Mak 14

M'ertu lil a Isrel avvrur navanel a ti apavrpep'n a Iesu

(Matiu 26:1-5; Luk 22:1,2; Sun 11:45-53)

1 # Avruh 12:1-27. Napn iru ipav'siau ipav'i tim'ah na Pasuva m'a Tim'ah na P'ret Iis nen Ihei. Laha, arpris lil m'er tisa na v'nen hua avtala a navanel a ti apavuadei a Iesu arna navanel m'ertu akavrndaui, kavrpep'ni. 2V'eti avvr ti a, “Nkavani arna napn na tim'ah, imahei ti m'ertu apavan der ipastudau sanan.”

Tav'et iamk ihsran sida p'as arna ptn a Iesu

(Matiu 26:6-13; Sun 12:1-8)

3 # Luk 7:37,38. A Iesu ilak a nut iamk, nahan iv'i P'etani al nmahan a Saimun, iv'i dui iamk la lep'ersi itua sarei tituei ha. Naran ilak kahatat, tav'et iamk ima asnn, kaua putel iamk aani arna nav'et, naha nav'et lera iv'i alapasta. Putel lera ilini a ueil p'as, m'in ip'eset, nahan iv'i nat, ulien nen ilil istudau. Laha, kaprus pn putel kahsrani arna ptn. 4V'eti m'ertu kinkin avlak atlera, nlr irer sanan, kavvrvr a hir, kavvr ti a, “?Inap'i hin iutakm a ueil inap'i lera? 5Sena ti advr ti imulul ani, imlev' 300,000 vatu aranan, laha imrndu ti imtau anr m'ertu siar ihei.” Laha, avv'ana hua m'ei.

6V'eti a Iesu ivr ti a, “Pavlni. ?Inap'i hin kvutakm ani? Hin ien si p'as a Kana. 7#TVH 15:11.M'ertu siar ihei apavlak asnm'i nakl. Naran pavrni, pavan si p'as anr, v'eti Kana nkalak asnm'i ikel. 8Hin ien sei irndu ti ipani. Itu ueil arna p'akk itauamu a ti apatin Kana. 9Nvrdaui, nvr a kam'i, arna nut udlani arna nadep' apavrp'ep'a v'nen p'as aranan, apav'ah tav'et lera kavrur sei hin iani.”

A Sutas ituran a ti ipatau a Iesu al lm'ar m'ertu avlep'lei

(Matiu 26:14-16; Luk 22:3-6)

10Laha, lman iru (12) nen, nahan iv'i a Sutas Iskariut, iv'a asnr arpris lil a ti ipatau a Iesu al lm'ar. 11Naran hir avrn v'nenan, avrn ip'as kavturan ani a ti apavtu nav'et ani. Laha, hin itala a navanel a ti ipataui al lm'ar.

A Iesu m'er m'ertuan avhan tim'ah na Pasuva

(Matiu 26:17-25; Luk 22:7-14; 22:21-23; Sun 13:21-30)

12Dav'a ier napn itauamu na Tim'ah na P'ret Iis nen Ihei. Arna napn lera, avrp sivsiv sena tim'ah na Pasuva. Laha, arm'ertuan avvr ani, kavvr ti a, “?Krn ti p'vrav'a ip'i kavandedp' si udlani a ti p'vhan Pasuva?”

13Laha, itep'a m'ertuan arru, kavr anr kavr ti a, “Parv'a arna v'anu, laha, karla dui iamk iev' nauei al putel, karsapei. 14Naran ipav'a eim, parvr a mlin na nmah karvr ti a, Tisa ivr ti a, ‘?Nut Kana p'ehan Pasuva m'er m'ertuak hini?’ 15Laha, hin ipav'iv'en nut lil ipamk arna tv'el hatahat na nmah eia. Aten mamh sera si udlani itater. Arna nut lera parandedp' tim'ah nad.”

16Arm'ertuan la arru hara arv'a arna v'anu karla ti si udlani ittu sera hin inep'a nut ivr anr inap'ei. Laha, arandedp' Pasuva.

17Lihat lera Hin ima m'er m'ertuan arnal lman iru. 18#Npin 41:9.Laha, naran avlak asn tiv' kavhatat, a Iesu ivr ti a, “Nvrdaui, nvr a kam'i, kam'i ki ipamk ipatu Kana al lm'ar m'ertu avlep'la Kana.”

19Laha, avrama kavrn istu, kavmimanp'sev' ani, kavvr ti a, “?Hin ak? ?Iv'i kana?” Laha, teruraur ivr ti a, “?Iv'i kana?”

20Ivrpranr kavr ti a, “Iv'i lman iru nam'i la ipadi p'ret al dis iamk m'a Kana ha. 21Kana, nv'i Net M'ertu, p'am'a ipanep'a nut Paivul ivri inap'ei, v'eti usa, nrn istu a m'ertu, la ipatu Kana, nv'i Net M'ertu, al lm'ar m'ertu avlep'la Kana ha. Ip'as mau a ti imahiak naran kinkin.”

