Maariko 3

Yeesu kaawosya omuunu ku‑rusuku rwa Isabhaato

(Mataayo 12:9‑14; Ruuka 6:6‑11)

1Rusuku orundi rwa Isabhaato, Yeesu ˆneengira mu‑nju ya eriikofyanyo. Mu‑nju omwo aariga ari‑mo omuunu unu afuuwe okubhoko. 2Abhafarisaayo bhaariga bheetegaaniiye Yeesu, bharore araabha kaja okuwosya omuunu oyo ku‑rusuku rwa Isabhaato. Aakamuwosya, bhabhone omusango gwa okumusitaaka. 3Yeesu ˆnaabhwira omuunu unu aariga afuuwe okubhoko ati, “Iija, wimereeguru agatigati anu.” 4Niwo Yeesu ˆnaabhuusya Abhafarisaayo ati, “Woori, ebhiraagiro bhya Muusa ebhiikirisya okukora gwa ekisi amwi okukora emibhiibhi ku‑rusuku rwa Isabhaato, okuwonʼya omuunu amwi okumwita?” Abheene nibhajibhira jibhijibhi.

5Yeesu ˆnaaroreerera nekeneke Abhafarisaayo bhoone abhiyiriiywega, keenu asurumbaayega inguru ya obhukomeeye bhwa emyoyo jeebhwe. Niwo ˆnaabhwira omuunu oyo ati, “Gorora okubhoko kwawo.” Omuunu oyo ˆnaakugorora, awoawo ˆnaawora! 6Abhafarisaayo bhejire bhaawuruka anja, awoawo nibhakora echinyanjo na abharuubhirisya bha omukama Yeroode Atipaasi,#3:6 Abharuubhirisya bha omukama Yeroode Atipaasi. Jinyabhurira ejindi ejaayika ati, Abhayeroodi. Abhaanu abho ꞉bheekirisiisye obhutungi bhwa Abharuumi mu‑chaaro cheebhwe. Ku‑meeresyo amaafu inguru ya omukama Yeroode unu, ringira Yeroode Atipaasi mu‑Meeresyo inguru ya Emisango Emikomeeye. cha okwikirisyanya nabho kutyo abhaja okwita Yeesu.

Abhaanu bhaafu nibhaja ku‑Yeesu

7Yeesu ˆnaasooka awo, ˆnaagenda ku‑nyanja ya Gariraaya aamwi na abheeyigisibhwa bhaaye. Echise echinene cha abhaanu okusooka Gariraaya, Yuudeya, 8Yerusareemu, Idumaaya, ku‑ngego ya omusima gwa Yorodaani, orubhaara rwa emisi ja Tiiro na Sidooni, nibhamuruubha kwa okubha bhaariga bhoonguuwe inguru ya ebhiruguusyo bhinu aariga akorere. 9Yeesu ˆnaabhwira abheeyigisibhwa bhaaye ati bhamwiraabhire ingama, kwa okubha echise chirya chaariga chiri chinene muno, korereki chikamuyiganya, eengire mu‑ngama omwo. 10Abharwaye bhaariga nibhayigana korereki bhamukuunʼye‑ko, kwa okubha aariga awosiisye bhaafu. 11Abhaanu bhanu bhaariga bhawungirwe amasambwa omwanya gunu bhaamuroraga, bhaagwaga ku‑maguru gaaye, nibhaamura obhuraka nibhariraga nibhaayika ati, “Awe uri Mwana wa Nyamuwanga!” 12Niwo ˆnaagagonya kwa obhururu ati, gaasiga okubhwira abhaanu ati omwene niga.

Yeesu kaawura jitumwa ekumi na bhabhiri

(Mataayo 10:1‑4; Ruuka 6:12‑16)

13Yeesu ˆnaariinya ku‑chiima. Eyo niwo ˆnaabhirikira abhaanu bhanu aariga ˆneenda, nibhamuruubha. 14꞉Aawuuwe ekumi na bhabhiri, abho nibho ˆnaatoga jitumwa jaaye.#3:14 Jitumwa jaaye. Ku‑meeresyo amaafu, ringira Jitumwa mu‑Meeresyo inguru ya Emisango Emikomeeye. ꞉Aabhawuuwe korereki bhabhega aamwi nage na abhatumega okuraasya Emisango ja Ekisi. 15Ka wone, ꞉aabhayaaye obhuturo bhwa okusoosya amasambwa ku‑bhaanu. 16Ganu nigo amasiina ga abhaanu ekumi na bhabhiri bhanu ꞉aawuuwe,

