Ruuka 3
3
Ameeyigisyo ga Yowana Omubhatiija
(Mataayo 3:1‑12; Maariko 1:1‑8; Yowana 1:19‑28)
1Ku‑muguuga gwa ekumi na etaanu gwa obhutungi bhwa Kayisaari Tibheeriyo, Pootiyo Piraato omwene, aariga ari mutungi wa Yuudeya. Yeroode Atipaasi,#3:1 Yeroode Atipaasi. Ku‑meeresyo amaafu, ringira mu‑Meeresyo inguru ya Emisango Emikomeeye. aariga ˆnaatunga Gariraaya. Owaabho unu aatogwaga Firipo, omwene aariga atungire omukoowa gwa Itureeya na ogwa Turakooniti. Risaniya, aariga ˆnaatunga omukoowa gwa Abhireene. 2Anaasi na Kayaafa, abheene nibho bhaariga bhari abhagabhisi abhakuru.#3:2 Abhagabhisi abhakuru. Ku‑meeresyo amaafu, ringira Abhagabhisi mu‑Meeresyo inguru ya Emisango Emikomeeye.
Ku‑muguuga ogwo, Yowana omwana wa Jaakariya, aariga ari ibhara. Mbe, ibhara eyo, Nyamuwanga ˆnaamuyaana omusango. 3Yowana ˆneeyinda echaaro choone cha ku‑ngego ya ku‑musima gwa Yorodaani enu ˆnaaraasyaga omusango. Aariga ˆnaabhwira abhaanu ati, “Mute ebhibhiibhi bhyemwe ku‑Nyamuwanga mubhatiijibhwe, korereki abhafwire echigongo ebhibhiibhi bhyemwe!” 4Rwa kutyo jikaamirwe mu‑chitabho cha omuragi Iisaya ati,
“Obhuraka bhwa omuunu unu kaabhirikira mw‑ibhara ati,
‘Muchumachumire Raatabhugenyi injira,
mwimye anu kaja okutura.
5Amateka goone gasiikirwe,
ebhiima na otwima bhyone bhinyaraganyibhwe,
anu ekiikire emibhwe, anu kaayaraata atereresibhwe,
6niwo abhaanu bhoone bharirora obhuchungusi okusooka ku‑Nyamuwanga.’”#3:6 Ringira Iisaya 40:3‑5.
7Yowana aabhwiraga abhaanu bhanu bhaamujaaga‑ko abhabhatiije, ˆnaayikaga ati, “Emwe orwibhuro rwa jinjoka! Niga unu ꞉aabhabhwiriiye ati, omutura okwikenga indamu ya Nyamuwanga inu iriija, kwa okubhatiijibhwa era? 8Mbe, mukore ebhikorwa bhinu ebhyeresya ati, chimari mwata ebhibhiibhi bhyemwe ku‑Nyamuwanga. Mwasiga okwitogera ati, Nyamuwanga aribheekirisya, kwa okubha omwikumangya ati, ‘Eswe chiri rwibhuro rwa Bhurayimu!’ Enibhabhwira ati, Nyamuwanga kaatura okuyindura amabhuyi ganu okubha abhaana bha Bhurayimu! 9Woori indamu ya Nyamuwanga iri inguru yeemwe rwa imbasa inu iteeywe ku‑masina ga amati. Abhaanu bhanu bhatakukora ebhikorwa bhya ekisi bhariramurwa, rwa kutyo bhuri riiti rinu ritakutwasya amatwasyo ga ekisi eritemwa na okweswa mu‑muriro.”
10Abhaanu bhanu bhaariga bheekumanyiisye ku‑ngego ya ku‑musima ogwo, nibhabhuusya Yowana ati, “Mbe, woori chikore kutiki?” 11Omwene ˆnaabhasubhya ati, “Omuunu akabha ari na emyenda ebhiri, agabhire‑ko omuunu unu atari nagwo. Omuunu akabha ari na ebhiryo, wone agabhire‑ko abha omweko.”
12Abhatobhesya bha rigooti#3:12 Abhatobhesya bha rigooti. Ku‑meeresyo amaafu, ringira mu‑Meeresyo inguru ya Emisango Emikomeeye. wone nibhamuuja‑ko, nibheenda abhabhatiije. Nibhamubhuusya ati, “Omwiyigisya, angu, eswe wone chikore kutiki?” 13ˆNaabhasubhya ati, “Mukatobhesya rigooti, musige okusaagirisya indengo inu yeenderwe.”
14Abhasirikare wone nibhamubhuusya ati, “Ka eswe chikore kutiki?” Omwene ˆnaabhasubhya ati, “Musige okuteesya omuunu ebhiinu bhyaye, musige okubheeyeresya omuunu, tari mwiywega na emiyeero jinu omuramira.”
