Ruuka 6

Yeesu niwe Raatabhugenyi wa orusuku rwa Isabhaato

(Mataayo 12:1‑8; Maariko 2:23‑28)

1Rusuku rumwi, ruri rusuku rwa Isabhaato, Yeesu aaturaga mu‑masambu ga ingano, aamwi na abheeyigisibhwa bhaaye. Abheeyigisibhwa nibhabhutura ebhyangara bhya ingano, nibhabhiwungurura, nibhabhikuuta na amabhoko, nibharya.

2Niwo Abhafarisaayo abhandi nibhamubhwira ati, “Mbawo omukora jinu ebhiraagiro bhya Muusa bhitakubheekirisisya okukora ku‑rusuku rwa Isabhaato?”

3Yeesu ˆnaabhasubhya ati, “Angu, muchaariga okusoma mu‑Bhikaame Ebhyeru jinu Dawudi ꞉aakorere omwanya gunu omwene na abheejaabho ꞉bhoonguuwe omweko? 4꞉Eengiiye mw‑iyeema rya Nyamuwanga, ˆnaagega emikaate jinu ꞉jaateeywe imbere ya Nyamuwanga, ˆnaarya! Neeya ˆnaayaana abheejaabho wone nibharya. ꞉Bhaariiye emikaate jinu ebhiraagiro bhya Muusa bhitakubheekirisisya okurya, tari abhagabhisi era.”#6:4 Ringira 1 Samweri 21:1‑6. 5Yeesu ˆnoongesya okwayika ati, “Anye Omwana wa Omuunu, naanye Raatabhugenyi wa orusuku rwa Isabhaato.”

Yeesu kaawosya omuunu ku‑rusuku rwa Isabhaato

(Mataayo 12:9‑14; Maariko 3:1‑6)

6Orusuku orundi rwa Isabhaato, Yeesu ˆneengira mu‑nju ya eriikofyanyo rya Abhayawudi, ˆnaamba okwiyigisya abhaanu. Mu‑nju omwo, aariga ari‑mo omuunu umwi, unu okubhoko kwaye kwa ebhuryo kwariga kufuuwe. 7Ka wone bhaariga bhari‑mo abheeyigisya bha ebhiraagiro bhya Muusa, na Abhafarisaayo, ꞉bhaayenjere injuno ya okusitaaka Yeesu. Kurwa ejo, nibharindirira bharore araabha kaja okuwosya omuunu ku‑rusuku rwa Isabhaato.

8Nawe, Yeesu ˆnaasombookerwa jinu bhaariga nibheeganirisya. Kurwa ejo, Yeesu ˆnaabhwira omuunu unu aariga afuuwe okubhoko ati, “Iija, wimereeguru agatigati anu.” Omuunu oyo ˆnaagenda, ˆneemereeguru.

9Niwo, Yeesu ˆnaabhwira abhaanu abho ati, “Enibhabhuusya emwe ati, angu, ebhiraagiro ebhiikirisya okukora ja ekisi ku‑rusuku rwa Isabhaato, amwi okukora emibhiibhi? Okuwonʼya omuunu amwi okumwita?” 10Yeesu ˆnaaroreerera nekeneke abhaanu bhoone bhanu bhaariga bhari awo. Ejire aamara ˆnaabhwira omuunu oyo ati, “Gorora okubhoko kwawo.” Omuunu oyo ˆnaakugorora, awoawo ˆnaawora.

11Abhafarisaayo abho, nibhabhiyirwa muno. Nibhaamba okwayikana kutyo abhaja okukorera Yeesu amabhiibhi.

Yeesu kaawura jitumwa ekumi na bhabhiri

(Mataayo 10:1‑4; Maariko 3:13‑19)

12Mu‑siku ejo, Yeesu ˆnaagenda ku‑chiima okusabhwa Nyamuwanga, ˆnaamusabhwa ingeta yoona. 13Bhwejire bhwacha, ˆnaabhirikira abheeyigisibhwa bhaaye. Mu‑bheene abho ˆnaawura‑mo ekumi na bhabhiri, abho nibho ˆnaatoga jitumwa jaaye.#6:13 Jitumwa jaaye. Ku‑meeresyo amaafu, ringira Jitumwa mu‑Meeresyo inguru ya Emisango Emikomeeye. Jitumwa ejo, nibho bhanu,

14Simooni unu Yeesu ꞉aatogere risiina rya Peetero, Andereya omumura waabho Simooni, Yakobho, Yowana, Firipo, Bhatoromaayo, 15Mataayo, Tomaasi, Yakobho omwana wa Arufwayo, Simooni unu aatogwaga Omujeroote,#6:15 Simooni unu aatogwaga Omujeroote. Aariga ari na amasiina gabhiri, erimwi ni Simooni Omukananaayo, erindi ni Simooni Omujeroote. Goone ago gari na obhugajuro bhumwi, omuunu unu aariga arwanire riremo rya obhwitaage okusooka mu‑bhutungi bhwa Echiruumi. Ringira Mataayo 10:4; Maariko 3:18. 16Yuuda omwana wa Yakobho, na Yuuda Isikariyooti unu ꞉aaromeeye Yeesu iniku.

