Parei 4

Avuadei a P'ita m'ei a Sun

1Laha, naran adrv'ana uam m'er nelnal, arpris m'a mlinar ptm'iel na nmah tamat m'er Satiusi kinkin avrama asnr. 2Nlr irer sena ti arv'ana m'er nelnal karvr ti m'ertu irndu ti ipathal ml arna m'ienen sanan a Iesu. 3Laha, avuadar kavtaur al p'resin ier m'ih nen, sena ti itv'i sera knarev'. 4V'eti m'ertu istudau asnr nelnal avrn v'nenar kavv'ahi, dui nen udlani avihih tausen ilm' (5,000).

A P'ita m'ei a Sun arp'tir karv'ana arna nah Kaunsel

5M'ih nen m'etav'aran, mlinar m'ertu a Isrel, m'er eltar, m'er dui na v'nen hua, 6m'ei Anas, iv'i mlinar pris, a Kaiavas, a Sun, Aleksada, m'er m'ertu udlani avv'i nl nam'elan a mlinar pris, hir udlani avp'lt a Serusalem. 7Kavtaur arp'tir arna p't nut nar, kavmiman anr kavvr ti a, “?Kran si lera arna nut hua v'ata, v'aha arna nahan ak?”

8Laha, a P'ita ilini a M'im'iln P'as, kavr anr kavr ti a, “Kam'i udlani kvv'i mlinar m'er eltar ardu a Isrel. 9Kam'i kvmiman a kam'em' sena pari p'as nrani asn dui si iani, m'a nut ima kap'as ml inap'ei. 10Nrrn ti p'ervrp'ep'ei a kam'i udlani m'er m'ertu udlani a Isrel a ti dui la ip'tir arna nahm'i ha, ima kap'as ml udlani arna nahan a Iesu Kristu, iv'i Dui a Nasaret, la kam'i kvtaui arna su lamu ha, v'eti Atua iani ti ithal ml arna m'ien. 11#Npin 118:22.Hin iv'i nakal la kam'i, kvv'i dui kvhl nmah, kvsrani ha, v'eti ima kav'i nakalamu na nmah. 12M'ertu uraur ihei irndu ti ipalev'la m'ertu, sena ti Atua iatu naha m'ertu kinkin uraur arna nadep' a ti ipalev'la nakd.”

Kaunsel ivrkar a P'ita m'ei a Sun a ti amarvrp'ep'a nahan a Iesu ml

13Laha, naran avla ti a P'ita m'ei a Sun ahardedrn a si ki ipamk, kavla ti aharskul ilil, aharrndu sei, avtah ani, kavrndu ti hir atrlak sarei m'ei a Iesu. 14V'eti ahavrndu ti apavvr si kinkin ml kavmlanr, sena ti avla dui lera ima kap'as ml ip'tir m'er. 15V'eti avvr anr a ti apavruh arna nahr dui arna Kaunsel, laha, hir uaki avvrvr a hir kavvr ti a, 16“?P'van v'ata anr ardu lera? Sena ti nelnal avlak a Serusalem avrndu ti aran pari lil iamk, nakd nkavp'ep'ni. 17Navrn ti v'nenar ipaier m'ertu ipastudau. Ip'as a ti p'vvrkarr ipahua, a ti amarv'ana ml m'a m'ertu kinkin arna naha dui lera.”

18Laha, avv'ara anr ml, kavvrkarr a ti amarv'ana karv'iv'en si kinkin arna nahan a Iesu ml. 19V'eti a P'ita m'ei a Sun arvrpranr karvr ti a, “Kam'i pavv'ahuri. ?Iviviln arna nahan Atua a ti p'ersapa v'nenam'i ipasiv' v'nenan Atua, v'aha ihei? 20V'eti kam'em' nkarp'n kam'em' arna sei ntrla sarei katrrni.” 21Laha, avv'ana hua ml m'er, sarei kavm'ahu anr a ti aparruh, sena ti ahavpasla navanel kinkin na ti apavutakm anr. Hir avdedrn a nelnal, sena ti m'ertu udlani avpatei Atua sena sei itu hin. 22Sena ti dui aran pari lil aranan karmhmah ani paian itnelv'a (40) sarei.

Avtu tamat sena ti apavvrp'ep'a v'nen, akavmamih

23Sarei, naran avulnr, hir arm'alet ml asnr duanar, karvrp'ep'a si udlani armlinar pris, m'er arelta, avvr anr. 24#Avruh 20:11; Niamaia 9:6; Npin 146:6.Naran hir avrn v'nen lera, avp'lt arna v'ahien iamk kavtu tamat asn Atua, kavvr ti a, “U Mlin Eia, Nakm uaki kv'i Atua, kan nut eia, nadep', nata, m'a si udlani iter a nlr. 25#Npin 2:1,2.Nakm ktvr sarei arna pnn a Divt, iv'i m'ertu na m'akarienam, kavr ti a, ‘?Inap'i hin arv'anudl nlr irer, v'aha m'ertu avv'ahur sei apavani iv'i si kaka uaki? 26Mlin lil arna nadep' avp'tir, kavman avp'lt kavmlen a Mlin Eia m'ei a Kristuan.’

27 # Luk 23:7-11; Mat 27:1,2; Mak 15:1; Luk 23:1; Sun 18:28,29. Nvvrdaui, a Erut, a Punsias Pailat, m'er v'anudl, m'er m'ertu a Isrel, hir udlani avp'lt kavmlen a Natm P'as, iv'i a Iesu, la Nakm ktaui iv'i a Kristu ha, 28a ti hir apavan si udlani Nakm kttu sarei tituei arna nut huam m'a v'ahienam. 29Hilaha, Mlin Eia, parn v'nen stuar avvr a kam'em', kam'ahu a kam'em' nvv'i m'ertu na m'akarienam a ti nkavmamih a ti p'vvrp'ep'a v'nenam ipahua. 30Kalmlm lm'am kamhmah a m'ertu avm'at, a ti p'van pari lilil ipav'iv'en sei kavan pari lilil m'ertu apavtah ani, arna nahan a Natm P'as iv'i a Iesu.”

31Sarei, naran avhiris a tamatar, nut avlakp'lt idudul, Laha, hir udlani avlini a M'im'iln P'as kavvrp'ep'a v'nenan Atua ihua, ahavmamih.

M'ertu avv'ah a Iesu avvsvsan siar udlani a hir

32 # Parei 2:44,45. Nelnal udlani avv'ah a Iesu avamk arna nlr m'a v'ahienar. Hir kinkin iahamk ivr ti sian kinkin iv'i nkan, v'eti avvsvsan siar udlani a hir. 33Laha, arapusel nut huar ilil istudau, kavvrp'ep'a ti a Mlin Lilad a Iesu ithal ml. Laha, vtmienan Atua istudau iter aranar udlani. 34Hir kinkin iahamk asnr ivr ti ihei a sei, sena ti m'ertu nadep'an v'aha nmahan iak, hin iulul ani, 35Katu nav'et nen al lm'ar apusel. Laha, hir avvsvsen anr m'ertu udlani p'sev' sian ialil.

36Dui iamk iak, nahan iv'i a Suses. Apusel avtu nahan uraur ani, iv'i a Panapas. Nahan lera avavi iv'i dui na ti ipani m'ertu iparn ipap'as. Hin ilak arna nl nam'elan a Livai kaiak arna nut a Saipras. 37Hin nadep'an iak, iulul ani katu nav'et nen al lm'ar apusel.

Currently Selected:

Parei 4: nmb

Highlight

Copy