Ruuka 5

Yeesu kaasora abheeyigisibhwa bhaaye bha okwamba

(Mataayo 4:18‑22; Maariko 1:16‑20)

1Rusuku rumwi, Yeesu aariga eemereeguuyu ku‑ngego ya omwaro gwa Genejareeti,#5:1 Omwaro gwa Genejareeti. Risiina erindi rya omwaro ogwo, ryatogwaga ati, omwaro gwa Gariraaya. enu ˆneeyigisyaga echise cha abhaanu omusango gwa Nyamuwanga. Abhaanu nibhamufogera‑ko, okukingira nibhamuyiganya korereki bhamutegeresye. 2ˆNaarora amaato gabhiri, ku‑ngego ya omwaro ogwo. Abhakokoosi abheene, ꞉bhaagasigire awo, nibhagenda okwosya amagoobhe geebhwe. 3ˆNaariinya mu‑ngama imwi ya Simooni, ˆnaamusabhwa ati, “Ifogesye‑wo kutooto mu‑manji okusooka ku‑njekekera.” Mbe, Yeesu ˆneenyanja mu‑ngama omwo, ˆnaagenderera okwiyigisya abhaanu.

4Yeesu ejire aamara okubheeyigisya, ˆnaabhwira Simooni ati, “Fuga ingama chigende ebhusibha, musikye amagoobhe geemwe, mujubhure jiiswi.” 5Simooni ˆnaamusubhya ati, “Mwami weeswe, chaatega obhwire bhwone chitaabhona echiinu wuri! Nawe kwa okubha awe waayika, echija okusikya amagoobhe.”

6Mbe Simooni na abheejaabho nibhasikya amagoobhe geebhwe, bhejire bhaamara okugasikya, nibhajubhura jiiswi nyafu muno, amagoobhe geebhwe nigaamba okutemuka. 7Nibhawungisya amabhoko abheejaabho bhanu bhaariga bhari mu‑ngama eyindi irya, korereki bhaaje okubhasakira. Bhejire bhaaja ꞉bheejusiisye jiiswi jingama joone ebhiri, jingama ejo nijirebherera okusika.

8Simooni Peetero ejire aarora ejo, ˆneefukama imbere ya Yeesu, ˆnaamubhwira ati, “Raatabhugenyi, niteeyire okubha aamwi na awe, kwa okubha anye niri muunu owa ebhibhiibhi!” 9Simooni ꞉aayikire emisango ejo, kwa okubha omwene na abheejaabho bhoone, ꞉bhaaruguurire inguru ya jiiswi nyafu muno jinu bhaariga bheetire. 10Mu‑ngama eyindi irya, aariga ari‑mo Yakobho na Yowana, abhaana bha Jebhedaayo. Abhamura abho bhaariga nibhasangira aamwi na Simooni emirimu ja okutega. Bhoone abho nibharuguura inguru ya jinu ꞉jaakorekeene. Yeesu ˆnaabhwira Simooni ati, “Siga okuubhaya! Okwambira woori owuja okubha nuwukumanyisya abhaanu rwa kutyo waariga nuutega jiiswi.” 11Mbe, Simooni na abheejaabho nibhasubhya amaato ku‑ngego, nibhasiga ebhiinu bhyebhwe bhyone, nibhamuruubha.

Yeesu kaawosya owa ebhigenge

(Mataayo 8:1‑4; Maariko 1:40‑45)

12Rusuku rurebhe Yeesu aariga ari mu‑musi omurebhe, omuunu umwi ˆnaamuuja‑ko. Ringira, omuunu oyo aariga aswireene ebhigenge omubhiri gwone. Ejire aarora Yeesu ˆnaaja ˆneefukama imbere yaaye, ˆnaamubhwira ati, “Raatabhugenyi, nimenyere ati, uri na obhuturo bhwa okummosya korereki neere. Ukeenda, enisabhwa ummosye.” 13Yeesu ˆneenamusya okubhoko, ˆnaamukuunʼya‑ko, ˆnaamubhwira ati, “Eneenda, uwore!” Awoawo, ˆnaawora ebhigenge bhyaye.

14Yeesu ˆnaamugaanya, ˆnaamubhwira ati, “Waasiga okubhwira omuunu woonewoone inguru ya omusango gunu! Tari nuugende ku‑mugabhisi akurore, usoosye echoogo,#5:14a Echoogo. Ku‑meeresyo amaafu, ringira mu‑Meeresyo inguru ya Emisango Emikomeeye. rwa kutyo ebhiraagiro bhya Muusa ꞉bhyaragiriiye, korereki bhubhe obhubhambaasi ku‑bhaanu ati, weesibhwa.”#5:14b Ringira Abharaawi 14:1‑22.

