Parei 3

A P'ita imhmah a dui iamk tln im'a, arna nahan a Iesu Kristu

1Arna napn iamk, a P'ita m'ei a Sun arv'a eia al nmah tamat arna naran na tamat, iv'i m'etaneiel itl knarev'. 2Laha, apap dui iamk, tln im'a naran idaiak dav'a ier naran lera, kataui asn pn liu iamk na nmah tamat, naha pn liu lera iv'i Pn Liu P'as. Ataui atlera arna napn udlani a ti ipamiman sei anr nelnal avrav'a al nmah tamat. 3Hin, naran ilar a P'ita m'ei a Sun a ti aparv'a eim al nmah tamat, imiman anr a ti apartu sei ani. 4V'eti a P'ita m'ei a Sun arp'ei ihua, laha a P'ita ivr ti a, “Pap'a kam'em'.” 5Sarei, ip'ar, kav'ah ti ipalev' si kinkin asnr. 6V'eti a P'ita ivr ti a, “Kana silva v'aha kul ihei asnk, v'eti sei niak ani p'etau anh. Arna nahan a Iesu Kristu a Nasaret, pap'tir kav'el.” 7Laha, iuada m'ldu lm'an kani ti ip'tir. Ilahml sarei, tln m'a su plah tln ima kahua. 8Laha, isihavs kap'tir, kav'el kadav'a al nmah tamat m'er, kav'el kasihavs kapatei Atua. 9Laha, nelnal avla ti iv'el kapatei Atua. 10Kavla ti iv'i m'ertu ilak asn Pn Liu P'as na nmah tamat, kamiman sei anr m'ertu iel. Laha, avrdus nlr kavtah ani istudau sena sei itu hin asnn.

A P'ita ivrp'ep'a v'nenan Atua arna Vradan a Sulumun

11Laha, naran dui tln im'a la atrmhmah sarei ani ha, iuadar a P'ita m'ei a Sun, nelnal udlani avvrvr kavp'lt asnr arna nut iamk al nmah tamat avr ti iv'i Vradan a Sulumun kavtah ani istudau.

12Naran a P'ita ila si lera, ivr anr nelnal kavr ti a, “?Kam'i udlani kvv'i m'ertu a Isrel, inap'i hin kvrdus nlm'i a si lera, kavp'a kam'em' ihua, inep'a ti nrani aulera iv'el arna nut huam'em' v'aha p'kl p'asam'em' uaki? 13#Avruh 3:15.Atuar a tetiad, iv'i Atuar a Epraham m'ei Aisak m'ei a Sikup, Hin iani ti naha M'ertu na M'akarienan, iv'i a Iesu, iv'a eia. V'eti kam'i kvtaui al lm'ar m'ertu avlep'lei, kavp'ep'ni arna nahn a Pailat naran irn ti ipulni. 14#Mat 27:15-23; Mak 15:6-14; Luk 23:13-23; Sun 19:12-15.V'eti kam'i kvp'ep'n M'ertu ip'as kaviviln udlani, kavmiman ti ipuln dui irpep'n m'ertu asnm'i. 15Kam'i kvrp Pla Silv'ien, la Atua iani ti ithal ml arna m'ien ha. Kam'em' nrlei karvrp'ep'ei a kam'i. 16Aulera, la kam'i kvlei kavrndaui ha, hin ima kahua arna nahan a Iesu lera, sena ti kam'em' nrv'ah nahan. Aau, aulera ima kap'as ml udlani arna nahm'i, sena ti nrv'ah nahan lera.

17V'eti hilaha, tv'alk, nrndu ti kvan si lera sena ti kaavrndu si ipamk, inep'a nut mlinam'i avani inap'ei. 18V'eti sei Atua itv'iv'en sarei tituei arna pnr dui na v'nenan udlani, iani ima katu hin inep'a nut avvri inap'ei, kavvr ti a Kristu der ipaiari pr.

19Sena si lera, kam'i pavvav nlm'i kavm'alet ml asn Atua, a ti ipavala si stuam'i, dav'a ti pavrn ipap'as arna nahn a Mlin Eia. 20Laha, hin ipatap'ei a Iesu Kristu, la atvrp'ep'a sarei tituei asnm'i ha. 21Hin ipalak eia pr dav'a ipaier naran si udlani ipama kam'dah ml, inep'a nut Atua itvrp'ep'a sarei arna pnr ardu p'as na v'nenan inap'ei, tituei ier dika. 22#TVH 18:15,18.Sena ti a Musis ivr an a tetiad kavr ti a, ‘A Mlin Eia, iv'i Atuam'i, ipani ti tv'elm'i kinkin ipamk ipap'tir asnm'i kav'i Dui na v'nenan kanep'a kana. Kam'i pavv'rn ani arna si udlani ipavr a kam'i. 23#TVH 18:19.V'eti m'ertu udlani iav'rn a Dui na v'nenan lera, Atua ipalev'lei asnr nelnal kutakm ani.’ 24Aau, pruvet udlani la avvrp'ep'a v'nenan ha, itudina hin aranan a Samuil m'er nki avtauatah ani ml, hir udlani atvvrp'ep'a sera naran laha. 25#Ap'u 22:18.Kam'i kvv'i a natr pruvet, kavv'i a natr a tetiad, la Atua ittu sera turanienan anr ha, kavr an a Epraham kavr ti a, ‘Arna nl nam'elam Kana p'emhmah a m'ertu na v'anu udlani arna nadep'.’ 26Atua iani ti a Natn, iv'i a Iesu, ithal ml, katap'ei asnm'i itauamu a ti ipamhmah a kam'i, kani ti kam'i udlani pavvav nlm'i kavln si stuam'i.”

Currently Selected:

Parei 3: nmb

Highlight

Copy