Ruuka 4

Syetaani kaaregeeja Yeesu

(Mataayo 4:1‑11; Maariko 1:12‑13)

1Yeesu ˆnaasooka ku‑musima gwa Yorodaani, eejuuywega Mwoyo Mweru. Aatangasibhwaga na Mwoyo Mweru mw‑ibhara eyo, ku‑mwanya gwone gwa masuubha makumi gana. 2Niwo ˆnaaregeejwa na Syetaani.#4:2 Syetaani. Ku‑meeresyo amaafu, ringira mu‑Meeresyo inguru ya Emisango Emikomeeye. Ku‑mwanya ogwo gwone, ataaryaga echiinu choonechoone. Omwanya ogwo gwejire gwawa ˆnoongwa omweko muno.

3Niwo Syetaani ˆnaaja okumuregeeja. ˆNaamubhwira ati, “Araabha awe uri Mwana wa Nyamuwanga, indura ribhuyi rinu ribhe omukaate.”

4Yeesu ˆnaamusubhya ati, “Jikaamirwe mu‑Bhikaame Ebhyeru ati, ‘Obhurame bhwa omuunu bhutari ku‑bhyokurya era.’#4:4 Ringira Orwichuko rwa Ebhiraagiro 8:3.”

5Neeya Syetaani ˆnaagega Yeesu ˆnaamusira ku‑chiima echireera muno. Awo ˆnaamweresya obhukama bhwone bhwa ebhyaro bhyone ku‑mwanya ogwoogwo. 6ˆNaamubhwira ati, “Enija okukuyaana obhukama na obhuniibhi bhwa ebhyaro bhyone, kwa okubha bhyone bhinu ꞉naayaaywe, anye wone eniyaana omuunu woonewoone unu eneenda. 7Woori, araabha ukandamya, enikuyaana bhyone bhinu.”

8Yeesu ˆnaamusubhya ati, “Jikaamirwe mu‑Bhikaame Ebhyeru ati, ‘Uramye Raatabhugenyi Nyamuwanga waawo. Umukorere emirimu omwene era.’#4:8 Ringira Orwichuko rwa Ebhiraagiro 6:13.”

9Neeya Syetaani ˆnaamusira mu‑Yerusareemu, ˆnaamwimereegusyu ku‑chisonge cha Riyekaru, ˆnaamubhwira ati, “Araabha naawe Omwana wa Nyamuwanga, ijunga ugwe aasi. 10Okubha jikaamirwe mu‑Bhikaame Ebhyeru ati,

‘Nyamuwanga kaja okuragirira bhamaraayika bhaaye bhakwangarire,

11na owuja okugwa mu‑mabhoko geebhwe,

korereki utaja okwikuujura okuguru kwawo kw‑ibhuyi.’#4:11 Ringira Ijabhuri 91:11‑12.”

12Nawe Yeesu ˆnaamusubhya ati, “Jikaamirwe rindi ati, ‘Waasiga okuregeeja Raatabhugenyi Nyamuwanga waawo.’#4:12 Ringira Orwichuko rwa Ebhiraagiro 6:16.”

13Syetaani ejire aamara okuregeeja Yeesu, ˆnaamusiga‑wo kasinjeeke korereki araabhone omwanya ogundi gwa ekisi gwa okumuregeeja.

Abhanajareeti abharema Yeesu

(Mataayo 4:12‑17, 13:52‑58; Maariko 1:14‑15, 6:1‑6)

14Neeya Yeesu ˆnaasubha mu‑mukoowa gwa Gariraaya, eejuuywega na obhuturo bhwa Mwoyo Mweru. Emisango inguru ya Yeesu, nijiswirana mu‑chaaro echo choone. 15ˆNaagenda, ˆneeyigisyaga abhaanu mu‑nju ja ameekofyanyo geebhwe.#4:15 Mu‑nju ja ameekofyanyo geebhwe. Ni inju inu Abhayawudi bhaariga nibheekofyanya inguru ya okusabhwa Nyamuwanga, okusoma Ebhikaame Ebhyeru, okwiyigisya emisango ja idiini na okuramya Nyamuwanga. Ku‑meeresyo amaafu, ringira Inju ya eriikofyanyo rya Abhayawudi mu‑Meeresyo inguru ya Emisango Emikomeeye. Abhaanu bhoone bhaamukusyaga.

