Maariko 7

Yeesu kaarema ameeyigisyo ga Abhafarisaayo

(Mataayo 15:1‑9)

1-4Mu‑siku jirya, Abhafarisaayo na Abhayawudi bhaariga bhatakurya bhateesaabhire okukingya mu‑bhikokora, okuruubhana na jitungwa ja bhasaaja weebhwe kutyo jaariga jiri. Omwanya gunu bhasookere mw‑iguriro, bheesaabhaga okwamba rwa kutyo jaariga nijeendwa, niwo bharye. Ka wone, bheechukaga jitungwa jeebhwe ejindi nyafu ja kara, rwa okwosya ebhikombe, amafurira na ebhiinu ebhindi rwa ebhyo.

Rusuku rumwi Abhafarisaayo na abheeyigisya abharebhe bha ebhiraagiro bhya Muusa nibhaaja okusooka mu‑musi gwa Yerusareemu, nibheekofyanya ku‑Yeesu. Nibharora abheeyigisibhwa abharebhe bha Yeesu bhanu bhaariga nibharya na amabhoko amajabhi, nikwo okwayika ati, bhateesaabhire rwa kutyo jaariga jeenderwe mu‑tungwa jeebhwe.

5Niwo Abhafarisaayo na abheeyigisya bha ebhiraagiro bhya Muusa nibhabhuusya Yeesu ati, “Mbawo abheeyigisibhwa bhaawo bhatakuruubha jitungwa ja bhasaaja weeswe? Abheene abharya ebhiryo, bhateesaabhire amabhoko geebhwe rwa kutyo jeenderwe!”

6Yeesu ˆnaabhasubhya ati, “Emwe muri bheerimaanya. Nyamuwanga ꞉aayikire echimari inguru yeemwe okutura ku‑muragi Iisaya ati,

‘Abhaanu bhanu abhanaana echibharo kwa emisango era,

nawe emyoyo jeebhwe jiri kura na anye.

7Abhandamya kutyo era,

kwa okubha emisango jinu abheeyigisya ni maragiriro ga abhaanu era.’#7:6‑7 Ringira Iisaya 29:13.”

8Yeesu ˆnaagenderera okubhabhwira ati, “Emwe omusigaga ebhiraagiro bhya Nyamuwanga, omuruubhaga jitungwa ja bhasaaja weemwe.

9“Muri na jinjira ja echenge ja okusiga ebhiraagiro bhya Nyamuwanga, korereki muruubhe jitungwa jeemwe! 10Nyamuwanga ꞉aaragiriiye okutura ku‑Muusa ati, ‘Uyaane esomwana na nyokomwana echibharo.’#7:10a Ringira Okwimuka 20:12; Orwichuko rwa Ebhiraagiro 5:16. ˆNaayika rindi ati, ‘Omuunu woonewoone unu kaafuma esemwene amwi nyiramwene, ni bhusibhusi eetwe.’#7:10b Ringira Okwimuka 21:17; Abharaawi 20:9. 11Nawe emwe omwayika ati, omuunu keekirisibhwa okubhwira esemwene amwi nyiramwene ati, ‘Ebhiinu bhinu nikakusakiiye, naabhisoosiisye rwa echiyaanwa#7:11 Echiyaanwa. Ku‑meeresyo amaafu, ringira Echoogo mu‑Meeresyo inguru ya Emisango Emikomeeye. ku‑Nyamuwanga, bhyabha Korobhaani.’ 12Okwiyigisya kutyo, omumukora asige okusakira esemwene amwi nyiramwene echiinu. 13Ku‑njira eyo, omugaya omusango gwa Nyamuwanga, korereki muruubhe jitungwa jeemwe. Ka wone omukora emisango myafu rwa ejo.”

Emisango jinu ejijabhiyasya omuunu

(Mataayo 15:10‑20)

14Yeesu ˆnaabhirikira rindi echise cha abhaanu, ˆnaabhabhwira ati, “Emwe bhoone muntegeresye, musombookerwe emisango jaani. 15Chitari‑wo echiinu chinu echiingira mu‑nda ya omuunu chinu echitura okukora ajabhiyare. Nawe, jinu ejisooka mu‑mwoyo gwa omuunu nijo ejimujabhiyasya. [16Omuunu woonewoone unu kaategeresya, noongwe.]”

