JAŊ 15

Yeso ga se diŋ tlalum cwãy

1Ndi diŋ doo tlalum cwãy no, Pan ɓi diŋ je jeege ɓen lay. 2Á car doo ɓe maapo maga bay wo leɗ ge wa go, led nen doo maapo yaŋ wo ga á mo leɗ wo, mo hay wo ti ngel ɓe de woore, mo leɗ wo debaŋ debaŋe. 3Hadge maga ndi had we de ɓe mokay fer we kneʼ we ge ti ngel ɓe de el so. 4Tay we de ɓi doo maga ndi de tayge de ɓay no lay no. Doo koo bay we de tayge de koo ɓe ma ɓuy wa kãã ma leʼge gà lay. Hayga nday tay we de ɓi gà no, ni nday kãã ma joŋ mopo gà lay.

5Ndi diŋ tlalum no, nday diŋ doo ɓi lay. Wosela maga yaŋ de tayge de ɓi, day ndi de tayge de ɓe lay no, joŋ mopo yaŋ debaŋ. Nday tay we de ɓi gà nday kãã ma joŋ mopo gà. 6Wosela maga day we tayge de ɓi gà no, go de ɓoʼge siigi doo jag doo kooren wo nono, á hig wo go, à hoo ra, à lag ra go ti wùu, saara roɗ go. 7Hayga nday lag we de tayge de ɓi, day wããre ɓin joŋ we ɓil ɓay lay no, ni nday wii we fen maga nday de sãy ɓe ti, ni nday daʼ ne yaŋ. 8Hayga nday leɗ we debaŋ no, ɗúu Pan ɓi raw rage so, nday raw naa nen go diŋ jar ɓi ma wer ɓi lay. 9Ndi de da we ge doo ga Pããben de da mege no lay. Lag we da kããra doosen no lay. 10Hayga nday yaŋ yãã jag wããre ɓin wo no, ni nday lag yaŋ da kããra doo ga ndi yãã jag wããre Pan ɓi, day ndi raw da jar doo ga á da jar no lay no.

11Ndi wãã sen ne nday, maga ɓil ɓay mo hay go ti ɓi fehe, nen maga ɓil ɓay mo hay go ti kããra fehe debaŋ. 12Wããre ɓi maga ndi bag ne nday diŋ ga nday mo da we kããra doo ga ndi da we no lay. 13Dage po daŋ maga jobo tob see ɓe go ti re bar ɓen wo mo gà so. 14Hayga nday yaŋ joŋ re maga ndi de riŋ we ge ti ɓe no, ni nday diŋ bar ɓi. 15Ndi ɗe ge nday ga weere jõõre ɓi gà so, werga wejõõ ko fen maga pan tiŋ ɓen joŋ ne mo gà. Ndi ɗe we ga bar ɓi, werga ndi kaŋ nen ɓay we go ti wããre maga ndi laan le jag Pan ɓi mo ɓuy no. 16Nday maŋ ndi go diŋ nday gà ama ndi hoo we le go diŋ ndi, ndi laa we wo ga nday mo see joŋ joŋre ma de ele, á mo hay ko joŋre ɓayn tum. Wersen Pããben hã ge fẽẽre maga nday wii ne ge de ɗúu ɓi mo ɓuy yaŋ ne nday. 17Wããre maga ndi de wãã ge ɓe ne nday mokay diŋ ga nday mo da kããra mono.

Jar ma ti tamsir caa wo hee de Yeso wo de jar ɓen wo no

18Hayga jar ma ti tamsir la caa wo hee we de ɓay ti re ɓi no, ni nday mo ko go ga á hay caa wo hee de ɓi taŋgu ɓay yaw. 19Hayga nday mo hay we diŋ jar ma ti tamsir la, jar ma ti tamsir la de hay wo yaŋ da we ge, werga nday diŋ jar ɓaara. Ama ndi hoo we le go yoo jar ma ti tamsir wo, nday bay ma jar ma ti tamsirn wo wa so, diŋ wersen jar ma ti tamsir la raw wo caa hee de ɓay mono. 20Ɗig we ti wããre maga ndi hay wãã ne nday ga : Wejõõ po bay de daŋ pan tiŋ ɓen kluu wa mono. Hayga á hay joŋ wo coo ɓi we, ni á joŋ wo coo ɓay yaŋ doosen lay. Hayga á hay yãã wo jag ɓi we, ni á yãã wo jag ɓayn yaŋ lay. 21Ama à joŋ we ge wo yaŋ de re sen ɓuy, diŋ ti re ɓi, werga á bay wo de ko je maga ɓoʼ me le mo wa. 22Ndi de hay a we gà no, á de hay wo diŋ jar ma de ɓlagge gà hayga ndi mo hay riŋ ra we gà pa no. Ama ma patala á ko wo ɓlagge ɓaaran we bay faare. 23Je maga caa hee de ɓi, de caa hee de Pan ɓi lay. 24Ndi mo hay joŋ joŋre maga jobo bay ma joŋge ɓe ti boŋ wa we gà no, á de hay wo diŋ jar ma de ɓlagge gà. Ama ma patala á wo de ko joŋre ɓi, day á raw wo caa hee de wùr de Pan ɓi ɓuy. 25Ama re maga á joŋn wo mokay leʼ go ti jag wããre maga à raw yer ge ɓe go ɓil wããre Baa ga : Á caa wo hee de ɓi de koɗ koɗ mono.

26De maga je kay we ge maga ndi ɓoʼn ge le we ti jag Pan ɓi ga diŋ Nenterse ma wãɗ cwãy maga a le go see Baa Pããben a ge we mono, á joŋ ge sedewa yaŋ go ti ɓi. 27Ma ɓay mo lay no, wãã we wããre ɓin go ne jar wo lay, werga nday hay le see ɓi ti tĩĩgi wer joŋre ɓin le hãã mono.

Currently Selected:

JAŊ 15: TUP

Highlight

Copy