A Iesu ien tim'ah lil

(Matiu 26:26-30; Luk 22:15-20; 1 Kurin 11:23-25)

22Laha, naran avhatat, a Iesu ilev' p'ret kavr ip'as ani asn Atua, kakausi katau anr, kavr ti a, “Pavlav'i kavhani, si laha iv'i p'akk.”

23Sarei, ilev' panikin, kavr ip'as ani asn Atua, katau anr, laha hir udlani avm'nm'n a nln. 24#Avruh 24:8; Seremaia 31:31-34.Laha, ivr anr kavr ti a, “Si laha iv'i dik na turanien m'dah, la ipararev' sena m'ertu istudau ha.” 25Nvrdaui, nvr a kam'i, “Kana nkam'n ui nava nahau ml ipaier naran p'em'n term'dah arna v'anuan Atua.”

26Laha, avhai a npin iamk kavrav'a eia arna Ptha na Nai iv'i Uliv.

A Iesu ivr ti a P'ita ipap'ep'ni

(Matiu 26:31-35; Luk 22:31-34; Sun 13:36-38)

27 # Sek 13:7. Laha, a Iesu ivr anr, kavr ti a, “Dika lihat, kam'i udlani pavrars arna v'ahienam'i sena Kana, sena ti Paivul ivr ti a, ‘P'erp dui ip'aur sivsiv, sivsiv udlani apavamkma.’

28 # Mat 28:16. V'eti naran p'ethal ml, p'etauamu a kam'i a Kalili.”

29V'eti a P'ita ivr ani, kavr ti a, “Ipavr ti m'ertu udlani apavrars arna v'ahienar, v'eti kana ikahei.”

30A Iesu ivr ani, kavr ti a, “Nvrdaui nvr anh, dika lihat uaki naran ntu idatiter ipav'aru, nakm pavri ipav'atl, kavr ti kaarndu Kana.”

31V'eti ivri ihua mau, kavr ti a, “Ipavr ti nkam'a m'ah pr, nkavr ti narndauh naran kinkin.” Hir udlani avvri inap'i lera.

A Iesu itu tamat arna nut a Ketsemani

(Matiu 26:36-46; Luk 22:39-46)

32Laha, avrama a nut iamk, nahan iv'i Ketsemani. Sarei, ivr anr m'ertuan, kavr ti a, “Pavlak dei atlera, Kana p'etu tamat lei.” 33Laha, ilev' a P'ita, a Sim'is m'ei a Sun, avsapei. Laha, irn istu istudau, v'ahienan ima kadadv ihuadau. 34Kavr anr kavr ti a, “Nlk irn istu istudau inep'a ti p'ama. Kam'i pavlak dei uam, kavrasp'.”

35Laha, iv'el isusupa kasisihpu kadars a nadep' katu tamat, kavr ti a, ipavr ti navanel ipaiak, si ihua na naran lera imaiari. 36Kavr ti a, “Apa, Tatei, Nakm krndu ti pan si udlani. Palev'la panikin laha asnk, v'eti narn ti ipanep'a nut Kana nrni inap'ei, v'eti ipanep'a nut Nakm krni inap'ei.”

37Sarei, imam'alet ml asnr kala ti avm'atr, kavr an a P'ita, kavr ti a, “?Saimun, nakm km'atr? Kaarndu ti pasp' arna m'etaneiel ipamk uaki? 38Pavrasp' kavtu tamat, imahei si kinkin ipandina kam'i. Nvrdaui, v'ahienam'i ihua, v'eti p'akm'i iahua.”

39Sarei, iv'a ml katu tamat kavr v'nen ml ivri itauamu. 40Laha, im'alet ml asnr, kala ti avm'atr ml, sena ti m'atar idv. Ahavrndu nut apavvrprani ml ipanap'ei.

41Iv'a kam'alet ml iv'i v'atl nen, kavr anr, kavr ti a, “?Hilaha kvm'atr kavrnrn kam'i uam? Ima ra. Pavlei, naran nen itama sarei ti apavtu Kana, nv'i Net M'ertu, al lm'ar m'ertu stu. 42Pavthal, p'vv'el. Pavlei, dui ipatu Kana al lm'ar m'ertu stu itmima.”

A Sutas itau a Iesu al lm'ar m'ertu avlep'lei

(Matiu 26:47-56; Luk 22:47-53; Sun 18:3-12)

43Naran a Iesu idv'ana uam, a Sutas, la iv'i lman iru (12) na m'ertuan ha, ima ilahml m'er m'ertu avstudau avua tali lil m'a niam. M'ertu lera avandan asnr arpris lil, m'er tisa na v'nen hua, m'er eltar m'ertu a Isrel. 44Au la itau a Iesu al lm'ar m'ertu avlep'lei ra, ittu sera v'nen anr, kavr ti a, “Dui la p'evr ip'as ani kasm pla nahn ha, Hin ra. Kam'i pavlav'i, kavuada mamahi, kavv'el.”

45Iv'amk m'a ti a Sutas ima, iv'a asn a Iesu, kavr ti a, “!Tisa, Tisa!” kasm pla nahn.

46Laha, avuadei kavlav'i. 47V'eti hir kinkin iamk ip'tir mima asnn irv'la tali lilan katr dui na m'akarienan a pris lil, katrus drlnan.

