Maariko 4

Echijekekanyo cha omubhibhi

(Mataayo 13:1‑9; Ruuka 8:4‑8)

1Yeesu ˆnaamba okwiyigisya abhaanu rindi ku‑njekekera ya inyanja. Echise echinene muno cha abhaanu nichiikofyanya anu Yeesu aariga ari. Niwo ˆnaariinya mu‑ngama inu yaariga iri mu‑nyanja, ˆneenyanja omwo korereki bhaasiga okumuyiganya. Echise choone nichiimereeguru ku‑chaaro ku‑njekekera ya inyanja. 2Yeesu ˆnaabheeyigisya emisango myafu ku‑bhijekekanyo. Mu‑meeyigisyo gaaye ˆnaayika ati, 3“Mutegeresye! Aariga ari‑wo omubhibhi umwi unu ꞉aagendere okubhibha jimbibho mw‑isambu ryaye. 4Omwanya gunu aabhibhaga, jimbibho ejindi ꞉jaaguuwe ku‑njira, jinyonyi nijiija, nijijirya. 5Jimbibho ejindi nijigwa ku‑rutare runu amayaru gaariga gatari maafu, jimbibho ejo nijiiraabha okumera, kwa okubha amayaru gaariga gari matooto. 6Nawe omuumwi gwejire gwaka, ebhiimesya nibhiwotoka na okuuma, kwa okubha emisi jaariga jiri ingurunguru era. 7Jimbibho ejindi nijigwa mu‑mawa. Amawa ago gejire gaakura, nigayiganya ebhiimesya ebhyo, nibhitaamibhwa okutwasya amatwasyo. 8Jimbibho ejindi nijigwa mu‑mayaru ga ekisi. Jimbibho ejo jejire jaakura, ejindi nijitwasya amatwasyo makumi gasatu, ejindi nijitwasya amatwasyo makumi gataanu na rimwi na ejindi nijitwasya amatwasyo egana rimwi!” 9Niwo Yeesu ˆnaabhabhwira ati, “Unu kaategeresya, noongwe.”

Isonga ya Yeesu okwiyigisya ku‑bhijekekanyo

(Mataayo 13:10‑17; Ruuka 8:9‑10)

10Echise cha abhaanu echo chejire chaasooka‑wo, Yeesu ˆnaasigara eenyere na abheeyigisibhwa bhaaye ekumi na bhabhiri na abharuubhirisya abhandi. Niwo nibhamubhuusya inguru ya obhugajuro bhwa ebhijekekanyo bhyaye.

11ˆNaabhasubhya ati, “Emwe muyaaywe okusombookerwa emisango jinu jiri mbisike inguru ya obhukama bhwa Nyamuwanga. Nawe abhaanu bhanu bhatakunduubha, enibhabhwira joone ku‑bhijekekanyo, 12korereki emisango jibhe rwa kutyo omuragi Iisaya ꞉aakaamire ati,

‘Bhaakaringira, bharingire, nawe bhaasiga okurora.

Ka wone, bhaakategeresya, bhategeresye, nawe bhaasiga okusombookerwa.

Araabha jitaakabheeye kutyo,

bhakanyindukiiye, nimbafwira echigongo.’#4:12 Ringira Iisaya 6:9‑10.”

Obhugajuro bhwa echijekekanyo cha omubhibhi wa jimbibho

(Mataayo 13:18‑23; Ruuka 8:11‑15)

13Niwo Yeesu ˆnaabhabhwira ati, “Mbe woori, mukataamibhwa okusombookerwa echijekekanyo chinu, muribhisombookerwa kutiki ebhindi bhyone? 14Omubhibhi ni muunu unu kaaraasisya abhandi omusango gwa Nyamuwanga. 15Abhaanu abhandi abhasusana na amayaru ga ku‑njira, anu omusango gwa Nyamuwanga ogubhibhwa. Omwanya gunu abhaguungwa era, Syetaani kaaja, na okusoosya‑mo omusango ogwo mu‑mitima jeebhwe. 16Abhandi abhasusanyibhwa na jimbibho jinu ꞉jaaguuwe ku‑rutare. Omwanya gunu abhoongwa omusango gwa Nyamuwanga, abhagwikirisya bhakondeeywe. 17Nawe kwa okubha bhatasirire emisi emwaro, abhabha‑wo omwanya mufuyi era, ebhinyaasyo bhikabhabhona inguru ya omusango gwa Nyamuwanga, awoawo abhasiga eriikirisya bhwangu. 18Jimbibho jinu ꞉jaaguuwe mu‑mawa, ejisusanyibhwa na abhaanu bhanu abhoongwa omusango gwa Nyamuwanga, 19nawe, abhajigwa muno na obhwiganirisya bhwa obhurame bhwa ku‑chaaro anu na okubhona ribhona ryafu na okurigira ebhiinu ebhindi. Ejo ejiyiganya omusango gwa Nyamuwanga, nigutaamibhwa okutwasya amatwasyo mu‑bhurame bhwebhwe. 20Jimbibho jinu ꞉jaaguuwe mu‑mayaru ga ekisi ejisusanyibhwa na abhaanu bhanu abhoongwa omusango gwa Nyamuwanga na okuguramira. Abho nibho abhatwasya amatwasyo, owumwi makumi gasatu, owundi makumi gataanu na rimwi na owundi egana rimwi.”

