Mak 15

A Iesu ip'tir arna nahn a Pailat

(Matiu 27:1-2; 27:11-14; Luk 23:1-5; Sun 18:28-38)

1Arna m'etav'aran nrnren uaki, arpris lil avp'lt m'er elta, tisa na v'nen hua, m'er M'ertu udlani avlak arna Kaunsel kavvrur sei apavani, kavhau a Iesu kavlav'i kavtaui al lm'an a Pailat. 2Laha, a Pailat imiman ani, kavr ti a, “?Nakm kv'i Mlin Lilar m'ertu a Isrel?”

A Iesu ivrprani, kavr ti a, “Inep'a nut kvri inap'ei.”

3Sarei, arpris lil avvrp'ep'a si stu istudau kavvr ti iani, v'eti a Iesu iavrpren si kinkin. 4A Pailat imiman ani ml, kavr ti a, ?“Nakm kaavrpren si kinkin anr? Parn, avvrp'lah istudau kavvrp'ep'a si stuam istudau.” 5V'eti a Iesu iavrpren si kinkin ml, kani ti a Pailat itah ani istudau.

A Iesu ilev' m'lnen a Parapas

(Matiu 27:15-26; Luk 23:13-25; Sun 18:39-40; 19:1-16)

6Arna tim'ah na Pasuva avsapa p'klr iamk, iv'i ti a Pailat ipam'ahu a ti m'ertu ipamk hir apavvri, iparuh al p'resin. 7Ardu kinkin avlak al p'resin, sena ti avp'tir kavmlen kavman, kavrpep'n m'ertu. Hir ki iamk iv'i a Parapas. 8Laha, nelnal avv'ara eia kavmimandinei an a Pailat a ti ipani asnr ipanep'a nut iani inap'ei nakl. 9V'eti a Pailat ivrpranr kavr ti a, “?Kvrn ti p'emahu a ti Mlin Lilar M'ertu a Isrel ipama asnm'i?” 10Sena ti irndu ti arpris lil avtau a Iesu al lm'an sena ti nlr ipri.

11V'eti arpris lil avtp' nelnal a ti apavvr ti ipam'ahu an a Parapas asnr. 12Sarei, a Pailat ivrpranr ml, kavr ti a, “?Kam'i kvrn ti p'en v'ata a dui kvvr ti iv'i Mlin Lilar m'ertu a Isrel?”

13Laha, hir avv'ara eia ml, kavvr ti a, “Pataui arna su lamu.”

14A Pailat ivr anr, kavr ti a, “?Inap'i? ?Hin ien si stu v'ata?” V'eti hir avv'ara eia mau, kavvr ti a, “Pataui arna su lamu.”

15Sarei, a Pailat irn ti ipani ti apavrn ipap'as, laha, kam'ahu an a Parapas asnr, kavr anr arm'rnuran a ti apavrp a Iesu a nahau, sarei, kataui al lm'ar a ti apavtaui arna su lamu.

Arm'rnur avsip'len a Iesu

(Matiu 27:27-31; Sun 19:2,3)

16Laha, m'rnur avlev' a Iesu kavuirv'a al naml a utan a Pailat. Naha naml lera iv'i Praituriam. Laha, kavv'ara a m'rnur udlani a ti apavp'lt. 17Kavtu klus m'ielm't ani, kavv'et makau kinkin lun iak ima kanep'a manuan a mlin, kavtaui arna ptn. 18Kavvr ip'as ani kavvr ti a, “Ip'as, Mlin Lilar m'ertu a Isrel.” 19Kavlev' napilakt kavrp ptn kavtup'ai kavsisihpu asnn kavpatei. 20Laha, naran atvsip'len sarei, avhsla klus m'ielm't aranan, kavtum'alet a klusan ml kavlav'i kavv'av'ei a ti apavtaui arna su lamu.

A Mlin Lil ilal arna su lamu

(Matiu 27:32-44; Luk 23:26-43; Sun 19:17-27)

21 # Rum 16:13. Arna navanel avla dui a Sairini iamk, nahan iv'i a Saimun. Hin iv'i a tetiar Aleksanta m'ei a Ruvas, irn ti ipav'a arna v'anu lil. Laha, avtp'i a ti ipaua su lamu nen a Iesu. 22Laha, avv'av'ei kavuirv'a arna nut iamk, nahan iv'i Kulkuta. Naha lera avavi kavr ti iv'i nut na su pt m'ertu. 23Sarei, avtu naui m'iel ani avuhei m'a m'erasin kinkin, nahan iv'i mir, v'eti a Iesu iarn ti ipam'ni. 24#Npin 22:18.Laha, naran atvlua sarei arna su lamu, avtupapr klusan udlani, kavan hlhal sanan a ti apavrndu ti hin ak ipaua klus v'ata.

