Maariko 6

Abhanajareeti abharema okwikirisya Yeesu

(Mataayo 13:53‑58; Ruuka 4:16‑30)

1Niwo Yeesu ˆnaasooka eyo, ˆnaasubha ewaabho mu‑musi gwa Najareeti, ari aamwi na abheeyigisibhwa bhaaye. 2Orusuku rwa Isabhaato rwejire rwakinga, ˆnaamba okwiyigisya abhaanu mu‑nju ya eriikofyanyo. Abhaanu bhaafu bhanu ꞉bhaamutegeresiisye bhaariga nibharuguura, nibhabhuusyanyaga ati, “Yego! Ka unu abhwene aaki emisango jinu joone? Ka wone, abhwene aaki obhwengeeso bhwone bhunu na obhuturo bhwa okukora ebhiruguusyo rwa ebhyo? 3Unu atari mubhuya wurya, omwana wa Maryamu? Abhamura bhaabho bhatari Yakobho, Yoose,#6:3 Yoose. Jinyabhurira ejindi ejaayika ati, Jejefu. Yuuda na Simooni? Angu, abhayara bhaabho bhatari bhanu chiikaaye nabho anu?” Nibhamubhiyirirwa, nibharema okumwikirisya.

4Yeesu ˆnaabhabhwira ati, “Abhaanu mu‑mbaara ejindi joone abhayaana omuragi echibharo, tari atakuyaanwa echibharo ewaabho, ku‑bhayiri bhaaye na mu‑nju yaaye omwene.” 5Kurwa ejo, Yeesu ꞉ataaturire okukora ebhiruguusyo bhyafu eyo, tari ꞉aateereeye‑ko mabhoko abharwaye bhatooto era, ˆnaabhawosya. 6ˆNaaruguura muno, kwa okubha abhaanu abho bhaariga bhatari na eriikirisya noorwo na akatyari.

Yeesu kaatuma abheeyigisibhwa ekumi na bhabhiri

(Mataayo 10:5‑15; Ruuka 9:1‑6)

Niwo Yeesu ˆneeyindaga mu‑nguuyo ja ayeeyi okwiyigisya abhaanu. 7ˆNaabhirikira abheeyigisibhwa bhaaye ekumi na bhabhiri. ˆNaabhayaana obhuturo bhwa okusoosya amasambwa mu‑bhaanu, ˆnaabhatuma bhabhiribhiri. 8ˆNaabharagirira ati, “Mwasiga okugega echiinu choonechoone cha okugenda nacho mu‑rugendo rwemwe, tari isimbo era. Mwasiga okugega isagwa, noorwo omukaate, noorwo jipirya, 9noorwo emyenda ja okuyindura. Mufware ebhiraato.” 10Ka wone, ˆnaabhabhwira ati, “Mu‑nju yooneyoone munu bharibharamira, mwikare omwoomwo, okukingira orusuku runu murisooka mu‑ruguuyo orwo. 11Ka wone, woonewoone anu abharema okubharamira amwi okubhategeresya, musooke‑wo nimukuukumuraga oruteeri rwa ku‑maguru geemwe, okubhakengya ati Nyamuwanga kaabharema.”

12Abheeyigisibhwa bharya nibheemuka, nibhaamba okuraasisya abhaanu ati bhate ebhibhiibhi bhyebhwe. 13Nibhasoosya amasambwa maafu mu‑bhaanu, nibhabhambaga amafuta#6:13 Nibhabhambaga amafuta. Kweresyaga ati Nyamuwanga niwe ꞉aabhawosiisye. abharwaye bhaafu na okubhawosya.

Yowana Omubhatiija kaatemwa‑ko omutwe

(Mataayo 14:1‑12; Ruuka 9:7‑9)

14Omukama Yeroode Atipaasi#6:14 Yeroode Atipaasi. Ku‑meeresyo amaafu, ringira mu‑Meeresyo inguru ya Emisango Emikomeeye. ꞉oonguuwe emisango ja Yeesu, kwa okubha Yeesu aariga akumuukire woone. Abhaanu abhandi bhaariga nibhaayika inguru ya Yeesu ati, “Oyo niwe Yowana Omubhatiija aasuurukire okusooka mu‑bhafuuwe, niyo isonga ari na amanaga ga okukora ebhiruguusyo rwa ebhyo.” 15Abhaanu abhandi bhaariga nibhaayika ati, “Omwene niwe Yeeriya,”#6:15 Yeeriya. Ni muragi wa kara. Ringira 1 Abhakama 17:1 okukingira 2 Abhakama 2:14. na abhandi nibhaayikaga ati, “Omwene ni muragi wa Nyamuwanga rwa abharagi abhandi bha kara.” 16Omwanya gunu Yeroode ꞉oonguuwe emisango ejo, ˆnaayika ati, “Oyo niwe Yowana, unu ꞉naatemere‑ko omutwe. Aasuuruka okusooka mu‑bhafuuwe!”