Echijekekanyo cha idara

(Ruuka 8:16‑18)

21Ka wone ˆnaabhabhwira echijekekanyo echindi ˆnaayika ati, “Angu, ari‑wo omuunu unu kaakongeesya idara ˆnaayifundikira na ridebhe, amwi okuyituura mw‑ifuufu rya obhuriri? Angu, atakuyituura inguru ku‑mutereko ibhe niimirika mbaara joone? 22Nikwo kutyo, gwonegwone gunu gubhisirwe, guriswerurwa. Ka wone, imbisike yooneyoone, irimenyekana. 23Unu kaategeresya, noongwe.”

24Niwo Yeesu ˆnaagenderera okubhabhwira ati, “Mutegeresye kisi! Indengo inu omurengera abhandi, eyoeyo niyo emwe wone Nyamuwanga aribharengera, na eyeemwe iryongesibhwa‑wo. 25Omuunu unu kaategeresya omusango gwa Nyamuwanga na okugusombookerwa, Nyamuwanga kaamusakira na okumwongesya obhwengeeso bhwa okugusombookerwa muno. Nawe araabha omuunu atakutegeresya omusango gwa Nyamuwanga, noorwo obhusombookerwa bhutooto bhunu ari nabhwo ariteesibhwa.”

Echijekekanyo cha imbibho inu eyimera

26Yeesu ˆnaabhabhwira rindi ati, “Obhukama bhwa Nyamuwanga bhuri rwa echijekekanyo chinu. Omuunu wumwi ꞉aabhibhire jimbibho mw‑isambu. 27Jisiku nijitura, ˆnaawongeraga ˆnaarafyaga. Imbibho irya niimera, niikura, nawe omwene ꞉ataamenyere kutyo eyimera na okukura. 28Iisi eyeene niyo eyikora imbibho niimera, niikura okukingira okutwasya amatwasyo. Okwamba eyimera riisya erera, nirifuuka, ku‑bhuteero nichibha‑ko echangara chinu chiri na oruro. 29Echiimesya chirya chikakomeera, na okuuma, niwo omurimi kaagega omuworo ˆnaagenda okugesa.”

Echijekekanyo cha akaro ka iyaradaari

(Mataayo 13:31‑32, 13:34; Ruuka 13:18‑19)

30Yeesu ˆnaabhabhwira ati, “Angu, obhukama bhwa Nyamuwanga chibhususanye na ki? Chibhususanye na echijekekanyo ki? 31Obhususana rwa akaro ka iyaradaari. Noorwo kutyo ni katooto muno okukira obhuro obhundi bhwone bhunu obhuyambwa, 32nawe kakamera, akakura, nikabha kanene muno okukira ebhiimesya ebhindi bhyone bhya emikubhi mw‑isambu. Akabha na amatabhi manene noorwo jinyonyi ejiija na okuwooya mu‑mbewo yaako.”

33Yeesu eeyigisyaga omusango inguru ya obhukama bhwa Nyamuwanga ku‑bhijekekanyo bhyafu rwa ebhyo, rwa kutyo bhaaturaga okusombookerwa. 34Gutari‑wo gwonegwone gunu ꞉eeyigisiisye atasoosiisye echijekekanyo wuri. Nawe, omwanya gunu aasigaraga eenyere na abheeyigisibhwa bhaaye, aabhasombooreraga joone.

Yeesu kaagonya omuyaga gwa echiiwure mu‑nyanja

(Mataayo 8:23‑27; Ruuka 8:22‑25)

35Rusuku orwo keegoro, Yeesu ˆnaabhwira abheeyigisibhwa bhaaye ati, “Chaambuke inyanja, chije ku‑ngego eyindi.” 36Nibhasiga echise cha abhaanu, nibheengira mu‑ngama munu Yeesu aariga ari, nibheemuka. Gaariga gari‑wo na amaato agandi ganu ꞉gaaruubheene nabho. 37Bhejire bhaakinga mu‑bhusibha, nigutiimuka omuyaga gwa echiiwure mu‑nyanja. Amakonjo nigabhuma ingama, amanji nigaamba okwingira mu‑ngama niirebherera okwijura.

38Omwanya ogwo, Yeesu aariga awongeeye ku‑rwayi mu‑seji. Abheeyigisibhwa bhaaye nibhamuuja‑ko, nibhamurafya, nibhaayikaga ati, “Omwiyigisya, utakwigana ati eswe echisingaarika?”

39Niwo Yeesu ˆneemuka ˆnaagonya omuyaga, ˆnaabhwira inyanja ati, “Choreera uteekane! Siiriika!” Omuyaga gurya nigutemekera, inyanja niibha etore chimwi. 40Mbe Yeesu ˆnaabhwira abheeyigisibhwa bhaaye ati, “Kurwa ki omuubhaya? Noorwo woori mutari na eriikirisya?” 41Nibhoobhaya muno, nibhabhuusyanya ati, “Si unu niga? Noorwo omuyaga na amakonjo ebhimugayuka!”

Currently Selected:

Maariko 4: jit

Highlight

Copy