Yeesu kaawosya abharwaye bhaafu

(Mataayo 4:23‑25)

17Yeesu ˆneeka okusooka ku‑chiima, aamwi na jitumwa jaaye. Ejire aakinga ku‑seerera, ˆneemereeguru. Ku‑seerera awo niwo bhaariga bheekumanyiisye abheeyigisibhwa bhaaye bhaafu na echise cha abhaanu abhandi okusooka mbaara joone ja omukoowa gwa Yuudeya na mu‑musi gwa Yerusareemu, na okusooka ku‑ngego ya emisi ja Tiiro na Sidooni. Abhaanu abho ꞉bheejire awo, okutegeresya Yeesu na okuwosibhwa amarwara geebhwe. 18Noorwo abhaanu bhanu bhaariga bhawungirwe na amasambwa,#6:18 Amasambwa. Ku‑meeresyo amaafu, ringira mu‑Meeresyo inguru ya Emisango Emikomeeye. wone aariga ˆnaabhawosya. 19Abhaanu abho bhoone, bheendaga okumukuunʼya‑ko, kwa okubha obhuturo bhwa okuwosya bhwariga nibhumusooka‑ko, na okubhawosya bhoone.

Ameeyigisyo inguru ya amabhando na ingʼanga

(Mataayo 5:1‑12)

20Yeesu ˆnaaringira abheeyigisibhwa bhaaye abho, ˆnaabhabhwira ati,

“Muri na ribhando emwe abhataka,

kwa okubha, emwe neemwe abhaanu bha obhukama bhwa Nyamuwanga.

21Muri na ribhando emwe, bhanu omuungwa omweko woori anu,

kwa okubha, muriigutibhwa.

Muri na ribhando emwe, bhanu omurira woori anu,

kwa okubha, muriseka.

22Muri na ribhando emwe,

araabha abhaanu abhabhasoka na okubhakindika,

abhaja okubhafuma na okubhabhwira ati, emwe muri bhajabhi,

inguru yaani anye Omwana wa Omuunu.

23Orusuku runu ejo jirikorekana, mukonderwe na okusandabha muno,

kwa okubha mumenyere ati,

echiyaanwa cheemwe mu‑rwire ni chinene.

Mwichuke ati, noorwo bhasaaja weebhwe,

bhaariga nibhanyaasya kutyokutyo abharagi bha Nyamuwanga.

24Nawe jiribhabhona, emwe abhaniibhi,

kwa okubha mwabhwene okusiiriisibhwa kwemwe.

25Jiribhabhona emwe, bhanu woori anu mwigutire,

kwa okubha muryungwa omweko.

Jiribhabhona, emwe bhanu woori anu omuseka kwa okukondererwa,

kwa okubha muririra na okusurumbara inguru ya orufu.

26Jiribhabhona emwe, araabha abhaanu abhabhakumangya,

kwa okubha, noorwo bhasaaja weebhwe,

nikwo kutyo bhaariga nibhakorera abharagi bha orubheeyi.

Ameeyigisyo inguru ya okwenda abhasoko

(Mataayo 5:38‑48, 7:12)

27“Enibhabhwira emwe bhanu omuntegeresya, mwendega abhasoko bheemwe. Abhaanu bhanu abhabhasoka, emwe mubhakorerega ja ekisi. 28Abhaanu bhanu abhabheeyiima, emwe mubhasabhirwega amabhando. Nyabhuriko abhaanu bhanu abhabhanyaasya, emwe mubhasabhirwega ku‑Nyamuwanga.

29“Omuunu akakugaya ˆnaakubhaatuura kw‑itama rimwi, nuumuyindurire na ritama erindi. Omuunu akakuteesya rikabhuuti ryawo, nuumusige agege noorwo na omwingiro. 30Omuunu woonewoone aakakusabhwa echiinu, umuyaane. Omuunu akakuteesya ebhiinu bhyawo, waasiga okumusabhwa ati akusubhisye. 31Mukorerega abhaanu abhandi rwa kutyo emwe wone omwenda bhabhakorerega.

32“Mbe mukeenda era bhanu abhabheenda emwe, angu omubha mukorere ja ekisi ki? Noorwo abha ebhibhiibhi, wone abheenda abhaanu bhanu abhabheenda era! 33Ka wone, mukakorera ja ekisi bhanu abhabhakorera emwe ja ekisi, angu omubha mukorere ja ekisi ki? Noorwo abha ebhibhiibhi, wone abhakora kutyo! 34Angu, mukabhanja abhaanu enu nimwiyikanya ati abhaja okubhasubhisya, ni ja ekisi jiiya jinu omukora? Noorwo abha ebhibhiibhi wone abhabhanja abheejaabho, kwa okubha abheeyikanya ati, abhaja okubhasubhisya bhyone!