17-20Yeroode Atipaasi aariga atwaye Yerodiya unu aariga ari mugasi wa Firipo, omumura waabho Yeroode. Yowana aamubhwiraga ati, “Okuruubhana na ebhiraagiro bhya Nyamuwanga, jitari ja kisi okutwara omugasi wa omumura waanyu.” Emisango ejo nijireterera Yerodiya abhiyirirwe Yowana muno, na ˆnaayenjeresyaga injira ya okumwita, nawe ˆnaataamibhwa. Mbe okwenda okukondisya Yerodiya, Yeroode Atipaasi ˆnaatuma abhasirikare bhagwate Yowana na okumubhoya mw‑ibhoyero. Nawe bhaariga nibhamurinda, korereki Yerodiya aasiga okumwita, kwa okubha Yeroode ꞉oobhayire Yowana na okumenya ati, Yowana ni murengeresi na omweru ku‑Nyamuwanga. Yeroode Atipaasi eendaga okutegeresya Yowana muno, nawe ejire aamutegeresya, ˆnaasurumbara muno.

21Mbe, rusuku rumwi Yerodiya ꞉aabhwene injira ya okwita Yowana. Orusuku orwo yaariga iri chikukuru ya okwibhurwa kwa omukama Yeroode. Omukama oyo, aariga akumire abhatongesi bhaaye abhakuru, abhakuru bha abhasirikare, na abhatangasya abhandi bha omukoowa gwa Gariraaya. 22Omwanya gunu abhagenyi bhaariga bheenyanjire, omuyaasya wa Yerodiya ˆneengira, ˆnaabhina. Yeroode na abhagenyi bhaaye nibhakonderwa. Niwo omukama ˆnaabhwira omuyarakaji oyo ati, “Nuunsabhwe choonechoone chinu oweenda, enija okukuyaana.” 23ˆNaarayira ati, “Enija okukuyaana choonechoone chinu oweenda, noorwo rikabha esinja rya obhukama bhwani.”

24Niwo omuyarakaji wurya ˆnaawuruka anja, ˆnaabhuusya nyiramwene ati, “Maayi, nisabhwe ki?” Nyiramwene ˆnaamusubhya ati, “Sabhwa akuyaane omutwe gwa Yowana Omubhatiija.” 25Mbe, omuyarakaji oyo ˆnaasubha bhwangubhwangu ku‑mukama, ˆnaamubhwira ati, “Eneenda unteere woori anu kutya omutwe gwa Yowana Omubhatiija ku‑rutubha.”

26Omukama ˆnaasurumbara muno, nawe inguru ya echirayiro chaaye chinu ꞉aarayiiye imbere ya abhagenyi bhaaye, ˆnaataamibhwa okurema. 27ˆNaatuma omusirikare agende okutema Yowana omutwe. Omusirikare ˆnaagenda mw‑ibhoyero, ˆnaamutema‑ko omutwe. 28ˆNaareeta omutwe ogwo guri ku‑rutubha, ˆnaayaana omuyarakaji oyo, ˆnaasirira nyiramwene. 29Omwanya gunu abheeyigisibhwa bha Yowana ꞉bhoonguuwe emisango ejo, nibhagenda nibhagega omutumbi gwaye, nibhaja okumusiika mu‑fwa.

Yeesu kaariisya abhaanu bhiwumbi bhitaanu na obhusaago

(Mataayo 14:13‑21; Ruuka 9:10‑17; Yowana 6:1‑14)

30Omwanya gunu jitumwa ekumi na bhabhiri bharya ꞉bhaasubhire, ꞉bheekofyanyiisye ku‑Yeesu, nibhamubhwira emisango joone jinu ꞉bhaakorere, na okwiyigisya abhaanu. 31Abhaanu bhaariga bhari bhaafu awo, abhandi bhaariga nibhaaja, na abhandi bhaariga nibhasooka‑wo. Okuruubhana na ogwo, Yeesu na abheeyigisibhwa bhaaye ꞉bhataabhwene noorwo omwanya gwa okurya. Kurwa ejo, ˆnaabhabhwira ati, “Muuje, chigende anu bhatari bhaanu, mwisye omwoyo kutooto.” 32Nibhariinya mu‑ngama, nibhagenda orubhaara runu abhaanu bhaariga bhatari.

33Nawe omwanya gunu bhaariga nibhagenda, abhaanu bhaafu nibhabharora na okusombookerwa ati ni bhaaga. Abhaanu bharya aamwi na abhandi okusooka mu‑misi myafu nibhabhabhirimira, nibhabhatangatira okukinga anu bhaariga nibhaja. 34Yeesu ejire eeka mu‑ngama, ˆnaarora echise echinene cha abhaanu. ˆNaabhafwira echigongo, kwa okubha bhaariga bhari rwa jinaama jinu jitari na omureefi. ˆNaamba okubheeyigisya emisango myafu.