16Orusuku rumwi, Yeesu ˆnaagenda iika ewaabho Najareeti, enu ꞉aakuriiye. Orusuku rwa Isabhaato#4:16 Isabhaato. Ku‑Bhayawudi ni rusuku rwa okuramya Nyamuwanga na okwisya omwoyo era. Ku‑meeresyo amaafu, ringira mu‑Meeresyo inguru ya Emisango Emikomeeye. rwejire rwakinga, ˆneengira mu‑nju ya eriikofyanyo rwa kutyo aariga anarire. ˆNeemereeguru asome omusango gwa Nyamuwanga. 17ˆNaayaanwa echitabho cha omuragi Iisaya, ˆnaachifumbura, ˆnaayenja anu akaamirwe ati,

18“Mwoyo Mweru wa Raatabhugenyi Nyamuwanga,

ari aamwi na anye.

Aansorere, nibhega nindaasisya abhataka Emisango ja Ekisi.

Aantumire ku‑bhaanu bhanu bhabhoyerwe,

okubharaasisya ati abhaja okwigurirwa,

na okubhwira abhawofu ati abhaja okurora,

na niwonʼye abhaanu bhoone bhanu abhanyaasibhwa.

19Aantumire niraasisye abhaanu ati,

omuguuga gwa obhuchungusi,

okusooka ku‑Raatabhugenyi Nyamuwanga,

nigwo gunu.”#4:19 Ringira Iisaya 61:1‑2.

20Mbe, Yeesu ejire aamara okusoma emisango ejo, ˆnaafumbika echitabho, ˆnaachisubhya ku‑mukosi wa inju ya eriikofyanyo, Yeesu ˆneenyanja korereki aambe okwiyigisya. Abhaanu bhoone mu‑nju ya eriikofyanyo omwo, bhaamuringiraga nekeneke. 21Niwo Yeesu ˆnaamba okubheeyigisya, ˆnaabhabhwiraga ati, “Ebhikaame Ebhyeru bhinu mwoongwa reero inu, bhyakuumira imbere yeemwe.”

22Yeesu ejire aamara okwiyigisya, abhaanu bhoone nibhaayika ati, “Aayika emisango ja ekisi!” Nibharuguurira muno emisango jaaye ja obhwitiriranya jinu ꞉aayikire. Nibheeya nibhabhuusyanya ati, “Angu, unu atari niwe omwana wa Jejefu?”

23Yeesu ˆnaabhabhwira ati, “Nimenyere ati omuja okumbwira orugani runu, ‘Muragusi, woori wiragure awe omwene!’ Ka wone, ‘Ebhiruguusyo bhinu ꞉choonguuwe ati waariga nuubhikora Kaperinaawumu eyo, mbe woori nuubhikore na mu‑ruguuyo rwawo anu!’”

24Yeesu ˆnaayika ati, “Ni chimari enibhabhwira ati, omuragi atakuyaanwa echibharo mu‑chaaro cha ewaabho.

25“Nawe, muntegeresye kisi! Enibhabhwira echimari ati, bhaariga bhari‑wo abhatumbagasi bhaafu mu‑chaaro cha Yisirayeeri, mu‑siku ja obhurame bhwa omuragi Yeeriya. Ku‑mwanya ogwo ingʼubha ꞉itaaguuye miguuga esatu na ameesi gataanu na kumwi, omweko mwafu muno nigwingira mu‑chaaro choone. 26Nawe, Yeeriya ꞉ataatumirwe okusakira omugasi woonewoone ku‑bhatumbagasi abho, tari ꞉aatumirwe era ku‑mutumbagasi umwi wa mu‑musi gwa Seereputa, mu‑chaaro cha Sidooni anja ya echaaro cha Yisirayeeri.#4:26 Ringira 1 Abhakama 17:9‑24.

27“Ku‑mwanya gwa omuragi Erisya, wone bhaariga bhari‑wo abhagenge bhaafu mu‑chaaro cha Yisirayeeri, nawe ꞉bhataawosiibhwe bhoone tari Naamaani era, omuunu kusooka mu‑chaaro cha Siiriya!”#4:27 Ringira 2 Abhakama 5:1‑14.

28Abhaanu bhoone bhanu bhaariga bheekumanyiisye mu‑nju ya eriikofyanyo omwo, bhejire bhoongwa emisango ja Yeesu ejo nibhabhiyirwa muno. 29Nibheemereeguru bhwangubhwangu enu bheejuuywega risungu. Nibhagenda nibhamusira anja ya omusi nibhamukuuraga, nibhamukingya ku‑bhwenenero bhwa echiima chinu omusi gwebhwe gwariga guumbakirwe‑ko, nibheendaga bhamujugune aasi eyo. 30Nawe, omwene ˆnaatura agatigati yeebhwe, ˆnaagenda jaaye.

