Ap'u 26

Aisak iv'a a nut a Kerar

1Dav'a m'em'erien iamk iak arna v'anu lera, iv'i teruraur ml arna nki iak itauamu arna naranan a Epraham. Laha, Aisak iv'a asn Apimelek, iv'i mlinar ardu a Vilistia, arna nut a Kerar.

2Sarei, a Mlin Eia iv'iv'en Hin ani, kavr ti a, “Mahv'a eia arna nut a Itsip. Palak arna nadep' p'evr anh. 3#Ap'u 22:16-18.Palak dei arna nadep' laha, Kana p'elak asnm kamhmah anh. Sena ti Kana p'etu v'anu udlani laha anh m'er a natm udlani, kan sei ntturan sarei an a Epraham iv'i a tetiam. 4Laha, p'ani ti a natm ipastudau ipanep'a msi eia, katu v'anu udlani laha an a natm. Laha, p'emhmah a pt v'anu udlani arna nadep' aranan a natm. 5Sena ti a Epraham iv'rn a drlk, kauada v'nen ntau ani, m'a sei ntaui, m'a v'nen huak.”

6Laha, Aisak ilak arna nut a Kerar. 7#Ap'u 12:13; 20:2.Dav'a, naran ardu na v'anu nen avvrur tav'etan kavmiman ani, ivr ti a, “Iv'i a v'nk,” sena ti idedrn a ti ipavr ti a, “Iv'i tav'etak,” sena ti iv'ah ti “Imahei ti ardu na v'anu laha apavrp kana sanan a Ripeka, sena ti hin nahn ip'eset.” 8Dav'a, naran itlak sarei arna nut lera ip'arei, Apimelek, iv'i mlinar ardu a Vilistia, iriri al uiduan kap'ep'a sei. Laha, parn, ila ti Aisak iduduvah m'ei a Ripeka, iv'i tav'etan. 9Sarei, Apimelek iv'ara an Aisak kavr ti a, “Palei, tav'et lera iv'i tav'etam dudau. ?Inap'i hin kvr ti a, ‘Iv'i a v'nk’?” Aisak ivr ani, kavr ti a, “Sena ti nvr ti imahei p'am'a sanan.”

10Laha, Apimelek ivr ti a, “?V'ata la hin kani m'a kam'em' ha? Arduam'em' kinkin irndu ti ipam'atr m'a tav'etam kav'ah ti iv'i si kaka uaki. Ipavr ti ipanap'i lera imuirma si stu aranam'em'.” 11Laha, Apimelek itu v'nen anr m'ertuan udlani, kavr ti a, “Dui la ipaier p'ak dui lera v'aha tav'etan ha, aparpep'ni.”

12Sarei, Aisak ilu sei arna nadep' lera. Arna pai lera si udlani isi iv'ev'anal. Laha, a Mlin Eia imhmah ani. 13Hin ima kav'i dui lil, kadama kalil mau, dav'a ti ima kav'i dui lil iamk. 14Sena ti sivsivan istudau, plukan istudau, m'ertu na m'akarienan istudau, dav'a ti ardu a Vilistia nlr avpri sanan. 15Laha, tah na nauei udlani, la dui na m'akarienan a tetian avhli ha, naran a Epraham idsilv' uam, ardu a Vilistia avtinkari a nadep'. 16Laha, Apimelek ivr an Aisak kavr ti a, “Paruh asnm'em', sena ti khua kasiv' kam'em' istudau.”

17Sarei, Aisak iruh atlera, kahl nmah kanuisan al m'ihual arna nut a Kerar, kalak atlera. 18Sarei, Aisak ihlur tah na nauei, la atvhl sarei arna naranan a tetian, iv'i a Epraham ha, sena ti ardu a Vilistia atvtinkar sarar itauatah a m'ienen a Epraham. Laha, itu nahar iv'i nki a tetian itaui itauamu.

19Sarei, arm'ertu na m'akarienan Aisak avhl tah iamk al m'ihual kavpasla nauei irarev' dav'a. 20V'eti ardu a Kerar la avp'aur pluk ha, avv'lv'al m'er ardu na plukan Aisak, kavvr ti a, “Nauei lera iv'i nkam'em'.” Laha, itu naha tah na nauei lera iv'i Esek (v'lv'elien), sena ti avv'lv'al m'ei. 21Sarei, avhl tah uraur kavv'lv'al sanan ml. Laha, itu nahan iv'i Sitna (Avmlani). 22Sarei, iruh atlera kahl tah uraur, v'eti ahavv'lv'al sanan. Laha, itu nahan iv'i Rehuput (M'lnen istudau iak), kavvr ti a, “Sena ti hilaha a Mlin Eia itu kam'em' m'lnam'em' a ti p'vnelnal arna nadep'.”

23Sarei, iruh atlera kadav'a auei a Persipa. 24Laha, a Mlin Eia iv'iv'en Hin ani arna lihat nen kavr ti a, “Kana nv'i Atuan a tetiam, iv'i a Epraham. Madedrn sena ti Kana nlak asnm. P'emhmah anh kani ti a natm ipanelnal sanan a Epraham, iv'i dui na m'akarienak.” 25Laha, ihl nev'etet atlera kav'ara a nahan a Mlin Eia kahl nmah kanuisan atlera. Laha, arm'ertu na m'akarienan Aisak avhl tah na nauei iamk atlera.

26 # Ap'u 21:22. Sarei, Apimelek iendan a Kerar kadama asnn, hin m'er Ahusat, iv'i tv'aln iamk, m'ei a Vikul, iv'i mlin lil na m'rnuran. 27Laha, Aisak ivr anr kavr ti a, “?Inap'i hin kvrama asnk sena ti kvlep'la kana kavtep'a kana nruh asnm'i?”

28V'eti avvr ti a, “Kam'em' nvla mamh ti a Mlin Eia ilak asnm, kavvr ti a, ‘P'vah lm'ad kavan turanien ipap'tir arna p't nut nad, a p't nut nam'em' m'a nakm, p'van turanien m'ah. 29A ti nakm mkautakm a kam'em', inep'a nut kam'em' navutakm anh inap'ei, kavan si p'as anh uaki iel, kavtap'ah uaki arna tamat. Hilaha kv'i dui a Mlin Eia imhmah anh istudau.’ ”

30Laha, ien tim'ah sanar kavhatat kavm'nm'n. 31Sarei, avthal m'etav'aran nrnren, kavah lm'ar kavan turanien ip'tir arna p't nut nar. Sarei, Aisak itap'er avruh asnn arna tamat.

32Dav'a, arna napn lera uaki, dui na m'akarienan Aisak avrama kavvrur tah na nauei la atvhl sarei ha, kavvr ani kavvr ti a, “Kam'em' nvpasla nauei.” 33Laha, itu nahan iv'i Sipa (Turanien). Sena si lera naha v'anu lil nen iv'i a Persipa ier dika.

34A Isau paian inelv'a (40) naran iua tav'etan, iv'i a Sutit, kav'i a natn a Piri, iv'i dui a Het, kauei a Pasemat iv'i a vnpan Elun, iv'i dui a Het. 35Laha, arru lera arani ti Aisak m'ei a Ripeka arrn istu arna v'ahienar.

Currently Selected:

Ap'u 26: nmb

Highlight

Copy