Ap'u 27

Aisak imhmahan a Sikup, v'eti Isau irn istu

1Dav'a, naran Aisak itrtarep', m'aten istu, ialedu sei ml. Laha, iv'ara an a Isau, iv'i a natn titiamu, kavr ani, kavr ti a, “Natk.” Hin ivrprani, kavr ti a, “Kana hilaha.”

2Laha, ivr ti a, “Palei, kana ntrtarep' dau, narndu naran p'am'a. 3Sena si lera, ip'as a ti palev' pla talei na ti palua sei, naten na nalu m'a tenpaui, kadav'a al lili kalua si dm kinkin p'ehani, 4kukuki ipav'i tim'ah p'as kalalm, ipanep'a nut nlap'as ani inap'ei, kauirma asnk a ti p'ehani, a ti p'emhmah anh arna nlk ipatauamu a ti p'am'a.”

5V'eti a Ripeka iv'rn ani naran Aisak iv'ana m'ei a natn, iv'i a Isau. Laha, a Isau iv'a al lili katala si dm kauirma. 6V'eti a Ripeka ivr an a Sikup, iv'i a natn, kavr ti a, “Parn, ntrn sarei a tetiam iv'ana m'ei a Isau, iv'i titiamu nam, kavr ti a, 7‘Pauirma si dm paluei kukuki ipav'i tim'ah p'as kalalm, a ti p'ehani kamhmah anh arna nahn a Mlin Eia ipatauamu a ti p'am'a.’ 8Sena si lera, pav'rn a v'nenak, natk, kan sei p'evr anh. 9Hilaha pav'a asnr nani udlani kalev' net nani p'as iparu kauirma asnk. Laha, p'etahpei ipav'i tim'ah p'as kalalm sanan a tetiam, ipanep'a nut ilap'as ani inap'ei. 10Sarei, nakm pauirv'a asn a tetiam a ti ipahani kamhmah anh ipatauamu a ti ipam'a.”

11V'eti a Sikup ivr an a unian, iv'i a Ripeka, kavr ti a, “Parn, tv'alk, a Isau, niln istudau, v'eti kana p'akk iama. 12Nsarei a tetiak ipaier p'akk kav'ah ti nv'i dui na hap'ilien, laha p'ani ti ipamlen kana kavr ti p'elak a nv' nl reran Atua, ikamhmah a kana.”

13V'eti a unian ivr ani, kavr ti a, “Natk, nl reran Atua, la irn ti ipaiarh ha, ipaier kana uaki. Nakm pav'rn a v'nenak uaki kadav'a kalav'r kauirma asnk.” 14Sarei, iv'a kalav'r kauirma asn a unian. Laha, a unian iukuki iv'i tim'ah p'as kalalm, inep'a nut a tetian ilap'as ani inap'ei. 15Sarei, a Ripeka ilev' klus p'asan a natn titiamu, iv'i a Isau, la iter asnn al nmah ha, katau an a Sikup, iv'i a natn titiatah, a ti ipauei. 16Sarei, katu nila p'ak net nani arna lm'an m'a natavnan, la niln ihei aranan ha. 17Kalev' p'ret m'a tim'ah la ilalm ha, nki iten sarei, kataui al lm'an a natn, iv'i a Sikup.

18Laha, iv'a asn a tetian kavr ti a, “Tetiak.” Hin ivr ti a, “Kana hilaha. ?Nakm kv'i ak, natk?”

19Laha, a Sikup ivr an a tetian kavr ti a, “Kana nv'i a Isau kav'i a natm titiamu. Nten sera sei kvr a kana. Pathal kalak kahan lasuv na si dm laha, a ti pamhmah a kana.”

20V'eti Aisak ivr an a natn kavr ti a, “?Natk, inap'i hin kpaslei ilahml sarei?” Laha, ivr ti a, “Sena ti a Mlin Eia, iv'i Atuam, iuirma asnk.”

21Sarei, Aisak ivr an a Sikup kavr ti a, “Pamima asnk, natk, a ti p'eier p'akm, karndu ti kv'i a natk a Isau, v'aha ihei.” 22Sarei, a Sikup imima asn Aisak, iv'i a tetian. Laha, Aisak ier p'akn kavr ti a, “Nadl iv'i drln a Sikup, v'eti lm'an iv'i lm'an a Isau.” 23V'eti iarndaui, sena ti niln istudau iak arna lm'an, kanep'a sera lm'a tv'aln, iv'i a Isau. Laha, imhmah ani.

24Kavr ti a, “?Kvrdaui kavr ti kv'i a natk a Isau?” Laha, ivr ti a, “Aau, kana hilaha.”

25Laha, ivr ti a, “Pauirma asnk, a ti p'ehan sei a natk iluei kamhmah anh arna nlk.” Sarei, iuirma asnn ihani, kauirma naui m'iel im'ni. 26Sarei, a tetian, iv'i Aisak, ivr ani, kavr ti a, “Pamima asnk hilaha, natk, kasm pla nhak.”