17Ejire aasigana na echise cha abhaanu na okwingira mu‑nju, abheeyigisibhwa bhaaye nibhamubhuusya inguru ya echijekekanyo echo. 18ˆNaabhabhwira ati, “Noorwo emwe mutari na obhwenge bhwa okusombookerwa echijekekanyo echo? Mutakumenya ati, echiinu chinu echiingira mu‑nda ya omuunu, chitakutura okukora ajabhiyare? 19Ebhiryo bhitakwingira mu‑mwoyo, tari ebhitura mu‑nda era na nibhisooka mu‑mubhiri gwaye nibhisirwa emwira.” Yeesu ꞉aayikire kutyo, obhugajuro bhwaye bhuri ati, ebhiryo bhyone bhibhe nibhiriibhwa.#7:19 Ebhiryo bhyone bhibhe nibhiriibhwa. Mu‑bhiraagiro bhya Muusa, Abhayawudi ꞉bhateekirisiibhwe okurya ebhiryo ebhindi rwa imbiiji na mutuuju. Ringira Abharaawi 11. 20ˆNaagenderera okwayika ati, “Emisango jinu ejisooka mu‑mwoyo gwa omuunu, nijo ejimukora ajabhiyare. 21Mu‑mwoyo gwa omuunu nimwo obhusooka obhwiganirisya obhubhiibhi, obhusengani, 22obhwifi, obhwiti, obhuromesi, omuruuru gwa ebhiinu, obhujabhi, obhujigi, orukubho, orwiso, amafumo, echigundu na obhutaamutaamu. 23Amabhiibhi ago goone agasooka mu‑mwoyo gwa omuunu, na nigo agamukora ajabhiyare.”

Eriikirisya enene rya omugasi unu atari Muyawudi

(Mataayo 15:21‑28)

24Yeesu na abheeyigisibhwa bhaaye nibhasooka mu‑mukoowa gwa Gariraaya, nibhagenda orubhaara rwa emisi ja Tiiro na Sidooni. ˆNeengira mu‑nju na aariga atakwenda omuunu woonewoone amenye ati ari awo. Nawe ꞉ataaturire okwiyibhisa. 25-26Eyo aariga ari‑wo omugasi umwi ari Mufoyeenike. Aariga atari Muyawudi. ꞉Aasookere Foyeenike mu‑mukoowa gwa Siiriya. Omuyaasya waaye aariga awungirwe risambwa. Omugasi oyo ejire oongwa ati Yeesu ari eyo, awoawo ˆnaamujaa‑ko, ˆneefukama imbere yaaye. ˆNeerembeeresya Yeesu ati asoosye risambwa mu‑muyaasya waaye.

27Yeesu ˆnaamubhwira ati, “Jitari ja ekisi okugega ebhiryo bhya abhaana na okwesera jimbwa. Siga abhaana bheegute okwamba.”#7:27 Ku‑Bhayawudi okwayika ati abhaana, ni okwayika inguru ya Abhayawudi abheene. Ka wone, okwayika ati jimbwa ni okwayika inguru ya abhaanu bhanu bhatari Bhayawudi. 28Nawe omugasi oyo ˆnaasubhya Yeesu ati, “Raatabhugenyi, noorwo jimbwa jinu jiri mw‑ifuufu rya imeeja, ejirya obhuwungururu bhwa ebhiryo bhinu abhaana abharya nibhuragara aasi.”

29Yeesu ˆnaamusubhya ati, “Omusango gunu waayika ni gwa kisi. Mbe, genda, risambwa ryasookere ku‑muyaasya waawo.” 30Omugasi wurya ˆnaasubha iika ewaaye, ˆnaasongʼana omwana waaye eegoroowe ku‑bhuriri, na risambwa rimusookere‑mo.

Yeesu kaawosya owa amatwi

31Niwo Yeesu ˆnaasooka orubhaara rwa omusi gwa Tiiro, ˆnaayitingʼana agatigati ya Sidooni, ˆnaagenda mu‑chaaro cha Dekapoori yeeyi na inyanja ya Gariraaya. 32Dekapoori awo aariga ari‑wo omusibhi wa amatwi na ari na obhujoojo. Abhaanu abharebhe nibhamureeta ku‑Yeesu, nibheerembeeresya Yeesu amuteere‑ko amabhoko, amuwosye. 33Yeesu ˆnaamusoosya mu‑chise cha abhaanu, ˆnaagenda nage ku‑mbari. ˆNeengisya ebhyara bhyaye mu‑matwi ga omuunu oyo. Yeesu ˆneefubhurira amachwata ku‑chaara, ˆnaamubhambaga ku‑rurimi. 34Yeesu ˆnaaragamira ku‑rwire, ˆneesya omwika, ˆnaamubhwira ati, “Eefata,” nikwo okwayika ati, “Iiguka.” 35Awoawo, omuunu oyo ˆneeguka amatwi na echisina cha orurimi rwaye nichisuruumurwa, ˆnaamba okuungwa na okwayika kisi.

36Yeesu ˆnaakomeeresya echise cha abhaanu bharya ati, bhaasiga okubhwira omuunu woonewoone jinu aakora. Nawe kutyo ꞉aagendereeye okubhagaanya, nikwo kutyo ꞉bhaagendereeye muno okuraasya emisango ejo. 37Nibharuguura muno, nibhaayika ati, “Joone jinu aakora ni ja kisi. Kaawosya abhaanu abha amatwi, bhoongwe, na abhajibhi, bhaayike!”

Currently Selected:

Maariko 7: jit

Highlight

Copy