Yeesu kaasoosya risambwa ku‑muunu

(Maariko 1:21‑28)

31Neeya Yeesu ˆnaagenda mu‑musi gwa Kaperinaawumu, mu‑mukoowa gwa Gariraaya. Orusuku rwa Isabhaato, ˆneengira mu‑nju ya eriikofyanyo rya Abhayawudi, ˆnaamba okwiyigisya abhaanu omusango gwa Nyamuwanga omwo. 32Ameeyigisyo gaaye, nigabharuguusya muno, kwa okubha emisango jaaye jaariga jiri na obhuturo.

33Mu‑nju omwo, aariga ari‑mo omuunu umwi awungirwe risambwa, ˆnaamura obhuraka, ˆnaayikaga ati, 34“Awe Yeesu wa Najareeti, owuchiyenja‑ko ki! Angu, wiijire okuchisingaarisya? Anye nikumenyere ati naawe ga, awe naawe Omweru wa Nyamuwanga.”

35Yeesu ˆnaagonya risambwa eryo, ˆnaaribhwira ati, “Jibhira! Sooka mu‑muunu unu!” Awoawo, risambwa eryo ˆnirimugwisya aasi imbere ya abhaanu abho bhoone. Ryejire ryamara okumugwisya aasi imbere ya abhaanu abho bhoone, nirimusooka‑mo okumuwutaasya wuri noorwo na akatyari.

36Abhaanu bhoone nibharuguura muno, nibhabhuusyanya ati, “Ni musango ki gunu? Mbawo kaagonya amasambwa kwa amanaga na obhuturo gasooke mu‑bhaanu, ka agamuungwa na okubhasooka‑mo!” 37Emisango ja Yeesu ejo, nijiswirana mu‑chaaro echo choone.

Yeesu kaawosya abhaanu iika ewa Simooni

(Mataayo 8:14‑17; Maariko 1:29‑34)

38Mbe, Yeesu ˆnaasooka mu‑nju ya eriikofyanyo rya Abhayawudi, ˆnaagenda ewa Simooni,#4:38 Simooni. Simooni oyo risiina ryaye erindi aatogwaga ati, Peetero. Ringira Ruuka 5:8. ˆnaasongʼana nyaabhuko Simooni arwaye, ari na omuswija mwafu. Nibhasabhwa Yeesu amuwosye.

39Niwo Yeesu ˆneemereeguru ayeeyi na nyaabhuko Simooni, ˆnaagonya omuswija ogwo gumusooke‑ko. Awoawo omugasi oyo ˆnaawora omuswija ogwo. Niwo ˆneemuka, ˆnaamba okubhafurubhendera.

40Mbe, risuubha ryejire ryatubhira, orusuku rwa Isabhaato niruyitingʼana. Abhaanu nibhareetera Yeesu abharwaye bheebhwe bhanu bhaariga bhari na amarwara ga mbaga nyafunyafu. Yeesu ˆnaatuura amabhoko gaaye ku‑bharwaye abho, ˆnaabhawosya bhoone. 41Aamwi na ejo, Yeesu ꞉aasoosiisye amasambwa okusooka mu‑bhaanu bhaafu muno, nigamwaya nigaayikaga ati, “Awe uri Mwana wa Nyamuwanga!” Nawe Yeesu ˆnaagagonya na ꞉ataagekirisisiisye okugenderera okwayika kutyo rindi, kwa okubha gaariga gamenyere ati, Yeesu niwe Kirisito.

Yeesu keeyigisya abhaanu

(Maariko 1:35‑39)

42Mwejo yende‑ko bhwejire bhwacha, Yeesu ˆnaasooka awo, ˆnaagenda orubhaara runu abhaanu bhaariga bhatari. Abhaanu bhaafu nibhamuyenjaga, bhejire bhaamubhona, nibhamuremera‑ko korereki asige okusigana nabho. 43Nawe, Yeesu ˆnaabhabhwira ati, “Neenderwe nigende mu‑misi ejindi wone, nibharaasisye Emisango ja Ekisi ja obhukama bhwa Nyamuwanga,#4:43 Obhukama bhwa Nyamuwanga. Ku‑meeresyo amaafu, ringira mu‑Meeresyo inguru ya Emisango Emikomeeye. kwa okubha ꞉naatumirwe ku‑songa eyo.”

44Niwo, Yeesu ˆnaagenderera okutura mu‑mukoowa gwa Gariraaya,#4:44 Mu‑mukoowa gwa Gariraaya. Jinyabhurira ejindi ejaayika ati, mu‑mukoowa gwa Yuudeya. ˆnaaraasisyaga abhaanu Emisango ja Ekisi ejo mu‑nju ja ameekofyanyo geebhwe.

Currently Selected:

Ruuka 4: jit

Highlight

Copy