27 # Isrel 11:20. Laha, imima asnn kasm pla nahn. Laha, Aisak irn m'i klusan, kamhmah ani, kavr ti a, “Nvrdaui, m'in a natk inep'a m'i pitvet la a Mlin Eia imhmah ani ha. 28Sena si lera nrn ti Atua ipatu niu anh ipadan eia, kani ti si p'sp'as ipasi arna nadep', katu uit m'a naui m'iel ipastudau. 29#Ap'u 12:3.Nrn ti nelnal apavan pariam, v'anu lilil apavsisihpu asnm. Nakm pav'i mlinar tv'alm, a natn a uniam apavsisihpu asnm. M'ertu iv'ana stu m'ah ipalak a nv' nl reran a Mlin Eia. M'ertu imhmah anh, a Mlin Eia ipamhmah ani.”

30Dav'a, iv'amk m'a ti Aisak itmhmah sarei an a Sikup m'a ti a Sikup iruh asn a tetian, iv'i Aisak, hin a Isau itraharah sarei katm'alet. 31Hin itukuk sera tim'ah ilalm kauirma asn a tetian, kavr an a tetian kavr ti a, “Tatei, pathal kahan si dm a natm iuirma, a ti pamhmah a kana arna nlm.”

32Aisak, iv'i a tetian, ivr ani, kavr ti a, “?Kv'i a hin ak?” Laha, ivr ti a, “Nv'i a natm titiamu, a Isau.”

33Laha, Aisak ivrdedrn istudau kavr ti a, “?V'eti dui iraharah kauirma si dm asnk iv'i a hin ak? Kana nthan sarei udlani naran kdahma, kamhmah ani. Aau, a Mlin Eia ikmhmah ani pr.” 34Laha, naran a Isau irn v'nenan a tetian, iv'ara eia sp'n katakal istudau, kavr an a tetian, kavr ti a, “Tatei, pamhmah a kana ml.”

35V'eti ivr ti a, “Tv'alm ihap'il kadama katua sera si p'sp'asam udlani.”

36 # Ap'u 25:29-34. Laha, ivr ti a, “Atu nahan ani iviviln, kavr ti iv'i a Sikup (m'ertu iv'nah m'lna m'ertu uraur), sena ti iv'nah m'lnak iv'aru hara. Itlev'la sera nut huak na titiamu, sarei, palei, ilev'lar si p'sp'as nakm krn ti pamhmah a kana aranan.” Laha, ivr ti a, “?Mkamhmah a kana ml katu si p'sp'as kinkin ipav'i nkak?”

37V'eti Aisak ivrprani kavr an a Isau kavr ti a, “Parn, nani ti iv'i mlinam kataui ti tv'aln udlani apavv'i dui na m'akarienan, katu uit m'a naui m'iel ani. ?P'en v'ata ml anh hilaha, natk?”

38 # Isrel 12:17. Laha, a Isau ivr an a tetian kavr ti a, “?Parndu ti pamhmah a m'ertu ipav'amk uaki, tatei? Pamhmah a kana ml, tatei.” Sarei, a Isau iv'ara eia katakal.

39 # Isrel 11:20. Laha, a tetian ivrprani, kavr ti a, “Parn, nakm palak arna nut ipalini a si p'sp'as na nadep', niu ipadan eia kamhmah anh. 40#Ap'u 36:8; 2 Armlin 8:20.Nakm pasilv' arna nut hua na tali lilam, kav'i dui na m'akarienan a titiatah nam. Dav'a ti naran pathal kamlani, nakm pakapr triuauahan imahei ml arna natavnam.”

A Sikup iruh asn a Isau

41Sena si lera, a Isau ilep'lei a Sikup sena v'nenan a tetian, naran imhmah ani. Laha, a Isau ivri arna nln kavr ti a, “Nsarei ikap'arei a ti apatakal sena m'ienen a tatei. Arna naran nen lera p'erpep'n a Sikup, iv'i tv'alk.”

42Dav'a, avrp'ep'a v'nenan a Isau lera, iv'i a natn titiamu, an a Ripeka. Laha, itep'a v'nen kav'ara an a Sikup, iv'i a natn titiatah, kavr ani, kavr ti a, “Palei, tv'alm, iv'i a Isau, iv'ahur ti ipatum'alet a der anh karpep'nh. 43Sena si lera, natk, pasapa v'nenak. Pap'tir karuh kadav'a asn a Lapan, iv'i a m'ank, kalak arna nut a Haran. 44Kalak m'ei napn kinkin, dav'a ti nl reran a tv'alm ipahiris. 45Palak dav'a ti tv'alm nln ikahrer ml anh, kavnapn a sei kani m'ei. Arna naran nen lera p'etep'a v'nen asnm kalev'lah atlera ml. Imahei ti kam'i parru parmln asnk arna napn ipamk.”

46Laha, a Ripeka ivr an Aisak kavr ti a, “Nlep'la silv'ienak sanar artav'et a Het. ?Ipavr ti a Sikup ipaua tav'et a Het ki ipamk ipanep'a tav'et na v'anu laha, silv'ienak ipanap'i?”

Currently Selected:

Ap'u 27: nmb

Highlight

Copy