35Keegoro yejire yaakinga, abheeyigisibhwa bhaaye nibhamujaa‑ko, nibhamubhwira ati, “Anu chiri mw‑ibhara, na ingeta yeengira. 36Nuurage abhaanu bhanu, bhagende mu‑nguuyo ja ayeeyi bheegurire ebhiryo.” 37Nawe Yeesu ˆnaabhasubhya ati, “Emwe, neemwe mubhayaane ebhiryo.” Nibhamubhuusya ati, “Chimari oweenda neeswe chigende okubhagurira emikaate ja jidinaari magana gabhiri (200)#6:37 Jidinaari magana gabhiri. Jipirya ejo jaariga jiri muyeero gwa omuunu umwi ku‑meesi gataanu na gasatu. korereki chibhayaane bharye?”

38Yeesu ˆnaabhabhuusya ati, “Angu, muri na emikaate eringa? Mugende mujirore.” Nibhagenda okujirora, nibhasubha, nibhamubhwira ati, “Chiri na emikaate etaanu era na jiiswi ebhiri.”

39Yeesu ˆnaabhabhwira ati, “Mubhwire abhaanu bhoone bhatege jinenda ku‑bhunyaasi.” 40Nibhatega jinenda, abhandi eganaegana, na abhandi makumi gataanutaanu. 41Yeesu ˆnaagega emikaate etaanu ejo na jiiswi ebhiri jirya, ˆnaaragamira ku‑rwire, ˆnaasiima Nyamuwanga. Neeya ˆnaabheganya emikaate, ˆnaayaana abheeyigisibhwa bhaaye korereki bhagabhire abhaanu. ˆNaabhayaana na jiiswi ebhiri jirya bhabhagabhire. 42Abhaanu bhoone nibharya, nibheeguta. 43Nibheeya, abheeyigisibhwa bhaaye nibhakumanya ebhibhaara bhinu ꞉bhyasigaaye, nibheejusya ebhitukuru ekumi na bhibhiri. 44Abhaanu bhanu ꞉bhaariiye ebhiryo ebhyo, abharume bheenyere, bhaariga bhari bhiwumbi bhitaanu (5,000).

Yeesu kaaribhata ku‑nyanja

(Mataayo 14:22‑33; Yowana 6:16‑21)

45Niwo Yeesu ˆnaaragirira abheeyigisibhwa bhaaye ati, bheengire mu‑ngama, bhatangate bhagende ku‑ngego ya inyanja, mu‑musi gwa Bhetisaayida. Omwanya ogwo omwene ˆnaasigara ˆnaaraganaga na echise cha abhaanu. 46Ejire aamara okuragana na echise cha abhaanu, ˆnaariinya ku‑chiima okusabhwa Nyamuwanga.

47Echisuute chejire cheengira, abheeyigisibhwa bhaaye bhaariga bhari mu‑ngama mu‑bhusibha, ka Yeesu aariga asigaaye eenyere mu‑chiima. 48ˆNaarora kutyo bhaariga nibhanyaaka muno okufuga, kwa okubha omuyaga gwariga guri gwa ebhutwe. Mbe oruguru rwejire rwatema, Yeesu ˆnaabhajaa‑ko enu ˆnaaribhataga ku‑nyanja, ˆneenda okubhatura‑ko. 49-50Nawe, bhoone bhejire bhaamurora ˆnaaribhataga ku‑nyanja, nibheetogera ati ni sambwa, nibhoobhaya muno, nibhakunga. Awoawo Yeesu ˆnaabhabhwira ati, “Musiiriike, naanye, musige okuubhaya!” 51Yeesu ˆnaariinya mu‑ngama omwo, omuyaga nigutemekera. Nibharuguura muno, 52kwa okubha ꞉bhataasombookeeywe noorwo echiruguusyo cha emikaate. Emyoyo jeebhwe jaariga jikomeeye turuturu.

Yeesu kaawosya abhaanu bhaafu Genejareeti

(Mataayo 14:34‑36)

53Yeesu na abheeyigisibhwa bhaaye bhejire bhaambuka inyanja, nibhakinga mu‑chaaro cha Genejareeti. Nibheesa inanga ku‑ngego awo. 54Bhejire bhaasooka era mu‑ngama, abhaanu bheende‑yo nibhasombookerwa Yeesu, 55nibhagenda nibhabhirimaga, nibhanyaragana mu‑chaaro cheebhwe choone. Nibhaamba okureetera Yeesu abharwaye bhari ku‑mararo, nibhabhasira woonewoone anu bhaamuungwaga ati ari eyo. 56Woonewoone anu ꞉aajiiye, ibhe iri mu‑nguuyo, mu‑misi amwi mu‑chaaro chirya, bhaariga nibhamureetera abharwaye mu‑maguriro. Nibheerembeeresya Yeesu ati, eekirisisye abharwaye abho bhakuunʼye noorwo ku‑bhisangʼarye bhya ku‑bhufunyiro bhwa omwenda gwaye era. Niwo bhoone bhanu ꞉bhaabhikuniisye‑ko, nibhawora.

Currently Selected:

Maariko 6: jit

Highlight

Copy