JAŊ 7

Hẽẽre Yeso laa wo yãã wããre ɓe gà

1Blam sen Yeso raw raŋ Galile go ɓuy, laa dayge raŋ Jude gà werga jar Jwif wo de kiɗ gi ɓe ga saara mo ʼwarn go. 2Few mburyug#7.2 Few mburyugi : Á diŋ tiŋ maga jar Israyel hay wo bagge ɓe de maga á hay wo ti puuli mo tiʼ no, à joŋ few ɓe nen kiŋgi kaʼ tum ma ɗig ti ɓaara ti ɓe. jar Jwifn raw kosge go mbaŋ, 3hẽẽre Yeso raw wo riŋ gi ɓe ga : Men ngel sen la go, see wo go Jude, maga jar ɓo ma wer ɓon mo ko wo joŋre maga ndo de joŋge ɓe mono. 4Hayga jobo da we ga à mo ko re maga se joŋ ne we no, á yoŋ ne gà. Day ndo de joŋ joŋre doo kay no mono, joŋ ne maga jar ɓuy mo ko wo ne. 5(Hẽẽre ɓen wo de see ɓaara bay wo de yãã wããre ɓen wa lay.) 6Yeso raw riŋ rage ga : Ma ɓi ngeln bay de age ti wur ɓe nen ɓi wa ɗa, ma ɓay ngeln wo mbaara ɓuy tum ti wur ɓe de ele. 7Jar ma ti tamsirn kãã wo ma caa hee de ɓay gà ama á caa wo hee de ɓi, wer maga ndi wãã ga joŋre ɓe maga á joŋ ne wo de ɓlagge mono. 8See mbay ti few no, ma ɓi, ndi wo ti few sen gà werga ngeln bay de age ti wur ɓe nen ɓi wa ɗa. 9Á riŋ ra de wããre sen no kay, raw hayge wo go Galile.

Yeso wo ti few mburyugn wo

10Hẽẽre ɓen raw wo mbaara ti fewn so, Yeso kal rawge lay ama bay go tinoo nen jar wa, de yoŋre.

11Jar Jwif raw wo kiɗgi ɓe ti fewn ni, wiɗ wo ga : Á naa gen ɓa? Á naa gen ɓa? 12Á wãã wo wããre ti ɓe debaŋ, de swegge wããre yoo ngaɓan wo, jar po wo ga : Á diŋ je de ele, jar ma la wo ga : Bay wa, á jãɗ jare. 13Ama jobo bay go wãã ge ti ɓe poɗag wa hase, werga á wo de joŋ hẽẽne doo jar Jwif wo.

14Fewn wo go kos tawge mokay, Yeso kal rawge ɓi tiŋ Baa, raw tĩĩ wer had jare. 15Jar Jwif raw wo ngrisgi, kal wo wãã ge ga : Bloo sen de ko re mokay koge la, á bay de joŋ lakol wa lay mo ɓa? 16Yeso raw riŋ rage ga : Fen maga ndi hadn mokay bay diŋ nen wããre ma ɓi wa, ama á a le jag Baa maga ɓoʼ me le mono. 17Wosela maga yaŋ de hã ɓil ɓe joŋ joŋre maga Baa de dage ɓe no, ko yaŋ ga hadge ɓin a le diŋ jag Baa, noga ndi wãã diŋ de egre see ɓi tawa gà mono, ko yaŋe. 18Wosela maga wãɗ go diŋ ti egre see ɓe tawa, kiɗ diŋ ga à mo togoɗ se, ama je maga joŋ joŋre ma togoɗ je maga ɓoʼ ne le, wãɗ wããre ti cwãy ɓe, ɓlagge joŋ ɓil ɓe gà has lay. 19Hã wããre Baa le ne nday diŋ Moyisi. Ama jobo bay hoo sug ti wããre Baa yoo ɓay wa. Nday kiɗ ii mege go diŋ wer may la? 20Ngaɓan raw wo fer wããre ne hẽn ga : Ndo de sõõ ti, wose de kiɗ ii mo ge go ne? 21Yeso raw riŋ rage ga : Ndi hay joŋ joŋre po we boŋ, nday ɓuy nday raw ngrisgi. 22Moyis riŋ nday ga car we ɓĩĩni weere ma twerpiiri wo go (de sen ɓuy tĩĩ wer ɓe joŋ ge diŋ Moyis gà ama diŋ moore ɓay wo.) Hay bo wur Saban no, nday day mbay caa ɓĩĩni ne jobo. 23Hayga nday yaŋ go car ɓĩĩni wel ma twar wur Saba maga nday mo ɓlag wããre Baa maga Baa hãn ne Moyis go wa we no, day nday sõõ ɓil me ti wer maga ndi pẽẽ jobo go de see ɓe ɓuy wur Saban an le la? 24Re maga nday ko sen go nen faale la mokay, men we cag re ma sen go. Ama lag we de deele cag ren diŋ ti ngel ɓe.

Yeso mbe diŋ Mesi yawla

25Jar Jerusalem po raw wo wããge ti ɓe ga : Ɓa bloon mo yeʼ bay diŋ je maga à de kiɗgi ɓe ma ʼwarge go mo wa ge? 26Kon we á go de wãã wããre tinoo mo poɗag yeʼe, jobo bay ruugi ɓe meʼ wa lay mo yeʼ ɗa. Waŋre naa kon bo wo yaŋ ga á diŋ Mesi mbe cwãy? 27Ama ma Mesin wo ge nduu gi la, jobo kãã ma ko ngel maga á a le ni mo gà ama ma bloo ma yeʼ naa de ko ngel maga á a le ni mono.

