JAŊ 8

Farisiyẽẽ nduu wo de wãy po ga saara daʼ jobo go de suuli de ɓe poɗage

1Yeso kal rawge ti húulì maga koore Olif wo ti ɓe mono. 2Toŋ ɓe de jag toŋ crum, á raw ferge ɓi tiŋ Baa, ngaɓan ɓuy raw wo yaʼge see ɓe, á raw hayge gesiŋ, raw tĩĩ wer had rage ni. 3Jar ma ndar wer wããre Baa wo de Farisiyẽẽ raw wo age de wãy po maga à daʼn de lengãɗge de jobo. Á raw wo ooge ɓe go pel jar deŋ ɓuy, 4raw wo ɗe Yeso ga : Waŋ, wãyn mo deŋ á daʼn lengãɗge de jobo le go ti ɓe tinoo la poɗag tiʼ. 5Moyis hay riŋ wùr ɓil jag liŋgi ga id naare ma doosen no kay wo go de ɓoɗge de húulì, ɓon ndo wãã gahãy lay? 6Á wãã wo sen maga ni saara mo kii wããre ne hẽn ti, ni saara mo car wããre ne hẽn see. Ama Yeso raw jel ti ɓe gesiŋ yerge nen sir de wedoo ɓe. 7De sen ɓuy á laa wo men Yeso wiigi gà Yeso raw naa ti ɓe go ciŋ, raw riŋ rage ga : Je ma yoo ɓay maga joŋ ɓlagge ti boŋ gà has mo ɓoʼn de húulì taŋgu. 8Blam sen á raw jel ti ɓe gesiŋ yerge nen sir de wedoo ɓe tigriŋ pa. 9Á wo wo laa wããre sen mokay, je la raw, je la raw, tĩĩ wer ma kluurin wo taŋgu. Yeso raw gwaʼ ge diŋ de wãy de oole pel ɓe deŋ tawa. 10Blam sen á raw naa ti ɓe go ciŋ, raw ɗe ge ɓe ga : Wãy no, jarn wo gen ɓa? Re jobo bay de baw mo ge yoo ɓaara boŋ wa yawla? 11Wãyn raw fer wããre ga : Bay boŋ wa Waŋ ɓi no. Yeso raw riŋgi ɓe ga : Re po bay jag ɓi ma baw mo ge wa has ɓuy lay. See mbo jag ɓo, ane joŋ ɓlagge wa so hase.]

Yeso diŋ je ler ngel go ne jar ma ti tamsir la wo ti

12Yeso raw ferge wãã wããre ne ngaɓan tigriŋ pa ga : Ndi diŋ je ler ngel go ne jar ma ti tamsir la wo ti. Wosela maga maŋ blam ɓi we, daʼ ge ngel go de lerge, ma woge de ɓe kolge go tenen, je sen day seege nen suŋgun gà so hase. 13Farisiyẽẽ raw wo riŋgi ɓe ga : Ndo wãɗ go ti see ɓo diŋ ndo de see ɓo tuu mokay, wããre ɓo maga ndo wãɗ mo deŋ bay cwãy wa. 14Yeso raw riŋ rage ga : Haybà ga ndi wãã go ti see ɓi diŋ ndi de see ɓi tuu layblaʼ no, wããre ɓi maga ndi wãɗn mo deŋ ti cwãy ɓe, werga ndi de ko ngel maga ndi a le ni, de ngel maga ndi wo ge ni mo lay. Ama ma ɓay, nday bay de ko ngel maga ndi wo ge ni mo wa lay. 15Nday cag re ma ɓay doo jar téebeere wo no, ama ma ɓi, ndi cag re jobo gà. 16De sen ɓuy, hayga á joŋ we nen maga ndi mo cag re no, re sen cag ti ngel ɓe, werga ndi bay cagge ɓe diŋ ndi de see ɓi tawa wa, ama Pan ɓi maga ɓoʼ me le, bay go de men mege boŋ wa. 17Á go de yerge ɓe ɓil jag liŋgi lay ga hayga jar po wo ɓog a wo we diŋ de sedewa sen boŋ no, ni se diŋ cwãy. 18Ndi de joŋ sedewa go ti see ɓi de see ɓi, day Pããbe maga ɓoʼ me le de joŋ sedewa go ti ɓi lay. 19Á raw wo wiigi ɓe ga : Day Pan ɓon le la gen so ne? Yeso raw riŋ rage ga : Nday bay de ko Pan ɓi wa lay, bay de ko mege wa lay. Hayga nday mo ko me we no, ni nday de hay de ko Pan ɓi lay.