15Noorwo kutyo, emisango ja Yeesu ja okwesya#5:15 Okwesya. Ku‑meeresyo amaafu, ringira mu‑Meeresyo inguru ya Emisango Emikomeeye. omugenge oyo, nijigenderera okuswirana muno. Abhaanu bheekofyanyaga, korereki bhategeresye ameeyigisyo gaaye, na okuwosibhwa amarwara geebhwe. 16Nawe, Yeesu ˆneeyawura omwene, ˆnaagenda orubhaara runu abhaanu bhatari, ˆnaasabhwa Nyamuwanga eyo.

Yeesu ari na obhuturo bhwa okufwira echigongo ebhibhiibhi

(Mataayo 9:1‑8; Maariko 2:1‑12)

17Rusuku rumwi, omwanya gunu Yeesu aariga ˆneeyigisya abhaanu mu‑nju, Abhafarisaayo aamwi na abheeyigisya bha ebhiraagiro bhya Muusa#5:17 Abhafarisaayo na abheeyigisya bha ebhiraagiro bhya Muusa. Ku‑meeresyo amaafu, ringira mu‑Meeresyo inguru ya Emisango Emikomeeye. wone bhaariga bhari‑mo bheenyanjirega. Bhaariga bheejire okusooka mu‑nguuyo joone ja Gariraaya na Yuudeya, noorwo abhandi bhaariga bhasookere mu‑musi gwa Yerusareemu. Yeesu aariga ari na obhuturo okusooka ku‑Raatabhugenyi Nyamuwanga, korereki awosye abharwaye.

18Niwo, nibhaaja abhaanu, bhayangirega riraro ari‑ko omuunu unu aariga afuuwe omubhiri. Nibheenda bhamwingisye mu‑nju, bhamutuure imbere ya Yeesu. 19Nawe ꞉bhataaturire okumwingisya omwo, kwa okubha abhaanu bhaariga bhayigeene muno mu‑muryango. Bhejire bhaataamibhwa okumwingisya, niwo nibhariinya ku‑njegwe nibhaja ku‑rusara rwa inju, keenu bhayangirega omurwaye oyo kw‑iraro ryaye. Nibhabhandura‑wo amatafwari inguru ku‑ndugu, niribha‑wo riwundu enene. Omurwaye oyo ari kw‑iraro ryaye okwo, nibhamutusya mw‑iwundu omwo, nibhamworomosya mu‑nju imbere ya Yeesu. 20Yeesu ejire aarora eriikirisya rya abhaanu abho, ˆnaabhwira omurwaye oyo ati, “Musaani, waafwirwa echigongo ebhibhiibhi bhyawo!”

21Mbe, abheeyigisya bha ebhiraagiro bhya Muusa na Abhafarisaayo abho, nibhaamba okubhuusyanya nibhaayikaga ati, “Niga unu? Mbawo kaayika emisango ja okufumirisya Nyamuwanga? Atari‑wo omuunu unu kaatura okufwira echigongo ebhibhiibhi, tari Nyamuwanga eenyere!”

22Yeesu ˆnaamenya emisango jinu bhaariga nibheeganirisya mu‑myoyo jeebhwe, ˆnaabhabhuusya ati, “Ni kurwa ki omwiganirisya kutyo mu‑myoyo jeemwe? 23Woori ni musango ki gunu guri mwangu muno? Okumubhwira ati, ‘Waafwirwa echigongo ebhibhiibhi bhyawo,’ amwi okumubhwira ati, ‘Imereeguru uribhate’? 24Nawe eneenda mumenye ati, anye Omwana wa Omuunu#5:24 Omwana wa Omuunu. Yeesu ꞉eebhirikiiye risiina rinu kwiya kaafu. Kw‑isiina rinu, Yeesu ꞉eeresiisye ati ꞉aasookere ku‑Nyamuwanga, ka wone ayaaywe obhuturo bhunene okusooka ku‑mwene. Ku‑meeresyo amaafu, ringira mu‑Meeresyo inguru ya Emisango Emikomeeye. niyaaywe obhuturo bhwa okufwira echigongo ebhibhiibhi mu‑chaaro munu.”

Neeya Yeesu ˆnaabhwira omuunu unu aariga afuuwe omubhiri ati, “Enikubhwira ati, imereeguru! Ugege riraro ryawo, ugende iika ewaawo.”