35“Nawe emwe, mwendega abhasoko bheemwe, mubhakorerega eja ekisi. Mubhabhanjega muteeyikanya okusubhisibhwa. Nyamuwanga aribhayaana echiyaanwa echinene, na omuja okubha abhaana bha echimari ku‑mwene unu ari Inguru ya Bhyone. Okubha Nyamuwanga kaasakira abhaanu bhoone noorwo bhanu bhatakumusiima, na bhanu abhakora amabhiibhi.

36“Mufwirwega echigongo abhaanu abhandi, rwa kutyo Esomwana kaabhafwira echigongo.

Ameeyigisyo inguru ya okusoosya indamu ku‑bhaanu abhandi

(Mataayo 7:1‑5)

37“Mwasiga okuramura abhandi, korereki emwe wone Nyamuwanga atarija okubharamura. Musige okwendera abhandi indamu, emwe wone mwasiga okwenderwa indamu. Mufwire echigongo abhaanu bhanu bhabhakayiiye, niwo emwe wone omuja okufwirwa echigongo ebhibhiibhi bhyemwe. 38Muyaanega abhaanu ebhiinu, niwo emwe wone muriyaanwa echiyaanwa echinene. Indengo inu omurenga niyo murirengerwa‑mo, korereki yiijure jabhijabhi, yiigatirwe na okusingisibhwa okukingira okwitika aasi. Okubha, indengo inu omurengera abhandi, eyoeyo niyo emwe wone Nyamuwanga aribharengera.”

39Yeesu ˆnaabhabhwira echijekekanyo ati, “Angu omuwofu kaatura okutangasya omuwofu oweejaabho? Jitari ati, bhoone ku‑bhubhiri bhwebhwe bharigwa mu‑ryobho?

40“Omwiyigisibhwa, atakutura okubha omumenyi muno okukira omwiyigisya waaye. Nawe, omwiyigisibhwa akamara okwiyigisibhwa, niwo kaabha na obhuturo rwa bhwa omwiyigisya waaye.

41“Mbawo owuringira nekeneke akabhambo kanu kari mu‑riiso rya oweejaanyu, nawe utakurora echuura chinu chiri mu‑riiso ryawo? 42Angu, owutura kutiki okubhwira oweejaanyu ati, ‘Weejaasu, siga nikusoosye akabhambo kanu kari mu‑riiso ryawo,’ keenu awe omwene utakurora echuura chinu chiri mu‑riiso ryawo? Omwirimaanya awe! Nuusoosye okwamba echuura chinu chiri mu‑riiso ryawo, niwo owutura okurora kisi na okusoosya akabhambo kanu kari mu‑riiso rya oweejaanyu.

Abhaanu abhamenyekana ku‑matwasyo geebhwe

(Mataayo 7:16‑20, 12:33‑35)

43“Ritari‑wo riiti rya ekisi rinu eritwasya amatwasyo amabhiibhi. Nyabhuriko, ritari‑wo riiti ribhiibhi rinu eritwasya amatwasyo ga ekisi. 44Ni chimari ati, abhaanu bhatakunogora ritiini ku‑mati ga amawa, na bhatakunogora emijabhiibhu ku‑masongoma. Owutura okumenya ati riiti ni rya mbaga ki ku‑matwasyo ganu eritwasya.

45“Nyabhuriko, omuunu wa ekisi kaakora ja ekisi, jinu ejisooka mu‑chibhiikiro cha ekisi cha omwoyo gwaye. Nawe omuunu omubhiibhi kaakora emisango emibhiibhi jinu ejisooka mu‑chibhiikiro echibhiibhi cha omwoyo gwaye. Chimenyere ati, emisango jinu omuunu kaayika, ejisooka mu‑bhwiganirisya bhwafu bhunu bhwijuuye mu‑mwoyo gwaye.

Abhoombaki bha mbaga ebhiri

(Mataayo 7:24‑27)

46“Ni kurwa ki omumbirikira ati ‘Raatabhugenyi, Raatabhugenyi,’ nawe emisango jinu enibhabhwira, mutakujikora? 47Omuunu woonewoone unu kaaja kw‑anye, ˆnaategeresya emisango jaani na okujigayuka kaasusana na echijekekanyo chinu. 48Kaasusana na omuumbaki wa inju, unu ꞉aasimbire orufuka, ˆnaakinga emwaro ku‑rutare, ˆnoombaka orufuka inguru ya orutare orwo. Mbe, induruma yejire yaaja, omusima nigwijura amanji, nigawurura nigabhuma inju eyo. Noorwo kutyo, ꞉gataayisingaarisiisye, kwa okubha yaariga yumbakirwe kisi.

49“Nawe, omuunu woonewoone unu kaategeresya emisango jaani, ˆnaarema okujigayuka, oyo ari rwa omuunu unu ꞉oombakire inju yaaye ku‑musenyi gwenyere, orufuka rutaabha‑wo wuri. Mbe, omusima gwejire gwejura amanji, amanji ago nigabhuma inju eyo, katungu katooto era niisararuka, niifuma, niisingaarika yoone.”

Currently Selected:

Ruuka 6: jit

Highlight

Copy