20Yeso wãã wããre sen mo yeʼ de maga ni se de had jar ɓi tiŋ Baa, de hayge ɓiŋ ngel maga fen lag solay ɓi tiŋ Baan de kaŋge ni mono. Jobo laa duʼ doo ne hẽn se gà has, wer maga wur ɓe hay bay de age wa ɗa kway mono.

Yeso ga à kãã ma woge go ti ngel maga se wo ni mo gà

21Yeso raw riŋ rage pa ga : Ndi raw ge, day nday kiɗ me ge yaŋ, ama nday huɗ gi nen ɓlagge ɓayn wo so. Nday kãã ma woge go ti ngel maga ndi de woge ni mo gà.

22Jar Jwif raw wo riŋ kããra ga : Á wo ge go ii see ɓe, werga á raw wããge ga : Nday kãã ma woge go ti ngel maga ndi de woge ni gà mono. 23Yeso raw riŋ rage ga : Nday ma ɓayn gesiŋ la, ama ma ɓin, ndi a le ciŋ, nday diŋ jar ma ti tamsir la, ama ma ɓin, ndi bay ma tamsirn la wa. 24Diŋ wersen ndi hay riŋ we we go ga nday huɗ gi nen ɓlagge ɓayn wo. Werga nday huɗ gi nen ɓlagge ɓayn wo no, hayga nday yãã wããre ɓi ga ndi diŋ je maga diŋ NDI we gà no. 25Á raw wo wiigi ɓe ga : Day ndo diŋ wose so la? Yeso raw fer wããre ne hara ga : Ndi diŋ je maga ndi hay wãã le ne nday ti tĩĩgi wern le mo ɓaa no. 26Ndi yaŋ ma wããge ɓe debaŋ ɗa pa, ma cag re ɓay lay, je maga ɓoʼ me le wãɗ re ti cwãy ɓe, day ndi wãɗ ne jar ma ti tamsirn wo la diŋ wããre maga ndi laan le jag ɓe.

27Á laa wo laage ɓe ga á wãã ne saara mokay diŋ ti Baa Pããben gà. 28Yeso raw riŋ rage ga : Nday wo ge we go maŋ Wel je tabayn ciŋ no, wur sen nday ko ge yaŋ ga : Ndi diŋ je maga diŋ ndi, nday ko yaŋ ga ndi bay joŋ mopo de ti ngel see ɓi tawa wa, ndi wãã go boŋ diŋ wããre maga Pan ɓi had me le de ɓe. 29Je maga ɓoʼ me le, de ɗaw mege doo ɓe, á bay go de men mege go boŋ wa, wer maga ndi joŋ tum diŋ joŋre maga nen ɓe de ele.

30Yeso wãã doosen no kay, jar debaŋ raw wo yãã wããre ɓe.

Jar maga go ti see ɓaara wo de gebeere wo

31Blam sen Yeso raw riŋ jar maga yãã wo wããre ɓen ga : Hayga nday yaŋ de yãã jag ɓi ti ngel ɓe no, ni nday kol ge diŋ jar ɓi ma wer ɓi cwãy cwãy. 32Nday laa ge wããre ma cwãy lay, wããre ma cwãy raw kol we ge go ti see ɓay lay. 33Á raw wo riŋgi ɓe ga : Wùr diŋ ɓĩĩni mani Abraham, wùr bay de joŋ gebeere ne jobo ti boŋ wa hase, day ndo raw wãã ge ga ni wùr kol ge yaŋ go ti se wùr mokay wããge ne? 34Yeso raw riŋ rage ga : Kidolgi ndi riŋ nday, wosela maga yaŋ joŋ ɓlagge mo ɓuy, diŋ gebee ɓlagge. 35Ama gebee mbe tum gebee, à bay de keege ɓe yoo weere bloon wo wa, ama wel bloo diŋ wel ɓe mbe tum ane. 36Hayga Weln kol we we go ti see ɓay no, nday raw kol ge go ti see ɓay cwãy. 37Ndi ko mbi we ga nday diŋ moore Abraham, day nday kiɗ ga nday ʼwar me go, wer maga nday bay yãã wããre ɓin wa. 38Ndi wãã go diŋ re maga Pan ɓi kaŋ nen ɓi le ni, ama ma ɓay nday joŋ diŋ re maga pan ɓay wãã mo lay.

