Popular Bible Verses from Maariko 6

Share

Abhaanu bhaariga bhari bhaafu awo, abhandi bhaariga nibhaaja, na abhandi bhaariga nibhasooka‑wo. Okuruubhana na ogwo, Yeesu na abheeyigisibhwa bhaaye ꞉bhataabhwene noorwo omwanya gwa okurya. Kurwa ejo, ˆnaabhabhwira ati, “Muuje, chigende anu bhatari bhaanu, mwisye omwoyo kutooto.”

Yeesu ˆnaabhabhwira ati, “Abhaanu mu‑mbaara ejindi joone abhayaana omuragi echibharo, tari atakuyaanwa echibharo ewaabho, ku‑bhayiri bhaaye na mu‑nju yaaye omwene.”

Yeesu ejire eeka mu‑ngama, ˆnaarora echise echinene cha abhaanu. ˆNaabhafwira echigongo, kwa okubha bhaariga bhari rwa jinaama jinu jitari na omureefi. ˆNaamba okubheeyigisya emisango myafu.

Kurwa ejo, Yeesu ꞉ataaturire okukora ebhiruguusyo bhyafu eyo, tari ꞉aateereeye‑ko mabhoko abharwaye bhatooto era, ˆnaabhawosya. ˆNaaruguura muno, kwa okubha abhaanu abho bhaariga bhatari na eriikirisya noorwo na akatyari. Niwo Yeesu ˆneeyindaga mu‑nguuyo ja ayeeyi okwiyigisya abhaanu.

Yeesu ˆnaagega emikaate etaanu ejo na jiiswi ebhiri jirya, ˆnaaragamira ku‑rwire, ˆnaasiima Nyamuwanga. Neeya ˆnaabheganya emikaate, ˆnaayaana abheeyigisibhwa bhaaye korereki bhagabhire abhaanu. ˆNaabhayaana na jiiswi ebhiri jirya bhabhagabhire. Abhaanu bhoone nibharya, nibheeguta. Nibheeya, abheeyigisibhwa bhaaye nibhakumanya ebhibhaara bhinu ꞉bhyasigaaye, nibheejusya ebhitukuru ekumi na bhibhiri.