25Awoawo, omurwaye oyo ˆneemereeguru imbere ya abhaanu bhoone, ˆnaagega riraro ryaye ˆnaagenda iika ewaaye, enu ˆnaakusyaga Nyamuwanga. 26Abhaanu bhoone nibharuguura muno na okuyaya. Aamwi na ejo, nibhakusya Nyamuwanga, nibhaayikaga ati, “Bhamura, reero chaarora emisango ja okuruguusya!”

Yeesu eejire okuchungura abha ebhibhiibhi

(Mataayo 9:9‑13; Maariko 2:13‑17)

27Ejo jejire jaawa, Yeesu ˆnaasooka mu‑nju, ˆnaarora omutobhesya umwi wa rigooti unu kaatogwa ati Raawi. Omutobhesya oyo, aariga eenyanjire mw‑itobhesisyo rya rigooti.

Yeesu ˆnaamubhwira ati, “Nuunduubhe!” 28Awoawo Raawi ˆnaasiga ebhiinu bhyone, ˆneemuka, ˆnaamuruubha.

29Neeya Raawi ˆnaakora obhugenyi obhunene iika ewaaye inguru ya Yeesu. Iika wa Raawi awo bhaariga bheekofyanyiisye‑wo abhatobhesya bhaafu bha rigooti na abhaanu abhandi, nibheenyanja ku‑nenda okurya ebhiryo aamwi na Yeesu. 30Echikorwa echo nichikora Abhafarisaayo, na abheeyigisya bheebhwe bha ebhiraagiro bhya Muusa, nibhagenda okujujuuma ku‑bheeyigisibhwa bha Yeesu, nibhaayikaga ati, “Mbawo, omurya na okunywa aamwi na abhatobhesya bha rigooti na abhakosi bha ebhibhiibhi?”

31Yeesu ˆnaabhasubhya ati, “Abhaanu bhanu bhatarwaye, bhatakukena omuragusi. Tari abharwaye nibho abhamukena! 32Anye ꞉niteejire okubhirikira bhanu abheerora wuti ni bharengeresi imbere ya Nyamuwanga. Tari niijire okubhirikira abhakosi bha ebhibhiibhi, korereki bhate ebhibhiibhi.”

Yeesu ari rwa omutwasi

(Mataayo 9:14‑15; Maariko 2:18‑20)

33Abhaanu abho nibhabhwira Yeesu ati, “Mbawo, abheeyigisibhwa bha Yowana abheeyimaga ebhiryo kwiya kaafu, omwanya gunu abhasabhwa Nyamuwanga. Noorwo abheeyigisibhwa bha Abhafarisaayo wone abhakoraga kutyokutyo. Angu, ni kurwa ki abheeyigisibhwa bhaawo bhatakwiyima okurya ebhiryo na okunywa?”

34Yeesu ˆnaabhasubhya ati, “Omutura kutiki okubhwira abhagenyi bha omutwasi ati bheeyime okurya ebhiryo omwanya gunu omutwasi achaari aamwi nabho? 35Nawe, jisiku ejiija jinu omutwasi arisoosibhwa‑wo na okusiga abhagenyi bhaaye. Mbe ku‑mwanya ogwo, niwo bhariiyima okurya ebhiryo.”

Yeesu keenganyirisya ameeyigisyo ga kara na ameeyigisyo gaaye amayaaya

(Mataayo 9:16‑17; Maariko 2:21‑22)

36Yeesu ˆnaabhabhwira echijekekanyo echindi, ˆnaayika ati, “Atari‑wo omuunu unu kaatura okutema echirepa okusooka ku‑mwenda omuyaaya, korereki achibhariirire ku‑mwenda omukokoro. Okubha aakakora kutyo, kaabha atemuuye omwenda gwaye omuyaaya. Aamwi na ejo, echirepa cha omwenda omuyaaya echo chitakuja okwiyanya na omwenda omukokoro.

37“Ka wone, atari‑wo omuunu unu kaatura okutuura echifuufu echiyaaya mu‑sagwa ja jinjayi jingʼokoro. Okubha, aakakora kutyo, echifuufu echiyaaya echija okufwimbya jisagwa ejo okukingira jaatike, nichiwururira aasi, na jisagwa ejo ejija okunyamuka. 38Nawe echifuufu echiyaaya, cheenderwe chituurwe mu‑sagwa ja jinjayi jinyaaya!

39“Omuunu unu anarire echifuufu cha kara, atakwenda echifuufu echiyaaya. Kaayika ati, ‘Echifuufu cha kara nicho cha ekisi.’”

Currently Selected:

Ruuka 5: jit

Highlight

Copy