39Á raw wo fer wããre ne hẽn ga : Pan wùr diŋ Abraham. Yeso raw riŋ rage ga : Hayga nday yaŋ diŋ moore Abraham cwãy no, ni nday de hay yaŋ joŋge diŋ joŋre maga á hay joŋ rage mono. 40Ama ma ɓi, ndi de sii gi ne nday tum diŋ cwãy wããre maga ndi laa le jag Baa, mbe de sen ɓuy nday de kiɗ mege ma ʼwar ge go. Á Abraham bay de joŋ re de maŋ maga nday de joŋge ɓe mokay wa hase. 41Nday joŋ diŋ joŋre mani pan ɓay no. Á raw wo fer wããre ne hẽn ga : Wùr bay diŋ weere ma de nday ga pan wùr bay go tinoo wa wa, Pan wùr boŋ diŋ Baa. 42Yeso raw riŋ rage ga : Hayga Baa mo hay we diŋ Pan ɓay cwãy no, nday de hay da me yaŋ, werga ndi a le go se Baa, day ndi de hayle gesiŋ mo yeʼ la nen doo ɓe. Ndi a bay de ti ngel see ɓi wa, ama ɓoʼ me le diŋ se. 43Wer may ga nday bay laa wããre maga ndi wãã ne nday wa mo la, werga nday bay de kããge ma coʼ sug wããre ɓin wa. 44Pan ɓay yaŋ diŋ Manhúulí, nday da joŋ ge diŋ fẽẽre maga pan ɓay da ne. Á diŋ je id jare, le ti tĩĩ gi wer ma taŋgun hãã, á bay de oo ge ti kidolgi ti boŋ wa hase, werga kidolgi bay ɓil ɓe wa has lay. Á leʼ we caa geteʼ no, á kal wãã ge go diŋ ti de el see ɓe, werga á diŋ je geteʼe, pan geteʼn lay. 45Ama ma ɓi, ndi wãã go diŋ cwãy, diŋ wersen nday bay yãã wããre ɓin wa mono. 46Wose yaŋ yoo ɓay maga kaŋ nen ɓi yaŋ ti ɓlagge maga ndi joŋ ne ne? Hayga ndi yaŋ wãã ge diŋ wããre ma kidolgi no, nday bay day ge yãã wããre ɓin wa gà le la? 47Je maga yaŋ diŋ ma Baa, laa wããre Baa, ama nday bay diŋ ma Baa wa, nday laan ne gà diŋ wer se no.

Yeso wo de Abraham

48Jar Jwif raw wo fer wããre ne hẽn ga : Kidolgi wããre maga wùr wãã ga ndo diŋ je Samari, ndo de sõõ ti mokay, wùr wãã naa ni. 49Yeso raw riŋ rage ga : Ndi bay de sõõ ti wa. Ama ndi hoo sug diŋ ti Pan ɓi, ma ɓay nday á mbuɗgi diŋ foo ɓi. 50Ma ɓi, ndi bay kiɗ gi diŋ kee ge see ɓi wa, ama jobo yaŋ boŋ, diŋ je keɗ mege no, je sen diŋ je cag ren lay. 51Kidolgi ndi riŋ nday, je maga yaŋ hoo sug ti wããre ɓi no, huu gi gà so hase. 52Jar Jwif raw wo riŋ gi ɓe ga : Patala wùr ko we cwãy ga ndo de sõõ ti so. Abraham huu go ɓaa yaw, jar ndar nen wããre Baa go huɗ wo go pa, day ndo ɓon ga je maga hoo sug we ti wããre ɓon huu gà hase. 53Pan wùr Abraham huu go ɓaa yaw, day ndo ɗig ga ndo daŋ Abraham kluu yaw? Ga jar ndar nen wããre Baa go huɗ wo ɓaa yaw mo ɓa, ndo maŋ nà diŋ wose mo deŋ so ne? 54Yeso raw riŋ rage ga : Hayga ndi yaŋ togoɗ see ɓi diŋ ndi de see ɓi no, ni ndi gay see ɓi togoɗ see ɓi de koɗ koɗe. Ama je maga togoɗ me, diŋ Pan ɓi, á diŋ je maga nday wãɗ ga á diŋ Baa ɓay mono, 55day nday bay de ko ge ɓe wa pa, ma ɓi, ndi de ko ge ɓe, hayga ndi wãã we ga ndi bay de ko ge ɓe wa lay no, ni ndi kol diŋ je geteʼ doo nday no lay no. Ama ndi de ko ge ɓe, day ndi hoo sug ti wããre ɓen wo lay. 56Pan ɓay Abraham hay ɗig gi ga se mo ko wur a ge ɓi no, á raw ko wur a ge ɓi, ɓil ɓe raw fug gi go feh debaŋ lay. 57Jar Jwif raw wo riŋ gi ɓe ga : Ndo bay bà go de joŋ kiŋgi doo dwee wa ɗa kway, ndo ko Abraham naa hun ne? 58Yeso raw riŋ rage ga : Kidolgi ndi riŋ nday, taŋgu maga a biŋ Abraham, ni ndi diŋ ndi mbi. 59Á raw wo hoo húulì ga saara ɓoɗ ne. Yeso raw yoŋ see ɓe go, raw men tiŋ Baan go.

Currently Selected:

JAŊ 8: TUP

Highlight

Copy