28Blam sen Yeso raw had rage ɓi tiŋ Baa, á raw ngar jag ga : Nday yaŋ mbay de koge ga ndi diŋ wose la day ndi a le genla ge? De sen ɓuy ndi bay de age de ti ngel see ɓi wa, ama je maga ɓoʼ me le, diŋ je wãã cwãy, nday bay de koge ɓe wa. 29Ma ɓi, ndi de koge ɓe, werga ndi a le go see ɓe, ɓoʼ me le diŋ se lay. 30Á raw wo kiɗgi ga saara baa ne, ama jobo laa baa doo ne hẽn see gà werga wur ɓe hay bay de age wa ɗa. 31De sen ni, jar po wo yoo ngaɓan debaŋ raw wo yãã wããre ɓe. Á raw wo wãã ge ga : Mesin a ge we no, day á joŋ ge fẽẽre mbuɗgi de daŋ bloo ma deŋ pa so ge?

Á laa soode wo le baa Yeso

32Farisiyẽẽ wo wo laa swegge wããre maga à de swegge ɓe ti Yeso yoo ngaɓan mokay, waŋre jar siɗ jag wo de Farisiyẽẽ raw wo laa soode wo le ma bagge ɓe.

33Yeso raw wãã ge ga : Ndi de hayge iggi see ɓay la nen naw rab koɗe, blam sen ndi fer ge see je maga hay ɓoʼ me le mono. 34Nday kiɗ gi ndi yaŋ, day nday daʼ me ge gà werga nday kãã ma woge ge go ti ngel maga ndi de woge ni mo gà. 35Jar Jwif raw wo riŋ kããra ga : Á wo ge gen maga naa kãã ma daʼ ge ɓe ga mo ne? Á raw ge yoo jar Jwif maga dus wo wo go yoo jar Greg wo wo haɗ jar Greg wo yawla? 36Wããre maga á wãã ne naa ga : Nday kiɗ gi ndi yaŋ, day nday daʼ me ge gà werga nday kãã ma woge ge go ti ngel maga ndi wo ge ni mo gà wer ɓe naa gahãyla?

Bii pyewre ma kol jar tenen

37Few ma de cõõre diŋ wur naw maga fewn taw go de ɓe mono. Ti wur sen Yeso raw urgi go ciŋ pel ngaɓan wo deŋ, raw ngar jag ga : Wosela maga jwaale yaŋ de kaŋge ɓe mo a le see ɓi jo bii. 38Wosela maga yãã wããre ɓi we, ɓil ɓe kol yaŋ diŋ pyew maga bii ma kol jar tenen dug le go ɓil ɓe, doo wããre maga à de yerge ɓe go ɓi kefdern no. 39(Yeso wãã diŋ ti Nenterse maga jar ma de yãã wããre ɓen daʼn ge wo mono. Ti wur sen, Nenterse hay bay de hãge le wa ɗa, werga Yeso hay bay de daʼ togoɗge wa ɗa.)

Jar ngaɓa caa wo ɓil ti re Yeso

40Jar po wo ngaɓan laa wo wããren go laa mokay, á raw wo wãã ge ga : Kidolgi bloo sen mo deŋ diŋ Je ndar nen wããre ma jag Baa mbe go cwãy. 41Jar ma lan wo ga : Á diŋ Mesi, ama maapo wo ga : Mesin kãã ma age le Galile nen ɓay so yawla? 42Werga à go de yerge ɓe go ga Mesin joŋ ge diŋ ti ɓĩĩni mani Dafid no, day á age le Betlehem ɓi leege maga Dafid hay joŋ ni mono. 43Wersen ngaɓan raw wo caa ɓil ti re Yeso ɓoge. 44Jar po wo yoo ɓaara da wo ga saara Baa ne, ama jobo laa baa doo ne hẽn see gà.

Waŋre jar Jwifn laa wo yãã wããre Yeso gà

45Sooden raw wo ferge see waŋre jar siɗ jag wo, Farisiyẽẽ raw wo riŋ rage ga : Wer may ga nday nduu de ɓe doo gà ɓa pa? 46Sooden raw wo riŋ rage ga : Jobo bay de wãã wããre ti boŋ doo bloo sen wa hase. 47Farisiyẽẽ raw wo riŋ rage ga : Nday de see ɓay, nday hãy go wer ɓe lay so yaw? 48Yoo waŋre naa wo, noga yoo Farisiyẽẽ wo mono, jobo yaŋ mbe de yãã wããre ɓen boŋ caw yawla? 49Ama jar maga wo see ɓay wer ɓe mo buh tiʼ diŋ jar maga bay wo de ko jag liŋgi mani Moyis wa, á wo mo tiʼ see ɓay diŋ jar maga wo go de faɗ ge.

50Nikodem jobo ma yoo Farisiyẽẽ wo hay wursen de see ɓe ni. Á diŋ je maga hay wo go see Yeso ti wurpo go taŋgu mono. Á raw riŋ rage ga : 51Doo maga jag liŋgi naan de wããge nono, naa kãã ma ɓoʼ wããre ne jobo ti bay laa ma jag ɓen go taŋgu gà bay ko re maga á de joŋge ɓe mono gà lay. 52Á raw wo fer wããre ne hẽn ga : Ɓa ndo diŋ je Galile lay? Jaŋ wããre Baa go de el ɗa, ni ndo ko yaŋ ga je siɗ wããre ma jag Baa go po bay le de age ti boŋ Galile wa hase. [53Blam sen wosela ɓuy raw liŋ ni ɓe liŋ ni ɓe.

Currently Selected:

JAŊ 7: TUP

Highlight

Copy