, haɗ we de ngel ma ciŋ wa, werga á diŋ paale Baa. 35Haɗ we de sirn wa lay, werga á diŋ ngel kaŋ ɓaale Baa, haɗ we de Jerusalem wa, werga á diŋ sir Waŋ ma kluu no. 36Haʼ de ti ɓo wa, werga ndo bay de kããge ma fer riŋ ti ɓo depuy noga de tàabay boŋ draʼ wa. 37Wãã we mbay tuu ga : ãã ni se diŋ ãã seno noga baywa, ni se diŋ baywa seno, werga re maga wosela wãã ni de daŋ sen mokay sen a le diŋ jag Manhúulí.

Yeso de had jar ti re saʼ ge hee

(Lug 6.29-30)

38Nday yaŋ de laage ga : Nen, poɗge ɓe diŋ nen lay. Saŋ, poɗge ɓe diŋ saŋ lay. 39Ama ma ɓi, ndi de riŋ nday ga saʼ we hee ɓlagge je maga joŋ we de ɓlagge mo wa. Hayga jobo maʼ mo we haw ɓaŋ war no, mbuɗ ma ɓaŋ gùrn ne hẽn pa. 40Hayga jobo yaŋ kiɗ moge de re ga se yãã õõbe ma ti ɓon no, men õõbe ɓo ma kluun go ne hẽn pa. 41Hayga je ma joŋ joŋre ne jar kluuri sir wo maŋ fen põõre we mo ti de waŋ ga yaʼ de ɓe ne se nen klewmeder boŋ no, yaʼ wo de ɓe ne hẽn ni nen klewmeder ɓoge. 42Jobo wii mopo we doo ɓo no, hã fen sen ne hẽne, joŋ day gà ne je maga da ga se taa mopo doo ɓo mo wa.

Wosela mo da je hee ɓe

(Lug 6.27-28,32-36)

43Nday yaŋ de laa ge ga : Ndo mo da kan ɓo je tabay, ni ndo caa hee de je hee ɓo. 44Ama ma ɓi, ndi de riŋ nday ga : da we jar hee ɓay wo, tos we ti jar maga joŋ wo bon ɓay mono, 45nen maga nday mo kol go diŋ weere Pan ɓay ma ciŋ no. Werga á kal wur le go mokay ti jar ma de ɓlagge wo, de jar ma de el wo ɓuy tuu, á cwaa bii le ti jar joŋ de el wo de jar ma de ɓlaggen wo ɓuy tuu. 46Hayga nday yaŋ dage diŋ jar da weege wo taw taw no, ni nday gor poɗge doo Baa pa le? Hay bo jar tar lumo wo de joŋge doosen no lay. 47Hayga nday yaŋ her jag diŋ ne hẽẽre ɓay wo taw taw no, ni nday de joŋge nà diŋ re may se de woore daŋ jar lan ane. Hay bo jar maga bay wo ti jag Baa wa joŋ wo doosen no lay. 48Wersen lag we go pah ɓuy doo ga Pan ɓay maga le ciŋ go pah no lay no.

Currently Selected:

MATIYE 5: TUP

Highlight

Copy