25M'etav'aran, arna m'etaneiel isav'et, avluei arna su lamu. 26Kavulul a v'nen iv'iv'en sei avluei sanan, kavtaui arna su lamu, ivr ti a, “Mlin Lilar m'ertu a Isrel.” 27#Aisaia 53:12.Kavlua m'ertu na v'nv'nahien arru m'ei, arna su lamu, tv'aln arna m'ldaun, tv'aln arna m'ir nen. 28Si lera itu hin inep'a nut Paivul ivri inap'ei, kavr ti a, “Avspani m'er m'ertu avluvn a v'nen hua.”

29 # Npin 22:7; 109:25; Mak 14:58; Sun 2:19. Laha, m'ertu avv'siau asnn kavsip'lani, kavvividen ptr, kavvr ti a, “Ua, Nakm la pakapr nmah tamat kahluri ml arna napn Ipatl ha, 30Nakm palev'lah kasisi arna su lamu.”

31Arpris lil m'er tisa na v'nen hua avvrvr a hir, kavsip'lani inap'i lera, kavvr ti a, “Hin ilev'la m'ertu uraur arna derar, v'eti ikalev'la Hin. 32Ip'as a ti a Kristu, iv'i Mlin Lil a Isrel, ipasisi arna su lamu a ti p'vlei kavv'ahi.”

Laha, hir, la aluar m'ei a Iesu arna su lamu ha, arsip'lani.

A Iesu im'a arna su lamu

(Matiu 27:45-56; Luk 23:44-49; Sun 19:28-30)

33Lihalm'au, nut ilihat arna nadep' udlani dav'a ier m'etaneiel itl. 34#Npin 22:1.Laha, arna m'etaneiel itl, a Iesu iv'ara eia kavr ti a, “?Elui, Elui, lama sapahtani?” V'nen lera avavi, ivr ti a, “?Atuak, Atuak, kln Kana sena v'ata?”

35Naran m'ertu kinkin avp'tir atlera avrn si lera, avvr ti a, “Pavrni, iv'ara an a Ilaitsa.” 36#Npin 69:21.Laha, m'ertu iamk ivrvr kalev' kalik iamk, kavdai a naui m'iel ihaau, kataui arna nai iamk, katau an a Iesu a ti ipam'ni, kavr ti a, “P'vtrahi, kavla ti a Ilaitsa ipama kalev'lei, v'aha ikahei.”

37Laha, a Iesu iv'ara eia kadam'a.

38 # Avruh 26:31-33. Laha, kalik itukar nutetan Atua al nmah tamat iapr hin iru, dan dan eia ier a nadep'. 39Naran mlin lilar m'rnur, la ip'tir arna nahn a Iesu ha, irn nut iv'ara eia inap'ei, kala nut im'a inap'ei, ivr ti a, “Nvrdaui, Aulaha iv'i a Natn Atua.”

40 # Luk 8:2,3. Tav'et kinkin ml avlak au, kavlei. Hir kinkin avv'i a Meri, iv'i tav'et a Maktala, m'ei a Meri uraur ml, iv'i a unian a Sim'is Pa m'ei a Suses, m'ei a Salum'i. 41Hir avsapei a Iesu naran ilak a Kalili, kavmhmah ani. Tav'et uraur avstudau, la avrav'a m'ei a Serusalem ha, avlak m'er.

Atin a Iesu al navapan a Susev'

(Matiu 27:57-61; Luk 23:30-56; Sun 19:38-42)

42Laha, nut pa ti neiel ipatpl, iv'i napn avandedp' a si udlani sena ti m'ih nen ipav'i Sapat. 43Laha, dui iamk, nahan iv'i a Susev', iv'i dui Arimatia, iv'a asn a Pailat. Aulera iv'i dui lil arna Kaunsel katrah v'anuan Atua. Iadedrn a nahn a Pailat, v'eti iv'a asnn, kamiman p'akn a Iesu. 44A Pailat itah ani naran irn ti a Iesu itam'a sarei. Laha, kav'ara a mlinar m'rnur kamiman ani ti itam'a sarei hatuei, v'aha idahei. 45Naran a Pailat irni asn mlinar m'rnur a ti itam'a sarei, im'ahu a p'akn a Iesu an a Susev'. 46Laha, a Susev' iul kalik p'as kinkin kadav'a kalev'la p'akn arna su lamu, kanpakari a kalik nen, kataui al navap iamk atri ima kav'i nut atu m'ertu im'a. Laha, katp' nav'et lil iamk im'lm'li kap'leskar liu na navap. 47A Meri, iv'i tav'et a Maktala, m'ei a Meri, iv'i a unian a Suses arla nut ataui.

Currently Selected:

Mak 15: nmb

Highlight

Copy