48Laha, a Iesu ivr anr, kavr ti a, “?Inap'i hin kvua tali lil m'a niam a ti pavlev' Kana? Kam'i kvv'ah ti nv'i dui na v'nv'nahien? 49#Luk 19:47; 21:37.Iel iel nlak m'a kam'i al nmah tamat kav'iv'en sei a kam'i nakl, v'eti kam'i kaavuada Kana. V'eti si lera iktu hin pr, sena ti Paivul ivri.”

50Arna naran nen m'ertuan udlani avruh asnn.

Malakal iamk imalmal karuh

51Malakal iamk isapei, iparpar uaki. Laha, malakal kinkin uraur avuadei. 52V'eti hin ilnp'la parparan kamalmal karuh asnr.

A Iesu ip'tir arna nah Kaunsel

(Matiu 26:57-68; Luk 22:54-55; 22:63-71; Sun 18:13-14; 18:19-24)

53Laha, avlev' a Iesu kavuirv'a asn pris lil. Arpris lil uraur, m'er eltar a Isrel m'er tisa na v'nen hua avp'lt asnn. 54A P'ita itauatah anr, v'eti iamima asnr, kadav'a al naml na nmaha pris lil, kadama kalak m'er dui na m'akarienan kavtela nep'v'en.

55Laha, pris lil m'er m'ertu udlani avlak arna Kaunsel avtala a m'ertu kinkin ipavrp'lei a Iesu a ti apavrpep'ni sanan, v'eti ahavpasla m'ertu kinkin. 56Sena ti m'ertu istudau avvrp'lei kavhap'il, v'eti v'nenar iahamk nakl.

57Laha, m'ertu kinkin avp'tir kavvrp'lei kavhap'il kavvr ti a, 58#Sun 2:19.“Kam'em' nvrn ti Aulera ivr ti a, ‘Kana p'utakm a nmah tamat laha, m'ertu avani a lm'ar uaki, sarei arna nitla napn p'ehl teruraur ml, v'eti m'ertu akavani a lm'ar.’ ” 59Avvri inap'i lera, v'eti v'nenar ianap'amk.

60Laha, pris lil ip'tir arna p't nut nar, kamiman an a Iesu, kavr ti a, “?Kaavrpren si kinkin? ?Hir avvrp'lah arna v'ata?” 61V'eti a Iesu ip'n Hin, iavrpren si kinkin.

Sarei, pris lil imiman ani ml, kavr ti a, “?Nakm kv'i a Kristu, iv'i a Natn Atua la nvpatei ha?”

62 # Taniel 7:13. A Iesu ivr ti a, “Aau, Kana ra. Laha, ‘kam'i pavla Kana, nv'i Net M'ertu p'elak arna m'ldaun Atua, la nut huan ilil ha, kadama ml arna p'knaran eia.’ ”

63Sarei, pris lil iapr klusan, kavr ti a, “?P'vrn m'ertu uraur ml apavvrur sei iani sena v'ata? 64#Livai 24:16.Kam'i ktvrn sera ti isip'len Atua. ?Kvv'ah v'ata?”

Laha, hir udlani avvr ti iviviln a ti ipam'a.

65Sarei, m'ertu kinkin avviri nahn kavuakar m'aten, kavthi, kavvr ani, kavvr ti a, “?Pavrp'ep'ei, hin ak irph?” Laha, hir kinkin avusei a m'e lm'ar.

A P'ita ip'ep'n a Iesu katakal istudau sanan

(Matiu 26:69-75; Luk 22:56-62; Sun 18:15-18; 18:25-27)

66A P'ita ilak auei al naml na nmah. Laha, tav'et na m'akarienan a pris lil ima. 67Naran ila ti a P'ita itela nap', ip'ei kavr ti a, “Nakm klak m'ei a Iesu, iv'i dui a Nasaret.”

68V'eti a P'ita ip'ep'ni, kavr ti a, “Kana narndaui, narndu sei kvri.” Laha, kav'el kadav'a a pn liu. Sarei, ntup'el ititer.

69V'eti tav'et nen ilei ml, kavr anr nelnal avp'tir atlera, kavr ti a, “Aulera iv'i hir ki iamk.” 70Laha, a P'ita ip'ep'ni ml.

Iap'arei, m'ertu avp'tir mima atlera avvr an a P'ita ml, kavvr ti a, “Nvvrdaui, nakm kv'i hir ki iamk kav'i dui a Kalili, sena ti v'nenam iv'iv'ani.”

71V'eti a P'ita iah lm'an, kavrp'ep'ei ihua, kavr ti a, “Kana narndu Dui lera kam'i kvvruri ra.”

72Sarei, ntup'el ititer ml iv'i v'aru nen. Laha, a P'ita iv'ahur v'nen a Iesu ivr ani, kavr ti a, “Naran ntup'el ikdatiter ipav'aru, nakm pap'ep'n Kana ipav'atl.” Naran hin iv'ahur v'nen lera itakal.

Currently Selected:

Mak 14: nmb

Highlight

Copy