Simooni, unu ꞉aayaaye risiina erindi, Peetero, 17Yakobho na Yowana, bhanu nibho bhaariga bhari bhamura bha Jebhedaayo, nibho ꞉aatogere risiina rya Bhoowanage, obhugajuro bhwaryo bhaariga bhari rwa ribharuka, 18Andereya, Firipo, Bhatoromaayo, Mataayo, Tomaasi, Yakobho omwana wa Arufwayo, Tadaayo, Simooni Omukananaayo,#3:18 Simooni Omukananaayo. Aariga ari na amasiina gabhiri, erimwi ni Simooni Omukananaayo, erindi ni Simooni Omujeroote. Goone ago gari na obhugajuro bhumwi, omuunu unu aariga arwanire riremo rya obhwitaage okusooka mu‑bhutungi bhwa Echiruumi. Ringira Mataayo 10:4; Ruuka 6:15. 19na Yuuda Isikariyooti, unu ꞉aaromeeye Yeesu iniku.

Yeesu ari na obhuturo okukira Syetaani

(Mataayo 12:22‑32; Ruuka 11:14‑23, 12:10)

Niwo Yeesu ˆnaasubha iika, ˆneengira mu‑nju. 20Echise cha abhaanu nichiikofyanya awo rindi, okukingira Yeesu na abheeyigisibhwa bhaaye nibhataamibhwa noorwo okubhona omwanya gwa okurya ebhiryo. 21Nyiramwene na abhamura bhaabho bhejire bhoongwa emisango ejo, nibhagenda okumugwata, bhaariga nibhaayika ati asarire.

22Abheeyigisya bha ebhiraagiro bhya Muusa bhanu ꞉bhaasookere mu‑musi gwa Yerusareemu, bhaayikaga ati, “Ari na Bherijebhuuri!” Ka wone bhaayikaga ati, “Omuunu unu, kaasoosya‑ko amasambwa ku‑bhuturo bhwa Bherijebhuuri, omukuru wa amasambwa goone.”

23Awo Yeesu ˆnaabhabhirikira, ˆnaamba okubhabhwira ku‑bhijekekanyo ati, “Syetaani kaatura kutiki okwisoosya‑ko omwene? 24Araabha abhaanu bha obhukama bhumwi bhakaawukana, obhukama obhwo bhurisimagira. 25Ka wone, araabha abhaanu bha inju imwi bhakaawukana, mbe abhaanu abho bharisigana. 26Araabha Syetaani kaarwana na amasambwa geejaabho, obhukama bhwaye bhwawukeene‑mo, obhutura okwimereeguru kutiki? Bhutakutura okwimereeguru noorwo na akatyari, chimari obhukama obhwo obhurisimagira chimwi. 27Nawe, echimari nicho chinu, ati omuunu atakutura okwingira mu‑nju ya omuunu owa amanaga, na okumuteesya ebhiinu bhyaye, atatangatire okumubhoya. Chimari araabha aakamubhoya, awo niwo kaatura okumuteesya ebhiinu bhyaye.

28“Ni chimari enibhabhwira ati, Nyamuwanga arifwira echigongo abhaanu ebhibhiibhi bhyebhwe bhyone na okufumirisya kwebhwe kwone. 29Nawe, atarifwira echigongo abhaanu bhanu abheefumirisya Mwoyo Mweru. Oyo aribha na risoro rya echibhiibhi akajaanende koone.” 30Yeesu ꞉aabhabhwiriiye kutyo kwa okubha bhaariga nibhaayika ati, “Ari na risambwa.”

Nyiramwene Yeesu na abhamura bhaabho Yeesu

(Mataayo 12:46‑50; Ruuka 8:19‑21)

31Niwo nyiramwene Yeesu na abhamura bhaabho nibhakinga, nibheemereeguru anja ya inju inu aariga ari‑mo. Nibhatuma omuunu umwi abhirikire Yeesu aaje, bhasimure nage. 32Echise echinene cha abhaanu chaariga chiinyanjire, chimusingiiye. Niwo abheeyigisya bharya bha ebhiraagiro nibhabhwira Yeesu ati, “Ringira, nyokomwana na abhamura bhaanyu bhari anja, abhakuyenja.”

33Yeesu ˆnaabhasubhya ati, “Maayi na abhamura bhaasu ni bhaaga?” 34ˆNaaroreerera abhaanu bhanu bhaariga bheenyanjire bhamusingiiye, ˆnaayika ati, “Muringire, bhanu nibho bhamaayi, na abhamura bhaasu. 35Omuunu woonewoone unu kaakora okwenda kwa Nyamuwanga, oyo niwe omumura waasu, maayi na omuyara waasu.”

Currently Selected:

Maariko 3: jit

Highlight

Copy