YouVersion Logo
Search Icon

Mak 16

16
A Iesu ithal ml arna m'ienen
(Matiu 28:1-8; Luk 24:1-12; Sun 20:1-10)
1Naran Sapat itsiv' sera nut, hin a Meri iv'i tav'et a Maktala, m'ei a Meri iv'i a unian a Sim'is, m'ei a Salum'i, avul ueil kinkin m'in ip'as, a ti apavrav'a kavvei ani. 2Laha, arna Sadi m'etav'aran nrnren avrama asn navap, naran neiel itpeia ser. 3Laha, avvrvr a hir, kavvr ti a, “?Hin ak ipatp'la nav'et itukar karliu asnd ipam'lm'li kadav'a au?” 4V'eti naran avklau, avla ti nav'et itm'lm'li katama au, v'eti nav'et lera ilil ihuadau. 5Laha, naran avrav'a al navap, avla malakal iamk, klusan ip'arei katva, ilak arna m'ldaun, laha avrdus nlr ani.
6V'eti hin ivr anr, kavr ti a, “Mavdedrn. Kam'i kvtala an a Iesu, iv'i Dui a Nasaret, la ataui arna su lamu ha. Hin itthal ml, ialak ml atlaha. Pavla nut ataui.” 7#Mat 26:32; Mak 14:28.“V'eti kam'i pavrav'a kavvr anr m'ertuan udlani, kavvr an a P'ita a ti Hin ittauamu a Kalili. Kam'i pavlei arna nut lera, ipanep'a nut itvr sarei a kam'i inap'ei.”
8Laha, avruh kavln navap ilahml sarei, sena ti avrdus nlr kavvrdedrn istudau. Hir ahavvr si kinkin anr m'ertu kinkin, sena ti avdedrn.
A Meri a Maktala ilei a Iesu la itthal ml ra
(Matiu 28:9,10; Sun 20:11-18)
9Naran a Iesu ithal ml m'etav'aran nrnren arna Sadi, iv'iv'en Hin itauamu an a Meri, iv'i tav'et a Maktala, la itsran sera m'im'iln stu isaru aranan ha. 10Sarei, hin iv'a kavrp'ep'ei anr m'ertu udlani, avlak m'ei a Iesu tituei, naran hir avlak kavrn istu ihuadau kavtakal. 11V'eti naran avrn ti a Iesu isilv', kavrn ti a Meri itla sarei, ahavv'ahi.
A Iesu iv'iv'en Hin anr m'ertuan iru
(Luk 24:13-35)
12Itauatah a si lera, a Iesu iv'iv'en Hin anr hir kinkin arru, inep'a ti iv'i m'ertu uraur, naran avv'el arna navanel kavrav'a arna v'anu uraur. 13Laha, dui arru lera arv'a karvrp'ep'ei anr m'ertuan uraur, v'eti ahavv'ahr ml.
A Iesu itep'a m'ertuan a ti apavrav'a arna nut udlani kavvrp'ep'a v'nen p'asan
(Matiu 28:16-20; Luk 24:36-49; Sun 20:19-23; Parei 1:6-8)
14Sarei, a Iesu iv'iv'en Hin anr m'ertuan arnal lman iamk (12) naran avlak kavhatat, kav'ana hua m'er, kavr ti ahavv'ahi, nlr ihua ihuadau, sena ti ahavv'ah v'nenar m'ertu avlei, naran itthal ml. 15#Parei 1:8.Laha, ivr anr, kavr ti a, “Kam'i pavrav'a arna nut udlani arna nadep', kavvrp'ep'a v'nen p'as anr m'ertu udlani. 16M'ertu ipav'ah v'nen p'as kapaptais, Atua ipalev'lei arna si stuan, v'eti m'ertu iav'ah v'nen pas, Atua iputakm ani ipamln. 17M'ertu apavv'ah Kana, apavla pari lilil laha. Apavsran m'im'iln stu arna nahak, apavv'ana arna v'nen uraur. 18Apavuada nmat. Ipavr ti apavm'n naui stu, ikautakm anr. Apavtu lm'ar aranar m'ertu avm'at apavrv'i ml.”
A Iesu iv'a eia kalak arna m'ldaun Atua
(Luk 24:50-53; Parei 1:9-11)
19 # Parei 1:9-11. Sarei, naran a Mlin Lilad itv'ana sarei m'er, Atua ilav'i iv'a eia kalak arna m'ldaun. 20Laha, avv'el kavrav'a kavvrp'ep'a v'nen p'as arna nut udlani. A Mlin Lilad ip'lt m'er arna pariar, kani ti v'nen p'as ip'tir sena ti itup'lten pari lilil m'a v'nenar. Amen.

Currently Selected:

Mak 16: nmb

Highlight

Share

Copy

None

Want to have your highlights saved across all your devices? Sign up or sign in