15Mu‑siku ejo, abhaanu bhaariga bhari na obhwiyikanyo bhunene, nibheebhuusyaga mu‑mitima jeebhwe araabha Yowana niwe Kirisito. 16Nawe Yowana ˆnaabhasubhya ati, “Chimari anye enibhabhatiija mu‑manji era. Nawe ariija omuunu owundi owa obhuturo okunkira. Anye niteeyire noorwo okusuruumura jingoye ja ebhiraato bhyaye.#3:16a Okusuruumura jingoye ja ebhiraato bhyaye. Mu‑siku jirya, omurimu gwa okusuruumura jingoye ja ebhiraato bhya abhagenyi gwariga nigukorwa na abhagaya bha emwaro muno. Omwene aribhabhatiija kwa Mwoyo Mweru na kwa omuriro okwesya#3:16b Okwesya. Ku‑meeresyo amaafu, ringira mu‑Meeresyo inguru ya Emisango Emikomeeye. emitima jeemwe rwa kutyo omuriro ogwesya ebhyuma. 17Agwatiriiye oruwungo mu‑ngaro jaaye, keenda okuwungura obhuro. Obhuro bhwa ekisi aribhubhiika mu‑chitara chaaye, nawe amakumbi arigoocha mu‑muriro gunu gutarisima.”
18Yowana aabhabhwiraga emisango ejindi myafu, ˆnaabhagaanyaga okukora ebhibhiibhi na okubhakomeeresya muno, enu ˆnaabharaasisyaga Emisango ja Ekisi ja Nyamuwanga.
19Niwo Yowana ˆnaagonya omukama Yeroode Atipaasi, kwa okubha Yeroode ꞉aagegere Yerodiya, omugasi wa owaabho, ˆnaamutwara. Yowana ˆnaamugonya ku‑musango ogwo na ku‑mabhiibhi agandi goone ganu aariga ˆnaakora. 20Niwo, Yeroode ˆneeyongesisya amabhiibhi gaaye kwa okubhoya Yowana mw‑ibhoyero.
Yeesu kaabhatiijibhwa
(Mataayo 3:13‑17; Maariko 1:9‑11)
21Omwanya gunu abhaanu bhoone bhaamarire okubhatiijibhwa, Yeesu wone ˆnaabhatiijibhwa. Omwanya gunu aariga ˆnaasabhwa, orwire nirwiguka, 22Mwoyo Mweru ˆneeka inguru yaaye rwa echiguuti, obhuraka nibhusooka mu‑rwire, nibhwayika ati, “Awe naawe Omwana waani omwendwa!#3:22 Omwana waani omwendwa. Ku‑meeresyo amaafu, ringira Omwana wa Nyamuwanga mu‑Meeresyo inguru ya Emisango Emikomeeye. Naawe owunkondisya!”
Oruganda rwa Yeesu Kirisito
(Mataayo 1:1‑17)
23Omwanya gunu Yeesu ꞉aambire emirimu jaaye ja okuraasya omusango, aariga ari na miguuga wuti makumi gasatu kutya. Abhaanu bhaariga nibheetogera ati aariga ari mwana wa Jejefu.
Jejefu wa Yeeri.
24Yeeri wa Mataati.
Mataati wa Raawi.
Raawi wa Meeriki.
Meeriki wa Yaana.
Yaana wa Jejefu.
25Jejefu wa Mataatiya.
Mataatiya wa Amoosi.
Amoosi wa Naawumu.
Naawumu wa Ejiri.
Ejiri wa Nagayi.
26Nagayi wa Maati.
Maati wa Mataatiya.
Mataatiya wa Seemeyi.
Seemeyi wa Yoseki.
Yoseki wa Yooda.
27Yooda wa Yowanani.
Yowanani wa Reesa.
Reesa wa Jerubhabheeri.
Jerubhabheeri wa Syeratiyeeri.
Syeratiyeeri wa Neeri.
28Neeri wa Meeriki.
Meeriki wa Aadi.
Aadi wa Koosamu.
Koosamu wa Erimaadamu.
Erimaadamu wa Eeri.
29Eeri wa Yooswa.
Yooswa wa Eriyejeeri.
Eriyejeeri wa Yoorimu.
Yoorimu wa Mataati.
Mataati wa Raawi.
30Raawi wa Simiyooni.
Simiyooni wa Yuuda.
Yuuda wa Jejefu.
Jejefu wa Yonaamu.
Yonaamu wa Eriyaakimu.
31Eriyaakimu wa Mereya.
Mereya wa Meena.
Meena wa Matata.
Matata wa Naasani.
Naasani wa Dawudi.
32Dawudi wa Yeese.
Yeese wa Obheedi.
Obheedi wa Bhoowaaji.
Bhoowaaji wa Sarumooni.
Sarumooni wa Nasyoni.
33Nasyoni wa Aminadaabhu.
Aminadaabhu wa Adimiini.
Adimiini wa Ariini.
Ariini wa Ejirooni.
Ejirooni wa Pereesi.
Pereesi wa Yuuda.
34Yuuda wa Yakobho.
Yakobho wa Isaaka.
Isaaka wa Bhurayimu.
Bhurayimu wa Teera.
Teera wa Nawoori.
35Nawoori wa Serugi.
Serugi wa Ragawu.
Ragawu wa Pereegi.
Pereegi wa Ebheeri.
Ebheeri wa Syera.
36Syera wa Kenaani.
Kenaani wa Arufwakisadi.
Arufwakisadi wa Syemu.
Syemu wa Nuuwu.
Nuuwu wa Raameki.
37Raameki wa Meetuseera.
Meetuseera wa Enooke.
Enooke wa Yareedi.
Yareedi wa Mayarareeri.
Mayarareeri wa Kenaani.
38Kenaani wa Enoosi.
Enoosi wa Seeti.
Seeti wa Adaamu.
Adaamu wa Nyamuwanga.
Currently Selected:
Ruuka 3: jit
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
