Parei 11

A P'ita iv'iv'en arna nah sas pari p'as M'im'iln P'as iani asnr v'anudl

1Laha, apusel udlani m'er tv'alr avlak a Sutia avrn v'nen a ti v'anudl kinkin atvlev' sera v'nenan Atua. 2Naran a P'ita iv'a eia a Serusalem, hir udlani la avvr ti akan p'au anr v'anudl udlani avv'ah a Iesu pr, avv'ana hua m'ei kavvr ti a, 3“?Inap'i hin kv'a kalak m'a hir kinkin adaan p'au nar kahatat m'er?”

4Laha, a P'ita ivrp'ep'adina si udlani anr, inep'a nut itu hin inap'ei, kavr ti a, 5“Kana, naran nlak a Supa katu tamat, nklus m'atak kala si iamk inep'a sera kalik lil kinkin ahudei arna kkan iv'a kulnrhrahei dan eia, ima a nadep' asnk. 6Kana np'a mamh nut a nln, kala si slm arna nadep' tlr iv'a, m'a si dm, m'a sei iharev' arna nadep', m'a m'anh itetv arna p'knaran. 7Karn nadl iamk ivr a kana kavr ti a, ‘P'ita, pap'tir karp si kinkin ipamk kahani.’ 8V'eti kana nvr ti a, ‘U Mlin, ikahei. Sena ti ndamuhan la si kinkin iaviviln a ti apahani kastu arna nahm.’ 9V'eti nadl lahara idan eia kavr a kana ml, iv'i v'aru nen, kavr ti a, ‘Sei Atua itaui kavr ti ip'as, nakm mavr ti istu.’ 10Si lera itu hin iv'atl, sarei, alev' si udlani im'alet ml eia. 11Laha, pavrni, arna naran lera, dui artl atvrama sarei asn nmah la nlak a nln ha. Atap'er dan a Sisaria a ti apavrama asnk.

12Laha, M'im'iln P'as ivr a kana kavr ti m'adedrn a ti p'esapar. Tv'ald avlm'sei lera avsapa kana dav'a nvrav'a eiman dui nen. 13Hin ivr a kam'em' kavr ti itla sera ensel iamk ip'tir al nmahan, ivr ani, kavr ti a, ‘Patep'a dui kinkin apavrav'a a Supa kavv'ara a dui kinkin iamk nahan iv'i a Saimun kav'i a P'ita. 14Hin ipavr v'nen kinkin anh arna ti Atua ipalev'lah m'a hir udlani avlak al nmaham.’ 15Naran nv'anadinei uaki, M'im'iln P'as ima aranar, inep'a nut ima aranam'em' itauamu inap'ei. 16#Parei 1:5.Laha, nv'ahur v'nenan a Mlin Lilad naran ivr ti a, ‘Hin a Sun iten sera paptais a nauei, v'eti kam'i pavpaptais a M'im'iln P'as.’ 17Atua ituvn a sei anr inap'amk a sei itu nakd la nvv'ah a Mlin Lilad a Iesu Kristu ha. ?Sena si lera, kana nv'i dui inap'i a ti p'etukar Atua?”

18Naran avrn si lera, ahavvr sei ml kavpatei Atua kavvr ti a, “Hilaha Atua iani ti v'anudl atvvav sera nlr a ti apavsilv'.”

Sas ip'tir arna nut Antiuk

19 # Parei 8:1-4. Naran arpep'n a Stivn katp'ev' m'ertu, nelnal avamkma kavunanut. Naran avunanut laha, hir kinkin avrav'a kavier a Vunisia, a Saipras m'ei Antiuk, kavvrp'ep'a v'nen p'as anr arm'ertu a Isrel uaki. 20Hir kinkin avv'i m'ertu a Saipras m'a m'ertu a Sairini avrav'a Antiuk kavv'ana m'er m'ertu avv'ana arna v'nen a Kris, kavvrp'ep'ei a Mlin a Iesu. 21Nut huan a Mlin Lilad ilak asnr kani ti nelnal avstudau avvav v'ahienar kavv'ah a Mlin Lilad.

22Laha, v'nen ivrur si lera ima kaier sas iter a Serusalem, sarei avtap'ei a Panapas a ti ipav'el dav'a kaier Antiuk. 23Naran hin ima asnr, ila ti Atua imhmah anr istudau, karn ip'as ani ilil. Kav'ana m'er kavr ti apavtauatah an a Mlin Lilad arna nlr udlani, kavmima asnn ipel. 24Sena ti iv'i dui p'as iamk kalini a M'im'iln P'as m'a v'ahien p'as. Laha, m'ertu inelnal avrama kavp'lt m'ei a Mlin Lilad.

25Laha, iln nut lera kadav'a a Tasis katala an a Sul. 26Naran ipaslei, iv'av'ei karv'a m'ei Antiuk. Sarei, karuaulul pai iamk karlakp'lt m'a sas karv'iv'en sei anr nelnal avstudau. Arna nut Antiuk itauamu atu naha m'ertu avv'ah a Iesu kavr ti avv'i Kristin.

Arm'ertu arna sas avsr lm'ar m'ertu arna sas arna nut a Sutia

27Arna naran lera, pruvet kinkin avaan a Serusalem kavrav'a Antiuk. 28#Parei 21:10.Hir kinkin iamk ip'tir, nahan iv'i Akapas, kavrp'ep'ei arna nut huan a M'im'iln P'as kavr ti itv'i ti m'em'erien lil ipama arna nut udlani arna nadep'. Si lera ima katu hin naran a Klutias iv'i mlin lil. 29Laha, m'ertuan a Iesu udlani p'sev' avrn ti apavtep'a nav'et kinkin ipanep'a nut avrndu ti apavani ipanap'i, a ti apavmhmah a tv'alr avlak a Sutia. 30Kavsran nav'et nen kavtau al lm'ar a Panapas m'ei a Sul, aruirv'a asnr elta.

Currently Selected:

Parei 11: nmb

Highlight

Copy